• Ashpen Newsletter
  • Posts
  • الكوبي رايتر الذي أنهى أزمة عالمية

الكوبي رايتر الذي أنهى أزمة عالمية

برغيف عيش ومناديل حمام

Sponsored by

،اعزائي القراء

كل سنة وانتم طيبين، ورمضان كريم عليكم جميعًا

بداية من النهاردة ان شاء الله ولحد نهاية رمضان هيبقي ميعادنا اليومي في سلسلة الميكروكوبي

واللي ما يعرفش، فـ الميكروكوبي هي سلسلة رمضانية انا عملتها من ٤ سنين تقريبًا

معظم افكارها بتدور في فلك صناعة المحتوى، الكوبي رايتينج، البراند استراتيجيز، الكريتيف انتربرنيرشيب، الانتاجية

وما خلافه من مواضيع انا بحب اتكلم عليها بشكل مستمر

السنة دي بقى انا قررت اني انشر نسخة جديدة من السلسلة دي ولكن من خلال نشرتي البريدية فقط

وانهاردة ميعادنا مع اول ايميل منها

فـ من غير ما اطول عليكم اكتر من كده

يلا بينا نبتدي

الكوبي رايتر الذي أنهى أزمة عالمية

برغيف عيش ومناديل حمام

كوبي رايتر مين اللي أنهى أزمة عالمية ده

وانهاها ازاي ان شاء الله برغيف عيش ومناديل حمام

مش هلومك لو لوهلة فكرت وسألت نفسك هو احمد العشري بيقول ايه

ولكن عزيزي وعزيزتي، اسمحولي نرجع بالزمن بسرعة لوقت كان فيه ازمة عالمية كبرى

ولأ، انا مش بتكلم عن الكورونا 

انا الحقيقة بتكلم عن الحرب العالمية الأولى

بس قبل ما ادخل في الموضوع على طول 

اسمحولي اضيف بعض من السياق التاريخي المتعلق بالحرب دي عشان نفهم اكتر

الحرب العالمية الأولى، نقدر نقول انها كانت بين طرفين أساسيين 

الطرف الأول وهو دول الحلفاء

وده كان بيتكون من بريطانيا العظمى، ايرلندا، روسيا، وفرنسا 

الطرف التاني وهو دول المركز

وده كان بيتكون من المانيا، الامبراطورية العثمانية، المجر، نمسا، وبلغاريا

وخلي بالك انا قولت اسم مين الأول في كل طرف من الدول

نقفز شوية بقى بالأحداث

واحنا في معمعة الحرب

كانت بريطانيا العظمى عندها نظرية مقتنعة بيها 

وهي اننا ممكن نتجنب الاحتكاك بالجيش الألماني على ارض المعركة

لو قدرنا اننا نحاصره ونمنع عنه كل الطرق اللي يقدر من خلالها يتحصل على امدادات بشكل عام

ونضغط عليهم لحد ما الجنود الألمان يستسلموا في النهاية

ودي نظرية ممتازة جدًا 

بس ما نفعتش

ليه بقى؟

لأن على الرغم من دول الحلفاء قدرت تنفذ الاستراتيجية دي بشكل فعال جدًا

و قطعوا كل الطرق دي وسيطروا على أكبر قدر منها

إلا أن الجنود الألمان رفضوا الاستسلام، وفضلوا محميين في الخنادق بتاعتهم

على الرغم من حالتهم في الخنادق كانت صعبة جدًا والوضع بيزداد كارثية مع مرور الوقت

بس الجنود رافضة الاستسلام

وده لسبب بسيط جدًا

الجنود لو استسلمت هيبقوا اسرى حرب 

والله أعلم هيحصل فيهم ايه بعد ما يستسلموا 

فـ اهون لنا نبقى فوق بعض داخل الخنادق وبننهار من جميع النواحي 

على أننا نستسلم 

وهنا جت فكرة

رئيس الوزراء البريطاني ساعتها ديڤيد جورج قرر يستعين بشخص واحد بس

وهو هاري رايكينبارخ

Harry Reichenbach

هاري في الزمن ده كان واحد من انجح الناس اللي بتعمل بروموشنز وعروض ترويجية للأفلام والممثلين في امريكا 

وكان ساعتها بينفذ افكار اللي لما حد يقرا عنها دلوقتي، يقول اه ده كان بيفكر خارج الصندوق - مع تحفظي يعني على الجملة دي بس ما علينا

ديڤيد لما كلم هاري عشان يشوف حل في المشكلة دي

كان الموضوع واضح جدًا 

احنا محتاجين نشوف طريقة او عرض نقنع بيها الجنود دول انهم يستسلموا ويسيبوا أماكنهم

ايه العمل يا هاري؟

هاري عمل ايه بقى

هاري الحقيقة طلب الأول انه يقعد مع اسرى حاليين من الحرب موجودين بالفعل من الجيش الألماني

كان عايز يقعد معاهم يفهم اكتر عن تجربتهم في الحرب، المشاكل اللي عندهم، وهما رغباتهم ايه وبيفكروا في ايه دلوقتي

وبناءً على اهدافه دي ابتدى يسألهم اسئلة

ومن الأسئلة دي، ابتدى يكون انسايتس 

ومن الانسايتس دي، هاري قدر يوصل لحل في شكل عرض بناءً على المطلوب من بريطانيا

اليك العرض اللي قدمه هاري

بمنتهى البساطة العرض اللي اتوجه للجنود اللي حابسين نفسهم في الخنادق كان كالأتي

:لو استسلمتوا حالًا، كل واحد فيكم هيحصل على الأتي

ترقية لكل الرتب الموجودة في ارض المعركة

امداد يومي من العيش

امداد يومي من اللحمة

امداد يومي من السجاير

امداد يومي من مناديل الحمام

كل ده اتكتب في فلاير، واتطبع منه اكتر من ٤٠ مليون نسخة

واترمى فوق الخنادق من خلال طيارات دول الحلفاء

عارف ايه اللي حصل؟

اللي حصل نقدر نقوله عليه تأِثير الدومينو الحقيقة

لإن جنود كتير جدًا اقتنعت بالفلاير وابتدت تستسلم 

والجنود اللي كانوا مترددين لما شافوا زمايلاهم بيقولوا انهم هيستسلموا 

ابتدوا هما كمان يستسلموا 

بس عارف انت ايه اكتر عنصر في دول خلى الجنود تقتنع بالاستسلام؟

مناديل الحمام

ومش عارف هل دي حاجة ممكن تصدمك ولا لأ

وانا مفيش مساحة اقدر احاول فيها اني اقنعك بـ ليه دي اكتر حاجة سهلت موضوع استسلامهم

بس تخيل انك مزنوق مع ١٠٠ واحد في حتة مساحتها ٥٠ متر مثلًا تحت الأرض

لو حد فيكم طلع فوق هيجراله حاجة

بس في نفس الوقت أنتم مزنوقين عايزين تعملوا حمام

تخيلت؟

نيجي بقى للدرس في القصة دي

لما تفهم سياق القصة، وسياق العرض اللي عمله هاري 

هتلاقي في النهاية ان هاري قدم عرض لجمهور مستهدف

العرض في النهاية ده سواء هتقدمه لجمهور الماني، جمهور جاي من الفضاء

فـ هو له ديناميكية ثابتة جدًا في طريقة بنائه، مكونة من خطوتين

الخطوة الأولى: العرض ده مصلحتي فيه ايه؟

وده سؤال عمرك ما هتفهم ولا هتعرف اجابته لو انت مذاكر منتجك او خدمتك، ومش مذاكر انت هتطلعه لمين

الخطوة التانية بقى: اقدم العرض ده ازاي؟

ودي الحقيقة هتبقى من خلال كذا عنصر

وهي انك تقدم وعد، وتقدم منتج او خدمة بتحقق الوعد ده

وتقول هتحققه ازاي

وتقول ايه هي طريقة الحصول على العرض ده وايه النتايج المتوقعة منه

بس كده

بدون لف ولا دوران، ولا دخول في تفاصيل ملهاش لازمة

ودي كانت قصة انهاردة

ولسه مكملين في قصص ودروس وتجارب كتير على مدار شهر رمضان الكريم ان شاء الله من خلال الميكروكوبي 

ياريت تشارك نسخة انهاردة مع زمايلك وتقولهم ليه يتابعوا الميكروكوبي السنة دي معاك 

دي حاجة هتسعدني جدًا ده اولًا، وثانيًا هتساعد في انتشار النيوزليتر لقاعدة جماهيرية اكبر ان شاء الله

مهتم بالذكاء الإصطناعي؟

حاططلك هنا واحدة من النيوزليترز الأكثر من رائعة اللي بتغطي جوانب كتير جدًا في كل ما يخص الذكاء الإصطناعى

سواء في اخر الاخبار المتعلقة بتطبيقاته، أو طرق تطبيقه اللي تقدر تاخد بيها في شغلك او في حياتك اليومية

هتلاقي تحت لينك الاشتراك فيها 

اشوفكم بكرة ان شاء الله

The Rundown is the world’s fastest-growing AI newsletter, with over 500,000+ readers staying up-to-date with the latest AI news and learning how to apply it.

Our research team spends all day learning what’s new in AI, then distills the most important developments into one free email every morning.