اللي جابك هنا مش هيوصلك هناك

،قرائي الاعزاء

اهلًا وسهلًا بيكم في نسخة جديدة من النيوز ليتر

:اللي من خلالها بشارككم ٣ نصائح في

الكوبي رايتينج ✏️

البراند بيلدينج 🏗️

الكريتيڤ انتربرينيرشب 🤓

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡

…فـ يلا بينا نبدأ بـ أول ٣ نصائح

معادلة هتغير نظرتك✏️
للكوبي رايتينج تمامًا

كوبي رايتينج#

اعتقد ان فيه ما بيننا المساحة اللي تخليك ما تضايقش مني

لما اقولك انك لو عرضت عليا كوبي ابص عليها واقيم طريقة كتابتك ليها

هرد عليك واقولك اني مش مهتم اقيم طريقة كتابتك

ولكن انا مهتم اقيم كام عنصر تانيين الحقيقة

واشوفهم اصلًا موجودين في الكوبي بتاعتك ولا لأ

خصوصًا لو انت كوبي رايتر بيشتغل في مجال بيزنس

مطلوب فيه تحقيق ارقام في شكل عائد مالي، اشتراكات، او ليدز مثلًا

لو لقيت العناصر دي موجودة هقولك براڤو عليك احسنت

بس لو مش موجودين، هنصحك ترجع تشتغل عليها تاني

:والكام عنصر دول يتلخصوا❗
:في المعادلة دي

وتعالى نشوفها مع بعض بشوية تفصيل

فيه ٧٠٪ من وقتك كـ كوبي رايتر المفروض 👈
تقضيهم في مذاكرة السوق اللي انت شغال عليه

وده معناه ان قبل ما يبقى عندك فايل فيه الكوبي

لازم يبقى عندك فايل فيه إنسايتس بتتكلم عن السوق اللي ذاكرته

ايه المشاكل الموجودة في السوق ده؟

ايه نقاط الألم والتحديات اللي موجودة عن الجمهور في السوق ده؟

الجمهور في السوق ده عايز ايه، وبيدور علي ايه؟

الجمهور في السوق ده لما بييجي يتكلم، بيتكلم ازاي وبيقول ايه؟

فيه ٢٠٪ من وقتك كـ كوبي رايتر بعد كده المفروض 👈
تقضيهم في مذاكرة العرض اللي هتقدمه

وهنا انت محتاج تخطط كويس اوي هو انت عايز تقدم ايه في الكوبي بتاعتك

ايه العرض المثالي اللي شايف انه لو اتقدم في الكوبي

هيبقى مغري جدًا بالنسبة للجمهور في السوق ده وهيبقوا حابين يعرفوا عنه اكثر؟

ايه العرض اللي بيعظم قيمة المكتسبات عندهم، وبيقلل من قيمة الفلوس قصاد حاجة زي كده؟

ايه العرض اللي يخليهم يفكروا انهم فعلًا محتاجين ياخدوه حالًا بدل ما يأجلوه بعدين؟

فيه ١٠٪ بقى واللي هما باقي وقتك 👈
اكتب فيهم الكوبي بتاعتك

صدق او لا تصدق، ايوه

مش من المنطقي انك تبقى بتشتغل في منظومة بتطالب بتحقيق أرقام بشكل مستمر

وانت كمسوق اولًا وكوبي رايتر ثانيًا، مقضي ٨٥٪ من وقتك في كتابة وتظبيط الكوبي

وسايب السوق وديناميكية العرض اللي هتقدمه على جنب

والنقطة دي الحقيقة، بتفكرني بمبدأ عالم الإقتصاد العظيم باريتو

:اللي قال فيه

إن ٢٠٪ من المجهود يؤدي الى❗
٨٠٪ من النتائج

لما تيجي تعكس المبدأ ده على المعادلة اللي قولتهالك

:هتلاقي انك ممكن تكون واقع في حالتين

يا اما انت بتبذل ٨٠٪ من المجهود 👈
بيوصل لـ ٢٠٪ بس نتائج

وده في حالة كونك كوبي رايتر كل تركيزه على كتابة الكوبي وخلاص بشكل حلو ومنمق

يا اما انت بتبذل ٢٠٪ من المجهود 👈
بيوصل لـ ٨٠٪ من النتائج

وده في حالة كونك كوبي رايتر بيطبق المعادلة اللي قولتلك عليها فوق

فـ صدقني مش مهم الهيدلاين❗
الكاتشي اللي هتكتبه

ولا التنسيق الجميل اللي هتعمله في الكوبي

ولا اللغة الرائعة وخلو الكوبي من الأخطاء الإملائية

ولا احساسك واحساس زميلك تجاه الكوبي بتاعتك

كل ده مش مهم لو انت مش مذاكر سوق في بيزنس بيطالبك بتحقيق أرقام ومبيعات

ومذاكر ديناميكية العروض اللي هتشتغل عليها

ازاى تحل مشاكل البراند 🏗️
بطريقة ممنهجة؟

براند استراتيجيز#

فيه ٩ خطوات لو طبقتهم زي ما انا بقولك بالظبط

في كل مرة هتواجه مشكلة في البيزنس أو البراند اللي انت مسؤول عنه

حياتك في الشغل هتبقى احسن ✅

عقليتك هتبقى افضل ✅

تطورك في رحلتك المهنية هيبقى اسرع ✅

وانا مش عارف هل انا حمستك زيادة عن اللزوم ولا لأ

بس خليني كمان اقولك ان بتطبيقك للـ ٩ خطوات دول

انت هتحب فكرة ان فيه مشاكل مطلوب نحلها

:ودول الـ ٩ خطوات❗

حدد ايه المشكلة المطروحة المطلوب حلها📌

وهنا الحقيقة الموضوع يتوقف على دورك في منظومة البيزنس عامل ازاي

يعني انت ممكن تكون الشخص اللي عنده اطلاع على المشكلة

بالتالي عنده هدف لحلها

او ممكن تكون الشخص اللي بيتعرف على المشكلة من خلال شخص تاني في المنظومة

في الحالتين، برجاء تحديد المشكلة بشكل واضح للجميع

اذكر الأرقام والحقائق والبيانات📌

مفيش مشكلة بتحصل في البيزنس او البراند بشكل عام

بيتم طرحها عشان احنا حاسين انها موجودة

او بيتم طرحها عشان احنا شايفين انها موجودة

سواء انت شايف مشكلة او حاسس بيها

فـ محتاجين نشاور عليها ونخلي اللي حوالينا يحسوا بيها

من خلال ارقام، او مقارنات زمنية، او اي بيانات بتقول ان فعلًا المشكلة دي موجودة

ابتدي في تجميع الآراء📌

أنت هنا محتاج تسمع اكتر ما تكون بتتكلم، ده لو انت اللي طرحت المشكلة

بس لو انت اللي بتستمع إلى المشكلة محتاج تفكر

انت شايف المشكلة ازاي؟

فريق العمل شايف المشكلة دي ازاي يا ترى؟

هل المشكلة دي اصلًا فعلًا مهمة حتى بعد ما شوفنا الأرقام؟

طب هل حل المشكلة دي دلوقتي فعلًا هيحقق النتايج اللي احنا عايزينها؟

نيجي بقى للبرينستورم او العصف الذهني📌

هنا الحقيقة مقدرش اقولك على قواعد تطبقها أو افرضها عليك

ولكن مدرستي في البرينستورم هو اني بحدد مدة زمنية لكل الموجودين

يطلعوا فيها مقترحاتهم وأفكارهم بناءً على اللي انا قولته فوق ده

كل واحد يروح لوحده يفكر ويشتغل خلال المدة الزمنية دي

بعد كده بنرجع تاني نلم الأفكار دي كلها في مكان واحد

و نبتدي نشتغل عليها

بنشوف بقى ايه مميزات كل فكرة من اللي اتقدموا📌

ليه الفكرة دي منطقية وملائمة للمشكلة؟

ايه اللي يخلي الفكرة دي قابلة للتنفيذ؟

ازاي الفكرة دي هتحل المشكلة فعلًا وتغير في الأرقام؟

وبنشوف ايه عيوب كل فكرة من اللي اتقدموا📌

ايه اللي مش نافع في الفكرة دي؟

ليه الفكرة دي مش هتقدم الحل اللي احنا بنسعى اليه؟

يا ترى هل فيه مشاكل تانية ممكن تطلع بسبب الفكرة دي؟

بعد كده بقى ييجي وقت اتخاذ قرار📌

يا ترى بعد كل اللي عملناه ده، ايه احسن فكرة قابلة للتنفيذ؟

ايه الخطة اللي هنعملها عشان نختبر بيها الفكرة دي اولًا على ارض الواقع؟

نبص بقى على النتائج الأولية📌

هل نتائج خطة اختبار الفكرة على أرض الواقع ماشية بشكل كويس؟

هل خلاص كده احنا تمام جاهزين نطلق الفكرة دي على نطاق اوسع؟

طيب يا ترى لو طلع كل ده لأ، هنعمل ايه؟

هترجعوا تاني لأكتر فكرة مرشحة بعد اللي جربتوها

او هترجعوا تاني للبرينستورم

نفضل بقى دايمًا بنراقب ونعدل📌

لو كل حاجة مشيت زي ما احنا عايزين

محتاجين دايمًا نكون واخدين بالنا من اي تغيرات

بتحصل على أرض الواقع

لإنها ساعات بتكون مؤشر ان فيه مشكلة قادمة في الطريق

جربت تعمل حاجات مملة 🤓
بانتظام قبل كده؟

كريتيف انتربرينور#

وقبل ما تجاوب على السؤال ده في دماغك

اسمحلي اسالك سؤالين كمان

يا ترى لو انت شخص يطمح او بيخطط انه يصنع لنفسه براند

او انه يبتدي ينشر أفكاره اونلاين

او انه يبتدي ينشر خبراته اونلاين ويبني لنفسه بيزنس موديل

ايه الحاجات اللي سهل اوي 🤔
تعملها عشان توصل لده؟

وايه الحاجات اللي سهل اوي برضه ما تعملهاش 🤔
على الرغم من انها هتوصلك لده؟

مش عارف اخدت بالك ولا لسه من اللي عايز اقولهولك

وهو أن معظم الحاجات اللي لو عملتها بشكل مستمر

و هتوصلك في النهاية الى النجاح أو تحقيق هدفك ايًا كان

هي حاجات غير محمسة على الإطلاق

وفيه معظم الأحيان مملة جدًا

وعشان كده، انت محتاج تنتظم في❗
عمل الحاجات المملة دي

وهي دي الحاجات اللي سهل اوي تعملها، بس سهل اوي ما تعملهاش برضه

وعشان ما نروحش بعيد، خليني افهمك النقطة دي اكتر بتطبيقها عليا

واحدة من أكتر الحاجات اللي بحب اعملها في حياتي

هو مشاركة تجاربي وخبرتي بشكل عام معاك

ولكن واحدة من أكتر الحاجات المملة اللي بعملها في حياتي

😄هو اي حاجة متعلقة بوصول المحتوى ده ليك في النهاية

يعني عشان الايميل ده يجيلك كل يوم حد من كل أسبوع

انا بقعد متوسط نص ساعة عشان اكتبه

ونص ساعة تانية انسقه في التول عشان الكلام يطلع مظبوط

الحاجات دي مملة جدًا بالنسبالي

لإن زي ما هي سهلة عليا اني اعملها على الرغم من كونها مملة

إلا أن سهل اوي ما اعملهاش، عشان هي مملة

بس انا لو ما عملتش الحاجة اللي سهلة اوي دي ومملة في نفس الوقت

انت مش هيجيلك الإيميل ده، مش هتسمع البودكاست

😄مش هتشوفني في حتة

كل حاجة صغيرة سهلة مملة هتعملها بشكل متكرر

هتوديك في النهاية الى الحاجة الكبيرة الحلوة اللي انت بتتمناها

الموضوع محتاج منك تبني هذه العقلية

والإستمرار على الحفاظ عليها

طالما اهدافك الكبيرة لسه زي ما هي ولسه ما اتغيرتش

سمعت الحلقة الجديدة🔥
من البودكاست؟

كوبي كاست#

😄 وقد يبدو ان الموضوع فيه اهانة، لكن حقيقي هو مش كده خالص

في الحلقة دي هكلمك عن ٤ نقاط❗
في غاية الأهمية انا محتاجك
تاخد بالك منهم

انت ازاي عندك نقطة عمياء في شغلك، وازاي تحددها؟ 👈

ليه يا ترى رأيك مش مهم وليه رأيك 👈
ممكن يسبب قرارات غلط في البيزنس؟

رأي مين اللي مفروض تاخد بالك منه وتشتغل بناءً عليه؟ 👈

و ٤ طرق تقدر تجيب بيهم الرأي ده وتتعامل بناءً عليهم؟ 👈

😄 حلقة مش كبيرة في المدة الزمنية، ولكن محتاجة ورقة وقلم

اللي جابك هنا 📖
مش هيوصلك هناك

كتاب عجبني#

كلمتين عن الكتاب 📘

الحقيقة انا اول مرة قرأت فيها الكتاب ده

😄كان عشان عنوانه ملفت بالنسبالي مش اكتر

بس محتوى الكتاب نفسه اكثر من رائع وفيه دروس مهمة جدًا جدًا

واحد من اهم المحاور اللي هتاخد بالك منها وانت بتقرأ الكتاب ده

هو فكرة ان اللي بيميز شخصين عن بعض عندهم نفس القدرات والمهارات التقنية

هو سلوكهم وطريقة تعاملاتهم بشكل عام عاملة ازاي

زي انك تكون شخص بتعرف تستمع كويس اوي

او انك بتقدر حد التقدير اللي يستحقه

او ان يبقى عندك القدرة على الإعتذار عند الخطأ

او انك تحدث تغيير لما يكون عندك اصلًا الرغبة في انك تحدث تغيير

أهم الأفكار اللي عجبتني في الكتاب ✍️

تلقيك للمدح بشكل مستمر ممكن يوهمك📌
بأن مفيش منك اتنين، وان كل حاجة سهلة عليك

كل ما ثقتك الزايدة في النفس تزيد بناءً على اوهام📌
كل ما رغبتك في انك تتغير او تتحسن بتقل

وانت بتعمل ليستة للحاجات اللي محتاج تعملها📌
اعمل واحدة كمان للحاجات اللي محتاج تبطل تعملها

لما تيجي تنتقد شغل حد او تعلق عليه📌
اسأل نفسك هل اللي هقوله ده له لازمة ولا لأ

لو انت مقتنع انك ما بتغلطش مستحيل تعترف انك غلطت📌
وده هيخليك غلطان اكتر

لما تعتذر قول عذرًا، انا هحاول اكون احسن 📌
ما تقدمش اعتذار معاه تبرير

لما تستمع الى شخص حاول تحسسه 📌
انه الشخص الوحيد اللي معاك في الأوضة

الكتاب ده لمين؟ 🔎

اعتقد الكتاب ده واحد من الكتب الكلاسيكية اللي ايًا كان مجالك ايه

وايًا كان شخصيتك عاملة ازاي

محتاج تقرأه مرة مرتين كده وتتمعن في الدروس اللي فيه كويس

فلسفلي الموضوع ده🎙

بودكاست عجبني#

😄البودكاست ده لمحبين الفلسفة بدون فلسفة

وعشان كده هو في البلاي ليست بتاعتي

اللي بحبه في البودكاست ده هو ٣ حاجات ما بيتغيروش

اختيار المواضيع نفسها ✅

وجهات النظر المختلفة جدًا عن بعضها ✅

وترشيحات الكتب طبعًا اللي بتتقدم ✅

فـ لو انت او انتي بتحبوا الفلسفة بشكل عام

وحابين تتعمقوا فيها بشكل بسيط بدون مذاكرة

انا ارشح البودكاست ده ليكم

نقطة بس صغيرة كده، فيه مواضيع في البودكاست انا بختلف معاها عادي

ف انا بقول كده عشان محدش ييجي يقولي فيه مواضيع غريبة

😅 لو شايف موضوع غريب، ما تسمعوش عادي

وقبل ما اختم كلامي انهاردة 🤚

لو ده اول ايميل يجيلك مني في النيوزليتر

او ده اول ايميل تفتحه مني اصلًا من شهر ونص

حابب ارحب بيك اولًا

وثانيًا، هسيبلك هنا لينكات لمجموعة من الإيميلات

اللي اتبعتت الفترة اللي فاتت

عشان تبقى تشوفها برضه

لما تدخل عليهم هيطلب منك تسجل❗
دخولك بالإيميل اللي مشترك بيه

اول ما تسجله هيجيلك لينك الأكسيس على الإيميل على طول

:ادخل منه واقرأ الإيميلات دي

انت بقرة ولا اسد؟👈

لمست قشر بيضة قبل كده؟👈

انت محتاج نقطة نظام👈

اليك ٣ تمارين هيخلوك كوبي رايتر احسن👈
بس انت هتكسل تعملهم

وبفكركم جميعًا 🔥

ان فيه بونص جواه ١٩ طريقة تقدر من خلالهم تكتب وتصيغ الكوبي بتاعتك

هيجيلك على الإيميل لو فيه ١٠ اشتركوا من اللينك بتاعك على النيوزليتر

نقطة مهمة جدًا بخصوص اللينك ده❗

اللينك بيحسب المشترك على حسابك 👈
بعد ما المشترك يأكد ايميله

حاول بعد ما تاخده كوبي تبعته زي ما هو ما تفتحوش 👈

لإنك لو فتحت اللينك هيعيد توجيهك على الدومين الأساسي بتاعي

وبالتالي لو خدته كوبي وهو مفتوح وبعته لشخص مش هيتحسب عندك

لما تدوس على الزرار اللي انا سايبهولك ده 👈

هتلاقي انت جبت كام مشترك وفاضلك قد ايه

حاول تعمل بوكمارك للصفحة اللي هتتفتح دي 👈

عشان تبقى ترجعلها كل شوية

وبكده خلصت نيوزليتر انهاردة🤙

اتمنى تكون اتبسطت واستفدت من ايميل انهاردة حقيقي

ويهمني طبعًا اني اعرف ايه اكتر نقاط عجبتك في ايميل انهاردة

ايه اللي عايز تشوفه الفترة القادمة برضه في النيوزليتر وهكذا

اعملي منشن على فيسبوك باللي عجبك واللي عايز تشوفه

وانا هرد عليك بنفسي على طول

اشوفكم يوم الأحد القادم ان شاء الله