- Ashpen Newsletter
- Posts
- بص العصفورة
بص العصفورة
وماذا عن الشجرة طيب؟
اعزائي القراء ✍️
بعتذر مقدمًا ان نيوزليتر انهاردة مش هتكون بالفورمات الأسبوعي
اللي انتم متعودين عليه
وده لأني انهارده حابب اتكلم عن موضوع واحد بس
والموضوع ده بخصوص ما يحدث حاليًا
واعذروني مقدمًا لو حسيتوا اثناء القراءة ان فيه كلمات منتقاة بعناية اثناء الكتابة
ولكن ده لتجنب الإيميل ده يروح في السبام، ومحدش فيكم يقدر ياخد باله منه
كل قصة تحمل اكتر📓
من جانب
ودي حاجة احنا كلنا عارفينها
نظرًا لإن ديناميكية القصص بتسمح بذلك في المطلق
ولكن في وضع زي اللي احنا فيه دلوقتي يا ترى
:اللي بيكسب سلطة انه يتحكم في سرد القصة
هو اللي بيقرر انهي جانب من القصة لازم الكل يتفرج عليه أو يسمعه اكتر
وواحدة من الجهات اللي بتاخد حق مكتسب في التحكم في سرد القصة
هي الميديا بجميع اشكالها
ولكن☝️
الميديا ما بتعملش ده بشكل عشوائي
وما بتعملش ده عشان هما بس متبنين اجندة واضحة
تبني اجندة حتى لو واضحة مش كفاية في التحكم في سرد القصة
لازم الاجندة دي تتحول الى استراتيجية
والاستراتيجي دي هيبقى جواها تاكتيكس
والتاكتيكس دي لازم تتطبق بشكل ممنهج
على جميع الأصعدة وفي نفس التوقيت
وده اللي انا عايز❗
اكلمك عنه
وانا عارف ان انا وانت وانتي واخدين فكرة عن اللي بيحصل
وعارف اننا كمان بنحكي جانب من القصة مختلف تمامًا عن اللي بيتقدم
وعارف اننا في محيط قد يهيأ لنا من كتر توحيده
ان العالم كله بقى على قدم وساق واحدة
ولكن الحقيقة ان الموضوع اكبر مما نظن، وأعقد مما نتخيل
وحله بيكمن في أننا نفهم الجانب الأخر ده
حاول يتحكم ازاي من خلال الميديا
في سرد القصة على مدار الفترة اللي فاتت
وازاي محاولاته دي خلقت افكار وردود ومحتوى على الانترنت
بينشر الجانب المزيف من القصة على لسان ناس
يدعوا انهم اصحاب القضية الحقيقية
:والهدف كالأتي ✅
هو أننا نستخدم نفس الاستراتيجيات ونفس التاكتيكس اللي بيعملوها
بس بالعكس و الإنعكاس على الجانب الأخر من قصتنا
هو أننا نستخدم ده في المحتوى اللي بننشره
وفي التعليقات اللي بنرد بيها على الطرف الآخر المضاد
دي الطريقة اللي نقدر نعيد من خلالها تشكيل الوعي
او اننا نوصل النقاش لحيطة سد الطرف الأخر ما يبقاش عنده مجال
غير انه يخبط دماغه فيها
ولو جينا بصينا على كل الحالات اللي من طرفنا
وانتشرت بشكل ناري خارج محيطنا ووصلت للعالم
هنلاقيها طبقت نفس الاستراتيجيات ونفس التاكتيكس اللي هما بيستخدموها بالظبط
فـ تعالوا بينا نشوف هما بيعملوا ايه
مائدة اللوغاريتمات❗
على مائدة اللوغاريتمات
من المقبلات للوجبة الرئيسية
هتاكل ما تؤمن به فقط وبشكل حصري
ده الكونسبت اللي اللوغاريتمات بتطبخ من خلاله
خلق دوامات مقفولة تضمن انك جوه دايرة مغلقة
بتشوف فيها كل ما يؤيد وجهة نظرك
وده عشان توصل لمرحلة الشبع
انت خلاص عارف ان الرسالة وصلت
ان الوعي زاد، وان مهتمك تمت بنجاح
وعشان كده احنا محتاجين نعيد تدريب اللوغاريتمات
احنا محتاجين نشوف مائدة الطرف الأخر بياكلوا عليها ايه
بيتكلموا في ايه
ايه نوع الادعاءات والمعلومات المفرغة من الحقيقة اللي بيقولوها
محتاجين ناخد نوتس وملاحظات على الحاجات دي
ثم بعد ذلك نفرض جانب قصتنا على المائدة دي
:فيه مثل بيقول❗
لو مش عاجبك اللي بتسمعه
غير سياق الحديث
بس الأهم انك تغيره عند اللي بيتكلم مكان ما بيتكلم
ما تكتفيش انك تغيره من عندك انت بس
لعبة الانحراف❗
وانا هنا بتكلم عن الانحراف بسياق الحديث
ودي لعبة مشهورة جدًا على طاولات الجدال والمناقشة
وهي اني لما اجي اواجهك بحقيقة غير مريحة
فـ انت تحاول تغير سياق الحديث بإنك تواجهني بحاجة مضادة
تجبرني اني انساق معاك في سياق حديثك
زي كده لما اسألك قولي ازاي توقع شجرة فيها اكتر من ٣٠٠٠ طير مسالم
فـ تقولي وماذا عن الحجر اللي انت حدفته عليا
او اقولك انت ازاي تحاول تاخد الشجرة دي مش بتاعتك
فـ تقولي وماذا عن الارض التانية دي فيها شجرة روح هناك خدها
وهكذا بقى
احيانًا ممكن العواطف والمشاعر تقودنا للانسياق مع الانحراف ده
ولكن مهم اوي ان كل ما يحصل انحراف في سياق الحديث
اننا يا نرجع للسياق الأساسي
يا نرد على الانحراف بـ انحراف تاني
يرجعنا للسياق الأساسي
اللعب في الدماغ❗
كان فيه فيلم اتعمل سنة ١٩٤٤ اسمه جازلايت
كان بيحكي فيه عن راجل بيحاول يلعب في دماغ مراته
ويقنعها انها بتتحول لمجنونة
كونسبت الجازلايتينج ده او اللعب في الدماغ هو كونسبت اصيل
في استراتيجيات الميديا بشكل عام الحقيقة
وفي قصتنا بشكل اخص
🏥يعني من ساعة حادثة الشجرة اياها
:اتطبق ٣ استراتيجيات كلهم في الجازلايتينج
اولهم التقليل من شأن اللي حصل: وده من خلال تعظيم اللي حصل يوم ٧ من شهرنا الحالي اكتر
ثانيهم النكران: وده من خلال تحييد اي مواد بتثبت ان اللي حصل ده مقصود ومثبوت مين سببه
ثالثهم مسك المعلومات: وده من خلال قلب كفة الميزان بعرض معلومات اكبر واكتر عن اللي حصل يوم ٧ وتقليل وتضئيل حجم المعلومات عن اللي حصل الناحية التانية
ويا ترى ده بيتعمل ليه بالشكل ده؟
عشان يخلق حالة من الارتباك عند اللي بيتفرج
ما يبقاش فاهم في ايه، ويوصل لمرحلة انه يشكك في معلوماته
وفي النهاية يعتمد على المصدر اللي عمله جازلايتينج وهو مش واخد باله
في انه مصدر معتمد لكل اللي بيحصل
اللعب في الإطار❗
تفتكر لو حد ما يعرفش حاجة
واتعرض عليه بشكل متكرر صور ولقطات
لجانب ماسك حاجة في ايده وتعابير وشه صارمة او حادة
وبعديها اتعرض عليه بشكل متكرر صور لعربيات اسعاف
واصوات الاسعاف واصوات الشحتفة وما خلافه
تفتكر انهي جانب هيبقى من الصور دي هيبقى صاحبه مهاجم
وانهي هيبقى صاحبه مسالم وفي حاله
ماذا لو الميديا بتشوف كل الحاجات دي زي ورق الكوتشينة
بتفنطها كويس وبترتيب معين بتعرض الماتيريال دي
والتفنيطة والترتيب ده معمول على حسب الأجندة بتاعتهم
تفتكر ايه اللي هيحصل؟
اهو ده اللعب في إطار القصة
وياريته على الصور بس
ده لعب في اطار الكلمات والمصطلحات والتشبيهات كمان
اللعب على التأجيل❗
ايه اللي يخليك تتقبل قرار مؤلم وغير مريح
وانك تشوفه بيتنفذ قدام عينيك
…بسيطة
انه يتقالك انه هيتعمل دلوقتي
بس يفضل يتأجل كل شوية
ف تفكر ان مع كل مرة بيتأجل فيها
ان الأوضاع هتبقى احسن وان خلاص مفيش داعي اوي
لتطبيق القرار المؤلم والغير مريح ده
لحد ما فعلًا القرار ده يتنفذ على غفلة
ساعتها بس مقدار مقاومتك له عمره ما هيكون زي اول مرة
لإنك خلاص اتعودت
وده اللي بيحصل من ساعة ما الموضوع ابتدى
لحد دلوقتي لسه القرار الأكبر ما اتنفذش
وعشان كده اي تشتت ممكن يحصل دلوقتي
في مواضيع فرعية هايفة لا تحمل وزن
او خروج سياق الحديث عن اللي بيحدث حاليًا
هيبقى في صالح الطرف الأخر
وهقول تاني☝️
لو مش عاجبك اللي بتشوفه او بتسمعه
وانت معاك الحجة
غير سياق الحديث كله ووقع المعبد على اللي فيه
بنفس استراتيجيتهم وبنفس لغتهم
ولكن الأهم زي ما بتعمل ده عندك
انك تعمل ده عندهم
مصادر ممكن تحتاجها📓
خلينا نتفق على حاجة
مستحيل تخرج من نقاش خسران وانت صاحب حجة وقضية
وصاحب تاريخ ومعلومات وحقائق
وصاحب استراتيجيات نقاش ومجادلة في محلها
خصوصًا لو النقاش مع واحد صاحب تاريخ ومعلومات وحقائق كلها على بعضها مفبركة
وبعيدًا عن ان انتصارك ده فيه جزء مرضي ليك نفسيًا
الا انه انتصار من المهم تحقيقه لشخص تالت بيتفرج عليكم حاسس انه تايه
ومش عارف يروح لأنهي جانب
ومش لاقي خيط على الأقل يمسكه ويدور وراه هو
لحد ما يوصل للنتيجة الصح
وعشان كده انا هشارك معاك مجموعة من المصادر دي
انا شخصيًا قرأتها و اتعرضت ليها
فـ سواء تعرفها او تعرف اكتر منها او ما تعرفهاش خالص
انت محتاج تجمع كل الحاجات دي في جعبتك لكل ما هو قادم
طنطورة❗
فرحة❗
الوعد❗
هكذا بدأت القصة❗
ولاد العم، اعرفهم اكتر❗
التاريخ المجهول بتاعهم❗
نهاية التاريخ❗
![](https://media.beehiiv.com/cdn-cgi/image/fit=scale-down,format=auto,onerror=redirect,quality=80/uploads/asset/file/4175505d-90e0-4bb2-88e7-c3e4154bf434/Screenshot_2023-10-22_at_5.53.52_PM.png)
نهاية التاريخ
وبكده خلصت نيوزليتر انهاردة❗
بعتذر مرة اخرى لخروج النيوزليتر عن سياقها المعتاد
ولكن ده خروج كان لا بديل عنه بالنسبالي
خصوصًا ان منصات التواصل الإجتماعي الخاصة بيا
نسبة الوصول فيها حاليًا مش احسن حاجة خالص
واحنا كلنا عارفين ليه
وانتظروا بكره ان شاء الله حلقة جديدة من كوبي كاست
هنتناقش فيها عن ما يحدث ولكن من جوانب تسويقية اعمق الحقيقة
اشوفكم يوم الأحد القادم ان شاء الله
…احمد العشري
Reply