،قرائي الاعزاء

اهلًا وسهلًا بيكم في نسخة جديدة من النيوزليتر

:اللي من خلالها بشارككم نصائح في

الكوبي رايتينج ✏️

البراند بيلدينج 🏗️

الكريتيڤ انتربرينيرشب 🤓

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡

في كل اسبوع هاخدك في رحلة داخل موضوع او اتنين من دول

بناءً على تجربتي الشخصية والمهنية

…. فـ يلا بينا نبتدي في نسخة الأسبوع ده

الفكرة دي حلوة؟

…ما بتتحسبش كده يا عزيزي

اليكم عزيزي وعزيزتي قاعدة بسيطة جدًا تتعلق بالأفكار

اللي ممكن نطرحها لما نيجي نحل مشكلة لبيزنس

او لما نيجي نكتب كوبي لبيزنس

او حتى لما نيجي نعمل استراتيجي لبيزنس في المطلق حتى

:القاعدة دي وببساطة شديدة كالأتي

وبس كده

بدون فذلكة

بدون لف ودوران

بدون مهاترات ملهاش اي لازمة الحقيقة

في شكل نقاشات ما بينا وبين بعض كتيم، او بينا وبين البيزنس

صحيح معظم الناس بتحب الأفكار الحلوة

وصحيح برضه ان نسبة كبيرة من الناس بيجيلها افكار حلوة

بس عارفين ايه مشكلة الأفكار الحلوة؟

انها ملهاش حاكمة او ماسكة

لإنها اولًا وزي ما قولت مرات كتير جدًا قبل كده

خاضعة للذوق العام من قبل متلقي الفكرة سواء شافها، قرأها، او سمعها 

ثانيًا بقى، الفكرة الحلوة في معظم الأحيان بتلاقيها بتدور

في فلك صاحبها او مؤلفها

انما مش بتدور في فلك صاحب المشكلة اللي هيتلقى الفكرة دي في النهاية

ودي مصيبة كبيرة الحقيقة

وعشان كده انت مش مطلوب منك تدور على افكار حلوة

مطلوب منك تدور على أفكار مناسبة

مطلوب منك تجيب فكرة مناسبة تحل مشكلة الجمهور اللي انت بتكلمه

وفي نفس الوقت تحل مشكلة البيزنس اللي جابك عشان تحلله مشكلته برضه

والأفكار اللي زي دي ما بتطلعش بالارتجال

وما بتطلعش في لحظة صفاء

وما بتطلعش بالصدفة كده

او على الأقل خليني اقول ان مش كل مرة هتيجي فيها تشتغل

هتلاقي الأفكار دي بتطلع بشكل عشوائي كده

بس انا اقدر اقولك برضه ان الأفكار دي ممكن تطلع بشكل منظم جدًا ومستمر

بس لو حسبتها بطريقة تانية ومن خلال اطار استراتيجي وابداعي واضح ومباشر جدًا

إطار الفكرة المناسبة

على الرغم من ان كل حالة بيزنس هتشتغل عليها

هتلاقي ان مشاكلهم بتختلف عن بعض

وطبيعة الجمهور المستهدف عند كل حالة ممكن تكون مختلفة عن التانية

الا اني بشوف ان الإطار اللي هحكيلك عليه كمان شوية ده

لو اخدته وطبقته بحذافيره في كل حالة

هتقدر تطلع افكار مناسبة عادي جدًا

البلوت تويست في الإطار ده هو ان مهمتك دايمًا وانت بتشتغل بيه

انك تسأل نفس الأسئلة هي هي، بس في كل حالة تاخد إجابات مختلفة

اكتفي بهذا القدر من الساسبنس ويلا نشوف مع بعض بقى

:الإطار عزيزي وعزيزتي كالأتي

يعني ايه الكلام ده؟

تعالوا ناخدها حرف حرف كده

الـ ف: هنا احنا بنتكلم على الفكرة المناسبة بشكل مباشر

الـ م: ودي عبارة عن حجم المدخلات اللي موجودة عندك اللي مفروض تساعدك في تكوين فكرة مناسبة

العاطفة: وهنا ببساطة احنا بنتكلم عن نوع الاستجابة العاطفية اللي ممكن تحصل لما المتلقي يتعرض للفكرة بتاعتنا 

المنطق: ايه العناصر اللي موجودة في الفكرة تخص المنتج او الخدمة اللي بتقول بشكل ما او بأخر ان اللي انت بتتكلم عنه ده منطقي بالنسبة للمتلقي

:يعني في النهاية لو انت فهمت اللي انا كاتبه ده، المفروض تشوف الإطار ده كالأتي

ايه اللي ناقصك دلوقتي يا ترى؟

براڤو عليك

ناقصك ٣ حاجات بالتمام والكمال

اولًآ ناقصك المدخلات

ودي مفيش مساحة في ايميل انهاردة اني اقعد اتكلم عليها

لأن المدخلات الحقيقة هو كل ما يتعلق بالمشكلة او الهدف اللي انت موجود عشان تحله او تحققه

والمدخلات بمنتهى البساطة هو حجم المعلومات والبيانات والريسريش اللي انت قمت بيه او هتقوم بيه تجاه المشكلة أو الهدف

وحجم المعلومات والبيانات والريسيرش اللي انت قمت بيه تجاه المنتج او الخدمة والسوق اللي موجودين فيه

لإنك من غير النوعية دي من المدخلات، مش هيبقى عندك انسايتس تعرف تتعامل بناءً عليها

وهتقوم واقع بسهولة في فخ الأفكار الحلوة

ثانيًا ناقصك تحديد الزاوية العاطفية في الفكرة 

وزي ما شرحتلك فوق، هل الفكرة دي بتلعب على اعتقاد او شهور، او انطباع، او هدف مثلًا متعلق بمتلقي الفكرة؟

هل الفكرة دي بتقدم فعلًا سبب حقيقي هو ليه منتجك او خدمتك او انت كبراند ككل موجود اصلًا قدام متلقي الفكرة؟

هل الفكرة دي خالقة دافع قوي فعلًا يخلي متلقي الفكرة يتحرك بناءً عليه وبناءً على الدوافع الموجودة عنده حاليًآ؟

ثالثًا ناقصك الزاوية البيعية في الفكرة

هل فعلًا المنتج بتاعك واحد من المنتجات القوية جدًا او المميزة جدًا في الكاتيجوري اللي بينتمي ايه؟

هل المنتج او الخدمة دي استخدامهم بشكل ما أو بأخر استخدام عملي وموفر بالنسبة للمتلقي؟

هل فيه أي ضمانات بتثبت الكلام ده؟ هل فيه اي نوع من الوعود بتلغي أي قلق عند المتلقي في جودة منتجك او خدمتك؟

انا ممكن احط اكتر من ٢٠ سؤال تحت النقاط دي

ولكن انا اظن انت فهمت الكونسبت وراء الإطار

الإطار ده بعيدًا عن فكرته، الا ان الأسئلة اللي ممكن تحطها لنفسك فيه

مفيهاش حاجة تتحفظ الحقيقة

ومفيش تمبليت هتمشي وراها عمياني هتوصلك للي انت عايزه

الإطار ده مهمته رفع جودة فكرتك

بالشكل اللي يتناسب مع مشكلة عميلك ومشكلة جمهوره في النهاية

مطلوب منك انك تفهم وتقيف استراتيجية عملك بناءً على كده

واكتفي بهذا القدر

وبكده خلصت نيوزليتر انهاردة🤙

اتمنى تكون استفدت من ايميل انهاردة حقيقي

حابب افكرك ان جزء مهم من نمو وانتشار واستمرار النيوزليتر دي

هو تفاعلك معاها ومشاركتك ليها مع اي حد

ممكن يكون مهتم بالمحتوى اللي فيها

❤️فـ شكرًا مقدمًا لتفاعلك

اشوفك يوم الأحد القادم ان شاء الله

احمد العشري