لمست قشر بيضة قبل كده؟

،قرائي الاعزاء

اهلًا وسهلًا بيكم في نسخة جديدة من النيوز ليتر

:اللي من خلالها بشارككم ٣ نصائح في

الكوبي رايتينج ✏️

البراند بيلدينج 🏗️

الكريتيڤ انتربرينيرشب 🤓

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡

…فـ يلا بينا نبدأ بـ أول ٣ نصائح

جربت تركز في ملمس قشر البيضة قبل كده عامل ازاي ✏️

كوبي رايتينج#

واحد من أكثر التمارين أهمية في التطبيق بعد ما تخلص كتابة الكوبي بتاعتك

هو انك تقرأها بصوت عالي وبتركيز

وعلى الرغم من اني متأكد أنك سمعت عن التمرين ده بشكل ما أو بأخر قبل كده

الا اني عارف انك مش بتطبقه بشكل مستمر ودوري بعد كل مرة بتخلص فيها كتابة كوبي

ليه بتعمل كده بقى؟

انا مش عارف الحقيقة

ولكن انا عارف ليه ده اكتر تمرين ممكن يفرق في اداء الكوبي بتاعتك بعد النشر

الهدف من قراءة الكوبي بصوت عالي وتركيز، هو ان ودنك تلتقط الكلمات اللي وقعها كان غريب عليها

او ان بقك يبتدي يتلعثم كده في النطق أثناء القراءة

او انك تحس ان نفسك خلص واضطريت تقف، بس لسه السطر ما خلصش

وده يخليني اكلمك شوية عن بضع من الدروس المستفادة من قشر البيضة

لو جربت تمشي ايديك على قشرة بيضة من الخارج

هتلاقي ان ملمسها ناعم جدًا

مفيش انبعاجات، مفيش نتؤات

ومش بس كده

انت لو جبت قلم ورسمت خط من اول البيضة لحد تحت

هتلاقي انك رسمت خط مستقيم بياخد انحناء للعمق كل ما توصل لنهاية البيضة

ولو كملت الخط ده من الطرف الأخر، هتلاقيه رجع تاني للنقطة اللي ابتديت منها

واهو ده بالظبط اللي المفروض الكوبي بتاعتك تكون عليه في النهاية

التسلسل فيها ماشي بنعومة شديدة

والعمق في الكوبي بيسمح بالإستفاضة اكتر في الموضوع اللي انت بتتكلم فيه

ونهاية الكوبي نهاية متعلقة بالسبب اللي بدأت عشانه كتابة الكوبي دي

زي تكوين قشر البيضة بالظبط

فـ اتمنى المرة القادمة لما تنسى انك تقرأ الكوبي بصوت عالي

تفتكر ملمس قشر البيضة

وتفتكر انك عشان توصل للتشبيه اللي انا قولت عليه ده في الكوبي بتاعتك

فـ انت محتاج تقرأ الكوبي بصوت عالي، وتكتشف المشاكل فين

دورك ايه في مظلة الجروث ماركتنج؟ 🏗️

براند استراتيجيز#

ممكن اول اجابة تيجي في بالك لما تشوف سؤال زي كده

هو انك ملكش دور، وان الجروث ماركتنج ده له ناس متخصصة فيه

ولكن الحقيقة، انت دورك لا يقل اهمية عن اي حد متخصص في الجروث ماركتنج

لإن صدق او لا تصدق، شغلكم كله مرتبط ببعضه

وده اللي هتقدر تعرف عنه اكتر وتفهمه بشكل اوضح

لما تسمع الجزء الأول من الحلقة الجديدة اللي نزلتها في كوبي كاست بودكاست

تقدر تسمع الحلقة من اللينك ده على طول

ازاي تبيعلي خدمة احترافية 🤓
وانا ما جربتش خدمتك قبل كده؟

كريتيف انتربرينور#

لو تخيلنا انك مسوق عندك خدمة تسويقية احترافية ما

وبتحاول تعرضها على عميل محتمل

يا ترى اجابتك هتكون ايه على السؤال اللي فوق ده لو العميل طرحه عليك؟

أو على الأقل سأل السؤال لنفسه في دماغه؟

لو اول اجابة جت في دماغك هي انك تحاول تدعم الخدمة اللي بتعرضها دي

بعدد سنين الخبرة اللي اشتغلتها

فـ اسمحلي اقولك معلومة كده صغيرة

لما تيجي تبيع خدمة تسويقية احترافية، مش المفروض انك تبيع خبرة السنين معاها

لإن صدق او لا تصدق

فكرة انك عندك خبرة هي حاجة مفترضة عند العميل ولا تحتاج لأي نقاش

طالما بتبيع خدمة احترافية، اذًا من المنطقي انك عندك خبرة في اللي بتعمله ده

ثانيًا بقى، العميل بتاعك مع انه مفترض انه عندك خبرة في اللي بتعمله

فـ هو معندوش ملكة او قدرة او خبرة تقييم خبرتك دي في النهاية

الا لو هو عميل في نفس المجال اللي انت بتقدم من خلاله خدمتك

طيب اومال المفروض في حاجة زي كده تعمل ايه؟

في الحقيقة، الإجابة تكمن في تقييم العميل

لشكل العلاقة ما بينك وبينه هتكون عاملة ازاي؟

:ودي حاجات العميل بيقدر يستنبطها او يشوفها من تصرفات معينة انت بتعملها

زي طريقتك في التواصل والكلام مع العميل ✅

وفهمك لأهم احتياجات موجودة عن العميل فعلًا ✅

وتقديمك لحلول او مقترحات متفصلة على مشكلة او هدف العميل ✅

وصدق او لا تصدق تاني

الـ ٣ عناصر دول هما اللي بيفرقوا كمان في طريقة تسعيرك لخدمة تسويقية احترافية انت بتقدمها كمان

والـ ٣ عناصر دول هما اللي بيقولوا انك عندك خبرة سنين من غير ما تبقى مضطر تذكرها اصلًا

خليك دايمًا فاكر كمان ان عميلك المحتمل ده بيختار من سوق كبير اوي

فيه ناس كتير بيقدموا حاجات كتير شبه بعض

:وعشان كده هو دايمًا قدامه ٤ اختيارات

يا يشتغل معاك ✅

يا يشتغل مع حد غيرك ✅

يا يعمل الشغل المطلوب بنفسه ✅

يا مش هيعمل حاجة خالص ✅

فـ فكر فيها كده وشوف انت عايز عميلك يعمل ايه ويروح فين

وبكده خلصت فقرة النصائح

يلا بينا نشوف فقرة ما اعجبني

تحب تتمرن شوية على البراند بتاعك؟💡

مصدر عجبني#

ده لينك لشوية تمارين كده تقدر تطبقها انت وزمايلك على البراند اللي مسئولين عنه

او تعمله مع العميل بتاعك عادي

الهدف منه انك تعيد تحديد أو تعريف مجموعة من العناصر المهمة جدًا في قلب البراند الاستراتيجي

تحت كل تمرين هتلاقي شرح بسيط عشان تعرف تحله

انا ازاي بنيت ده؟🎙️

#بودكاست عجبني

:اسم البودكاست اللي برشحه ليك الأسبوع ده هو

How I built this - Guy Raz

البودكاست ده الحقيقة اعتقد انه كنز معلومات وتجارب ودروس وقصص

لأي مسوق بشكل عام مهتم بمجال الشركات الناشئة والأفكار الجديدة بشكل عام

راز في البودكاست بيستضيف بشكل مستمر رواد أعمال من مختلف المجالات

بيحكوا في حلقاتهم ازاي قاموا ببناء شركاتهم، ايه التجارب اللي فشلوا فيها

ايه الحاجات اللي اتعلموها خلال الرحلة، وايه الدروس المستفادة في النهاية

فـ ده بودكاست، ما ينفعش ما يبقاش موجود في الليستة بتاعتك الصراحة

وبكده خلصت نيوزليتر انهاردة 🤙

اتمنى تكون اتبسطت واستفدت من ايميل انهاردة حقيقي

ويهمني طبعًا اني اعرف ايه اكتر نقاط عجبتك في ايميل انهاردة

ايه اللي عايز تشوفه الفترة القادمة برضه في النيوزليتر وهكذا

اعملي منشن على فيسبوك باللي عجبك واللي عايز تشوفه

وانا هرد عليك بنفسي على طول

اشوفكم يوم الأحد القادم ان شاء الله