أخفقت كام مرة الأسبوع ده؟

In partnership with

،عزيزي وعزيزتي

بسرعة كده معايا
فكر وفكري كده في اخر ٥ اخفاقات حققتها الأسبوع ده

بالمناسبة ممكن يكونوا في الشغل او بره الشغل عادي
ها؟
خلاص فكرنا؟

طيب بسرعة اكتر من كده
كام اخفاقة من دول عملناهم لأول مرة من نوعهم الأسبوع ده؟

فيه منهم اللي متكرر صح؟
فيه منهم اللي غلطنا فيه بدل المرة الواحدة عشرة مش كده؟

طيب ماذا لو في حياتك
قدرت توصل لمرحلة انك لما تيجي تغلط
تغلط مرة واحدة بس؟
هي مرة واحدة وبعديها صعب اوي تغلط نفس الغلطة هي هي تاني

ماذا لو بقى عندك قدرة على تحليل الغلطة لما تحصل اول مرة
بشكل يخليك قادر تعرف ليه وازاى ده حصل؟
ساعتها بالمنطق كده هيبقى عندك وعي كامل

عن ازاي تتجنب الوقوع في نفس الغلطة دي تاني
وبالتالي تجنب الاخفاق في نفس الجزئية مرتين

في الحقيقة احنا مش محتاجين نسأل ماذا لو
لإن فعلًا فيه طريقة تخليك تتجنب الموضوع ده بشكل عملي جدًا

مشكلته الوحيدة انه معتمد بس على مدى جديتك في تطبيقه
ومدى رغبتك في تغيير العقلية بتاعتك كمان الحقيقة

الموضوع ببساطة مبني على ٤ أسئلة

والحقيقة الـ ٤ اسئلة دول اتعملوا من ٥٤ سنة تقريبًا
After Action Reviews في شكل اطار اسمه
أو مراجعة الأفعال بعد القيام بها

ولو بتسأل نفسك هو ايه اللي حصل من ٥٤ سنة
وايه نوعية الأفعال اللي كانت بتتعمل
عشان يتعمل إطار زي كده نراجع من خلاله

فـ الحقيقة الموضوع طلع من قلب الحروب
اللي كانت الولايات المتحدة جزء منها بشكل مباشر او غير مباشر في الفترة دي
بداية من الحرب الباردة ما بينها وبين الاتحاد السوفيتي ساعتها
وتحديدًا الحرب الكورية وحرب فيتنام

والفترة دي الجيش الأمريكي تكبد خسائر بشرية ومادية ومعنوية مش قليلة خالص
واللي منها قدروا يبتكروا إطار يعلموا بها القيادات والجنود في الجيش
ازاي يتجنبوا الأخطاء اللي حصلت واللي ممكن تحصل
لاحقًا في اي اشتباك او ظرف بعدين

ومن كتر ما الإطار ده كان في غاية الفعالية
الموضوع ما توقفش عند تنفيذه بس في الأطر العسكرية
و تبنته قطاعات كبيرة من الشركات والمنظمات المدنية عادي

في سبيل تحسين كفاءة العمل وتزويد الموظفين بخطة عمل واضحة
يقدروا من خلالها يراجعوا شغلهم اول بـ اول
او اضعف الايمان يتم تقييمهم بشكل ما أو بآخر من خلال الإطار ده

نقطة تانية في غاية الأهمية تجاه فعالية الإطار ده الحقيقة
هو انه مش بيركز خالص عليك انت كشخص اخطأ
لأ هو بيركز على سبب المشكلة ذات نفسها التي أدت إلى وقوع خطأ اصلًا

نقطة بقى تالتة وهي أن الإطار ده عادي جدًا ممكن تعمله ما بينك وبين نفسك
مش لازم حد يبقى فوقك عشان يطبقه عليك
ولا لازم تستنى حد يقيمك بناءً عليه

اذا كنت جاد جدًا في نقطة انك تتجنب الأخطاء المتكررة
تقدر عادي جدًا تعمله لوحدك
وتتعامل بناءً عليه بعد كده

فـ تعالى بينا نشوف ايه هي الـ ٤ اسئلة المكونة للإطار ده

انت نيتك كانت ايه؟

اول سؤال في الإطار بتاعنا هدفه انك ببساطة تشرح كده لنفسك
انت كنت عايز تعمل ايه يا ترى؟

ايه اللي كنت بتخطط توصل اليه؟
ايه الهدف اللي كنت عايز تحققه؟
ايه اللي كان مفروض يحصل؟

اسئلة قد تبدو بديهية جدًا الحقيقة
بس في واقع الأمر ساعات كتير ما بناخدش بالنا
احنا فعلًا كنا عايزين نوصل لإيه او عايزين نحقق ايه

وبالتالي لو احنا مش محددين ده صح
بالتبعية عمرك ما هتقدر تحدد ايه الغلط اللي عملته في البروسيس وانت شغال

وفيه اوقات كتير أخرى
احنا بنروح نعمل بروسيس، واحنا مش عارفين ايه الهدف خالص بقى
والحقيقة ما ينفعش نطلق عليها اسم بروسيس
لإن الإسم الأوقع لها هو هنمشي الدنيا كده ونشوف الكلام على ايه

نقطة تانية في غاية الأهمية، هو انك لما تيجي تحدد هدف او حاجة عايز توصل إليها
لازم تبقى واضحة في الصياغة
ما تروحش تكتب أهداف عايمة كده ملهاش ماسكة

ايه اللي حصل بقى؟

ايه كان ماشي كويس معاك؟
ايه اللي حصل عكس توقعاتك؟
ايه المشكلة اللي اكتشفتها في نص الطريق؟
المشكلة كانت في الخطة ولا في طريقة التنفيذ؟

ايه اللي حصل في الوقت اللي حددت فيه الهدف
والوقت اللي اكتشفت فيه أن الهدف مش هيتحقق؟

ازاي الواقع خالف المتوقع؟

اخدت بالك من شكل الأسئلة؟

ولا سؤال منهم سامحلك بإنك تلقي اللوم على الأخرين
او تلقي اللوم على طرف خارجي
الأسئلة هنا هدفها انك فعلًا تحدد الحقائق
اللي منعت من الوصول للهدف

طيب ليه اللي حصل حصل؟

الهدف من السؤال ده هو المزيد من التعمق
في إجابة السؤال التاني الحقيقة

لإن فيه معظم الأحيان الواقع بيخالف المتوقع
بيبقى بسبب احنا بالغنا في قدراتنا على فعل شئ ما

ما قدرناش ندير وقتنا صح
ما كناش محددين قدرات الفريق بتاعنا مظبوط
ما كناش طايقين الحاجة اللي عايزين نعملها دي
فـ اشتغلنا فيها عشان تخلص وخلاص
كنا لوحدنا تمامًا واغفلنا ان عشان الحاجة دي تخلص
محتاجين دعم او مشاركة حد معانا

وهكذا بقى

سؤال محتاج صراحة كاملة واجابة في غاية الواقعية الحقيقة

هعمل ايه المرة الجاية؟

وده سؤال اجابته بتبقى عبارة عن مجموعة من النقاط
المترجمة في شكل أفعال وبس

يمكن محتاجين ندي لنفسنا وقت اكبر
يمكن محتاجين نحدد من الاول احنا مين هيساعدنا
يمكن محتاجين نستخدم أدوات واستراتيجية مختلفة عن اللي فاتوا
يمكن محتاجين نحدد سقف قدراتنا الحالية ارتفاعه قد ايه
يمكن محتاجين نسأل عن تفاصيل اكتر قبل ما نشتغل المرة الجاية

يمكن حاجات كتير الحقيقة
بس الأكيد، انها لازم تطلع من قلب الـ ٣ اسئلة اللي قبل السؤال ده

 ARR وده ببساطة شديدة كان إطار الـ

وياريت ناخد بالنا من حاجة مهمة جدًا

فيه مثل بحبه اوي بيقول
لما تعمل غلطة
وتروح تكررها تاني هي هي
ساعتها مبقتش غلطة الحقيقة
دي بقت قرار

وعشان تتجنب قرار زي ده
محتاج تاخد بالك انك دايمًا بتشتغل من خلال منظورين

اول منظور منهم هو انك تعرف ايه اللي عملته ونجح
فـ تكمل تعمله عادي

وتاني منظور هو انك تعرف ايه اللي عملته وما نجحش
فـ تحاول تحسن منه

وده في حالة انك مهتم او مضايق انك ما نجحتش تحقق اللي كنت عايز تعمله
لإنك لو غير مهتم او مش مضايق
فـ عادي مفيش حاجة هتتغير

كتاب هدية من حبيب الكل

ما اظنش ان فيه حد ممكن يكون وصل للسكشن ده من الإيميل
 😄 Hubspot وما يبقاش عارف منصة

وهاب سبوت الحقيقة واحدة من أكثر المنصات ترشيحًا في المصادر
المتعلقة بالتسويق، خصوصًا في الوطن العربي

نظرًا لإنها بتقدم مصادر تعليمية كتير بشكل مجاني في مجالات كتير من فروع التسويق المختلفة

ومصدر انهاردة بقى هو عبارة عن كتاب الكتروني فيه تفاصيل
كتير جدًا متعلقة باستخدام شات جي بي تي
في جوانب كتير متعلقة بالشغل اللي بتعمله بشكل يومي

بالإضافة كمان لأكتر من ١٠٠ امر ممكن تكتبهم لشات جي تي
في تاسكات كتير ممكن تكون محتاج فيها مساعدة

سواء بقى على مستوى افكار للمحتوى، او اشكال الايميلات
ده غير كمان اوامر تحليل البيانات

وانا شايف بشكل شخصي أن نقطة تحليل البيانات دي بالتحديد
نقطة في غاية الأهمية لأي كونتنت كريتور او كوبي رايتر انه يتعلمها الحقيقة
خصوصًا لو لسه بيبتدي في الكارير بتاعه

هتلاقوا لينك الكتاب تحت
 ❤️ قراءة مفيدة ومثمرة

والى اللقاء في ايميل اخر ان شاء الله

Unlock the full potential of your workday with cutting-edge AI strategies and actionable insights, empowering you to achieve unparalleled excellence in the future of work. Download the free guide today!