،قرائي الاعزاء

اهلًا وسهلًا بيكم في نسخة جديدة من النيوزليتر

:اللي من خلالها بشارككم نصائح في

الكوبي رايتينج ✏️

البراند بيلدينج 🏗️

الكريتيڤ انتربرينيرشب 🤓

:بالإضافة الى كده، هتلاقي ترشيحات مني سواء كانت

كتاب قرأته او بقرأ فيه حاليًا 📖

بودكاست بسمعه 🎙️

مصدر ممكن يفيدكم، او مقولة عجبتني، على حسب يعني💡

في كل اسبوع هاخدك في رحلة داخل موضوع او اتنين من دول

بناءً على تجربتي الشخصية والمهنية

…. فـ يلا بينا نبتدي في نسخة الأسبوع ده

حدث في دانكن دوناتس

🍩من ٧ سنين فاتت

السنة: 2017
المكان: دانكن دونتس، التجمع
الحدث: اول مرة أشتري دوناتس

كنت متحمس اوي اني اخوض تجربة تناول الدونتس لأول مرة بعد سنين من المشاهدة التراكمية لهذا النوع من المخبوزات في الأفلام والمسلسلات الأجنبية

:بس كل الحماسة دي طارت في ثانية لما وقفت قدام الدونتس والراجل سألني

تحب تختار ايه يا فندم؟

في الحقيقة انا ما كنتش عارف أختار اى حاجة

لأن كان قدامي اكتر من 10 أنواع تقريبًا وانا لسة أبيض خالص

في ناس كتير ورايا

الراجل اللي سألني لسة مستني مني انطق

عيني بتروح وتيجي في الدونتس كلها عشان اختار واحدة

توتر غريب مع سماع زمزئه من الناس اللي ورايا

عيني جت تاني على واحدة من الدونتس كده، باينها دي ولا ايه؟

..هاخد اللي لونها ازرق دي لو سمحت

وخدت الدونت منه ومشيت

بس مشيت وانا حاسس اني مش مبسوط

وعندي تخيل ان اللي انا اختارتها دي، في احلى منها بكتير جوة

بس في نفس الوقت برضه انا لو دخلت تاني مش هعرف برضه اختار ايه أحسن؟

الإختيارات كتير ودي حاجة مزعجة جدًا

انا مش عارف انت خضت نفس تجربتي دي اول مرة اشتريت فيها دوناتس ولا لأ

يمكن ريحت دماغك وجبت علبة الـ 12 وجربتهم كلهم عشان تقرر بعد كدة هتجيب ايه

بس انا بحكيلك القصة دي لأن السبب الرئيسي في إحساسي بعدم السعادة ده

كان في تعدد الإختيارات اللي انا اتعرضتلها

او فيما يسمى في علم النفس بمفارقة الإختيار

ونظرًا لكونك شخص يعمل في مجال التسويق بشكل عام

فـ انا ظن ان مهم جدًا ليك تفهم ازاي مفارقة الإختيار دي زي ما هي حاجة بتأثر عليك كمستهلك

فـ هي كمان بتأثر عليك كمسوق بيروج لخدمة او لمنتج

ولكن مع جمهوره المستهدف

اعباء الإختيارات الكتيرة

عالم النفس باري شويس صاحب كتاب مفارقة الإختيار كان بيقول في كتابه

ان كل لما تزود عدد الاختيارات المتاحة امام اللي مفروض يشتري منك

فـ توقع ان نسبة المبيعات على الحاجة اللي انت عارضها دي هتقل

وتفسيره لده ان في نفس اللحظة اللي انت بتعمل فيها كده

بيتعرض المتلقي لما يسمى بعبء الإختيار او التشويس اوڤرلوود

عبء الإختيار بيجبرك انك تبذل وقت ومجهود اكبر عشان تختار

وطبعًا ده بيزود فرصة انك تختار اختيار غلط وتندم عليه بعدين

ومع ان تعدد الاختيارات يبان انه حاجة كويسة بتزود فرصة تحقيق الرغبات الفردية

سواء ليك او لجمهورك المستهدف مثلًا

وده معناه بالتبعية حدوث زيادة في المبيعات

الا انها مش قاعدة مسلم بيها في كل الحالات

وساعات كتير بتأثر فعلًا بالسلب على البيزنس في النهاية

يعني انت مثلًا لما تيجي تكتب كوبي واحدة بتتكلم فيها عن اكتر من ٢٠ منتج مع بعض

وتيجي تقول ان كلهم موجودين

كلهم حلوين

كلهم خامة ممتازة

كلهم كلهم كلهم

فـ انت ببساطة بتعرض اللي بيتفرج لحيرة وعبء في الاختيار

ده بإفتراض انه صدقك اصلًا ان كلهم شبه بعض في كل حاجة فعلًا

الاوحش من كده انك بسبب الطريقة في الكومنكيشن

هو مش هيقدر يفتكر او يحدد ايه اكتر حاجة علقت معاه

ايه اكتر منتج او كاتيجوري مثلًا علق بالنسباله لو لفت انتباهه اكتر

فـ لا تضع البيض كله في سلة واحدة

لما تيجي تكتب كوبي سواء هتبقى البوم او كاروسيل

او ايًا كان شكلها في النهاية هيبقى عامل ازاي

فكر كأنك بتبني تقسيمة ڤاترينا في محل جزم في وسط البلد

الرصة اللي محطوطة دي، مش محطوطة كده عبثًا

انت طول ما انت ماشي بعرض ڤاترينة المحل

بتلاقي التقسيمة شكلها بيتغير والمنتجات وضعها مختلف في الترتيب

فـ لو مثلًا انت بتبيع برفانات -

قسمهم كاتيجوريز وطلع كل كاتيجوري في كامبين لوحده

لو عندك منتجات كتير فعلًا قوية في العموم -

اذًا كل منتج من دول المفروض له البوزيشنينج الخاص بتاعه

خد بوزيشنينج كل منتج لوحده والعب عليه في كامبين لوحده

لو عندك مجموعة كاملة ولازم تطلع بيها في كامبين على بعضها -

اختار انت ايه اقوى منتجات في الكولكشن دي تبقى هي واجهة الكامبين

لو البراند بتاعك عامل كذا عرض وكذا خصم -

ما تعرضهمش كلهم مع بعض في كامبين واحدة، قسمهم على حسب نوع العرض والخصم مثلًآ

لو عندك منتجات بتتماشى مع بعض مثلًا -

جرب تعملهم في باندل مع بعض، اهو منه قللت الاختيارات ومنه رفعت قيمة المعروض برضه

لو عندك منتجات من نفس الكاتيجوري بس في تفاوت في سعرهم -

فـ اكيد ده راجع لاعتبارات في جودة وديناميكية المنتج نفسه

فـ انت هنا ممكن تعمل زي مقارنات ما بين المنتجات دي في الكامبين بتاعتك

عشان اللي بيتفرج يفهم انت ليه عندك من نفس الكاتيجوري كل الحاجات دي وايه الفروقات ما بينهم

وهكذا بقى

في ١٠٠ حاجة ممكن تعملها هنا لو انت فاهم الكونسبت ده تأثيره عامل ازاي

تعامل مع الاختيارات بحرص

وفكر دايمًا ازاي تقدمها بشكل ذكي في الكومنكيشن بتاعك

فكر ازاي تقدمها بأحسن طريقة تضمن انه يختار بسرعة

ومن غير ما تاخد منه وقت ومجهود كبير

ومن غير ما يحس في النهاية انه اخر قرار غلط بسببك

وما تعتمتدش انه لو مش فاهم او محتار هيسألك

لإنه صدق او لا تصدق هو ممكن اصلًا يتجنب نفسه العناء ده ويشوف حاجة تانية

ف خلال دقيقتين بعد خروجه من الاعلان بتاعك عادي

ولو تعرف مكان بيعمل بوسطن كريم دونات حلوة

😄اكون شاكر ليك جدًا

وبكده خلصت نيوزليتر انهاردة🤙

اتمنى تكون استفدت من ايميل انهاردة حقيقي

حابب افكرك ان جزء مهم من نمو وانتشار واستمرار النيوزليتر دي

هو تفاعلك معاها ومشاركتك ليها مع اي حد

ممكن يكون مهتم بالمحتوى اللي فيها

❤️فـ شكرًا مقدمًا لتفاعلك

اشوفك يوم الأحد القادم ان شاء الله

احمد العشري