كوبي رايتر تحت التعديل

،قرائي الاعزاء

اهلًا وسهلًا بيكم في نسخة جديدة من النيوز ليتر

:اللي من خلالها بشارككم ٣ نصائح في

الكوبي رايتينج ✏️

البراند بيلدينج 🏗️

الكريتيڤ انتربرينيرشب 🤓

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡

…فـ يلا بينا نبدأ بـ أول ٣ نصائح

ليه كل الناس بتعدل عليك؟ ✏️

كوبي رايتينج#

لو انت كوبي رايتر بيتعدل عليك من زميلك

مروراً بمديرك، وصولًا الى عميلك

ومش عارف، ولا مقتنع بـ هما ليه بيعملوا كده

ومضطر انك تعمل التعديلات دي عشان الدنيا تمشي

اولًا حابب اقولك انت عندك مشكلة كارثية☝️
في طريقة عرض الكوبي بتاعتك

ثانيًا عشان نتفادى الكارثة دي✌️
انت محتاج إطار واضح جدًا تلتزم بيه كل مرة

هتعرض فيها كوبي او كامبين، سواء لمديرك أو لعميلك

عدم التزامك بالإطار ده بيحكي قصة من اتنين الحقيقة

يا اما انت مش فارق معاك اللي انت بتعمله ف عادي 🤔
ما عندكش مشكلة مع التعديلات

يا اما انت فيه حاجة في البروسيس بتاعتك مش صح 🤔
وانت حابب تكمل بالبروسيس دي

اتفقنا؟، تعالى بقى نشوف ازاي بعد كده تعرض الكوبي بتاعتك

اشرح الطريقة اللي اشتغلت بيها ✅

احكي انت عملت ايه، ليه هو مختلف، وليه ده احسن اختيار؟

اعرض دليل يثبت النقطة الأولي ✅

اعرض داتا او كيس ستادي حصلت قبل كده انت عملتها، بتثبت ان طريقتك دي بتشتغل

وضح اننا محتاجين نعمل تيست ✅

حاول تفكر اللي بتتكلم معاها ده، اننا في النهاية محتاجين نعمل تيست، لو نجحت يبقى تمام، لو ما نجحتش يبقى هنعدل

بعد ما تخلص بقى دول، اطلب انت الفيدباك ✅

لإنك ساعتها بتجبر اللي قدامك يفكر من خلال السياق اللي انت عرضت بيه

فـ يا اما هيناقشك في السياق ده وبكده انت قطعت شوط كبير اوي الحقيقة

يا اما هيهد كل اللي انت عملته 👈
وساعتها انت محتاج تحكم هو اللي انت عملته من البداية صح ولا غلط

يا اما هيتجاهل كل كلامك 👈
ويتكلم معاك بالأحاسيس، وده مش مكانها الحقيقة

حابب اقولك حاجة اخيرة

ان طريقة العرض دي بتقول من غير ما انت تقول

حجم المجهود، الريسيرش، الرؤية، والتنفيذ اللي انت قمت بيهم في الخلفية

عشان تعرض الكوبي دي او الكامبين دي في النهاية

انت بتبيع ايه؟ 🏗️

براند استراتيجيز#

عزيزي للمرة اللي مش فاكر كام

محتاج نتكلم اكثر عن نقطة مهمة جدًا ببيع اي منتج

تحت مظلة اي براند هتشتغل عليه في حياتك

وهي الانطباع

انا عارف ان منتجك حلو، وسعره تنافسي جميل

وجودته مفيش منها اتنين

ولكن لو مش ده الإنطباع اللي واصل للمستهلك النهائي

فـ اي حاجة بتعملها وهتعملها مش بتغير الانطباع ده، ملهاش لازمة الحقيقة

وعشان كده انا عايزك تفكر في حاجتين

سواء كنت صاحب براند او مسوق مسئول عن براند

ان الانطباع عند جمهورك المستهدف، المفروض يكون نوعين

نوع ايجابي: وده اللي انت عايزه يتكون عند جمهورك

نوع سلبي: وده اللي انت مش عايزه يتكون عندك جمهورك

المتحكم في تكوين اي نوع من الاتنين دول، هو انت في النهاية

اه والله بتكلم معاك بجد

وعشان كده انا عايزك تجيب منتجك تحطه في النص

وعلى شماله تكتب ايه الانطباع الايجابي اللي عايز تكونه عند جمهورك

وعلى يمينه تكتب ايه الانطباع السلبي اللي مش عايز تكونه عند جمهورك

زي ما انت شايف في الصورة دي كده

بعد بقى ما تخلص التمرين ده

راجع كل فيدباك وكل ريفيو وكل رأي واحد من عملائك قاله عن منتجك او عن البراند بتاعك

وشوف يا ترى اللي انت عايزه فعلًا واصل، ولا فيه حاجة تانية انت مش واخد بالك منها

ازاي تبقى صانع محتوى مؤثر؟ 🤓

كريتيف انتربرينور#

"على الرغم من وجود قدر لا بأس به من الكليشيه في جملة " صانع محتوى مؤثر

الا ان ده لا يتعارض مع حقيقة وجود صناع محتوى مؤثرين فعلًا

وان الكليشيه اللي بقى موجود في الجملة دي

بقى موجود بسبب عناصر عبثية كتير اوي الحقيقة

احنا في غنى اننا نتكلم عنها

ولكن انا حابب اقولك انك لو فكرت كده بعمق

في مين فعلًا صناع المحتوى المؤثرين في حياتك انت

وجربت كده تفكر بعمق اكتر، هما ليه مؤثرين كده في حياتك

هتكتشف ان فيه ٣ عناصر بيقدموها في المحتوى بتاعهم هما سبب التأثير ده

وعشان توصل لمرحلة انت كمان ممكن تكون فيها بعدين صانع محتوى مؤثر

محتاج تاخد بالك من الـ ٣ عناصر دول

صوت واضح وعالي 📢

الصوت هنا مش معناه بالضرورة صوتهم في الفيديوهات او في البودكاست مثلًا

لأ، الصوت هنا هو وصف للشخصية وطريقة التفكير، وطريقة تكوين الأراء

والديناميكية اللي بيتم عمل الشغل من خلالها

كل العناصر دي بتقع تحت بند الصوت

وعشان كده لو جيت تبص على صناع محتوى انت بتحبه ومتأثر بيه

هتلاقي ان صوته واضح وعالي في اي حاجة بيعملها

حاجة كاتبها، حاجة مصورها، او حاجة مسجلها

قصص حلوة وذات صلة ✍️

صانع المحتوى المؤثر، هو اللي يقدر يحكي قصص المتعرض ليها

يحس انه شايف نفسه فيها

صانع المحتوى المؤثر هو اكتر حد ممكن يكون فاهم انت بتمر بـ ايه

وده عشان هو مر باللي انت بتمر بيه حاليًا قبل كده

وما بين اللي مر بيه واللي انت بتمر بيه، هو قادر يحكيلك قصة تساعدك

أفكار كبيرة وخارجة عن المألوف للعين💡

وعشان تفهم النقطة دي بشكل اوضح

انا عايزك تفكر في ٣ صناع محتوى في نفس الكاتيجوري أو المجال

مهم طبعًا انك يا تكون بتتابعهم، او بتفضلهم

او عارف عنهم يعني بشكل تراكمي

بعد كده اسأل نفسك، مين اكتر واحد فيهم أفكاره اكبر؟

مين اكتر واحد فيهم فكرته حتى لو بتتكلم عن موضوع مألوف

ولكن هو بياخدها إلى عمق مختلف؟

اهو الشخص اللي جه في بالك ده حالًا

هو صانع محتوى عنده عنصر تأثير قوي جدًا

لإن صانع المحتوى من النوعية دي

بيبقى عنده عمق في الخبرة والمعرفة مختلف عن اللي حواليه

وشاءت الأقدار ان النوع ده من الخبرة والمعرفة

هو اكتر نوع انت بتحبه وبتدور عليه

فـ اذا كنت بتخطط الى انك في يوم من الأيام

تبدأ رحلتك الانتربرينورية من خلال صناعة المحتوى

وبتسعى الى التأثير بشكل ايجيابي

خد بالك من العناصر دي

قصة سبوتيفاي اللي متحكتش 🎥

مسلسل عجبني#

وهي ما اتحكتش

عشان فيه معالجة درامية للقصة ومش كل الأحداث حصلت بالظبط

ولكن ده ما يمنعش ان المسلسل ده من نتفليكس كان اكتر من هايل الصراحة

The Playlist: Spotify Untold Story

المسلسل هياخدك في رحلة مكونة من ٦ حلقات

هيحكيلك فيه قصة إنشاء ونجاح شركة سبوتيفاي

ولكن بتويست مختلف الحقيقة

لأنك في كل حلقة هتكمل في القصة من منظور ٦ أشخاص مختلفين

وهما صاحب الرؤية، الصناعة، القانون، المبرمج، الشريك، والفنان

وعشان كده انت كل حلقة هتلاقي نفسك داخل القصة من باب ورؤية مختلفين تمامًا كل مرة

هل أنت دودة كتب؟🎙️

بودكاست عجبني#

هو ده سؤال وفي نفس الوقت بودكاست الحقيقة

عشان لو انت دودة كتب وبتحب الكتب قد عينيك

فـ واحد من البودكاستس اللي مش واخدة حقها الصراحة في الاستماع وانها تتعرف

:هو بودكاست

Bookworm Podcast

جو ومايك اصحاب البودكاست بيقروا كتاب كل اسبوعين

وفي كل حلقة بيطلعوا يتكلموا عن الكتاب ده

وايه الطرق اللي يقدروا يطبقوا من خلالها اللي اتقال في الكتاب ده

واحد من اسباب حبي للبودكاست ده

هو احساس اني هسمع حاجة عن كتاب وانا مش مكون رأي عنها مسبقًا

وده بيخليني اكتشف كتب جديدة من منظور ناس تانية

قبل ما اقرر انا اشتري الكتاب ده في النهاية

❗اكتر من ١٩ طريقة تكتب بيهم الكوبي بتاعتك❗

بونص#

ماذا لو قولتلك على إطار

تقدر من خلاله تكتب كوبي بـ ١٩ طريقة مختلفة

يسمحولك بعرض الفكرة الأساسية في الكوبي دي بكذا شكل مختلف

ويسمح لك كمان تعمل تيست واختبار اكبر على اللي انت كتبته

لحد ما تعرف انهي طريقة جابت اكتر مع العميل اللي انت بتكلمه؟

لو حابب تاخد الـ ١٩ إطار دول في ايميل بونص زيادة في الانبوكس بتاعك مني

شارك النيوزليتر دي مع ١٠ من زمايلك شايف ان محتوى النيوزليتر ممكن يفيدهم

:وخليهم يشتركوا من اللينك اليونيك بتاعك اللي هتلاقيه لما تدوس هنا

وبكده خلصت نيوزليتر انهاردة🤙

اتمنى تكون اتبسطت واستفدت من ايميل انهاردة حقيقي

ويهمني طبعًا اني اعرف ايه اكتر نقاط عجبتك في ايميل انهاردة

ايه اللي عايز تشوفه الفترة القادمة برضه في النيوزليتر وهكذا

اعملي منشن على فيسبوك باللي عجبك واللي عايز تشوفه

وانا هرد عليك بنفسي على طول

اشوفكم يوم الأحد القادم ان شاء الله