صوتك حلو؟

In partnership with

،عزيزي وعزيزتي 

انا انهارده حابب اتكلم معاك في 5 نقاط
عن الصوت ونبرة الصوت في الكتابة

وفي حالة انك مستغرب اصلًا ان الصوت بيتكتب
فكر شوية كده فـ هو اشمعنى يعني نبرة الصوت
اللي ممكن تتكتب بس الصوت لأ

وفكر شويتين كمان كده في انك بتقرأ الكلام ده دلوقتي بتاعي
وانت متخيل صوتي عادي في دماغك وطريقة كلامي عاملة ازاى
حتى لو كنت ما سمعتش صوتي قبل كده خالص بالمناسبة

دي عملية بتحصل في دماغك تلقائي، وانا ليا دور فيها

وانت كمان في شغلك ليك دور فيها برضه
ودورك فيها مهم وخطير جدًا

….خليني الأول قبل ما نتعمق في تفاصيل

اقولك انا ليه بكتب الايميل ده؟

في الحقيقة انا بشوف حوالين مني لحد دلوقتي ناس كتير بتتلخبط ما بين
البراند ڤويس او صوت البراند، والتون اوف ڤويس او نبرة صوت البراند

ده غير اني بشوف برضه ناس بتحط الصوت
والتون الشخصي بتاعها وهي مش واخدة بالها
وبتفرضه على البراند كده عافية وخلاص

اثر الموضوع ده في الكومنكيشن
كارثي الحقيقة

لإنه بيخلق حالة من التشوه الكامل
لشكل وديناميكية البراند ده في العموم

وعشان كده احنا محتاجين نتكلم شوية حلوين كده مع بعض
ومحتاجين ناخد الموضوع خطوة خطوة كده براحة

:فـ يلا بينا نبتدي

 Brand Voice ايه هو الـ

في اول الكلام كده
البراند ده عبارة عن شخصية

شخص حقيقي لازم تكون حاطه قدام عينيك ومتخيل صفاته
شخصية البراند هي اللي بتعمل اختلاف في المنافسة في الماركت

لأن صدق او لا تصدق في بتاع 20 براند شبهك
بيبيعوا نفس المنتج او الخدمة بتاعتك

وعشان كده مهم في المرحلة دي انك
تعمل بحث عميق جدًا عن نوع وشخصية البراند بتاعك

وعشان تسهل الموضوع على نفسك اكتر واكتر

احنا كبني ادمين اشكالنا مختلفة، وكذلك صوتنا برضه مختلف
فـ لو انت رسمت شخصية للبراند بتاعك مختلفة
يبقى لازم صوته كمان يكون مختلف

ازاي تحدد الصوت ده بقى؟

:جرب تسأل نفسك اسئلة شبه دي

 هو لو البراند بتاعي راجل او ست
شخصيتهم هتبقى عاملة ازاى؟

..ولأ
ما ينفعش يبقوا راجل وست مع بعض

 ايه نوع العلاقة اللي ممكن البراند بتاعي
يكونها مع التارجت اودينس بتاعه؟

 طيب هي البراندات اللي شبههي عاملة ازاى؟

 طيب يا ترى هو التارجت اودينس بتاعي بيفكر فيا ازاى؟

طبعًا انت دلوقتي بتقول لنفسك

وانا لسه هقعد افكر في كل الكلام ده؟
هرد عليك واقولك اه عشان ده شغلك الحقيقة

ماهو انت من غير الأسئلة دي مش
هتقدر تعرف تحدد صوت البراند بتاعك

صوت البراند بيعكس بشكل ما او بأخر احساس
وتفكير البراند بشكل عام وعلاقته مع جمهوره

البراند ده ممكن يكون رخيص
ممكن يكون مناسب
ممكن يكون غالي

بس ما ينفعش يبقى التلاتة مثلًا
او حتى اتنين من التلاتة

البراند ده ممكن يكون محلي
او ممكن يكون دولي

البراند ده ممكن يكون بريميام مثلًا

فيه احتمالات كتير جدًا

مطالب انك تفكر فيها وتحدد الأنسب اكتر
لانك منها هتقدر تحدد صوت البراند هيبقى عامل ازاي

نقطة تانية في غاية الأهمية برضه

وهي ان صوت البراند ما بيتغيرش

وما ينفعش كل شهرين تقول انا هعمل صوت جديد للبراند اللي انت بتشتغل عليه
لإن انت شخصيًا كبني آدم أو شخص، صوتك ما بيتغيرش كل شهرين

مفيش بني ادم بيغير حنجرته كل شوية ويطلع بصوت جديد
صوتك بصمة خاصة ملكك انت بس

نفس الكلام طبقه على البراند بقى

هو مش احنا قولنا انك ممكن تلاقي 20 براند شبهك في الماركت؟
صوتك هو اللي هيبقى مختلف عنهم

زى كده لما تشوف 2 توأم
هما شبه بعض اه، بس صوتهم مش شبه بعض خالص

وانا عارف انك وارد تكون قرأت هنا ولا هنا ان عادي يبقى صوت البراند
بتاعك شبه صوت براند تاني، وفي شركات كبيرة صوتها واحد

بس مفيش حاجة اسمها كده

مفيش براند تيم في الدنيا هيحط صوت للبراند بتاعه
نسخة طبق الأصل من براند تاني منافس ليه

لأن الصوت بيأثر على انطباع البراند في عقل الجمهور
فـ ما ينفعش يبقى في براندين واخدين نفس الإنطباع هو هو في دماغ جمهور واحد

 Tone of Voice نيجي بقى للـ

ودي نبرة صوتك وانت بتتكلم مع الجمهور المستهدف

ومعلش قبل ما ندخل في تفاصيل، محتاجين ناخد مثال صغير كده
انا عايز اطبقه عليك انت شخصيًا
عشان يساعدك في فهم اللي انا لسه هقوله

احنا اتفقنا ان صوتك واحد مش بيتغير صح؟
نبرة صوتك بقى هي اللي تقدر تتغير عادي حسب انت بتكلم مين
وحسب برضه الموقف اللي انت فيه والمشاعر اللي انت حاسسها

وعشان تفهم الحتة دي اكتر

تخيل انك دلوقتي في بنك وعايز تستلف قلم تمضي بيه على حاجة

:اول سيناريو هتاخد قلم من شخص غريب

هتقول معلش انا مش معايا قلم، استأذنك اخد قلمك بعد ما تخلص؟

:تاني سيناريو برضه مع شخص غريب

لو سمحت، ممكن معلش اخد القلم ثانية بس؟

:تالت سيناريو مع صاحبك في نفس البنك

!بقولك ايه يبني!، اديني قلمك بعد ما تخلص كده بس بسرعة

ايه بقى المشترك والمختلف
في السيناريوهات دي؟

المشترك هو الصوت
المختلف هي التون او النبرة اللي اتكلمت بيها

واهو ده بالظبط الفرق ما بين الصوت ونبرة الصوت

نبرة الصوت او التون اوف ڤويس
بتاعة البراند بتتغير على حسب
شكل التارجت اودينس اللي انت بتكلمه
او بتتغير على حسب شكل التشانل اللي البراند موجود عليها

ومش معنى كلامي انه بيظبط التون او النبرة
على كل شخص مفرد في التارجت

لأ هو بيفصلها على حسب شكل شرائح الجمهور المستهدف عنده

يعني مثلًا اي براند كبير ولنفترض حاجة زي شركات الاتصالات كده
هتلاقي ان على حسب الخدمة المعلن عنها، نبرة الصوت مختلفة تمامًا

الشركة ما بتكلمش اللي خطه فاتورة، زي اللي خطه باقة او فليكسات مثلًا

نفس الكلام عندك، لو انت عندك كذا شريحة

التون بتتظبط بناءً عليها
والتون ببتظبط بناءً على الهدف النهائى برضه من الرسالة

تعالى بقى اقولك ازاي تكتبلي صوتك

انا عايزك تبص على اى محتوى بتلاقيه وتقسمه لـ 3 حاجات

:الكلمات

نوعية الكلمات اللي بيستخدمها البراند
او الكاتب اللي انت بتحبه في العموم
وتجمعها كلها عندك كده وتذاكرها وتبص عليها كويس

حاول تفهم من الكلمات اللي بيتم استخدامها البراند
او الكاتب هو الأسلوب بتاعه عامل ازاى؟
مبسط ولا معقد، ولا هلس وهزار ولا ايه بالظبط؟

ولازم الكلمات دي تجمعها في فايل كده على جنب عشان تعرف تحللها
ما تعتمدش على ذاكرة عينيك

عشان عينيك ملهاش ذاكرة الحقيقة عشان تعتمد انك بالنظر كده هتفهم

 :التون بتاعته

هو انت لما بتشوف طريقة كتابة البراند او الكاتب
ايه الأحاسيس او ايه المشاعر اللي انت حسيتها
وانت بتستهلك قطعة المحتوى او الكوبي بتاعته؟

ودي حاجة مهمة برضه عشان تعرف
ايه نوع المشاعر اللي هما بيلعبوا عليها بشكل اكبر؟

 :الإطار العام للمحتوى

ركز على الفواصل و الترقيم والتشكيل لو موجودين

اقرأ المحتوى أو الكوبي بصوت عالي

عشان تفهم هو بيتكلم في العادي بسرعة ولا ببطء ولا نظامه ايه بالظبط؟

ايه اكتر أنواع المحتوى اللي بيحب يستخدمها؟، وهكذا

بس يا سيدي هما دول الـ 3 حاجات اللي تعرف بيهم تكتب صوتك

او صوت البراند عادي

لو عايز تجرب تطبق حالًا على اللي انا بقوله ده

جرب تفكر هو انا صوتي عامل ازاى؟
وايه التون بتاعتي في الايميل ده بالتحديد
أو حتى في ايميلاتي بشكل عام
وحسيت ايه وانت بتقرأ البوست؟

الموضوع ممكن قد يبدو سهل
بس هو لو كان سهل وحاجة بديهية كده
مكنش فيه ناس كتير جدًا بتتلخبط فيه وبتنفذه غلط

معظم الناس بتفكر في جزئية هو احنا هنكتب ايه في الحاجة دي

بس محدش بيفكر هو انا هكتبها ازاي، وهوصلها بالشكل الصح ولا لأ

اتقان القدرة على خلق الصوت وتحديد نبراته
هيلعب دور محوري في إجابة السؤال التاني

وبس كده

OOH واخيرًا قبل ما اختم، لو انت ادفرتايزر وبتدور انك تطلع اعلانات
تحديدًا في الولايات المتحدة وأوروبا
ADQuick تقدر تكونكت دلوقتي مع

وتختار اللوكيشنز والميديا اونرز اللي حابب تشغل الكامبينز بتاعة
شركتك او الأجينسي اللي انت فيها معاهم
وتقيس كمان النتائج كلها من بلاتفورم واحدة

فـ لو مهتم تعرف تفاصيل اكتر عن ازاي ده بيحصل
روح على اللينك اللي انا سايبهولك تحت

لو مفهمتش اي حاجة من اللي انا قولتها في السكشن ده
 😄 مفيش مشكلة عادي مش لازم تدوس ومفيش حاجة هتفوتك

اكتفي بهذا القدر
 ❤️ والى اللقاء في ايميل اخر ان شاء الله

Run IRL ads as easily as PPC

AdQuick unlocks the benefits of Out Of Home (OOH) advertising in a way no one else has. Approaching the problem with eyes to performance, created for marketers with the engineering excellence you’ve come to expect for the internet.

Marketers agree OOH is one of the best ways for building brand awareness, reaching new customers, and reinforcing your brand message. It’s just been difficult to scale. But with AdQuick, you can plan, deploy and measure campaigns as easily as digital ads, making them a no-brainer to add to your team’s toolbox.

You can learn more at AdQuick.com