قولتله اختار..قام احتار..راح طار

،قرائي الاعزاء

اهلًا وسهلًا بيكم في نسخة جديدة من النيوز ليتر

:اللي من خلالها بشارككم ٣ نصائح في

الكوبي رايتينج ✏️

البراند بيلدينج 🏗️

الكريتيڤ انتربرينيرشب 🤓

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡

…فـ يلا بينا نبدأ بـ أول ٣ نصائح

قولتله اختار.. قام احتار.. راح طار ✏️

كوبي رايتينج#

على قد ما يبان العنوان ده مضحك

الا اني بشوف كوبي رايترز كتير بيحصل معاهم كده لما يكتبوا كونفرچن كوبي

او كوبي بيعية لعميل

بيقدموا اختيارات او طلبات كتير للعميل في نفس الكوبي

وبيبقوا متوقعين ان العميل هيقوم بعملها كلها

وفي الحقيقة ده ما بيحصلش، وفي اسوء الأحوال العميل ما بياخدش اي رد فعل تجاه الكوبي دي الحقيقة

وعشان كده محتاجين نتفق على قاعدة كده محورية في الكونڤرجن كوبي

"وهي قاعدة "حاجة واحدة بس

ما تطلبش من العميل يشترك في النيوزليتر بتاعتك ❌
ويشتري المنتج بتاعك

اختار حاجة واحدة ✅

ما تقولوش انت هتنزل في الوزن وكمان هتكسب عضلات ❌

اختار وعد واحد بس على حسب البيرسونا ✅
عايزة ايه ومنتجك يقدر يحقق ايه

ما تعملش خصم ٥٠٪ وفيه خصم تاني ٪٧٥ ❌

اختار خصم واحد وده اللي تلعب عليه ✅

وهكذا بقى

لما بتقدم كذا حاجة في نفس الكوبي

بيحصل حاجة اسمها تخفيف لقوة ووزن الكوبي بتاعتك

والعميل اللي بيقرأ هيحس انه مش فاهم هو المفروض يعمل ايه

واوعى تفكر انه لما يحس انه مش فاهم انه بالضرورة هييجي يسألك

لا عادي ممكن يسيبك ويكمل اللي كان بيعمله

فـ لا تخيره، ولا تحيره، وبلاش تطيره

:براندينج 🏗️
ايه اول ٣ عناصر جم في بالك؟

براند استراتيجيز#

لوجو؟

الوان؟

خطوط؟

مش هلومك الحقيقة لو دي اول حاجات جت في بالك

لإن للأسف نسبة كبيرة من المحتوى اللي ممكن تكون اتعرضتله بشكل متكرر وحجم كبير

كان فيه ربط ما بين الكلمة دي والعناصر اللي جت في بالك اول ما سألتك

ولكن اسمحلي اقولك على الـ ٣ عناصر اللي المفروض ييجوا في بالك لما تيجي سيرة البراندينج

تطوير البراند 👨‍💻

تخيل انك قابلت شخص ما تعرفوش لأول مرة واتكلمت معاه

في بضع ثواني هتلاقي نفسك كونت انطباع عنه مبدئي، مبني على شكله وطريقة كلامه

والموضوع مش هيقف عند كده

كا ما تزيد مدة تفاعلك مع الشخص ده، كل ما هتبتدي الانطباعات دي تكبر وتكتر

طيب تخيل بقى معايا ان لو الشخص ده براند

هيحصل ايه؟

هنا بقى ييجي دور تطوير البراند في الموضوع

وهي عملية تخطيط وتكوين انطباع استراتيجي، احنا عايزينه يوصل ليك لما تشوف البراند ده

وخلي بالك انا قولت استراتيجي، لإن ما ينفعش نسيب تكوين الانطباع عندك يحصل بشكل عشوائى

وعشان كده في الجزء ده بنشتغل على حاجات زي البوزيشنينج الخاص بالبراند، وشخصية البراند بشكل عام عاملة ازاي

وايه المميزات الموجودة في البراند ومنتجاته، وايه المنافع النهائية اللي بتعود على المستخدم من البراند والمنتج

بعد ما الحاجات دي تخلص، بناءً عليها بيتحدد بقى شكل الهوية البصرية بتاعة البراند هتبقى عاملة ازاي

وعشان كده تطوير لما بيتعمل صح، انت بتضمن ان العميل لما يشوفك يقدر يعرف انت مين وبتعمل ايه بسلاسة

والأهم من كده انها بتتضمن انه يقدر يعرف ده بالشكل اللي انت عايزه

ادارة البراند 💼

ادارة البراند بقى هي العنصر اللي بيلعب اخطر دور في عملية البراندينج.. ليه بقي؟

لإنه ده العنصر اللي بيضمن ان البراند في كل نقطة تواصل ما بينه وبين العميل

بيتكلم وبيعبر وبيقدم اللي بيقدمه

بناءً على العناصر اللي تم تحديدها في تطوير البراند

وعشان كده في العنصر ده بيتم صنع الأرشادات لكل نقطة تواصل

هتلاقي دليل بيقول البراند بيتكلم ازاي، البراند بيعبر ازاي بصريًا

البراند المفروض يعمل ايه، وما يعملش ايه

هتلاقي برضه دليل قبل ما حاجة تطلع للعميل

بتعدي على مين عشان يقول ان الحاجة دي طالعة صح

وهكذا بقى، مفيش مساحة للإرتجال في البراند مانچمنت

كل حاجة المفروض تبقى طالعة من قلب اللي تم تحديده في العنصر الأول

تفعيل وتنشيط البراند ✅

وده العنصر اللي بيبقى عبارة عن مجموع العنصرين اللي فوقيه

خلاص انت كل حاجة بقت جاهزة عندك

ودلوقتي البراند يقدر يتواصل مع العملاء المحتملين

على نقاط التواصل اللي اتحددت بالفعل

نقطة بقى مهمة جدًا احب انك تحطها حلق في ودنك قبل ما اقفل الكلام في الموضوع ده

كلمة براندينج بتعني استخدام كل الأدوات اللي عندك من خلال التسويق والإعلانات

لتوصيل رسالة وانطباع معين للعميل المحتمل اللي بتكلمه

لو خدت بقى جزء من الأدوات دي وقولت ان ده هو البراندينج لوحده

دي هتبقى مشكلة كبيرة اوي الحقيقة

ازاي تستغل انواع المعرفة لصالحك؟ 🤓

كريتيف انتربرينور#

وانا كلامي هنا الحقيقة لكل شخص بعتلي مؤخرًا بيقولي انه مش حاسس انه خبير بما فيه الكفاية

بإنه يشارك الناس بشكل عام المحتوى اللي عنده في الحاجة اللي هو مهتم بيها

وانه متردد وخايف من رد فعل الناس بشكل عام

في البداية انا حابب احييك ان عندك احساس بالمسئولية مخليك نوعًا ما بتفكر كده

لإن الحقيقة على ارض الواقع لو بصيت حواليك

هتلاقي ان فيه ناس عادي بتشارك اللي عندها من منظور الخبرة

وهي معندهاش خبرة ولا حاجة عادي

بس حابب برضه اخليك تاخد بالك ان مش شرط عشان تشارك الناس

محتوى بحاجة انت مهتم بيها

انك لازم تكون خبير عادي

نقطة كمان ممكن تصدقها او ممكن متصدقهاش، ان الناس بشكل عام بقت تكره كملة خبير دي

من كتر ما بقت موجودة في كل حتة

وعشان كده انا عايزك تعرف ان فيه ٣ انواع للمعرفة تقدر تستغلهم لصالحك

:وتقدر من خلالهم تنشر المحتوى اللي نفسك فيه

استغل معرفة الأخرين☝️

وده نوع من المعرفة انا بشوف ان استغلاله مثالي لأي كريتور بيحب يقرأ كتير ويسمع كتير ويتفرج كتير

لإن لو انت الشخص ده، فـ انا وانت عارفين ومتفقين ان فيه محتوى كتير اوي وحش، ومحتوى مش كتير اوي حلو

طيب ماذا لو انت الكريتور اللي يقدر ينشر للناس المحتوى الحلو المبني على معرفة الأخرين ده؟

مع الوقت لما الناس تشوف اللي انت بتنشره ده، هتبتدي تثق فيك وفي ترشيحاتك

لأ وكمان لما يتزنقوا في حاجة بعد كده، هيرجعوا ليك انت يسألوك على ترشيحات

وانت هنا تقدر مثلًا تقدم ملخصات لفيديوهات، او بودكاستس، او كتب عجبتك

او تقدر تستضيف ناس انت بتحبها وتحط نفسك مكان الجمهور

وتحاول تسأل الضيوف دول اسئلة بتدور في دماغ الجمهور اللي انت بتكلمه بالفعل

استغل معرفة اللي انت بتتعلمه ✌️

فاكر لما قولتلك الناس ما بقتش تحب تسمع كلمة خبير

ولا تثق في اي حد كده عادي يقول على نفسه كده؟

اهو الناس بقى بتحب تسمع اللي بيقول انه بيجرب او بيتعلم

لإن ببساطة الشخص ده بيمثلهم، لإنهم هما كمان نفسهم يجربوا ونفسهم يتعلموا

اطلع وقول للناس انا هجرب اتعمل حاجة معينة في مدة زمنية معينة

وهوثق تجربتي دي وهشارك الدروس المستفادة منها اول ب اول

انت مش متخيل حجم المصداقية والتأثير

اللي هيبقى عندك لو انت كريتور من النوع ده

فـ ليه لأ؟

استغل معرفتك 👌

وانا قاصد احط دي اخر نوع من استغلال المعرفة

لإن ما يمكن فعلًا بجد وعن صدق انت عندك خبرة في حاجة معينة

ما يمكن فعلًا انت عندك هواية وقعدت بتمارسها سنين كتير اوي

وعندك من التجارب اللي ممكن تشاركه مع الناس

ما يمكن فعلًا انت فيه حاجة بتحبها اوي اوي وملهاش علاقة بشغلك

بس اتعلمتها من الصفر، وتقدر تفيد بيها غيرك

ليه ما تشاركش الناس تجاربك دي؟

حرفيًا منصات التواصل الاجتماعي كلها ملعبك، ومفتوحة ليك

ليه لأ؟

الكتاب اللي بقرأه كل سنة مرة 📖

كتاب عجبني#

بدون مبالغة في اللي هقوله

بس الكتاب ده انا قرأته من ٢٠١٦ حتى الأن ٨ مرات

وبدون مبالغة تاني، ده الكتاب اللي كل ما برجعله

بيفكرني انا ليه بعمل اللي بعمله سواء هنا في النيوزليتر، او في البودكاست، او على صفحتي

:والكتاب ده هو

The War Of Art - Steven Pressfield

مين مفروض يقرأ الكتاب ده؟ ✍️

اي شخص في دماغه فكرة ايًا كان شكلها، وكل سنة بيقعد يأجل فيها بسبب ظروف هو بيقول انها السبب

ولكن الحقيقة ما هي الا تسويف صرف في شكل كونسبت اسمه المقاومة وده اللي هيحكي عنه ستيڤن بالتفصيل في الكتاب

ازاي الكتاب ده غير دماغي؟ 📒

اعتقد واحد من اهم الدروس اللي اتعلمتها من الكتاب ده واللي ساعتها كان يعتبر صفعة شديدة القوى على الخد من ٧ سنين كده

هو ان فيه نوعين من الأشخاص في الشغل

الشخص الهاوي، والشخص المحترف

وإن على الرغم من ان ممكن الإتنين يكون عندهم نفس المهارات

إلا أن عقلية الشخص هي اللي بتحدد نتيجة عمله في النهاية هتبقى عاملة ازاي

وان كمان نوع عقليتك سواء هاوي او محترف، هو اختيار في النهاية

انت اللي مسئول عنه بعد ما تعرف طبيعة كل واحد فيهم عاملة ازاي

فـ حقيقي انت محتاج في اسرع وقت تقرأ الكتاب ده بتمعن

لإنك مش متخيل انك لو اخدته على محمل الجد، ممكن يغير فيك ازاي

انا مش حابب اتكلم اكتر من كده خوفًا من اني احرق تفاصيل اكتر لحد ممكن يكون مهتم انه يقرأ بنفسه

ولكن لو انتم حابين بعد كده ان ترشيحاتي للكتب اسرد فيها براحتي

ابعتولي وانا هعمل كده ان شاء الله

تجربتي مع اداة جوجل الجديدة 🤖

بونص#

👀تحب يجيلك مني ايميلين الأسبوع الجاي؟

واحد هيبقى النيوزليتر عادي في ميعادها يوم الحد ان شاء الله

والتاني هيبقى ايميل بحكي فيه تجربتي مع تكست اف اكس من جوجل

وازاي تقدر تستخدمها في شغلك

لإن التوول فيها كذا اوبشن، وفيه منهم اللي حلو اوي

وفيه منهم اللي مش بالضرورة ممكن يفيدك

😄بس بشكل عام كانت تجربة ممتعة الحقيقة

لو حابب يجيلك البونص ايميل ده

فـ دوس على اللينك اللي تحت ده وشير النيوزليتر مع زمايلك

وانا هضيفك ان شاء الله في الميل ليست اللي هبعتلها البونص

وبكده خلصت نيوزليتر انهاردة 🤙

اتمنى تكون اتبسطت واستفدت من ايميل انهاردة حقيقي

ويهمني طبعًا اني اعرف ايه اكتر نقاط عجبتك في ايميل انهاردة

ايه اللي عايز تشوفه الفترة القادمة برضه في النيوزليتر وهكذا

اعملي منشن على فيسبوك باللي عجبك واللي عايز تشوفه

وانا هرد عليك بنفسي على طول

اشوفكم يوم الأحد القادم ان شاء الله