انت بقرة ولا اسد؟

وصدقني دي مش شتيمة...

،قرائي الاعزاء

اهلًا وسهلًا بيكم في نسخة جديدة من النيوز ليتر

:اللي من خلالها بشارككم ٣ نصائح في

 الكوبي رايتينج ✏️ 

البراند بيلدينج 🏗️ 

الكريتيڤ انتربرينيرشب 🤓 

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖 

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡 

فـ يلا بينا نبدأ بـ أول ٣ نصائح

ازاي تكسب فلوس من الكوبي رايتينج ✏️
بدون ما يبقى عندك عملاء؟

كوبي رايتينج#

لو انت شخص عايز يتعلم كوبي رايتينج وتشتغل كوبي رايتر

:فـ غالبًا هتعمل حاجة من الأتي

هتقرأ كذا كتاب متخصصين في الكوبي رايتينج

او تقرأ مجموعة من المقالات اللي بتتكلم عن الكوبي رايتينج وازاي تبقى كوبي رايتر

او تلتحق بأي كورس مجاني بيدي اساسيات الكوبي رايتينج

او تتفرج على مجموعة من الفيديوهات على اليوتيوب بخصوص الكوبي رايتينج برضه

وعلى الرغم من ان ده مجهود مش قليل خالص، الا انه كل ده في النهاية هيديك أساسيات فهم المجال ده بشكل عام

وصدق او لا تصدق، ده الجزء السهل من رحلتك في مجال زي الكوبي رايتينج

الجزء اللي هيخليك فعلًا تتعلم بسرعة وتتطور في المجال ده، هو التطبيق بشكل وحجم كبير جدًا

 :وانا عارف انك دلوقتي بتسأل وبتقول

" طيب هو انا هطبق ازاي ومفيش عملاء اصلًا؟"

او

" وفين العميل اللي يقبل اني اطبق معاه وانا معنديش خبرة؟"

هرد عليك انا واقولك طيب ماذا لو قولتلك ان فيه حل تقدر من خلاله تطبق من غير ما يبقى عندك عملاء

وكمان تكسب فلوس منه؟

عارف الحل ده فين؟

الحل ده موجود في بيتك او اوضتك، او جوه دولابك، او تحت سريرك

لإن على الرغم اني معرفكش معرفة شخصية

الا اني متأكد انك عندك منتجات في البيت عندك مختلف انواعها والاقسام اللي بتنتمي اليها

وانت بطلت تستخدمها بقالك كتير اوي، ومكدسها عندك تكديس قهري وخلاص

فـ ايه رأيك انك تطلع المنتجات دي وتفلترها كده

وتختار منها اللي تقدر تبيعه

والأهم، انك تطبق اللي اتعملته في الكوبي رايتينج في انك تبيع الحاجات دي؟

لو الفكرة دي عجبتك، خليني اقولك على خطوتين انت محتاج تعملهم بعد ما تختار المنتجات اللي انت عايز تبيعها

١- الخطوة الأولى انك تحدد هتبيع الحاجات دي على ايه؟

وما اظنش ان فيه مكان اسهل من الماركت بليس الخاص بالفيسبوك

او تقدر تشوف ايه المنصات اللي بتسمح للمستخدمين انها تبيع منتجات مستعملة وتعرض المنتج بتاعك عليها

:٢- الخطوة التانية بقى انك هتطبق الاطار ده في كتابة الكوبي الخاصة بالمنتج اللي هتبيعه

هتذاكر المنتج اللي هتبيعه ده كويس الأول

هتكتب هيدلاين او عنوان له قوي لجذب الانتباه

هتكتب الكوبي بتاعتك

بعد كده هتحط الكول تو اكشن اللي هو بيخاطب اللي بيقرأ ويقوله اشتري  

واسمحلي احكيلك قصة بخصوص الموضوع ده حصلت معايا من كذا سنة فاتت مع واحد صديقي

صديقي كان جايب " برفيوم" هدية لصديقته وكان مخطط انه يهاديها بيها في مناسبة معينة

ولكن شاءت الاقدار ان قبل المناسبة دي انهم يسيبوا بعض

بس زيادة على سوء حظ صديقي ان المدة المسموحة بالاستبدال والارتجاع خلصت

فـ بقى معاه هذا " البرفيوم" مش عارف يعمل بيه ايه

ساعتها كان بيتكلم معايا وبيقولي اني اشوف لو حد من اصدقائي محتاج يجيب هدية

ممكن ياخد البرفيوم ده ويديله الفلوس اللي دفعها عادي

وهنا انا قولتله طب ما تحطه على اي ماركت بليس وبيعه عادي

صديقي عجبته الفكرة وقالي ماشي يلا بينا

وللأسف انا ساعتها اقترحت عليه ان انا هبعتله يكتب ايه في وصف المنتج - (هقولك ليه للأسف كمان شوية)

:وعشان مطولش عليك ده اللي اتكتب عن البرفيوم

والبرفيوم اتباع بعديها بيومين من واحدة بنت شافت الاعلان واشترته منه فعلًا

اما بقى للأسف اللي قولتهالك، فـ ده لإن صديقي عجبته الفكرة

وجه بعديها في قعدة صفا يقترح عليا اننا نعمل بيزنس من الموضوع ده

والموضوع اخد مجهود ووقت مني عشان اقنعه يسيبني في حالي

فـ زي ما انت شايف

:التجربة دي باختصار

مش هتكلفك حاجة غير الوقت في انك تطبق اللي اتعلمته اثناء مذاكرتك للكوبي رايتينج

وممكن تدخلك فلوس انت محتاجها دلوقتي

وهتخليك برضه تكتب في البورتفوليو بتاعك مشاريع انت قمت بيها بنفسك
عشان تجيب بيها عملاء بعدين

فـ جرب انت مش خسران حاجة، وابقى احكيلي عن النتائج اللي وصلت ليها

اخبار حالة البراند بتاعك ايه؟ 🏗️

براند استراتيجيز#

واحد من التمارين اللطيفة اللي بحب اديها في الاستشارات اللي بقدمها للمسوقين وأصحاب العلامات التجارية بشكل عام المهتمين ببناء استراتيجية واضحة للبراند اللي شغالين عليه

هو تمرين مبني على ٧ نقاط الهدف منه تحديد حالة البراند دلوقتي في السوق شكلها ايه من وجهة نظر المسوق او صاحب العلامة التجارية

التمرين ده ببساطة لما تطبقه هتعرف البراند بتاعك واقف فين، والمفروض يروح فين

دوس على الزرار ده هيوديك على لينك التمرين والتعليمات اللي مفروض تمشي عليها

اليك مجموعة من الحقائق عن بناء بيرسونال براند 🤓
تقدر تستفيد منه ماديًا بعدين

كريتيف انتربرينور# 

والحقائق دي بشكل خاص بتدور حوالين تبني عقلية معينة يفضل تبقى موجودة عندك طالما ناوي تسلك الطريق ده

١- مفيش حد مهتم بيك انت شخصيًا الحقيقة

جمهورك مهتم بحاجتين بس، وهما ازاي انت هتقدر تساعدهم؟

اي حاجة غير كده بتيجي بعد ما يعرفوا انت ازاي هتساعدهم

ولو مش مصدق، اسأل نفسك انت مشترك في النيوزليتر دي ليه

٢- النجاح في بناء قاعدة جماهيرية ليك بييجي من اتقانك وتكرارك لكل الحاجات المملة والمتعبة بالنسبالك

سواء انك تكتب محتوى، تسجل بودكاست، تصور فيديو

كل حاجة من دول فيها خطوات مملة ومتعبة حقيقي، ولكن تبني عقلية اتقان الحاجات المملة والمتعبة دي

هو اللي هيحققلك اللي انت عايزه في النهاية

وخليك فاكر ان الفرق ما بينك وبين شخص عنده بيرسونال براند قوي وناجح وانت بتحبه

ان الشخص ده اتقن الحاجات المملة، واكتشف طريقة ممتعة لعملها

٣- عمرك ما هتقدر تبسط كل الناس اللي موجودة عندك

وده معناه انك اثناء الرحلة دي ممكن تخسر متابعين

وممكن كلامك يضايق فئة من الناس دي

وعلى الرغم من ان دي تبان حاجة وحشة

الا انها مؤشر جيد من وجهة نظري

لأنك كده بيحصل عندك فلترة ما بين الجمهور اللي فعلًا معجب بطريقة رؤيتك ومعالجتك للأمور

والجمهور اللي مش عارف او فاكر هو جه عندك ازاي

اتفقنا؟

 ما قولتليش بقى.. انت بقرة ولا اسد؟📖

كتاب عجبني#

في الحقيقة دي مش شتيمة خالص

:ولكن دي واحدة من الحاجات اللي انا احتفظت بيها عندي على كيندل بعد قراءة كتاب

The Almanack of Naval Ravikant

نافال في كتابه كان بيربط ما بين طريقتنا في الشغل لطريقة شغل البقرة والأسد في الطبيعة

البقرة في الطبيعة بترعى طول اليوم، وطول اليوم قاعدة بتاكل برضه

انما الأسد بقى على الطرف الأخر من الطبيعة بيبقى قاعد طول اليوم مريح، لحد ما يلاقي فرصة في شكل وليمة حلوة ويقوم ينتهزها

وبيوضح نافال بقى اننا لو اتبعنا اسلوب الاسد في الشغل هنبقى احسن بكتير

ناخد وقتنا في اننا نريح كده، نقعد نعمل حاجة تانية غير الشغل ونحتفظ بطاقتنا لحد ما نلاقي فرصة تستحق السعي وراها

ولكن انا الحقيقة ما كنتش مقتنع اوي ان دي الطريقة اللي المفروض اتبعها

اصل لو الشخص اشتغل زي البقرة كل يوم، ماهو هيوصل لمرحلة من الجفاف البقرة ذات نفسها عمرها ما هتوصلها

ولو الشخص ده قال لا خلاص هشتغل زي الاسد، ف مش مضمون برضه اني الاقي الفرصة اللي اعرف انتهزها

الاسد في الاخر برضه لو ملقاش اكل، مراته قاعدة دايرة من الصبح عشان تجيب اكل للعيال

ف هو في الاخر هياكل برضه

المهم اني وصلت في النهاية ان اعتقد الشخص في شغله المفروض يكون مكس ما بين البقرة والاسد

عشان مش كل تاسك مطلوب تشتغل فيها زي البقرة

ولا كل تاسك برضه ينفع تشتغل فيها زي الاسد

انت شايف ايه يا ترى؟شوف التمرين

ليه معظم الأفكار بتفشل؟🎙️

بودكاست عجبني#

:ده عنوان لحلقة اكثر من رائعة الحقيقة في بودكاست

Unmistakable Creative Podcast

البرتو في الحلقة دي هيفصللك كل حاجة بخصوص اسباب فشل الأفكار بشكل عام وبشكل خاص كمان لو بتشتغل في ستارت ابس

حلقة من الحلقات اللي لو سمعتها بتركيز فعلًا مش هتندم

وانصحك تشترك في البودكاست ده عشان فيه كنوز الحقيقة

وبكده خلصت نيوزليتر انهاردة 🤙

اتمنى تكون اتبسطت واستفدت من ايميل انهاردة حقيقي

ويهمني طبعًا اني اعرف ايه اكتر نقاط عجبتك في ايميل انهاردة

ايه اللي عايز تشوفه الفترة القادمة برضه في النيوزليتر وهكذا

اعملي منشن على فيسبوك باللي عجبك واللي عايز تشوفه

وانا هرد عليك بنفسي على طول

اشوفكم يوم الأحد القادم ان شاء الله

Join the conversation

or to participate.