الأرقام ما بتفكرش

مصيبة لا تكون ما بتفكرش انت كمان زيها

الأرقام ما بتفكرش

مصيبة لا تكون ما بتفكرش انت كمان زيها

عزيزي وعزيزتي،

اهلًا وسهلًا بيكم في ايميل جديدة من الميكروكوبي الرمضانية

قصتنا انهاردة قصة غريبة جدًا في ظاهرها 

ولكن لما نتعمق في تفاصيلها هنكتشف درس مهم جدًا 

يخص الأرقام والداتا وطرق معالجتها 

فـ من غير ما اطول عليكم اكتر من كده

..يلا بينا نبتدي

سنة ١٩٩٢

Stella Lieback

راحت سيدة في العقد التامن من عمرها تقريبًا اسمها ستيلا لايباك الى الدرايڤ ثرو الخاص بماكدونالدز

وطلبت كوباية قهوة

بعد ما اخدت الكوباية خلاص

قامت دلقتها على نفسها وهي في العربية من غير ما تقصد

راحت بقى ماكدونالدز معوضاها

بس مش بكوباية قهوة تانية لأ

 😄 دفعتلها ٣ مليون جنيه تعويضات

ايه العبث ده؟

Excuse Me Wow GIF by Mashable

Gif by mashable on Giphy

يعني ايه يعني ادلق على نفسي كوباية قهوة

فـ اتعوض بـ ٣ مليون جنيه

ما الكل عارف ان القهوة سخنة يعني عادي

وده حقيقي فعلًا، بس عشان كده محتاجين نغوص اكتر في التفاصيل

ايه اللي حصل بعد ما القهوة ادلقت؟

الحقيقة هو ان ستيلا بعد ما اخدت كوباية القهوة 

شالت الغطا بتاعها عشان كانت عايزة تحط سكر ولبن

بس وهي بتشيل الغطا راحت كوباية القهوة مدلوقة كلها على حجرها 

والقهوة كانت سخنة جدًا لدرجة انها سببتلها حروق من الدرجة التالتة في كل المنطقة اللي تحت بطنها

ده غير ان حصلها تشوهات جلدية تطلبت تدخل جراحي وعمليات ترقيع

وخسرت اكتر من ربع وزنها بسبب اللي حصل ده

ستيلا بعد ما خرجت من المستشفى

طلبت من ماكدونالدز انها تدفعلها حق فواتير المستشفى بس، ما كانتش عايزة حاجة تاني

وكانت قيمتها تقريبًا ١٩ الف جنيه

بس ماكدونالدز رفضت تديها حق فلوس المستشفى

وهنا بس قررت ستيلا تحول الموضوع الى قضية وتوديه للمحكمة

واحدة من الحقائق اللي محامي ستيلا ابتدى بيها كلامه في المحكمة

هو درجة الحرارة اللي ماكدونالدز بتقدم بيها القهوة، واللي كانت ١٩٠ درجة

والقهوة في الحرارة دي من السخونة انها تحرق اللسان عادي وهي بتتشرب 

ومش بس كده كمان

المحامي كمان اشار الى ان فيه ٧٠٠ قضية اترفعوا على ماكدونالدز في اخر سنتين

من اشخاص اتحرقوا بدرجات متفاوتة بسبب شدة سخونية القهوة بتاعتهم 

وهنا سأل محامي ستيلا الشخص المنتدب من ماكدونالدز من المحكمة

هل فكرتوا في اي وقت وبسب كل القضايا دي، انكم تقللوا درجة حرارة تقديم القهوة شوية؟

المنتدب قاله لأ الحقيقة

وهنا سأله المحامي ليه طيب؟

إليكم الإجابة

:المنتدب رد وقال

 ٧٠٠ ده رقم احصائيًا قليل اوي لما نيجي نقيسه قصاد

عدد مبيعات القهوة اللي بتتباع سنويًا من خلالنا واللي يقدر بالبلايين

فـ زي ما انت شايف دفاع ماكدونالدز كان مبني باعتماد كلي على الأرقام

بس المحامي مكنش سهل برضه

:المحامي قاله

في الحقيقة انا مستغرب، انت عندك ٧٠٠ شخص اتحرقوا بسبب القهوة بتاعتكم

ومن الواضح ان ٧٠٠ شخص ده رقم مش كبير كفاية بالنسبالكم عشان تقللوا درجة حرارة قهوتكم

هل في بالك رقم معين من الأشخاض مضطرين يحصلهم حروق، عشان تبتدوا تقلقوا

فـ تقللوا درجة حرارة القهوة؟ او تجيبوا حد بيفهم في عمل القهوة ينظر في المشكلة دي؟

المنتدب من ماكدونالدز قاله لأ مفيش رقم محدد

وهنا بس ابتدى يحصل قلق في المحكمة

في المحاكم بره، الحكم النهائى في انواع كتير من القضايا مش بيبقى مبني على حكم قاضي المحكمة

بيبقى فيه هيئة من المحلفين موجودين، وهما بيبقوا مسئولين عن اصدار الحكم النهائى في القضية

والقاضي بينطق به في النهاية

خلال حضور هيئة المحلفين في القضية دي في بدايتها كده، كانوا حاسين بنوع من انواع السخافة

انهم هيحكموا في قضية واحدة دلقت على نفسها قهوة

بس من خلال استماعهم للحوار اللي دار ما بين محامي ستيلا والمنتدب من ماكدونالدز 

ابتدوا يشيطوا غضبًا من الطريقة اللي ماكدونالدز بتتعامل فيها مع الموضوع

في النهاية في ٧٠٠ بني ادم كانوا خلف الـ ٧٠٠ قضية دول

ازاي ماكدونالدز بتتعامل بالاستهتار ده

وازاي ماكدونالدز شايفة كل ده شوية ارقام وخلاص

..وصدر الحكم

هيئة المحلفين اصدرت حكم ان ماكدونالدز مطالبة بتعويض ستيلا بمبلغ اولي قيمته ٢٠٠ الف جنيه

وضافوا عليهم كمان مبلغ اسمه تعويضات تأديبية قيمته ٢.٨ مليون جنيه كمان

ولو انت ما تعرفش فـ التعويضات التأديبية كان رسالة تأديب كده للجهة المسئولة

اللي هي في قصتنا ماكدونالدز

المثير للإعجاب بقى، هو الطريقة اللي حسبوا بيها مبلغ التعويضات التأديبية على ماكدونالدز

وهي برضه من خلال الأرقام

The One Where Estelle Dies Episode 15 GIF by Friends

Gif by friends on Giphy

هيئة المحلفين من خلال ريسيرش بسيط 

قدروا يعرفوا ان مبيعات ماكدونالدز اليومية من القهوة في الوقت ده

كانت تقدر بحوالي مليون و ٤٠٠ الف جنيه

فـ لما ماكدونالدز تطلع ٢.٨ مليون جنيه تعويضات اللي هما يومين مبيعات قهوة

فـ ده عقاب كافي وفيه رسالة واضحة جدًا ليهم

كل ده عشان ماكدونالدز قررت انها تحول بني ادمين لمجموعة ارقام

بدون اي تفكير في اعتبارات اخرى

اللي نسيوا ياخدوه في عين الاعتبار 

انهم دخلوا محكمة اللي هيصدر فيها القرار في النهاية هما بني ادمين 

مش مجموعة ارقام

وده اللي اثار غضب هيئة المحلفين جدًا 

وده برضه اللي احنا بنعمله واحنا مش واخدين بالنا

نظرًا لسهولة الاعتماد على الارقام في وقتنا الحالي 

فـ انت تقدر تاخد اي رقم، وتحكي عليه قصة

المصيبة السوداء، ان محدش بيبص وماذا بعد الرقم ده؟

اجابة السؤال ده مش هينفع نفس الرقم يجاوب عليها

اجابة السؤال ده محتاجة بني ادم عاقل يفكر ويشوف ثم بعد ذلك يجاوب

واحدة من الحالات في البيزنس اللي انا كنت طرف فيها

كان عندنا فيه واضحة بقالها اكتر من ٣ شهور ملاحظة من قبل الطرف اللي انا فيه

وهو ان فيه طرف اخر بيقوم بعمل حملات تسويقية للبيزنس ده

وبيحقق ارقام وأرباح مالية ممتازة من منظورهم

المشكلة اللي احنا كنا ملاحظينها بقى

ان الأرقام والأرباح دي بتحصل على فترة زمنية قصيرة جدًا 

يعني على فترات زمنية ابعد، الأرقام بتقع

وهكذا بقى

وفضلنا في الصراع ده بنحاول نوصل لحل ومفيش فايدة

لحد ما جت من عند الكلاينت نفسه

الكلاينت نفسه طلب اجتماع لجميع الأطراف

وقال فيه بمنتهى الوضوح ان الأرقام والأرباح اللي بتحصل دي

ارقام سامة للبيزنس

وبتسبب مشاكل كتير جدًا لينا داخلية انتم مش عارفين عنها

وبناءً علي ذلك احنا محتاجين نغير من اللي بيتعمل حاليًا

وعلى الرغم من ان ده قد يبدو شيء ايجابي وده حقيقي

 😄 الا ان الإجتماع نفسه كان ممكن تجنبه لو كنا اخدنا خطوات بدري عن كده

الأرقام ما بتفكرش

الأرقام بتحكي قصة

وزي ما احنا عارفين، القصة ممكن تتحكي بأكتر من ١٠٠ طريقة

مهم جدًا ليك كمسوق انك ما تتحمسش تحكيها بالشكل الإيجابي كده على طول

مهم جدًا انك تغوص في تفاصيل الأرقام دي لإنك وبكل تأكيد هتكتشف انسايتس تانية 

ما كنتش تعرف عنها اي حاجة

الأرقام دي برضه بتحكي قصص وانسايتس عن بني ادمين بيتستخدموا منتجك في النهاية

فـ تبقى مصيبة سوداء انك بتشتغل في الكومنكيشن انداستري، ومش مهتم تعرف الأرقام دي بتقول ايه عن البني ادمين دول 

وبس كده

اتمنى تكون استفدت من ايميل انهاردة

ولنا لقاء اخر بكرة ان شاء الله

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير