تجربتي مع اداة جوجل الجديدة

،عزيزي المشترك، عزيزتي المشتركة

بشكركم على مشاركتكم للنيوزليتر مع زمايلكم

وبشكركم كمان ان فيه مشتركين جدد انضموا من اللينك بتاعكم

وعشان كده وزي ما وعدت

حابب احكيلكم الأول قبل اي حد تاني

عن تجربتي الجديدة مع التول الجديدة اللي عملتها جوجل

قبل ما ندخل في التفاصيل 🤚

مهم انك تاخد بالك ان فيه ١٠ أدوات داخل التول دي تقدر تستخدمها بشكل عام

وعشان كده احنا هناخدهم واحدة واحدة عشان نفهم كل واحدة بتعمل ايه

وانت ممكن في النهاية تستخدمها ازاي في شغلك

1- Simile

التول دي بتسمحلك انك تدخل كلمة

وهي تحطهالك في جملة فيها تشبيه للكلمة دي بحاجة تانية

او انها تقارن الكلمة دي بحاجة تانية، وفي معظم الأحيان تقدر تتستخدم التول دي

لو انت عايز تحط في الكلمة بتاعتك في جملة فيها تشبيه بلاغي

وفي أحيان اخرى خيالي برضه

:انا دخلت هنا كلمة انتربرينيرشيب او ريادة الأعمال، ودي النتايج اللي طلعتلي

وزي ما انت شايف، النتائج الى حد ما مقبولة

على الرغم من اني حسيت ان التول علقت على حتة الرولر كوستر وكررتها مرتين

وان باقي التشبيهات برضه مش متنوعة الى هذه الدرجة

وده لإن كلمة ريادة الأعمال تقدر تاخدها في تنويعات تشبيهية اكتر من كده

الا ان في المجمل النتائج لطيفة

في درجة حرارة للتشبيه ينفع تلعب فيها بالمناسبة☝️

وهدف درجة الحراة دي انك لما تزودها، درجة الإبداع في التشبيه تزيد

او تقللها فـ درجة الإبداع تقل شوية

فـ انا استخدمت نفس الكلمة اللي فوق في التشبيه

بس عليت درجة الحراة لواحد

:ودي كانت النتايج

😄 وزي ما انت شايف، الإبداع كله في البحر

في تشبيهات حلوة اه

بس كلها محصورة في كاتيجوري واحد

ممكن تستخدم التول دي في ايه؟ 🤔

انا شايف انك تقدر توظفها في حاجتين في شغلك

أول استخدام هي وصف المنتجات بشكل أساسي ✅

وتاني استخدام في الكونتنت كالندر الخاصة بالسوشيال ميديا شانل عندك ✅

2- Explode

التول دي غريبة الحقيقة

لانها بتاخد كلمة منك، تطلع لك كذا كلمة تانيين ليهم نفس طريقة النطق

وفي اوقات كتير نفس المعنى برضه للكلمة الأساسية

وانا بقول عليها غريبة، لإني ما كنتش شايف ليها استخدام ينفع اوي في شغلك

:انا دخلت كلمة موبايل، ودي النتايج اللي طلعتلي

زي ما انت شايف كده، النتائج ماشي حلوة اه

بس ملهاش استخدام اوي ممكن ينفع في شغلك

😄الا لو انت بتغني راب وعايز كلمات على نفس الوزن والقافية

او بتكتب اغنية لمنتج مثلًا أو خدمة

3- Unexpect

التول دي بقى هتطلعلك تغيير في الأحداث وبلوت تويستات ممكن ما تخطرش في بالك

وبما اني بشرب قهوة حاليًا وانا بكتب الايميل ده ف قولتله كده

:ودي كانت النتايج

ولا نتيجة من دول كنت متوقع انها هتطلع كده بصراحة

وكنت اتمنى ان النتائج تكون اطول من كده شوية في التول دي

عشان اشوف هيروح بيها لحد فين

ممكن تستخدم التول دي في ايه؟ 🤔

طبعًا لو عايز تستخدم ستوري تيلينج في الكوبي او الكونتنت بتاعك ✅

او لو هتكتب وصف لمنتجاتك بطريقة مضحكة وخفيفة الدم ✅

4- Chain

التول دي بتديك سلسلة من الكلمات اللي ينفع تبقى مرتبطة بالكلمة اللي انت هتدخلها

بس فيه تويست كده صغير

تاني كلمة بتطلع هي مرتبطة ب اول كلمة دخلتها

تالت كلمة بتطلع هي مرتبطة ب تاني كلمة طلعت

وهكذا بقى

:ف انا هنا دخلتله كلمة قلم، ودي كانت النتايج

ممكن تستخدم التول دي في ايه؟ 🤔

لو عايز تعمل خريطة ذهنية الأول قبل ما تكتب عن منتج او خدمة ✅

التول دي هتبقى لطيفة جدًا ليك ✅

او لو عايز تعمل عصف ذهني قبل ما تكتب قصة مثلًا او سكريبت ✅

ممكن تفيدك برضه

5- POV

ودي تول بتديك وجهة نظر او رأي سواء عن شخص او موضوع ما ايًا كان ايه هو

:ف انا اختارت البيرسونال براندينج، ودي كانت النتايج

النتايج مقدرش اقول انها رائعة

ولكنها لطيفة

خصوصًا لو انت مش عارف تكتب موضوع من انهي زاوية، او انهي سياق

6- Alliteration

أو الجناس

التول دي بتديلك قائمة كده من الكلمات

بخصوص الكلمة اللي انت مدخلها

وكلهم بيبتدوا بنفس الحرف اللي انت هتختاره

أنا دخلتله كلمة جروث ماركتنج

واختارت حرفين

:ودي كانت النتايج

ممكن تستخدم التول دي في ايه؟ 🤔

انا شايف انها مفيدة لأي حد مثلًا عايز يذاكر موضوع معين ✅

وحابب يعرف ايه كل الحاجات المتعلقة بيه من خلال كل حرف

7- Acronym

التول دي هتاخد كل حرف في الكلمة بتاعتك

وتطلعلك عليه كلمة كاملة

لما تقراهم جنب بعض، هتلاقيهم شرح الكلمة الأساسية اللي انت دخلتها

انا دخلت للتول كلمة بوهو

:ودي كانت النتايج

ممكن تستخدم التول دي في ايه؟ 🤔

لو عايز تعمل تاج لاين او سلوجان مثلًا ✅

8- Fuse

التول دي بتربط كلمتين ببعض حتى لو مش شبه بعض في المعنى

انا هنا دخلتلها كلمتين هما الكتاب والباور بانك

:ودي كانت النتايج

😄 هناك قليل من الأڤورة، بس بشكل عام تول لطيفة

ممكن تستخدم التول دي في ايه؟ 🤔

انسب استخدام ممكن يكون في وصف المنتجات ✅

9- Scene

التول دي حلوة، لإنها بتديك تفاصيل حسية لمكان او حدث ما على حسب انت مدخل ايه

انا دخلتلها كتابة نيوزليتر

:ودي كانت النتايج

ممكن تستخدم التول دي في ايه؟ 🤔

ينفع تستخدما لو هتحكي قصة او بتهيأ المتلقي لمشهد معين في دماغك ✅

10- Unfold

انا وصف التول اللي هما كاتبينه ده مفهمتوش من اول مرة الحقيقة

بس لما جربتها، عرفت انها بتديك الكلمة بتاعتك في جمل ينفع الكلمة بتاعتك تتحط فيها

:انا دخلت كلمة كونتنت، ودي كانت النتايج

ممكن تستخدم التول دي في ايه؟ 🤔

الحقيقة مش شايف ان ليها لازمة اوي ليك تستخدمها

الا لو عايز تطلع منها كونسبت جديد

بس ساعتها هتبقى ملزم بإنك تشرحه بطريقتك ومعالجتك

لإن التول مش هتفيدك بحاجة

خلاصة التجربة❗

انا شايف في المجمل ان مجموعة التولز دي

ممكن تستخدمها لو عايز تعمل برينستورم بشكل عام

وشايف برضه انها مش اداة بشكل عام بقى ينفع تعتمد عليها اوي في شغلك

حابب انوه برضه ان درجة الحرارة الخاصة بكل تول تقدر تلعب فيها براحتك

وانا لما عملت كده، كان بيحصل فرق كبير في النتائج

بس مقدرش اقولك انهي درجة حرارة احسن الحقيقة

دي محتاجة المدخلات بتاعتك انت

😄وبس كده

اتمنى تكون خدت فكرة كويسة عن الأداة 🤙

ولو حابب تشاركني رأيك

او عندك اي حاجة حابب تقولهالي

تقدر ترد على الايميل ده على طول

وانا ان شاء الله هشوفه على طول

لو شايف ان المحتوى اللي هنا ممكن يفيد زميلك او دايرتك

هكون مبسوط جدًا بإنك تشارك النيوزليتر معاهم

شكرًا