- Ashpen Newsletter
- Posts
- ازاي تبقى بات مان؟
ازاي تبقى بات مان؟
حتى لو مش اسمك بروس واين
![](https://media.beehiiv.com/cdn-cgi/image/fit=scale-down,format=auto,onerror=redirect,quality=80/uploads/asset/file/1ce25314-5798-4909-bcf2-e8947db8af45/Modern_Typography_Black_Friday_Sale_Poster__Email_Header_.jpg?t=1722007269)
Creator Letter Email
،عزيزي وعزيزتي
اسمحوا لي في بداية الأمر
ونظرًا ان عنوان الإيميل ما يكفيش اللي انا كنت عايز اكتبه
ولتحقيق نوع من المساواة برضه
أعيد السؤال اللي في العنوان بشكل أعم
وهو ازاي تبقى بات مان
حتى لو اسمك مش بروس واين؟
او ازاي تبقي ووندر وومان
حتى لو اسمك مش ديانا برينس؟
اما بقى لو مش عارفين مين الناس دي في المطلق
😄 فـ ده معناه يا اما انا بقيت عجوز شوية
يا اما انتم كبرتوا في سياق زمني
لم يسمح ان يبقى عندكم سوبر هيرو مفضل او كده
وعشان سياق الايميل ما يبوظش
انا اتمنى ان السببين ما يكونوش موجودين الحقيقة
😄 واننا كلنا نبقى عارفين عادي مين بات مان ومين كات وومان عادي
طيب جميل اوي لحد كده
بس برضه ممكن واحد او واحدة دلوقتي بيفكروا ويقولوا
ماشي احنا عارفين بات مان وكات وومان
بس الحقيقة احنا مش مهتمين خالص لا اننا نبقى ده
ولا اننا نكون شبه دي
ايه الغرض من طرحك لسؤال زي ده في المقام الأول؟
وده سؤال منطقي وفي محله طبعًا
بس مضطرين نكمل شوية في الإيميل عشان نلاقي الاجابة
الموضوع كله بيبتدي من عند سؤال تاني الحقيقة
وده سؤال من الأسئلة اللي بتتبعتلي كتير جدًا
وهو انا عندي مشكلة كبيرة في اني انشر المحتوى بتاعي اونلاين
وببقى شايف او شايفة ان انا معنديش حاجة اقولها
وببقى خايف او خايفة من رد فعل الناس تجاه اللي ممكن اعمله ده
وفي اوقات كتير بنشوف ان شخصيتنا شخصية عادية جدًا
ويمكن اقل من العادية لدرجة ما تسمحش اننا نعمل حاجة زي كده
فـ انت ايه رأيك؟ وتنصحنا بـ ايه ممكن نعمله؟
طبعًا انا مش شايف رد فعلكم الحالي عامل ازاي الحقيقة
بس انا اظن ان فيه جزء مش قليل وهو بيقرأ اللي انا كتبته
قعد يهز دماغه ويكلم نفسه في صمت
ويقول ايوه انا عندي نفس المشكلة دي
وفي واقع الأمر ساعات الصوت النفس ده بيبقى زيادة عن اللزوم
وبيفضل يجري ورا البني الأدم ويطارده في كل مرة يفكر فيها يقوم يعمل حاجة
لحد ما يوصل لمرحلة انه ما يعملش حاجة خالص
وفي احياناً اخرى، الصوت ده بيبقى عامل زي صوت النموسة كده
قاعد يعمل زن في دماغك في المرحلة اللي اهو خلاص هتبتدي
فـ تيجي تقول خلاص مش مشكلة هأجلها لوقت تاني
وتسويف يجيب في تسويف
والمحصلة صفر في النهاية
والحقيقة ان في كلا الحالتين، في حاجتين
واحدة منهم بتحصل
والتانية لسه هتحصل
وبشكل ما او بأخر مخك هيحاول يخليك ما تركزش فيهم
وبما اني في الحالة دي عدو مخك
:اسمحلي اقولك ايه هما
لو انت شايف نفسك مش كويس كفاية
هتلاقي نفسك في محنة شديدة في كل ما يتعلق بترويج شغلك وشخصيتك
ولو ما روجتش لشغلك وشخصيتك صح
هتلاقي صعوبة شديدة في تحقيق اللي بتحاول توصل اليه
ولو وصلت للنقطة دي
فـ انا اظن انت فهمت ايه المغزى من السؤال
اللي انا طرحته في عنوان ايميل النهاردة
وبما انك فهمت المغزى
فـ اسمحلي اقولك الحل
وهو انك تخلق نسخة موازية لنفسك
بتتشارك نفس قيم وأفكار نفسك الأصلية
عندها نفس الأهداف اللي عند نفسك الأصلية
ولكن الحقيقة بتتصرف بشكل مختلف تماماً عن نفسك الأصلية برضه
والموضوع لوهلة قد يبدو معقد جدًا
او حاجة صعب تنفيذها على أرض الواقع
بس انا عايز اقولك ان الموضوع ده
ناس كتير جدًا طبقته في حياتها
ويمكن عملوا ده وهما مش قاصدين ده بشكل استراتيجي
وفي حالات كتير عملوه لغرض يحقق أهداف معينة في دماغهم بس كده وخلاص
ونجحوا في النهاية في الوصول للي هما عايزينه
تعالى مثلًا نشوف قصة خريستو ستويتشكوف
![](https://media.beehiiv.com/cdn-cgi/image/fit=scale-down,format=auto,onerror=redirect,quality=80/uploads/asset/file/bea24c1c-86ad-4b89-8859-7f6bc5d95a6c/9786191515455.jpg?t=1722005764)
Hristo Stoichkov
ستويتشكوف واحد من أشهر أساطير نادي برشلونة في التسعينات
وكان هداف كأس العالم نسخة ٩٤
ووصل مع المنتخب البلغاري ساعتها للمركز الرابع في النسخة دي
واخد جائزة الحذاء الذهبي وكمان الكرة الذهبية في نفس السنة
وكان واحد من اللعيبة الفراودة اللي تحب تتفرج عليهم وهما ماسكين كورة الحقيقة
وانا عارف ان كل ده كلام ممكن ما يكنش له معنى لجزء كبير من اللي بيقرأ دلوقتي
بس انا بقوله عشان نبقى فاهمين بس ان الراجل في لغة الكورة، واحد من العظماء
ستويتشكوف في كتاب السيرة الذاتية بتاعته كان بيحكي ويقول شئ في غاية الأهمية
:تعالوا نشوفه مع بعض
انا في الشغل كنت بلبس ماسك او قناع خالص بالشغل بس”
سواء خارج التمرين او داخل التمرين او في الملعب في الماتشات
دايمًا كنت بظهر بشكل أني غضبان جدًا واجريسف كده
…مع اني ساعتها ممكن مكنش كده عادي
بس الماسك ده كان دايمًا بيحميني من اي حاجة لها علاقة بالميديا والأعلام
وفي اوقات كتير كان بيجنبني مشاكل كتير ممكن تحصل في الملعب مع اللاعيبة
“وده كان بيديني حرية اني اتحرك واتصرف بشكل عام بشكل احسن
زي ما انت شايف كده
اللي كان بيعمله ستويتشكوف هو انه خلق نسخة موازية لنفسه
شبهه في كل حاجة، عندها نفس المهارات مفيش حاجة اتغيرت
بس النسخة دي لابسة ماسك بيتصرف بالشكل اللي يخليه مرتاح
في الحاجة اللي بيعملها
ستويتشكوف مكنش يعرف حاجة عن البيرسونال براندينج
مكنش شخص تكنيكال عنده مجموعة من التجارب عايز يشاركها مع الناس
كان لعيب كورة، عايز يدي اللعبة كل ما عنده بالطريقة اللي تريحه
بالطريقة اللي تخليه يعرف يدي الحاجة حقها
عندك مثلًا برضه جاميرا بورلي
![](https://media.beehiiv.com/cdn-cgi/image/fit=scale-down,format=auto,onerror=redirect,quality=80/uploads/asset/file/7de72c8b-360d-4d77-82cd-69c30999bbea/Jamira-Burley.jpg?t=1722005998)
Jamira Burley
وجاميرا الحقيقة حكايتها حكاية فريدة من نوعها، على الأقل بالنسبالي
لإني عرفت عنها من خلال فيديو كانت نزلته على تيكتوك
بتحكي فيه حاجة معينة كده
جاميرا بنت كانت بتشتغل في التيك انداستري لسنين كتير جدًا
وكان عندها سر كبير اوي، محدش كان يعرف عنه اي حاجة
لحد ما هي قررت تطلع وتبوح بهذا السر
:تعالوا نشوف ايه سر جاميرا
على مدار ١٠ سنين فاتت، انا كان عندي مساعد اسمه مات”
بيرد على الايميلات نيابة عني
بيتفاوض على أسعار الشغل مكاني
بيرتب مواعيد الاجتماعات كأنه فاتح الكاليندر بتاعتي
بيوافق على العروض المناسبة ليا
وبيرفض العروض اللي مش هتقدملي حاجة جديدة
الفكرة بس ان مات ده مزيف ومش حقيقي
وان انا مكنش عندي مساعد من اساسه
وانا اللي كنت بعمل كل حاجة تحت اسم مات ده
نظرًا لأني بنت سمراء بتشتغل في التيك انداستري
فـ الشخص الوحيد اللي ممكن يبقى متقبل حاجة انا بقولها
هو انا شخصيًا الحقيقة
بس الناس ابتدت تعاملني بـ احترام اكتر
لما فكروا ان فيه مساعد ليا بيرد على الايميلات بتاعتي
مع اني انا اللي كنت برد عادي
وعشان كده انا قررت اعمل مات
الناس بتثق في مات اكتر من ثقتها فيا
لما فكرت ان عندي مساعد اسمه مات
الناس شافت اني بروفيشنال جدًا جدًا
عشان مات المساعد بتاعي
مات خلاني اتكلم واتفاوض بثقة اكبر بكتير
“من اللي كانت عندي وانا لوحدي
وعلى الرغم من ان فيه جانب حزين في القصة دي الحقيقة
وممكن الحزن الأكبر فيه له علاقة بالعنصرية بشكل ما او بأخر
الا ان جاميرا قدرت توظف ده لصالحها
جاميرا قدرت توظف قناع مات في انها تحقق اللي هي عايزة توصل اليه
جاميرا خلقت لنفسها نسخة موازية اسمها مات
فـ ازاي انت كمان تخلق نسخة موازاية لنفسك يا ترى؟
وانا هنا مش بقولك تعمل زي جاميرا
او تعمل زي ستويتشكوف
بس انت كمان تقدر تستغل السياق ده لصالحك
عشان توصل للي انت عايزه
عشان تروج لأفكارك
عشان تسوق لنفسك
عشان اي حاجة انت بتفكر فيها لنفسك الحقيقة
وعارف ايه الممتع في الموضوع ده كله؟
انك تقدر تحققه من خلال ٣ خطوات بس
مش اكتر، ولا اقل
:تعالى بينا نشوفهم
اعمل ليستة فيها افضل حاجات فيك
او افضل حاجات انت عملتها او حققتها
الانجازات اللي انت فخور بيها
أفضل صفات الناس اللي حواليك بتوصفك بيها
النجاحات اللي حققتها
التجارب اللي مريت بيها
حرفيًا اي حاجة لها علاقة بيك تقدر تستخدمها لصالحك
اعمل ليستة فيها قصص من حياتك
قابلة للحكي من خلال نسختك دي
وانا هنا مش قصدي انك تألف قصص
بس كل شخص فينا ممكن يكون عنده كمتوسط كده
تقريبًا من ٣-١٠ قصص وصلته للنقطة اللي هو فيها حاليًا
الفكرة كلها ان في العادي انت مش بتصحى كل يوم فاكرهم
بس لما تحط سياق لمخك بالشكل ده
هتجبره انه يفتكر انت وصلت للنقطة اللي انت فيها حالًا ازاي
والأهم من كل ده، ان معظمهم هيبقى قصص
اكتب القصص دي عندك وحطها قدامك
لإن دي القصص اللي هتحكيها وتقوم بها اسمك لما تبتدي
اكتب أفعال افضل نسخة منك هتكون بتعملها
النسخة دي هتكون بتعمل ايه؟
بتدي اولويات لإيه في حياتها؟
بتتكلم ازاي؟
بتكتب ازاي؟
بتسوف بنسبة قد ايه؟
معيوبة بنسبة قد ايه؟
مثالية لأنهي درجة؟
نسخة منغلقة على نفسها؟
نسخة مفتوحة للكل؟
بتسعر نفسها ازاي؟
بتوافق على ايه؟
بترفض ايه؟
خلصت؟
الف مبروك
انت خلصت النسخة أو البيرسونا الموازية ليك
اللي تقدر تاخد اكشن، انت ذات نفسك بقالك كتير مش عارف تاخده
مش فاضل غير انك تبتدي
انا عارف انك كويس
وعارف كمان انك عارف جواك في معظم الأحيان انك كويس
بس معرفتك لده لوحده مش كفاية لو أهدافك كبيرة
الأهداف الكبيرة بتبقى مستفزة للبني ادم انه يتحرك
وفكرة انك لسه متحركتش، ده مش عيب
يمكن انت محتاج تضحك على مخك
وتخلي نسختك الموازية هي اللي تُستفز وتتحرك
واكتفي بهذا القدر في ايميل النهاردة
❤️ والى اللقاء في ايميل جديد ان شاء الله
نزلت الكورس ده ولا لسه؟
Nicolas Cole ده كورس في شكل مجموعة من الإيميلات مقدمة من
بيشرحلك فيها ٥ خطوات تقدر من خلالهم تبقى جوست رايتر بيشتغل فري لانسر
مع اي حد مؤثر في اي صناعة ممكن تتخيلها
كل اللي محتاج تعملها تدوس على اللينك اللي تحت ده
وتروح تكتب ايميلك
وهيتبعتلك بعديها على الإيميل من عنده ان شاء الله
مذاكرة مثمرة للي لسه ما نزلوش
😄 وللي نزله وقاعد بيتمرقع وما فتحوش
Writers making less than $5,000 per month:
Feeling underpaid and overworked?
Still charging per month (or worse, per hour)?
Tired of spinning on the freelancer hamster wheel?
Reply