تتعلم ماركتنج من مين؟

In partnership with

،عزيزي وعزيزتي

اعتقد واحدة من أكبر المشاكل اللي بيعملها مسوق لنفسه
خصوصًا لو لسه في بداية طريقه بشكل ما أو بأخر

هو تركيزه الكبير جدًا على معظم النصائح
اللي بيشوفها حواليه في كل حتة
متعلقة بشكل مباشر أو غير مباشر
بالتسويق والاعلانات والدروس المستفادة منها

خصوصًا بقى لما النصائح دي تبقي مبنية
على براندات أو علامات تجارية
حجمها كبير جدًا وبقالها سنين كتير جدًا جدًا في السوق

في واقع الأمر التركيز على النوعية دي من النصائح أو المحتوى بشكل عام
بتخليك كـ متلقي تاخد نصائح تسويقية غير قابلة للاستخدام الحقيقة

مش عشان هي غلط في صميمها
بس عشان ملهاش علاقة باللي بيحصل عندك في شغلك

لإن فيه معظم الأحيان، ويمكن انا اكاد اجزم انك كمسوق دلوقتي
بتشتغل في بيزنس عدد الأفراد اللي فيه ممكن يتعدوا على صوابع ايديك
او بتشتغل في بيزنس بشكل عام من صغير لمتوسط الحجم

وانا متأكد انك برضه بشكل ما او بآخر عملت حاجة من اتنين في الموضوع ده
يا اما جربت تسمع النصائح دي وتجربها، ولقيت مفيش نتيجة عادي
يا اما جالك عطل في دماغك لإنك مش عارف انت ازاي
برضه هتطبق ده في البيزنس عندك

وانت عندك حق الحقيقة
لإن الموضوع عامل كإنك راكب عجلة وبتحاول توصل لتسارع عربية بالعافية كده

وبناءً على ذلك

وبكل أمانة وصدق حقيقي
انت محتاج تهدى شوية على نفسك في موضوع
الاعتماد على مصادر خارجية تتعلم منها
ومحتاج في نفس الوقت تتعلم من خلال تجاربك الشخصية

و انا مش بقول تلغي خالص أي مصادر خارجية
أو نصائح جاية من حتة خارج الإطار اللي انت فيه

بالعكس
وجودها المصادر دي ضروري جدًا لتغذية مخك
بالإنسايتس الجديدة اللي ممكن تعلمك حاجة مختلفة

بس أضعف الإيمان
الحاجات دي لازم تبقى جاية من حالات
شبه الحالات اللي انت مسئول عنها دلوقتي

وعشان كده
انا هقولك على ٣ خطوات استراتيجية
هيعلموك كل حاجة انت فعلًا محتاجها
عشان تعرف تعمل شغل في البزنس
اللي انت فيه يحقق فعلًا نتائج قابلة للقياس

كل اللي مطلوب منك، انك تستوعبهم كويس
تفهم ابعادهم
وتروح تطبق

فـ تعالي بينا نشوفهم خطوة خطوة

هات بيزنس سابق بخطوتين

سابق بخطوتين عن مين؟
عن البيزنس اللي انت مسؤول عنه
ما تروحش تجيب بيزنس سابقك بـ ٦٠ ألف خطوة وتركز معاه

نقطة تانية كمان
مش لازم تروح تجيب بيزنس يعتبر منافس مباشر ليك خالص
يعني حلو بشكل عام انك تبقى محدد مين المنافس المباشر وبيعمل ايه

بس كتر تركيزك مع منافس مباشر وانت مش عارف انت بتعمل ايه
هيخليك تقلده وتعمل شبهه عادي
هيخليك تستنصح وتقول انا هاخد اللي بيعمله بس هخليه
كأنه طالع من قلب وروح البراند بتاعي

وانا الحقيقة بقول تستنصح
عشان انت لو عارف قلب وروح البراند بتاعك بجد
مكنتش هتعمل كده من الأول

انت كل اللي محتاجه تعمله
انك تجيب بيزنس فيه شبه قريب الى حد ما من البيزنس بتاعك

طبعًا انت دلوقتي هتقول ان انا بلخبطك
وهتقول برضه ماهو انا هعرف منين هو فيه شبه قريب ولا لأ

هقولك انا مش بلخبطك ولا حاجة خالص
مشكلتك انك بتوصل لاستنتاجات سريعة وانت لسه ما خلصتش قراءة

عشان اجابة سؤالك ده تكمن ببساطة
في البوزيشنينج اللي عامله البيزنس ده
اي بيزنس لما بييجي يتكلم سواء قاصد او مش قاصد
هتلاقي فيه كلامه نوع من انواع البوزيشنينج
في الكومنكيشن اللي طالع من عنده

:وابسط صياغة للبوزيشنينج ده هي الآتي
احنا بنعمل س لـ ص من الناس

:زي مثلًا المثال ده

لو انت بيزنس اونر وبتدور على حد يعملك خدمات تسويقية
فـ احنا بنعمل خدمات تسويقية مصممة على حسب
حالة ومرحلة البيزنس اللي انت فيه

س هنا هي الخدمات التسويقية المصممة على حسب حالة ومرحلة البيزنس
ص هنا هي البيزنس اونر

شغلك بقى انك تحدد البيزنس، وتشوف الـ س والـ ص بتاعته
وتختار عنصر واحد بس البيزنس ده شبه البيزنس بتاعك

بمعنى لو فيه بيزنس بيعمل س شبهك، ركز معاه
ولو فيه بيزنس بيعمل ص شبهك، ركز معاه برضه
ولو فيه بيزنس الـ س والـ ص شبهك، ما تركزش معاه
عشان ده مباشر وممكن يكون نسخة منك

جمع بقى وفلتر الناس دي كلها بناءً على الطريقة دي
وتعالى روح على الخطوة التانية

فصص التسويق بتاعهم حتة حتة

خلاص انت عرفت هما بيقولوا ايه من الخطوة الأولى
ركز بقى في هما بيعملوا ايه اكتر

وعشان ما تسرحش كتير في المرحلة دي وتحس انك تايه
انا عايزك تجاوب على الأسئلة دي وانت بتشتغل هنا

في انهي مرحلة من تواجدهم الأونلاين قدروا يبقى عندهم ظهور او حضور قوي؟
ايه اللي حصل؟ غيروا ايه يا ترى؟

ايه الفورمات او الاستراكشر اللي اتعمل بيه اكتر كوبيز، كريتيڤر، بوستس بشكل عام
حققت ارقام كبيرة؟

ايه الطرق اللي بيقدموها ومن خلالها بيحصلوا على عملاء جدد؟
ايه هي البروسيس الخاصة بالمبيعات عندهم؟ شكل الفانل عندهم عامل ازاي؟
هل انا محتاج اعمل نفسي عميل عشان اشوفها كلها؟ لو اه اعمل كده

طبعًا مش دي الأسئلة الوحيدة اللي ينفع تسألها لنفسك وتروح تحدد ليها اجابات
تقدر تحط هنا اسئلة زي ما انت عايز
بس الشرط انها تكون طالعة بهدف تفصيص وتحليل الناس دي ناجحة ازاي 

النجاح بشكل عام آثاره بتبقى في كل حتة
الشاطر هو اللي بيعرف يجمعها  صح

بعد كده بقى هنروح للخطوة التالتة

أقف على أكتاف الناس دي

بناءً على كل حاجة انت جاوبت عليها في السؤال التاني
تعالى هنا بقى واستخدمها كمرجع ينفع تطور عليه اللي انت بتعمله في البيزنس بتاعك

:وهنا انت برضه محتاج تجاوب على اسئلة شبه دي كده

هل الناس دي مقدمة منهجية ينفع اطبقها في البيزنس عندي او اعمل شبهها؟
يعني لو اخذنا نفس المثال بتاع البيزنس اونر والاجينسي اللي بتعمل خدمات تسويقية فوق
لو افترضنا انك اجينسي انت كمان بتعمل خدمات تسويقية بس لاصحاب المطاعم
هل اللي بيكلموا البيزنس اونر عاملين كومنيكيشن للقيمة بشكل افضل؟
هل شارحين للبيزنس اونر ازاي من خلال بروسيس واضحة يقدر يحصل على خدمة تحققله ارقام؟
هل البروسيس أو المنهجية دي عاجباك؟
ماذا لو اخدت كونسبت البروسيس ده وطبقته عندك في شرح أنت بتقدم ايه لاصحاب المطاعم؟

هل البيزنس موديل بتاعهم افضل؟
هناخد نفس المثال برضه
هل الاجينسي بتاعة البيزنس اونرز
عاملة مثلًا الخدمة في شكل اشتراك شهري ملوش علاقة بباكدج او حاجة
وفاتحين امتيازات اكتر للعميل من خلال الاشتراك ده؟
هل انت في الناحية التانية بتقدم باكدج وخلاص؟
ماذا لو عملتها اشتراك انت كمان؟
هل فيه فرصة لتنفيذ ده؟

اخدت بالك من الهدف من الأسئلة هنا؟
انت عايز تشوف هما عملوا ايه احسن وعملوه ازاي احسن
وتشوف من اللي اتعمل ده، انت ممكن تتعلم منه ايه
وممكن تطبق منه ايه عندك

دي الطريقة اللي تخليك تتعلم اقل وتعمل اكتر

فيه فرق زمني رهيب جدًا بيعانوا منه مسوقين كتير الحقيقة
ما بين تلقي معلومة او نصيحة جديدة
والذهاب لتطبيقها على أرض الواقع

وده طبعًا راجع لأسباب كتير مفيش مساحة لسردها كلها
بس واحد من أسبابها هو كتر المعلومات اللي بقت في كل حتة

وواحد من اكتر الحلول الفعالة للمشكلة دي
هو تقييد عدد المصادر، وتكبير حجم التنفيذ

وعندما يتعلق الأمر بشغلك، تقييد عدد وحجم المصادر
بيحتم اختيار المصادر الصح
ومفيش احسن من مراقبة السوق لتحديد شكل المصادر
لأن السوق زي ما فيه امثلة سيئة
فيه امثلة كتير جيدة جدًا وناجحة جدًا برضه

 😄 وبس كده

نزلت الكورس ده ولا لسه؟

 Nicolas Cole ده كورس في شكل مجموعة من الإيميلات مقدمة من
بيشرحلك فيها ٥ خطوات تقدر من خلالهم تبقى جوست رايتر بيشتغل فري لانسر

مع اي حد مؤثر في اي صناعة ممكن تتخيلها
كل اللي محتاج تعملها تدوس على اللينك اللي تحت ده
وتروح تكتب ايميلك
وهيتبعتلك بعديها على الإيميل من عنده ان شاء الله

مذاكرة مثمرة للي لسه ما نزلوش
 😄 وللي نزله وقاعد بيتمرقع وما فتحوش

The fastest way to build a lucrative side hustle?

Ghostwriting.

✅ You don’t need any startup capital.
✅ You don’t need a big social audience.
✅ And you don’t need decades of writing experience.

To become a Premium Ghostwriter you only need 5 simple (but oddly specific) skills.

And this FREE email course will give you everything you need to start ghostwriting today.

Get instant access here.