عزيزي المسوق، رأيك مش مهم

عن ازاي تكتب كوبي مقنعة، وليه رأيك مش مهم، واشياء اخرى نتحدث

،قرائي الاعزاء

اهلًا وسهلًا بيكم في نسخة جديدة من النيوز ليتر

:اللي من خلالها بشارككم ٣ نصائح في

 الكوبي رايتينج ✏️ 

البراند بيلدينج 🏗️ 

الكريتيڤ انتربرينيرشب 🤓 

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖 

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡 

فـ يلا بينا نبدأ بـ أول ٣ نصائح

فيه ٣ إطارات لو بنيت عليهم الكوبي، هتبقى مقنعة ✏️
اكتر للقارئ

كوبي رايتينج#

الإطار الأول: المشكلة الكبيرة ☝️

وعلى الرغم من ان ده إطار منطقي وبديهي جدًا، إلا أن ٦ من كل ١٠ كوبي رايترز بيستخدموه غلط

الهدف من الإطار ده انك تبتدي الكوبي بتاعتك بطرح مشكلة "حقيقية" و"ملموسة" فعلًا عند القارئ

بالشكل اللي يقعنه فعلًا انك فاهم مشكلته اولًا

ثم يقتنع ثانيًا بإن "الحل" اللي بتقدمه هو أنسب حل لهذه المشكلة

لو هذا القارئ ما اقتنعش باللي بتقوله، ايه اللي هيخليه يكمل معاك؟

وعشان تستخدم الإطار ده بطريقة صحيحة، انا عايزك تفكر في الترتيب عند طرحك للمشكلة:

"طرح المشكلة الأكبر - تداعيات وجود المشكلة دي - الحل بتاعك - النتيجة بعد الحل"

:وانا كنت كتبت بوست كامل عن الإطار ده عندي قبل كده، تقدر تشوفه من هنا

الإطار التاني: الفرصة الكبيرة ✌️

عشان الكوبي بتاعتك تكون مقنعة اكتر للقارئ، مش شرط انك كل مرة تبنيها على مشكلة

ممكن تبينها على فرصة برضه

القارئ ممكن يدفع فلوس عشان انت اقنعته انه عنده فرصة ممكن يستغلها لصالحه

لو افترضنا انك دلوقتي صاحب اچينسي متخصصة في الماركتنج والأدفيرتايزينج

الأچينسي دي عشان تكمل وتحقق نمو ، فـ انت عارف انك محتاج تجيب عملاء بدخل ورقم معين شهريًا

هنكمل افتراض واقولك ان عندي حل يقدر يحققلك اللي انت عايزه ده

:هنا انا ممكن اكتبلك الكوبي بطريقتين

المشكلة الكبيرة: هل بتعاني الفترة دي في انك تجيب عملاء لشركتك؟

الفرصة الكبيرة: بتخطط تضاعف دخل الأچينسي بتاعتك في الربع السنوي القادم؟

شوفت الفرق؟

لو فكرت هتلاقي ان الطريقتين بيقدموا نفس العرض اللي انت محتاجه: انك تكمل وتحقق نمو

ولكن إطار كل فكرة مختلف عن التاني

الإطار التالت: التوقع الكبير 👌

التوقع الكبير بشكل عام بيقول ان فيه حاجة هتحصل عما قريب او بتحصل، وبشكل ما هتأثر على القارئ اللي انت بتكلمه

وده الحقيقة إطار لو استخدمته صح، هتقدر تجذب انتباه القارئ وتقدر كمان تبني ثقة ما بينك وبينه

عايزك تاخد بالك ان الإطار تقدر تستخدمه بطريقتين، طريقة سلبية وطريقة إيجابية

:يعني ممكن تقول

فيه حاجة كبيرة بتحصل او هتحصل - ازاي تستغلها لصالحك (ايجابي)

فيه حاجة كبيرة بتحصل او هتحصل - ازاي تاخد بالك منها (سلبي)

ده الفرق

عزيزي المسوق…. رأيك مش مهم 🏗️

براند استراتيجيز#

واحدة من اكتر الغلطات البشعة اللي بشوف مسوقين كتير وأصحاب براندز كمان بيعملوها

هو انهم بيتجاهلوا دور الجمهور المستهدف في عملية بناء البراند او العلامة التجارية في النهاية

وبيتعاملوا مع اي مشكلة او اي هدف عندهم بناءً على تحليلاتهم وارائهم الشخصية والمهنية فقط

مع ان رأي وتقييم وفيدباك هذا الجمهور في النهاية هو اللي بيحدد شكل البراند في السوق هيبقى عامل ازاي

وهو اللي هيحدد ليك انت كمسوق او صاحب علامة التجارية المفروض تعمل ايه او تشتغل ازاي

وعشان كده انا هشاركك واحد من التمارين اللطيفة اللي بنصح بيها المسوقين وأصحاب العلامات التجارية

:هيساعدك في انك تحلل رأي جمهورك ويديك فكرة انت المفروض تشتغل ازاي

ازاي توصل لأكبر عدد من الناس المهتمة بما تقدمه 🤓
وتحقق اكبر عائد مادي منه؟

كريتيف انتربرينور# 

ودول سؤالين معظم اللي عاوزين يبدأوا رحلتهم في صناعة المحتوى اونلاين بالشكل اللي يحقق لهم بيرسونال براند قوي ويدخلهم عائد مادي مرضي، بيدوروا على إجابة ليهم

لما حد فيهم بيسألني السؤالين دول، انا برد عليهم بسؤالين تانيين الحقيقة لازم يجاوب عليهم

لو جاوب عليهم هو هيعرف لوحده المفروض يعمل ايه

السؤال الأول: تفتكر هل فيه ١٠٠ الف بني ادم ممكن يكونوا مهتمين باللي بتقدمه ده؟

انا عارف انه سؤال يخض

بس مش ده الغرض منه

الهدف من السؤال أنك تحاول تفهم هل اللي انت بتقدمه ده

فيه قطاع كبير من الجمهور على الطرف الآخر عنده احتياج يسمع ويشوف ويقرأ اللي عندك ده ولا لأ؟

ودي نقطة مهمة جدًا أنت فعلًا محتاج تفكر فيها كويس

لأن بشكل كبير لو الإجابة طلعت لأ مستحيل يكون فيه ١٠٠ الف بني مهتمين

فـ ده معناه برضه ان ممكن الرقم يبقى اقل من ١٠ الاف بني ادم

وده معناه ان النيش الخاص باللي انت بتقدمه ده ضيق

وبالتالي سؤالك عن ازاي اوصل لأكبر عدد من الناس سؤال مش في محله

شوفت سؤال واحد ودانا لحد فين؟

السؤال التاني: هل اقدر احقق دخل مادي من اللي بقدمه ده يوصل لـ مليون جنيه في السنة؟

انا عارف ان يمكن انت أهدافك المالية مش بتطمح للوصول لرقم زي ده سنويًا

وعارف ان يمكن انت لو حققت جزء اصغر بكتير من الرقم ده هتبقى راضي ومبسوط

ولكن اسمحلي اقولك انا ليه حطيت الرقم الكبير ده

لإن اولًا الهدف من السؤال هو انك تحاول تعرف معدل الربحية من النيش الخاص باللي انت بتقدمه ده

ممكن يوصل لحد فين؟

ثانيًا بقى، انك لو جاوبت وقولت لأ مستحيل، طب ايه الدخل السنوي الممكن اللي تقدر تحققه؟

هل هو ١٠٠ الف جنيه سنويًا؟

لأ برضه؟

هل هو ١٠ الاف جنيه سنويًا طيب؟

كل سؤال بتفكر فيه وبتقول عليه لأ، بيقولك بشكل واضح وصريح ان فيه مشكلة هنا محتاجة تتحل

اصل لو النيش بتاعك ضيق، يبقي من المنطقي انك لما تعمل منتج ايًا كان ايه هو بقى

ان تسعيره هيبقى غالي لإن الجمهور مش كبير، فـ يقدر يحققلك دخل على الأقل ١٠٠ الف جنيه سنويًا

اما لو النيش بتاعك واسع، يبقى من المنطقي برضه ان دخلك ممكن يبقى متعدد من منتجات قليلة في السعر وعالية في السعر

لإن قاعدة الجمهور اكبر بكتير وفيها تنوع يسمح بحاجة زي كده

وبالتالي ممكن توصل لمرحلة تحقيق دخل على الأقل ١٠٠ الف جنيه سنويًا

وعشان كده، انت محتاج تفكر في السؤالين دول كويس

ليه تتكلم اقل، وتسأل اكتر؟📖

كتاب عجبني#

وده الحقيقة سؤال اظن انت مهتم تعرف اجابته

لو انت من بنود مسئولياتك الإدارة والتدريب بشكل عام

:اجابة السؤال ده هتلاقيها في كتاب هو اكثر من رائع الحقيقة اسمه

The Advice Trap

مايكل بنجاي في الكتاب هياخدك خطوة بخطوة في تحليل كل ما وراء فن القاء النصيحة كشخص محطوط في مكان ما ومطلوب منه انه يدي نصيحة

ايًا كان نوع وشكل النصيحة اي

اكتر جزء عجبني في الكتاب الحقيقة لما ابتدى يتكلم عن انواع إعطاء النصيحة بشكل غلط، وان كل نوع منهم بيبقى ناتج عن طباع وسلوك شخصي موجود عندك

فـ ازاي تاخد بالك من الطباع والسلوك ده، عشان ما تديش نصيحة ملهاش لازمة في النهاية

جزء تاني برضه عجبني في الكتاب ان مايكل كان بيقول ان فيه ٧ اسئلة، تقدر من خلالهم تدير حوار مثمر ومفيد مع شخص طالب مساعدتك

:الأسئلة دي كالأتي

ايه بيدور في بالك دلوقتي؟ ◀

وايه كمان؟ ◀

تفتكر المشكلة الحقيقة في الموضوع ده فين بالظبط؟ ◀

طيب وانت عايز تعمل ايه بقى؟ ◀

تفتكر ايه اللي انت شايفه ينفع، وايه اللي ما ينفعش خالص نعمله؟ ◀

طيب شايف انا ازاي اقدر اساعدك؟ ◀

ايه اكتر حاجة شوفت انها قيمة في حديثنا ده؟ (ده بعد ما تخلص خالص) ◀

وطبعًا انت في النهاية تقدر تعمل المكس بتاعك من الأسئلة

فـ انصحك تقرأ الكتاب، لأنه فعلًا هيفيدك

 ازاي تفشل؟🎙️

بودكاست عجبني#

:عشان تنجح، مطلوب انك تفشل، والبودكاست ده معمول عشان يكلمك في الموضوع ده

How to Fail

اليزابيث داي هوست البودكاست هتاخدك في رحلة مع كل ضيوفها اللي من الكريتيف انداستري وهتتكلم معاهم عن معظم التجارب والمشاريع الابداعية اللي فشلت عند كل واحد منهم

وايه الدروس المتسفادة من كل قصة من دول

بودكاست اعتقد ان مهم ليك تسمع منه بتاع ٥ حلقات كده، عشان تعرف انك مش لوحدك وانك طبيعي

وانك عادي تفشل

وبكده خلصت نيوزليتر انهاردة 🤙

اتمنى تكون اتبسطت واستفدت من ايميل انهاردة حقيقي

ويهمني طبعًا اني اعرف ايه اكتر نقاط عجبتك في ايميل انهاردة

ايه اللي عايز تشوفه الفترة القادمة برضه في النيوزليتر وهكذا

اعملي منشن على فيسبوك باللي عجبك واللي عايز تشوفه

وانا هرد عليك بنفسي على طول

اشوفكم يوم الأحد القادم ان شاء الله

Join the conversation

or to participate.