Print Ads

،عزيزي وعزيزتي

ازاي تعمل بورتفوليو وانت ما اشتغلتش قبل كده؟
وازاي تشتغل اصلًا وانت معندكش بورتفوليو؟

سؤالين محيرين جدًا الحقيقة في إجابتهم
ولكن واضحين جدًا في هدفهم

وهو انك طالما بتشتغل في صناعة الكومنكيشن
سواء كتابيًا أو بصريًا
مطلوب منك عمل بورتفوليو
نقطة

المشكلة بقى اننا فاهمين المطلوب ده غلط

نقطة طلب البورتفوليو الهدف منها في النهاية
هى رؤية طريقة تفكير ومنهجية عمل الشخص
صاحب البورتفوليو ده في النهاية

طيب هو احنا عايزين نشوف الطريقة والمنهجية دول من خلال ايه؟
الإجابة هتبقى من خلال شغل نقدر نسميه كومنيكيشن في النهاية

يعني من خلال كوبي بـ هيدلاين وبودي -
من خلال ديزاين -
من خلال رسالة واضحة محطوطة في الحاجتين دول -
من خلال رسالة متحدد طالعة لمين في الحاجتين دول -
من خلال كول تو اكشن واضح في الحاجتين دول برضه -

السؤال هنا اللي انا عايزه اطرحه عليكم
هو مين قال انك عشان توريني طريقة تفكيرك ومنهجية عملك
لازم توريهاني في شغل سابق مع شركة او عميل انت نفذته قبل كده؟

يعني اكيد لو ده موجود يبقى خير وبركة، احب اشوف طبعًا
بس احنا ليها ركزنا على الشكل ونسينا السياق؟

انا عايز اشوف في المطلق عشان اقيمك
واشوف حجم الامكانيات اللي موجودة عندك

فـ انت ليه حكمت على نفسك بالتوهة وسط اول سؤالين طرحتهم؟
:ونسيت تركز في الحقيقة الآتية

وهي انت لو فعلًا عندك مجموعة من المهارات محكومة بمنهجية عمل
فـ انت مش محتاج ثبت ده في فرصة شغل حقيقية

انت محتاج تثبت وتعرض ده في المطلق
حقيقي بقى او مش حقيقي ده مش مهم دلوقتي
المهم تعرض اللي عندك وتظهر ما تمتلكه بالفعل

طيب يا ترى ازاى تعمل ده؟

ارجع كده اقرأ البراجراف التالت في السكشن اللي فوق ده على طول
وتعالى كمل هنا تاني

قرأت خلاص؟
ها؟
لقيت ايه؟

كوبي بهيدلاين وبودي -
ديزاين -
رسالة واضحة محوطة في الحاجتين دول -
رسالة متحدد طالعة لمين -
كول تو أكشن واضح في الرسالة دي -

تفتكر ايه اسهل طريقة ممكن تعمل بيها الحاجات دي؟
انك تروح على اي بيزنس موجود على سطح كوكب الأرض
وتجرب تطبق عليه العناصر دي من وجهة نظرك
بغرض إظهار ما تمتكله

وهنا فيه نقطتين حابب اركز عليهم

اول نقطة ان الحل اللي انا قولته ده
هو الحل الأسهل
لكن مش الحل المثالي

الحل مثالي موجود في عنوان الايميل
في حالة انك نسيت هو ايه
وفتحت الايميل عشان شوفت كلمة بورتفوليو

النقطة التانية بقى واللي ممكن تيجي في دماغك على الحل الأسهل
وهو انت ازاي تعمل ده وانت مش عارف الاوبجكتيف؟
وانت مش عارف مين التارجت اودينس؟
او وانت مش عارف ابعاد البيزنس بشكل عام؟

وهنا اسمحلي اوقفك شوية عن التفكير
لإنك عمليًا وعلميًا قاعد بتخلق في دماغك تعقيدات مفترضة
عشان ما تشتغلش

لإن أول مرحلة في منهجية عمل أي شخص
بيشتغل في مجال التسويق او الكومنكيشن

هو انه يعمل ريسيرش -
ويذاكر السوق -
ويذاكر المنتج -
ويذاكر الجمهور المستهدف -

بعد كده يشتغل بقى 

فـ فكرة انك قاعد بتفكر انا هعمل ده ازاي
مع انك عارف انك لو اشتغلت بحق وحقيقي هتعمل ده كده كده
تخليني اطرح اسئلة كتير عن منهجية العمل بتاعتك

اذًا ده معناه انك تقدر تعمل ده بشكل طبيعي جدًا عادي
حتى لو انت ما بتشتغلش في البيزنس ده دلوقتي
ده حتى الاوبجكتيف ممكن تخمنه من اتجاه الكومنكيشن بتاعهم بشكل عام
وحتى لو مقدرتش تحددها صح مفيش مشكلة
مفيش لوم هيتحط عليك ساعتها يعني ما تقلقش

وبالمناسبة، ده ينطبق على الحل الأسهل
او الحل المثالي
واللي هتكلم عنه دلوقتي

 Print Ads وهو الـ

من ٧٥ سنة فاتوا كده
كان عالم الكومنكيشن والأدفيرتايدينج عايش في عصوره الذهبية الحقيقة
حيث ان ساعتها الاعلانات كانت بتعمل تأثير بحق وحقيقي

وانا هنا مش بتكلم عن التأثير على المستوى الإبداعي -
انا بتكلم عن التأثير على مستوى سلوك المستخدم -
تأثير على مستوى السوق بشكل عام -
تأثير على مستوى صعود وهبوط وسحق المنتجات لبعضها البعض كمان -

وعارفين كل ده كان بيحصل من خلال ايه؟
Print Ads من خلال الـ

:واللي كانت بتبقى في شكل
اعلانات مطبوعة في الجرايد -
في المجلات -
في الشوارع -
على ڤاترينات المحلات -

فيها نفس العناصر اللي انا قولتها فوق بخصوص الكومنكيشن
بنفس منهجية العمل والتنفيذ

كوبي بهيدلاين وبودي -
ديزاين -
رسالة واضحة محطوطة في الحاجتين دول -
رسالة متحدد طالعة لمين -
كول تو أكشن واضح في الرسالة دي -

كل ده بس من غير سوشيال ميديا
من غير فرص غير محدودة من كتابة عدد لا نهائي من الكوبيز
من غير عدد لا نهائي من منصات التواصل مع الجمهور المستهدف
من غير عدد لا نهائي من امكانية التعديل على كومنكيشن بعد نشر
وهسيبلك انت تتخيل الباقي

  Print Ads وده الحقيقة اللي ساعد الـ
يبقى ليها هذا الأثر العظيم في الأدڤيرتايزينج بشكل عام

لإن مفيش فرص للغلط واللخبطة
الرسالة لو مش طالعة صح
الإعلان خلاص بالسلامة ملوش لازمة

وعلى الرغم من ان ده اصلًا الهدف العام من خلق رسالة
انها تطلع صح وتحقق هدف وتعمل تأثير
سواء من ١٠٠ سنة او دلوقتي

بس ظروف وامكانيات زمننا الحالي
خلقت المساحة اللي تخلينا ننسى الهدف ده اصلًا
ونركز على الفرعيات

وعشان كده انا شخصيًا واحدة من أكثر النصائح
اللي بقولها لأي حد لسه في بداية كاريره في الكومنكيشن
ولأي حد عايز يجرب يعمل بورتفوليو في المطلق
Print Ads هو انك تجرب تعمل

ازاي؟

عناصر البرينت اد انا قولتها في الايميل ده لحد دلوقتي ٣ مرات
 😄 فـ مش هعيدها تاني

ولكن انا عايزك تركز على كام حاجة كده تانيين
:وانت شغال على العناصر دي في برينت اد

الرسالة لازم تبقى في غاية الوضوح

مفيش مجال ان اللي بيقرأ يحاول يفهم انت عايز تقول ايه
لو انت اللي كاتبه مش واضح من اول مرة
مش بيقول انت عايز توصل ايه
عيد كتابة

انت ما بتكتبش بوست او كوبي على سوشيال ميديا
فـ معتمد ان اللي هيقرأ هيكمل عشان يفهم
البرينت اد مفيهوش المساحة لحاجة زي كده اصلًا
وده ينطبق على الهيدلاين والبودي والكول تو اكشن بتاع الكوبي

دايمًا استخدم المنتج كعنصر بصري

وانا النصيحة دي بقولها للي مش ديزاينر
نظرًا ان اسهل حاجة يقدر يعملها انه يجيب صورة المنتج
فـ لتسهيل الأمور عليك
خلي المنتج هو الهيرو في التصميم

احترم دايمًا المساحات البيضاء في التصميم

المساحات البيضاء بين عناصر الكوبي في التصميم
في غاية الأهمية
لإنها بتدي فرصة للي بيقرأ يركز على اللي انت عايز تقوله
لو الكلام كله محشور تحت بعضه
محدش هيقرأ حاجة

طيب وانت هتعمل التصميم ازاي؟

قاعد بتسأل السؤال ده طول ما انا بتكلم في الخطوات انا عارف
بس صدق او لا تصدق انت عندك كم اختيارات غير محدود
تقدر تعمل التصميم من خلاله
هقولك على اتنين منهم بس
والتاني هيبسطك اوي

اولًا روح على كانڤا

حتى لو بتستخدم النسخة المجانية
دور في التمبليتس هناك على حاجات ليها علاقة بالبرينت ادز
هتلاقي ٦٠ الف حاجة تعرف تستخدمهم كريفرنيس ليك
او حتى تاخد منهم حاجة وتعدل عليها

ولو مش عارف تستخدم كانڤا اصلًا
ادخل على مدرسة كانڤا للتصميم من هنا
وهتلاقي خطوات تفصيلية تعلمك ازاي تستخدمه

 ImagineFx ثانيًا بقى استخدم

جوجل عملت اداة ذكاء اصطناعي جديدة
تقدر من خلالها تديها برومبت تصميم
وهي تعمله عادي

ده غير انك من خلالها تقدر تحدد كمان الستايل
والأرت دايركشن بتاع التصميم

كل اللي مطلوب منك انك تكتب برومبت مظبوط
طيب وانت هتكتب برومبت مظبوط ازاي؟

لما تبقى عارف الكوبي بتاعتك عناصرها ايه
وايه العنصر البصري اللي فيها
وايه الكول تو اكشن برضه

طبعًا في الأول، النتائج مش هتبقى مظبوطة اوي
ولكن تقدر برضه من خلال نفس الأداة
تعدل على كل تصميم على حدى
لو عايز تخليه احسن

البرينت ادز دي انا عملتها كروكي كده على جوجل وانا بلعب
:والنتائج بتاعتها مبهرة جدًا الحقيقة كبداية

معدش فاضل غير انك تبدأ 

فيه ٨ من أصل كل ١٠ اشخاص معندهمش بورتفوليو
بيطبقوا السهل والمعتاد والمتكرر والممل لما يجربوا يعملوا واحد

جرب ولو على سبيل التجربة انك تبقى مختلف
جرب تقدم حاجة تقول انك عندك ميزة تنافسية غير عادلة وسط كل الناس
جرب ولو لمرة تركز فعلًا على اظهار حجم المهارات اللي عندك

في ميديام او وسيط او فورمات، عين اللي بتتفرج مش متعودة عليه

فرص ان العين تبقى عليك هتبقى اكتر
فرص انك تجذب انتباه اللي ممكن يشغلك هتبقى اعلى

وهو ده الهدف في النهاية
 ❤️ وبالتوفيق ان شاء الله