،عزيزي المشترك وعزيزتي المشتركة

أهلًا وسهلًا بيكم في البونص التاني من النيوزليتر

من ١٤ سنة فاتت وفي منتصف شهر أكتوبر تحديدًا

كانت بداية دخولي مجال التسويق

وفي الوقت ده الحقيقة انا كنت زي اي حد لسه بياخد خطواته الأولى في المجال ده

معنديش اي عمق معرفي في اي مجال تحت مظلة التسويق

يخليني قادر احدد انا المفروض اعمل ايه او اتحرك ازاي

والإحساس ده كان دافع طبعًا خطير ليا بإني محتاج اذاكر بشكل مركز

وأطبق في اسرع وقت، عشان اشوف انا اتعلمت ايه في النهاية

ولكن في التوقيت ده واجهني❗
مشكلتين كبار جدًا

وعلى الرغم من كبر حجم❗
المشكلتين دول في التوقيت ده

الا اني ممتن اني وقعت فيهم بشكل شخصي الحقيقة

لإن ده بشكل ما أو بأخر اجبرني ارسم طريق تعلمي

لوحدي وبتجربتي الشخصية

وده اللي خلاني بعد ١٤ سنة

وبعد عدد ساعات لا يحصى من التطبيق والممارسة

وبعد قراءة أكثر من ٢٠٠ كتاب ومئات المصادر المختلفة

لسه مكمل على نفس الطريق ده

واللي حقيقة ما بقاش طريق وخلاص

لأ، ده بقى بنية تحتية حجمها كبير جدًا

ولسه الى وقتنا الحالي بيتفرع منها طرق جديدة

وعشان كده انا ✍️
بكتبلك الإيميل ده

على الرغم من انك مش بتواجه نفس المشكلتين اللي واجهوني زمان وانا ببدأ

الا اني عارف انك بتواجه نوعين مختلفين من المشاكل الحقيقة

حاطين قدامك نفس العائق اللي كان قدامي زمان

المشكلة الأولى وفرة المعلومات❗

لو انت لسه بتاخد خطواتك الأولى

او حتى بقالك من سنة لـ ٣ سنين في المجال بتاعك

فـ انا متأكد قلبًا وقالبًا انك مواجهتش صعوبة في انك

تلاقي منصة عليها محتوى يخص مجالك

بس بتواجه صعوبة في انك لسه برضه مش عارف انهي منصة

او انهي مصادر اللي مفروض تركز عليها

خصوصًا ان مع وفرة المصادر والمعلومات

بقى فيه وفرة في المعلومات السطحية وكمان الخطأ

ودي مشكلة كارثية الحقيقة

المشكلة التانية فيك انت❗
عزيزي وعزيزتي

ان انت معندكش صبر، وبتزهق بسرعة

بتاخد خطوة في دقيقة

وتفضل واقف في نفس مكانك شهرين

وبتراكم كل حاجة عليك

وبتكدس المعلومات تكديس قهري

وصدقني وصدقيني انا مش بنتقد حد فيكم

وانما انا بحاول اعرض الحقائق كما هي

عشان لما نحدث تغيير، نحدثه بشكل واقعي

ازاي هنحدث التغيير ده؟ 🔎

من وجهة نظري انت مش محتاج غير حاجتين اتنين بس

محتاج كونسبت تؤمن بيه

ومحتاج اداة تساعدك على تطبيق الكونسبت ده

وإليك الكونسبت اللي محتاج⭐
:تؤمن بيه الأول

مفيش حد هيساعدك تتعلم وتتطور وتنمي مهاراتك غير نفسك

صحيح انت ممكن لما تبدأ تلاقي ناس ممكن تساعدك بشكل ما أو بأخر

بس المساعدة دي ما ينفعش تاخدها كحق مكتسب ومضمون ليك بشكل حصري

هتقدر تاخده زي ما انت عايز طول حياتك داخل المسار المهني اللي انت فيه

كلنا بندخل كل يوم جديد بنفس الـ ٢٤ ساعة هما هما

وكلنا خلال الـ ٢٤ ساعة دول عندنا اولويات في حياتنا

بنتعامل بناءً عليها

فـ لا يجوز ان رحلة تعلمك وتطورك على المدى القصير والطويل

يبقوا مفعول به

والفاعل بتاعه شخص غيرك

اتفقنا؟

اليك بقى الأداة اللي هتساعدك ⭐
:على تطبيق الكونسبت ده

الأداة اللي حرفيًا عايمة على بحر من المعلومات والبيانات

وفي انتظار حد يعرف يسحب منها المعلومات والبيانات دي

بالشكل اللي يفيده في النهاية

فـ لو انت بتستخدم شات جي بي تي عشان يكتبلك حاجة بلغة تانية

او يديلك افكار تنفذها وخلاص، وما خلافه يعني

فـ انت فايتك كتير الحقيقة

لإن شات جي بي تي❗
يقدر يعلمك اي حاجة انت محتاجها

وانا معرفش انت او انتي بتشغلوا ايه حاليًا

ومعرفش خططكم المستقبلية لمساركم المهنى عاملة ازاي

بس اللي انا اعرفه ومتأكد منه حاجتين

إنك لو عارف انت عايز ايه او ناقصك ايه عشان تتطور

شات جي بي تي يقدر يساعدك

وانك لو مش عارف انت عايز ايه بس عايز تتعلم

شات جي بي تي يقدر يديلك خطة تعلم واضحة

مش مطلوب منك غير انك تبقى عارف

ازاي تطلب منه ده بالشكل الصحيح

وده اللي هعلمك ازاى👌
تعمله بالتفصيل

هقدملك من خلال ٦ مواضيع رئيسية

خليط ما بين خلاصة فعالة جدًا

من الاستراتيجيات والخطط اللي انا طبقتها اثناء رحلة تعلمي

ومجموعة من الأوامر اللي هتكتبها لشات جي بي تي

ذات صلة مباشرة بالإستراتيجيات دي

فـ يلا بينا نبدأ رحلتنا

مش كل حاجة مهم تذاكرها ✍️

فيه ١٠٠ الف طريقة تقدر من خلالهم تتعلم مهارة جديدة

او تتعلم مجال جديد، او تطور من نفسك في مجال انت فيه

ولكن ال ١٠٠ الف طريقة دول مش على نفس القدر من الأهمية كلهم

نقطة كمان بقى، انت معندكش وقت اصلًا انك تطبق ال ١٠٠ الف طريقة دول

:وده لو هيفكرنا بحاجة، فـ هيفكرنا بمبدأ باريتو اللي بيقول

إن ٢٠٪ من المجهود يؤدي الى❗
٨٠٪ من النتائج

وده اللي هتعمله مع شات جي بي تي ✅

بمنتهى البساطة انت هتطلب من شات جي بي تي

:انه يديلك خطة تعلم واضحة لمجال ما، بس

وده مثال للأمر اللي انا دخلته👇
:لتعلم البيرسونال براندينج

:ودي كانت اجابة شات جي بي تي👇

بالمناسبة فيه عناصر تانية هو قالها برضه

بس انا اخدت الجزء ده تحديدًا

لإن من خلال مذاكرتك مثلًا للعناصر دي كويس اوي

وفهمك ليها وتطبيقها كويس

هتقدر تقطع شوط كبير في فهمك للبيرسونال براندينج

وهو ده الهدف من ادخل امر مبني على الكونسبت ده

طريقة تانية ممكن تستخدمها ✅
هي المايند ماب

المايند ماب واحدة من اهم الأدوات البصرية

اللي تقدر من خلالها تعرف كل المواضيع المتعلقة بالموضوع الرئيسي

اللي انت عايز تتعلمه

سواء بشكل مباشر او غير مباشر وبالأفرع بتاعتهم كمان

وانا هقولك على طريقة تخلي شات جي بي تي

يعملك بيها مايند ماب عن الموضوع او المجال اللي انت مهتم بيه

تكون متقسمة بشكل يحددلك ايه الأهم ثم المهم ثم الأقل اهمية

:ممكن تكتب امر شبه ده كده👇

:وده كان شكل النتيجة اللي طلعها👇

طبعًا ده جزء منها مش كلها

انت تقدر تاخد المايند ماب دي برضه وتدخلها على اي برنامج ديزاين

وتخرجها في شكل بصري وتبقى موجودة عندك بتعمل تراكينج بناءً عليها

المذاكرة محتاجة جدول ✍️

ماهو مش منطقي بعد ما تعرف انت محتاج تذاكر ايه

هتسيب الموضوع كده لمزاجك ومودك الشخصي

المنطقي هو انك تبتدي تعمل جدول مذاكرة

عشان تبتدي تذاكر الكلام ده بشكل اعمق

ودي حاجة انت تقدر تعملها بسهولة مع شات جي بي تي

بعد ما تعرف انت المفروض هتذاكر ايه

:دخل امر شبه ده كده👇

:وده جزء من اللي هو عمله👇

انا هنا قولتله اني بذاكر بس ساعتين في الاسبوع كل جمعة وسبت

فـ هو اخد الخطة كلها وقسمها على ٨ اسابيع

وحط فيها كمان ساعات للمراجعة زي ما انا طلبت منه

طبعًا خطة المذاكرة دي ممكن تقصر او تطول عن كده

على حسب انت ناوي تذاكر قد ايه

طبعًا انت محتاج مصادر ✍️

😅انا عارف عينيك عمالة تجري بتشوف المصادر فين

بس الحقيقة المصادر المفروض ترتيبها يبقى زي ما انا حاططها كده

بعد ما تطلع بالخطة الأول، وبعد ما تحدد جدول المذاكرة هيبقى عامل ازاي

لما نيجي نسأل شات جي بي تي على المصادر

انا انصحك تسأله فيها بالترتيب اللي انت هتشوفه دلوقتي ده

لإن من وجهة نظري اي ترتيب خارج ده

بيسبب سطحية في الإجابات اللي هتطلعلك

واي مذاكرة خارج الترتيب اللي هتشوفه ده برضه

هتعملك لخبطة ملهاش اي لازمة

:فـ انت هتكتب أمر شبه ده كده👇

:وده اللي شات جي بي تي عمله👇

زي ما انت شايف هو جابلي على كل جزء من الخطة

الكتب والبودكاستس والفيديوهات والتمارين اللي انا طلبتها

طبعًا انت ممكن تطلب منه يحطلك كورسات كمان

وممكن برضه تقوله يقدملك كل الترشيحات الموجودة بفلوس

فـ دي تقدر تتحرك فيها براحتك زي ما انت عايز

وانت بتذاكر ✍️
فيه حاجات مش هتفهمها

وده طبيعي جدًا، ده جزء اصيل من رحلة التعلم

بس انا عايز اقولك ان اي حاجة ممكن تلاقي نفسك مش فاهمها

تقدر تستخدم شات جي بي تي بأكتر من طريقة

عشان يفهمك الحاجة دي بشكل احسن

اول طريقة هي تكنيك فاينمان ✅

ريتشارد فاينمان هو عالم فيزياء مشهور جدًا وصاحب واحد من أشهر الكونسبتس

اللي ليها علاقة بالتعلم وفهم العلم ده وشرحه وتطبيقه

ريتشارد بيقول انك عشان تتأكد انك فهمت معلومة بشكل كامل

المفروض تلاقي نفسك قادر تشرحها لغيرك بمنتهى البساطة

وكان بيقول برضه انك عشان تمرن نفسك على الموضوع ده

:محتاج تعمل الأتي

الطريقة دي ممكن تستخدمها❗
بالعكس برضه

يعني نظرًا لإنك دلوقتي لسه بتتعلم

وفيه حاجات مش فاهمها

فـ انت تقدر تقول لشات جي بي تي يستخدم فاينمان تكنيك

بإنه يشرحلك ايه اللي انت مش فاهمه ده

كإنك انت يعني الطفل اللي عنده ٥ سنين

وشوف هو هيعمل ايه

:يعني انا مثلًا قولتله كده👇

انا هنا كنت بقوله اني مش فاهم الجزء

بتاع اليونيك سيلينج بروربيزيشن في البيرسونال براندينج

ممكن تشرحهولي كأني طفل عنده ٥ سنين

:ودي كانت إجابته👇

وزي ما انت شايف كده

الإجابة اكثر من رائعة الحقيقة

تاني طريقة هي التمرين البصري ✅

جرب تطلب من شات جي بي تي

يديلك موقف بصري كده تتخيله له علاقة بالحاجة اللي انت مش فاهمها

ساعتها ممكن يرسملك موقف او مشهد او حدث معين

متعلق بالجزء اللي انت مش فاهمه عشان تتخيله بشكل افضل

يعني انا اخدت نفس الجزئية👇
:اللي فوق وقولتله كده

:وده كان رده👇

تمرين هايل الحقيقة وهو حط موقف اكتر من ممتاز

تالت طريقة خليه يستفيض ✅

لو افترضت مثلًا وانت بتذاكر من مصدر ما

لقيت حاجة اتقالت انت مش فاهمها اوي

انت ممكن تاخد الحاجة دي كوبي بيست

وتديها لشات جي بي تي

وتطلب منه انه يشرحهالك بشكل اوضح

وده شكل امر ممكن تكتبه👇
:قبل ما تديله الحاجة

رابع طريقة انت اللي تستفيض ✅

ودي ممكن تعملها بعد ما تخلص مذاكرة ومراجعة

جرب تدخل لشات جي بي تي وقوله ده اللي انا اعرفه عن الموضوع

حاول تحلل كلامي وتقولي ايه اللي محتاج يتحسن

وايه نقاط الضعف الموجودة في اللي شرحته

وده شكل الأمر👇
:اللي ممكن تكتبه

كل دي طرق تقدر من خلالها تفهم كل العناصر الواقعة منك

وتقدر كمان من خلالها تكتشف عناصر تانية ممكن تركز عليها

وانت بتذاكر

اطلب بقى منه يشغلك ✍️

انت مش مضطر خالص وبأي شكل من الأشكال

انك تفضل قاعد مستني وحاطط ايدك على خدك

في انتظار فرصة شغل او حد يكلمك

عشان يخليك تطبق اللي اتعملته عليه

انت ممكن وبمنتهى البساطة تطلب من شات جي بي تي

انه يديلك مشاريع وتاسكات تشتغل عليها

وتطبق اللي انت اتعلمته ده فيها

يعني ممكن تعمل👇
:حاجة زي كده

:ودي كانت مقترحاته👇

مش شرط انك تشتغل على كل الحاجات اللي هو هيطلعها

ولكن المقترحات دي فيها حاجات كتير ممكن تفكر فيها

وتبتدي تطبقها بإيدك

وأخيرًا عايزك تاخد ✍️
بالك من الأتي

واحدة من اخطر المشاكل اللي هتواجهها وانت بتتعلم

سواء هتستخدم شات جي بي تي

بالطريقة انا قولتلك عليها دي

او بطريقة تانية غير دي

او هتتعلم بدون استخدام شات جي بي تي اصلًا

على الرغم من قدرات مخك الخيالية على عمل اي حاجة

الا ان في النهاية مخك ده له قدرة استيعاب مقيدة بعدد العناصر

اللي مطلوب منه التركيز عليها في النهاية

لو شتت مخك ونفسك قدام الف حاجة

عشان الاسم انك عايز تتعلم

فـ للأسف انت مش هتتعلم صح

فيه الف مصدر ممكن تتعلم منه

وفيه الفين كتاب ممكن تفتحهم

وفيه مهمات صعبة جدًا، محتاجة تتكسر

عشان تبقى اسهل في التنفيذ

مهم جدًا انك تسهل توزيع الاحمال اللي داخلة مخك

سواء الاحمال دي مذاكرة، مصادر، كتب، او تاسكات حتى

وعشان كده احنا محتاجين❗
نتفق على ٥ قواعد

مطلوب منك تعملهم وانت بتتعلم

:وهما كالأتي

الحاجة اللي هتاخد منك وقت طويل جدًا
قسمها على مدد اصغر

التاسك اللي صعب جدًا تنفيذها
كسرها لتاسكات أصغر سهلة في التنفيذ

لما يبقى قدامك الف طريق
اختار اوضح طريق منهم بالنسبالك دلوقتي

لما يتقدملك ١٠٠ معلومة، اعطي اولوية
لأهم ١٠ فيهم من وجهة نظرك دلوقتي

انت عمرك ما هتعرف اللي❗
ما تعرفوش بالفعل

ما تقعدش تفكر ولا تسأل ايه احسن مصدر اذاكر منه

وايه احسن كتاب اقراه، ولا ايه احسن بودكاست اسمعه

لو انت ما تعرفش حاجة وسألت السؤال ده لشخص ما

عمرك ما هتعرف هو قالك فعلًا اجابة صح ولا لأ

لإنك سألت اصلًا عشان ما تعرفش

فـ بالتالي مش هتعرف هي دي اصدق اجابة ولا لأ

وعشان كده وهفكرك تاني

ابدأ باللي موجود قدامك

لإن مفيش وقت

وبكده خلص بونص انهاردة

اتمنى تكون استفدت منه

😄واتمنى برضه تاني انك تطبق عليه بسرعة

وأخيرًا، طلب صغير❗

زي ما كنت موضحلك من قبل كده

ان النيوزليتر حاليًا بالنسبالي في مرحلة الجروث او النمو

اللي من خلالها انا بحاول اوصلها لأكبر عدد من المسوقين

اللي ممكن يكونوا محتاجين المحتوى اللي بقدمه بداخلها

جزء من الانشطة اللي بتتعمل في الجزئية دي الحقيقة

معتمد عليك انت وقدرتك على مشاركتها مع اكبر عدد من زملائك

ومساعدتك ليا في الهدف ده

بتغير كتير جدًا من الإستراتيجيات اللي انا مخطط اعملها الفترة القادمة ان شاء الله

وبتسهل كمان من فرص حصولك على اي بونص ممكن اقدمه من خلال النيوزليتر

فـ لو حابب تكون جزء فعال من الاستراتيجي دي

هتلاقي هنا لينك ممكن تشاركه مع زمايلك واصدقائك

واعتقد ان احسن طريقة ممكن تفيد بيها حد انت حابه يشترك في النيوزليتر

انك تعرفه ايه اللي هيستفيده منها لما يشترك من وجهة نظرك

❤️ واكتفي بهذا القدر وشكرًا مقدمًا

…احمد العشري