،قرائي الاعزاء

اهلًا وسهلًا بيكم في نسخة جديدة من النيوزليتر

:اللي من خلالها بشارككم نصائح في

الكوبي رايتينج ✏️

البراند بيلدينج 🏗️

الكريتيڤ انتربرينيرشب 🤓

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡

في كل اسبوع هاخدك في رحلة داخل موضوع او اتنين من دول

بناءً على تجربتي الشخصية والمهنية

…. فـ يلا بينا نبتدي في نسخة الأسبوع ده

ما لا يفهمه الهواة في المطلق

عن النجاح والفلوس والنمو 

ما اخبيش عليكم الحقيقة، انا واحد من الناس اللي بينزعج انزعاج كلي

لما يفتح النيوزفيد عنده ويشوف بوستات من نوعية

انا ازاي قدرت اكبر دخلي من صفر الى رقم من خمس او ستة اصفار

او انا ازاي قدرت اعلي الريتش والتفاعل عندي بنسبة مليار في المية

او ما خلافه من اي حاجة من اشكال المحتوى اللي ليها علاقة بالمواضيع دي الحقيقة

وبيخليني في النهاية بشوف ان اللي بينفذ الطرق دي في طريقة عرضه

بالإضافة كمان الى الناس اللي بتصدق طرق العرض دي

انهم لسه في مرحلة او تحت تصنيف الهواة

وده راجع لـ ٣ اسباب من وجهة نظري

اول سبب وهو ان دي طريقة عرض سطحية وساذجة جدًا اتعملت وكانت تريند في الخارج من حوالي ١٥ سنة فاتت وما بقتش تتعمل دلوقتي بالشكل ده خالص

تاني سبب وهو كل الكلام اللي بييجي بعد طريقة العرض دي بيبقى ليه علاقة ببرنامج، او كورس، او خدمة صاحب الفكرة دي نفسها بيحاول يعرضها على المتلقي 

وده يودينا لتالت سبب، وهو محاولة الناس اللي بتعرض بالطريقة دي انها تعمل بوزيشنينج لنفسها في اطارات النجاح والنمو المبهر والفلوس الكتيرة

طبعًا كل واحد حر يعمل اللي هو عايزه

وبالتأكيد انا مش بهاجم حد او عايز اسخن حد على حد

ولكن زي ما كل واحد حر فـ انا كمتلقي برضه حر في تكوين انطباع ووجهة نظر

تجاه هذه الطريقة بشكل عام

بالإضافة إلى ذلك، انا شخص في الإيكو سيستم ده عنده القدرة انه يطبق نفس المنهجية دي

ولكنه ما طبقهاش، ومش بيطبقها، ولا هيطبقها ان كان له عمر ان شاء الله

ليه بقى يا ترى؟

لسبب واضح وبسيط جدًا

النجاح والفلوس والنمو مفيش عناصر سحرية هتعملها عشان تحصل عليهم

ومفيش خلطة سرية فيه ناس حاطاها في الدرج بعيد عن عيون الناس

وبتطلع من الدرج للي يدفع مقابلها اعلى سعر

العملة الوحيدة اللي لازم تدفعها في مقابل الحصول على نجاح ونمو وفلوس هي الوقت بتاعك

وخلي بالك تاني اني قولت ان العملة الوحيدة اللي هتدفعها هي الوقت بتاعك

يعني ده معناه انك عادي جدًا ممكن تدفع وقتك في مقابل الحصول على الحاجات دي

وما تحصلش عليها في النهاية، او ما تتوفقش في الوصول اليها في النهاية

وده اللي محدش بيحاول يتقبله او يفهمه في المطلق

ان في البيزنس وفي الانتربرينيرشيب تحديدًا على المستوى الشخصي 

فيه مجموعة من الهواة، ومجموعة من المحترفين

الهاوي بينط من تريند لتريند

من سبوبة لسبوبة 

من بروجكت لبروجكت

من هاك لهاك سعيًا في تحقيق ارقام اكبر

من كلاينت ممكن بيدفع قليل دلوقتي، لكن طبيعة بيزنس الكلاينت ممكن تعمله اكتر على الزمن الأبعد

لكلاينت بيدفع اكتر، بس طبيعة البيزنس لا هتضيف ولا هتقلل من اللي هو عارفه دلوقتي 

الهاوي وقت ما اللي في جعبته يخلص

هيشوف انه استنفذ كل الادوات اللي ممكن تحققله نمو ونجاح وفلوس بسرعة وبحجم كبير 

بس تفتكر ان دي خلاص النهاية؟

اكيد لأ، فيه وقت بيمر، وازمات بتكبر او بتطور، وطلبات واحتياجات جديدة بتتخلق

تفتكر هنا الهاوي ممكن يفكر ازاي؟

هل يحاول يشتغل اكتر طيب؟

ماهو بالفعل بيحاول يشتغل اكتر ووقته مستهلك ما بين حاجات كتير جدًا، هيعمل ايه اكتر من كده

هل يعلي تكلفة سعر تقديم خدماته او برامجه او الهاكس اللي بيحاول يبيعها؟

فكرة كويسة، ولكن في النهاية هيخبط في سقف الحد الأقصى اللي ممكن حد يدفعه في النهاية في حاجة زي كده؟

هل يسعر مثلًا بناءً على وقته طيب؟

فكرة مش بطالة، بس مهما عمل، يومه مكون من ٢٤ ساعة لا هيقلوا ساعة ولا هيزيدوا ساعة، فـ ده مش حل مثالي

ايه العمل طيب، ايه اللي ينفع يتعمل؟

هنا محتاجين نتكلم عن المحترف

المحترف شخص في وجهة نظر اللي حواليه ممل جدًا

هو موجود كل يوم ملتزم بتأدية مجموعة من المهام بشكل قد يكون روتيني جدًا

متفهم بشكل كبير لميكانيكية عمل الواقع بشكل يومي

وهو ان المجهود اللي عملته انهاردة الصبح، مش هلاقي نتيجته اخر اليوم

ولا اخر الأسبوع

بس ممكن اخر الشهر

وممكن اخر ٣ شهور قدام

وممكن اخر سنة

على حسب هو بيشتغل علي ايه الحقيقة

المحترف غالبًا لما يتحصل على النتيجة النهائية والناس تشوفها

هيقولوا عليه جت معاه بالحظ، او مشيت معاه بالكوسية

مع ان الحظ والكوسة في الموضوع، انه كان موفق بما فيه الكفاية انه يفهم ان دي حقيقة كيف تحدث الأمور من منظور الواقع ويتقبلها

بس عارفين ايه البلوت تويست في الموضوع؟

ان حتى المحترف عند مرحلة معينة هيوصل لنفس المشاكل اللي هيوصلها الهاوي برضه

دخله ونموه ونجاحه بقوا ثابتين عند مرحلة معينة

وفي متغيرات وظروف وتحديات بتطالب بإنه يغير من الثبات ده

بس المشكلة انه برضه بيعمل اقصى ما عنده

وبرضه هيوصل لسقف في التسعير

وبرضه هيوصل لسقف في عدد ساعات عمله

تفتكروا المحترف ممكن يعمل ايه ساعتها؟

تعالوا نشوف مع بعض

هيحول خدماته لمنتج 

يعني لو افترضنا انه كوبي رايتر محترف بيقدم خدماته للعملاء بالشكل المتعارف عليه

فـ هو يقدر يحول الخدمات دي في شكل منتج يقدمه لشركات عندهم كوبي رايترز بالفعل

وبدل ما هو يقدم خدماته بالشكل المتعارف عليه، خدمته هتبقى تعليم وتطوير الكوبي رايتر  دول في الشركات دي

او لو افترضنا انه كوبي رايتر محترف ودي حاجة خدت من حياته المهنية وقت كبير جدًا لا بأس به

فـ يقدر يبني منهج تعليمي من خبرته دي ويقدمها لسكيل اكبر في السوق يعلم من خلاله عدد اكبر من الكوبي رايترز في المجال

او لو افترضنا انه حتى فري لانسر محترف، قدر يبني بروسيس متكاملة للفري لانيسنج بشكل عام

فـ بعيدًا عن نوع الخدمة اللي بيقدمها، فـ هو يقدر يعلم قطاع اكبر من الفري لانسرز مثلًا ازاي يبنوا سيستم لشغلهم

وهكذا بقى 

والنقطة دي الحقيقة بتخليه يدخل في المرحلة اللي بعد دي على طول

انه هو نفسه بقى المنتج

لإن ساعتها الناس مش هتدفعله عشان شكل ونوع الخدمة اللي بيقدمها 

الناس بتدفعله في مقابل المعرفة، الخبرة، والأنظمة اللي الشخص ده قدر يكونها ويبنيها بناءً على تراكم خبراته وتجاربه

ساعتها الطلب عليه هيبقى اعلى بكتير من اللي كان بيعرضه قبل كده في المعتاد

وساعتها برضه هو يقدر يتحكم في حجم الطلب ده باختياره هو كمان

الموضوع مش بيقف عن كده بس

لإن بناءً على خبرة الشخص المحترف ده

فـ هو عنده القدرة على تحديد وزيادة وتغيير حجم القيمة المعروضة في المنتج او المنتجات اللي هو هيقدمها

اي منتج بيتقدم في النهاية، بيوعد بحل مشكلة او تحدي عند الشخص المستهدف من هذا المنتج

وبناءً على حجم المشكلة او التحدي، وحجم الهدف اللي المستهدف عايز يوصله

بيقدر يحدد ما مدى قيمة وفعالية المنتج في تحقيق ده في النهاية

الشخص الوحيد اللي يقدر يوازن ويلعب على المعادلة دي صح

هو الشخص المحترف الحقيقة

لإن هو الشخص الوحيد اللي من بداية الأمر كان ملتزم ببروسيس، حتى لو كانت مملة

فـ هي بشكل ما او بأخر بتمكنه من انه يبقى شاطر في تحديد وزيادة القيمة المعروضة في منتجه 

وبتمكنه كمان من تكسير القيمة على مستويات مختلفة من المنتجات على حسب دراسته للجمهور المستهدف واحتياجاته 

وكل دي استراتيجيز في النهاية بيقدر من خلالها يحقق نمو اسرع، نجاح او انتشار اكبر، ودخل اكثر قيمة في النهاية

دي الحقيقة اللي محتاجين نفهمها

مطالب منك تشتغل 

وبعد ما تشتغل، مطالب منك تشتغل كويس

وبعد ما تشتغل كويس، مطالب منك تشتغل كويس بشكل متكرر

وبعد ما تشتغل كويس بشكل متكرر، حاول ما تبطلش تعمل ده

شئ ممل انا عارف، ولكنه في غاية الأهمية لنقلك من خانة انت فيها

لخانة انت عايز توصل اليها

واتمنى في النص ما بين السعي والوصول

انك تستمع فعلًا بالتجربة دي

لإنك بتصرف فيها اهم عملة انت تملكها في حياتك

وهي وقتك

فـ حاول تصرفها لصاحلك، وانك تتصرف معاها بذكاء

وده بونص جديد مني ليك

البونص ده الحقيقة موجه بشكل عام لفئتين من المشتركين هنا في النيوزليتر

صناع محتوى او كوبي رايترز بيحاولوا يحسنوا من الطريقة اللي بيشتغلوا بيها

مسوقين في العموم بيحاولوا انهم يعملوا لنفسهم بيرسونال براند قوي مبني على اوثريتي وسيستم يمشوا عليه

في الحالتين هو اكتر من ممتاز، وانصحكم انكم تاخدوا لفة بداخله عميقة

هتلاقي تحت لينك هيوديك على البونص على طول

ممكن يجيلك على الإيميل، او تقراه اونلاين عادي

Ready To Escape Your 9 to 5?

Do you feel stuck in your full-time job?

• Need a simple way to make more money?

• Want a proven path to leave your corporate prison?

• Looking to start a side hustle (but don’t know where to begin)?

Then you’re in luck! 

This FREE 5-Step Playbook will help you become a Premium Ghostwriter:

• How to ghostwrite anything for anyone

• Create an in-demand ghostwriting offer

• The exact steps to land your first writing client 

Click here to get instant access.

وبكده خلصت نيوزليتر انهاردة 🤙

اتمنى تكون استفدت من ايميل انهاردة حقيقي

حابب افكرك ان جزء مهم من نمو وانتشار واستمرار النيوزليتر دي

هو تفاعلك معاها ومشاركتك ليها مع اي حد

ممكن يكون مهتم بالمحتوى اللي فيها

❤️فـ شكرًا مقدمًا لتفاعلك

اشوفك يوم الأحد القادم ان شاء الله

احمد العشري