Personal Branding

،عزيزي وعزيزتي

موضوع البيرسونال براندينج من المواضيع
اللي لما بيتم ذكرها، بنلاقي ناس كتير بتتحسس مسدسها

نظرًا لأنه موضوع شائك وفيه جزء كبير من الناس لا تتقبله
ونظرًا برضه لإن فيه ناس كتير بتتكلم عنه وبتقول اي كلام وخلاص

فـ الموضوع ده الحقيقة يعتبر من المواضيع اللي هي فيها خلل من الناحيتين
من ناحية الأشخاص اللي تدعي الخبرة فيه
ومن ناحية رد فعل الأشخاص اللي بتشوف حاجة ليها علاقة بالموضوع ده

وانا الحقيقة مش موجود هنا عشان اهاجم اي طرف من الاتنين
لإني غير مهتم على الإطلاق بتصحيح وجهات نظر
او تعليم أشخاص تدعي الخبرة المفروض تعمل ايه

وقبل ما تتحسس مسدسك انت كمان من الطريقة اللي بدأت بيها كلامي هنا
افتكر اني بتكلم عن حاجة اسمها بيرسونال براندينج
او براندينج شخصي

بمعنى ان دي وجهة نظري انا الشخصية
المبنية على رحلتي اللي بدأتها من ٥ سنين تقريبًا
في نشر أفكاري والمحتوى اللي عندي اونلاين

وياريت نركز جدًا على جزء رحلتي في نشر افكاري دي
لأني ماقولتش رحلتي في البيرسونال براندينج

عشان كمان شوية هنفهم الفرق الجوهري ما بينهم

بس خلينا نبتدي الأول بقصة صغيرة كده

من يومين كنت بتفرج على بودكاست لـ اليكس هورموزي
وده رائد أعمال غني عن التعريف الحقيقة وواحد من الشخصيات
اللي عندها عقلية تفكير انا بحترمها وبحبها جدًا جدًا

في البودكاست ده اليكس كان بيقول
انا لو صحيت بكرة قولت للناس انا فطرت شوفان
Fuck you!, Oatmeal is Bullshit محدش هيقدر يقولي

بس لو صحيت بكرة قولت للناس كل واحد فيكم المفروض يفطر شوفان الصبح
عشان الشوفان صحي جدًا والمفروض ناكله
Fuck you Alex كلهم هيقولولي

وبمنتهى السلاسة اللي في الدنيا اليكس في المثال ده
قدر يشرح الفرق ما بين انك تطلع تتكلم وانت عندك سلطة وقوة تأثير
مثبتة من خلال بروسيس موجودة عندك من قبل كده

وانك تطلع تنظر على الناس وكإن مثلًا مفيش منك اتنين في الحتة
اللي انت بتتكلم فيها

وانا الحقيقة حابب استخدم المثال اللي اليكس قاله ده
كـ ريفرنس في حاجة لها علاقة بتجربتي الشخصية في نشر أفكاري اونلاين

وهي من أين تأتي السلطة؟

ومن أين تأتي قوة التأثير؟

فيه ٦٠ الف اجابة ممكن من خلالهم نجاوب على السؤالين دول
في حالة ان فيه شخص مهتم يصنع تأثير او يخلق سلطة معينة في مجال محدد
او يشغل حيز في دماغ جمهوره المستهدف بشكل ما هو عايزه

بس انا من وجهة نظري
السلطة والتأثير دايمًا بييجوا اكتر من خلال ٣ أشخاص الحقيقة

Curator اول شخص وهو الـ

وده الحقيقة شخص طريقته في صناعة المحتوى اونلاين
قائمة على نشر أفكار ناس تانية

مش شرط بالضرورة الأفكار دي تبقى بتاعته خالص
ولا شرط بالضرورة برضه انه يعالجها من وجهة نظره
ولا شرط انه يبقى عامل بوزيشنينج لنفسه بإنه الخبير في الحاجة دي

ده الشخص اللي دايمًا تلاقيه بيجمعلك مصادر من كل حتة تجربها انت
او الشخص اللي تلاقيه بيحكي قصص حد تاني ويقولك نتيجتها ايه

وهكذا يعني

 Connector تاني شخص هو الـ

وده الشخص صاحب العلاقات العميقة في مجالات متعددة
Breaking Bad ده شخص عامل زي سول المحامي في مسلسل

اللي تلاقيه دايمًا عارف واحد يعرف واحد صاحب واحد
ممكن يساعد واحد في شغلانة ما
او ممكن يخلص لواحد حاجة هو محتاجها

الناس بتروح للشخص ده عشان يرشحهلم ناس
الناس ساعات بتدي كوميشن للشخص ده عشان يجيب ناس بمواصفات محددة

 Creator تالت شخص بقى هو الـ

ده بقى الشخص اللي بيصنع محتوى وبينشر أفكاره
بناءً على وجهة نظره، بناءً على تجربته  الشخصية

ده شخص لما بيشتغل بيمسك حتة في دماغ جمهوره وبيتربع فيها لوحده كده
ده شخص الناس بتستنى تشوف تجربته، تسمع وجهة نظره
تتفرج علي معالجته للي بيحصل حواليهم

وكل ده بيحصل لإن عنده مجموعة من الأدوات والمهارات، والعقلية
اللي تخليه قادر يشتغل على ده ويستمر في تحقيقه والحفاظ عليه

من وجهة نظري دول الأشخاص اللي بيقدروا يصنعوا تأثير
ويقدروا يخلقوا سلطة بشكل ما او بأخر في مجال ما اونلاين

ويمكن هنا الحقيقة فيه سؤال تالت محتاجين نطرحه

انهي واحد فيهم احسن من التاني؟

الحقيقة انا معنديش اجابة للسؤال ده
لإن الموضوع بيتوقف في الأول والأخر على تجربة الشخص نفسه
وتقييمه لقدراته وحجم مهاراته وخبراته

اللي بناءً عليها يقدر يحدد هو ممكن يتحرك في انهي اتجاه

انا لما ابتديت من ٥ سنين الاتجاه بتاعي كان ومازال هو اتجاه الكريتور
لإن دي الميزة التنافسية الغير عادلة اللي موجودة عندي ومش موجودة عند حد غيري

اه ممكن يكون فيه ناس كتير بتتكلم في نفس الحاجات اللي انا بتكلم فيها
بس مفيش حد بيتكلم عنها زي ما انا بتكلم عنها

هل ده عشان انا احسن منهم شخصيًا وحياتيًا ومهنيًا؟
اكيد لأ

هل ده عشان أنا مختلف عنهم شخصيًا وحياتيًا ومهنيًا؟
اكيد اه

اذًا ده معناه انك في حالة انك مهتم او حابب تبقى شخص مؤثر بشكل ما أو بأخر
انت محتاج تحدد اصلًا انت مين في الناس دي

ومحتاج تحدد بجد فعلًا
لإن ناس كتير بتتبنى اتجاه الكريتورز
وهما مش كريتورز ولا حاجة

 Curators وناس كتير بتتبنى اتجاه الـ
وبينسوا في نص الرحلة انهم كده
وبيتعاملوا انهم كريتورز
فـ بيبان عندهم نقاط ضعف كتير مكنتش باينة من قبل كده

وهكذا بقى

والموضوع ما بيقفش على كده بس الحقيقة

بمعنى مهمتك مش هتخلص لما تختار انت مين في الـ ٣ دول
لإن فيه ٣ عناصر تانيين محتاج تاخد بالك منهم كويس جدًا في شخصيتك
هيأثروا على اللي انت عايز توصله من كل ده

اول حاجة منهم هي التحيز اللي موجود عندك

انت كشخص هتطلع تنشر أفكارك اونلاين وهتتكلم عن الحاجات اللي عندك

يا ترى ايه الحاجات اللي انت مؤمن بيها؟
ايه الحاجات اللي عندك تحيز شديد اليها؟
ايه القيم اللي بتؤمن بها بشكل عام؟

ايه الحاجات اللي انت رافض وجودها؟
ايه الحاجات اللي حابب تعارضها؟
ايه الحاجات اللي عايز تروج اليها؟

ايه الفكر اللي عايز ناس تؤمن به؟
ايه المنهجية اللي عايز الناس تمشي عليها؟

كل دي حاجات انت محتاج تفكر فيها كويس اوي
وتجاوب عليها بجد

ما يبقاش فيها تأليف ومثالية زيادة عن اللزوم
عارف ليه؟

لأن تاني حاجة ايه هو شكل سلوكك يا ترى؟

ودي الحقيقة عاملة زي اسمع كلامك اصدقك
اشوف امورك استعجب

امورك دي هي سلوكك

انت بتتكلم بتقول ايه؟
شكل المحتوى بتاعك بيوصل ايه في النهاية؟
بتتعامل مع جمهورك المستهدف ازاي؟
بتتفاعل معاهم من انهي منطلق؟

من الأخر كده يعني
هل تحيزك طابع على سلوكك
ولا الاتنين كل واحد فيهم في حتة شكل؟

تالت حاجة بقى ايه هو شكل منتجك؟

لو بتعمل كل ده عشان تخلق سلطة معينة
وتشغل مساحة محددة في دماغ جمهورك
وتصنع تأثير بشكل في مجال ما

يا ترى يا هل يا ترى، المنتج النهائي اللي بتقدمه للجمهور ده
طالع من التحيز والسلوك بتاعك؟
ولا طالع من اللاشئ كده؟

لو المنتج بتاعك فعلًا مش طالع من كل حاجة ليها علاقة بالسؤالين اللي فوق
الف مبروك كل حاجة انت حاولت تعملها باظت
والف مبروك انت ظهرت على حقيقتك انك مش كده

بس لو عملت كل حاجة فعلًا بشكل ممنهج من الأول
الف مبروك انت قدرت فعلًا تخلق بيرسونال براند ليك

بس الرحلة لسه مخلصتش
لإن البيرسونال براند عبارة عن بروسيس، مش نتيجة بتوصلها
يعني لو انت شايفها نتيجة، انا اضمن لك انك هتبوظها بعد ما توصلها

لإنها عمرها ما كانت نتيجة الحقيقة

وهنا بس انا عايز ارجع للي قولته في أول الإيميل

فاكر لما قولتلك اني بوصف رحلتي في نشر أفكاري اونلاين
مش بوصفها كرحلة في صناعة بيرسونال براند ليا؟

لإن صدق او لا تصدق
سواء انت قاصد تعمل بيرسونال براند، او مش قاصد تعمله

طالما شمرت ايديك وطلعت تتكلم اونلاين
الناس كده كده هتكون انطباع عنك
الناس كده كده هتربط مجموعة من الصفات بيك
الناس كده كده هتربط مجموعة من الكلمات بيك

شئت أم أبيت ده اللي هيحصل
واي حد ينكر ده فـ هو عايش في مدينة أفلاطونية في دماغه الحقيقة

فـ طالما الموضوع كده، يبقى أضعف الإيمان
والأولى ليك من البداية خالص
إنك تحاول تعرف انت مين وعايز ايه
وبتطمح في تقديم ايه في النهاية
بشكل صادق جدًا وشفاف جدًا ما بينك وبين نفسك

بعد كده امشي على الكلام ده
وخليك صادق في تطبيقه
مرة ورا التانية ورا التالتة

وصدقني مرة واحدة كده هتاخد بالك

أن جمهورك بقى متعلق بيك
وان جمهورك بقى واثق فيك
وان جمهورك بقى يسأل عليك
وان جمهورك بقى يجيبلك جمهور اكبر
وان جمهورك بقى شايفك مؤثر

وساعتها لما ده يحصل

كمل على الطريق اللي انت ابتديت فيه عادي
لإنك ما وصلتش لخط النهاية
ولا هتوصله الحقيقة

يمكن هتوصله لما تبطل اللي انت بتعمله
بس طول ما انت بتعمله
صعب اوي انك توصل لخط النهاية الحقيقة

لو مش مصدق

حاول تراجع كده على مدار ٥-١٠ سنين فاتت
على حسب حجم خبرتك وامتى دخلت المجال

مين الناس اللي كنت بتتابعها؟
مين الناس اللي لسه بتتابعها؟
مين الناس اللي بطلت؟
مين الناس اللي لسه مكملة؟

هل كل الناس دي في مكان واحد في دماغك؟
هل معندكش اي تفضيلات؟
هل معندكش اي انطباعات عن كل واحد فيهم بشكل مختلف؟

وبس كده

اكتفي بهذا القدر في ايميل النهاردة

يمكن انا معرفش عدد الناس اللي هنا اللي مهتمة بموضوع زي ده
بس لو انت مهتم به وعايز تدخل معايا جروب كول
اجاوب فيها عن اسئلتك بخصوص التوبيك ده

اعمل شير للايميل ده واعملي منشن على السوشيال ميديا
او اكتب بوست عنه عادي بس اعملي منشن عشان اشوفه

قولي فيه انطباعاتك
الأسئلة اللي في بالك
الحاجات اللي فكرت فيها بناءً على العناصر اللي ذكرتها في ايميل النهاردة

وانا بعد ما اشوف المنشن هتواصل معاك بشكل شخصي
عشان تدخل الجروب كول دي ان شاء الله

❤️ والى اللقاء في ايميل قادم ان شاء الله