٣ تمارين هيخلوك كوبي رايتر احسن في شهر، بس انت هتكسل تعملهم

،قرائي الاعزاء

اهلًا وسهلًا بيكم في نسخة جديدة من النيوز ليتر

:اللي من خلالها بشارككم ٣ نصائح في

الكوبي رايتينج ✏️

البراند بيلدينج 🏗️

الكريتيڤ انتربرينيرشب 🤓

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡

…فـ يلا بينا نبدأ بـ أول ٣ نصائح

٣تمارين هيخلوك كوبي رايتر احسن ✏️
بس انتهتكسل تعملهم

كوبي رايتينج#

اعذرني على ثقتي الزائدة في العنوان

بس فيه ٨٥ الف مسوق على الأقل، سمعوا مني الـ ٣ تمارين دول بشكل ما او بأخر

واللي طبقهم في النهاية تقدر تعدهم على صوابع ايديك

وعشان كده انا اتوقع بنسبة كبيرة انك ممكن " للأسف" تكسل تطبقهم

مع انهم حرفيًا ممكن ينقلوا مستوى مهارتك في الكوبي رايتينج تحديدًا لحتة تانية خالص

حاول تعيد كتابة كوبي شوفتها قبل كده بناءً على ذاكرتك فقط ☝️

اكيد انت بشكل شبه يومي، بتشوف عدد مش قليل خالص من الكوبيز على منصات مختلفة وبشكل متنوع كمان

واكيد برضه فيه جزء من الكوبيز دي عجبك بشكل ما او بأخر

حاول تفتكر كده ليه " كوبي" معينة انت شوفتها قبل كده عجبتك يا ترى؟

الكوبي دي كانت موجهة لمين؟

الكوبي دي كانت بتحاول تحقق ايه او توصل ايه؟

ويا ترى لو هتكتب الكوبي دي تاني من دماغك، ممكن تكتبها بشكل عامل ازاي؟

هات كوبي تقدر توصل اليها بسهولة وعجبتك ✌️
وعيد كتابتها وهي قدامك

وده تمرين تاني في حالة انك مش فاكر اي حاجة عجبتك قبل كده (مشكلة دي خلي بالك)

كل اللي مطلوب منك انك تجيب اي كوبي عجبتك من على الانترنت، ايًا كان مصدرها ايه

المهم تكون عجبتك او لفتت انتباهك

وتخليها مفتوحة قدامك، وتعيد كتابتها حرف بحرف

الهدف من التمرين ده انك تحاول تدخل جوه دماغ الكوبي رايتر اللي كتب الكوبي الأصلية

تحاول تفهم هو ليها كتبتها بالشكل ده، وازاي صنع التسلسل في الرسائل البيعية داخل الكوبي ذات نفسها

هات نفس الكوبي اللي جبتها في الخطوة التانية دي 👌
واعملها تشريح

وده تمرين تالت في حالة انك كسلان ومش هتعمل التمرين التاني (مشكلة اكبر دي خلي بالك)

الهدف من التمرين ده هو انك هتسأل نفسك شوية اسئلة كده وانت بتقرأ الكوبي

تحاول من خلال إجابتها تستخلص هي ليه الكوبي ده اصلًا عجبتك او لفتت انتباهك

:اسأل نفسك اسئلة زي دي كده

الهيدلاين بيقول ايه وليه يا ترى الكوبي رايتر استخدم الهيدلاين ده؟ ✅

ايه الفكرة الأساسية اللي بتدور حواليها الكوبي دي؟ ✅

ايه الأوفر اللي اتقدم في الكوبي وشكله عامل ازاي؟ ✅

ايه الفعل اللي الكوبي رايتر طالبه من اللي هيتلقى الكوبي دي؟ ✅

مفيش كوبي رايتر انا اعرفه او عرفني انه طبق اي تمرين من الـ ٣ دول

وما استفادش منهم استفادة عظيمة، فرقت معاه في البروسيس اللي بيمشي عليها وهو بيكتب

ايه هي حالة المنافسين قصاد حالة البراند بتاعك؟ 🏗️

براند استراتيجيز#

ايه اول اجابة جت في بالك؟

هل هي اجابة عشوائية ولا منظمة؟

هل انت فعلًا عارف حالة البراند بتاعك او اللي بتشتغل عليه قصاد حالة المنافسين في السوق؟

هل تقدر تقول الإجابة دي وانت متأكد مليون في المية منها؟

لو " لأ" اتكررت كتير قصاد كل سؤال انا سألتهولك دلوقتي

يبقى انت عندك مشكلة في فهم مكانك في السوق قصاد مكان منافسينك في نفس السوق

ودي مشكلة كبيرة بتأثر على كل حاجة انت بتعملها دلوقتي الحقيقة

فـ تعالى اقولك ازاي تقدر تفهم وضع البران بتاعك الحقيقي في السوق قصاد منافسينك عامل ازاي

👇 في البداية، انت محتاج تجاوب على السؤالين دول

ايه هي احتياجات ومتطلبات جمهورك المستهدف❓
اللي عشانها البراند بتاعك دلوقتي موجود؟

مين تاني موجود في نفس السوق عشان نفس احتياجات ومتطلبات جمهورك المستهدف❓

لو قدرت تجاوب على السؤالين دول بشكل واضح وصريح وشفاف جدًا، بدون اي نوع من انواع المبالغات

هيبقى عندك قائمة كاملة بخصوص كل حاجة متعلقة بجمهورك المستهدف

وقائمة كاملة بخصوص اللي بيتنافسوا معاك على نفس الجمهور ده

وبكده معدش فاضل غير انك تحللهم تحليل مبني على المنطق والتفكير الاستراتيجي

👇 وده تقدر تحققه من خلال اجابتك على الأسئلة دي

منافسينك دلوقتي بيعملوا ايه وبيقدموا ايه بالظبط؟❓

منافسينك دلوقتي ما بيعملوش ايه؟ وما بيقدموش ايه؟❓

منافسينك بيعملوا ايه زيك بالظبط؟❓

منافسينك بيعملوا ايه مختلف عنك؟❓

رحلة المشتري عند منافسينك عاملة ازاي؟❓
ودي حاجة تقدر تعملها تتبع بإنك تتابع المنافس كإنك عميل مستهدف له

جاوب على الأسئلة دي بشكل تفصيلي

وانت هتقدر تقيم حالة البراند بتاعك صح

ولو ما بتعرفش اصلًا تحلل منافسينك ازاي وبناءً على ايه

انصحك تسمع الحلقة دي في البودكاست عندي بعنوان

هل حللت منافسينك بالطريقة دي قبل كده؟

هتديك اطار واضح تقدر تمشي عليه خطوة بخطوة عشان تحلل منافسينك

هل طريقة عرضك لخدماتك 🤓
تتماشى مع نوع مشكلة عميلك؟

كريتيف انتربرينور#

وعشان تفهم السؤال ده انا قصدي بيه ايه كويس

اسمحلي اقولك حقيقة ثابتة ومؤكدة عن مشاكل اي حد ممكن يبقى محتاج خدماتك

✌️فيه نوعين من المشاكل عميلك بيواجههم

مشكلة خارجية: مشكلة ملموسة محتاجة تتحل، ولكن صدق او لا تصدق مش ده اللي عشانه ممكن يشتغلوا معاك

مشكلة داخلية: مشاكل تانية غير ملموسة ظاهريًا سببها هو وجود المشكلة الخارجية في المقام الأول، وده اللي مفروض تشتغل عليه

لو قدرت تحدد المشاكل الداخلية دي، وعبرت عنها كتابيًا بإنك تقدر تحليها من خلال مجموعة المهارات اللي عندك

كده طريقة عرضك لخدماتك بقت ماشية مع نوع مشكلة عميلك بشكل سليم

👇 مثال على كده

لو فيه ستارت اب ولنفترض مجال تخصصها حاجة متعلقة بالتكنولوجيا، بتدور على كوبي رايتر يشتغل معاها

ليه الشركة دي بتدور على كوبي رايتر؟❓

عشان محتاجين حد متخصص في الكوبي رايتينج ✅
يبقى موجود في فريق التسويق لصناعة المحتوى الإعلاني الخاص بالشركة (مشكلة خارجية)

بس هل ده فعلًا السبب الرئيسي لوحده؟❓

الإجابة لأ، هما عايزين كوبي رايتر يقدر من خلال الحملات الإعلانية ✅
اللي هيصنعها انه يحقق انتشار اكبر للشركة، انه يجيب عملاء محتملين اكتر للشركة، او انه يحقق مبيعات اكتر للشركة (مشكلة داخلية)

تفتكر بقى انهي مشكلة من دول لو ربطت خدماتك بيها❓
هتلفت انتباه الشركة دي ليك اكتر

اظن الإجابة واضحة

هتنافس على المشكلة الخارجية، فيه ١٠٠ الف واحد غيرك بينافس عليها برضه

هتنافس على المشكلة الداخلية، هتصنع لنفسك فرصة انك تكون متميز

ده طبعًا بافتراض ان عندك المهارات دي بالفعل، وموجود عندك ما يثبت ذلك

وبكده خلصت نيوزليتر انهاردة 🤙

اتمنى تكون اتبسطت واستفدت من ايميل انهاردة حقيقي

انهاردة ما شاركتش معاك حاجات عجبتني، عشان مفيش انشطة عملتها الأسبوع ده الحقيقة

بس الأسابيع القادمة كتير ان شاء الله

فـ اكتفي بهذا القدر انهاردة

❤️ واشوفكم يوم الأحد القادم ان شاء الله