مشكلتك انك مبدع

زيادة عن اللزوم الحقيقة

،عزيزي وعزيزتي

في البداية حابب اوضح اني لا انقص من قدر الإبداع اللي موجود عندكم

كل بني آدم على هذا الكوكب هو شخص مبدع في شئ ما بشكل ما أو بأخر

وقد يبدو من كلامي كده اني السطر الجاي ده هشرح انا قصدي ايه لما كتبت العنوان ده

ولكن انا مش هعمل كده الحقيقة

نقرأ قصة النهاردة

واخدك من نقطة لنقطة

وفي النهاية هشرحلك ان شاء الله

فـ يلا بينا نبتدي

من ٢٢٤ سنة كده فاتت تقريبًا

كان فيه ظابط في المدفعية في جيش نابليون بونابرت 

اسمه تشارليز باربيير

Charles Barbier

واحدة من المشاكل اللي تشارليز لاحظها في الجيش عنده

إن معظم العساكر بيتضرب عليها نار بليل

وده كان بسبب انهم عشان يقروا المراسلات اللي بتيجي للكتيبة بشكل متكرر

بينوروا لمبة جاز كده عشان يشوفوا مكتوب ايه، ما الدنيا كحل 

وبناءً عليها القناصة كانوا بيستدلوا بالنور ده بليل ويضربوا نار على العساكر

وعشان كده تشارليز قرر أن الكتيبة محتاجة طريقة اكثر امانًا للتواصل من غير نور

ماذا لو حسينا المكتوب بدل ما نقرأه؟

وده مش سؤال رومانسي، دي الفكرة اللي خطرت في بال تشارليز كحل للمشكلة دي

وعشان كده قرر يبتكر حل اسمه الكتابة الليلية

écriture nocturne - Night Writing

وده ببساطة شديدة كده عبارة عن نمط مكون من ١٢ نقطة في شكل مستطيل 

معمولين لكل حرف هيتم استخدامه في كتابة الرسائل

وعلى الرغم من ان لما تم تطبيقه كان فعال إلى حد ما

بس الحل ده كان فيه مشاكل كتير

اولها ان العساكر بتاخد وقت اطول من اللازم عشان تقرأ أو تكتب الرسايل بالشكل ده

وثانيها ان العساكر كانت بتواجه صعوبة في انها تحفظ الانماط المختلفة لكل حرف بسهولة

وعشان كده الجيش رفض يستمر في تطبيق الفكرة دي المعسكرات

نجري ٢١ سنة قدام كده بسرعة

في الوقت ده كان في طالب عنده ١٢ سنة تقريبًا سمع وعرف عن موضوع الكتابة الليلية اللي اخترعوا تشارليز ده

الطالب ده اتعمى وهو صغير لما كان بيلعب في ورشة ابوه

المهم، الطالب ده قابل تشارليز وطلب منه يذاكر السيستم اللي بنى بيه تشارليز الكتابة بتاعته

والطالب الحقيقة بعد ما ذاكره كان متفق على حقيقة ان الطريقة دي صعبة وبطيئة جدًا في الفهم والحفظ

وكان شايف ان فكرتها حلوة اوى، بس محتاجة تتبسط اكتر من كده

فـ قرر الطالب ده انه يغير الـ ١٢ نقطة لكل حرف، ويخليهم ٦ بس

وقال ان بدل ما نخلي النقاط دي تعني شكل حرف من حروف الأبجدية

احنا نخلي النقاط دي بتعمل شكل شبه كل حرف من حروف الأبجدية

والطريقة دي خدت من الطالب حوالي ٣ سنين في التنفيذ

يعني لما وصل سنه لـ ١٥ سنة تقريبًا كان خلاص عنده سيستم كامل يقدر يقرأ بيه بدون نظر

انا مش عارف انت عرفت انا بتكلم عن مين ولا لسه

بس الطالب ده هو لويس برايل

Louis Braille

والطريقة اللي عملها دي هي طريقة برايل في الكتابة اللي معظم العالم دلوقتي بيستخدمها

طريقة سمحت لملايين من الناس المصابة بالعمى انها تقرأ بنفس سرعة الناس الطبيعية

طريقة قدمت فرصة ان الناس دي تشتغل وتحتك بسوق العمل زيهم زي اي حد تاني

Braille Alphabet

والقصة دي فيها درس عظيم جدًا الحقيقة

برايل في قصتنا دي اخد حاجة تم ابتكارها لغرض واحد فقط لا غير

وحولها لحاجة مختلفة تمامًا بغرض تاني خالص

وده صدق او لا تصدق، نوعين مختلفين من الإبداع

ازاي؟

لو جيت سألتك ايه الفرق ما بين علم الحساب، وعلم الحساب التطبيقي؟

هل الإتنين يعتبروا علم حساب وخلاص؟

في الحقيقة لأ

علم الحساب هو علم حساب صرف مطلق كده

مبنى على اكتشاف أنماط ووضع نظريات حولها من خلال تفكير مجرد كده من اي حاجة تانية

إنما علم الحساب التطبيقي هو لما شخص يكتشف حاجة حسابية ويحطلها غرض او تطبيق علمي وعملي مع بعض

فـ كإن انت عندك شخص بيكتشف حاجة

وشخص تاني بياخد الاكتشاف ده ويخلقله تطبيق 

اهو الإبداع برضه كده

الإبداع فيه نوعين

ابداع صرف مطلق: وده ممكن تشوفه في المتاحف والرسومات واي شغل تقدر تقول عليه فني مطلق كده

ابداع عملي: وهو انك تنتج حاجة ابداعية لغرض واضح جدًا

الإبداع العملي يسمحلك انك تاخد ابداع صرف مطلق بالمناسبة

بس بشرط

ان لازم يكون فيه سبب وراء ذلك في النهاية

لازم يكون فيه غرض من اللي انت عملته ده

لإن لو مفيش سبب، ومفيش غرض

يبقى اللي انت عملته ده يعتبر زينة أو تطعيم لحاجة موجودة وخلاص

يبقى في النهاية انت فشلت في تطبيق منتج إبداعي عملي من خلال التظاهر بأنه عمل إبداعي صرف

تفتكر بناءً على التايتل بتاعك دلوقتي، انت مطلوب منك تطبق انهي نوع؟

بالظبط كده، براڤو عليك

انت مطلوب منك تطبق الإبداع العملي

لإنك وصدقني مع كامل احترامي ليك وليكي

انت مش فنان بوهيمي عايش في عصر النهضة سايقك الابداع ليل نهار

ومش فارق معاك هتاكل ايه النهاردة وهتخرج فين بكرة وهتدفع الفلوس اللي عليك ازاي

والكلاينت لما جابك تشتغل معاه ما طلبش منك تعيد احياء الفن التكعيبي في الاكاونت بتاعه

انت بتشتغل بناءً على أهداف واضحة جدًا

انت بتطلع شغل بناءً على اغراض وأسباب المفروض انها تكون واضحة جدًا 

قيمة منتجك الإبداعي من خلال هذا السياق بتتحدد من خلال مدى قدرته على تحقيق الأهداف المطلوبة منه

مش على مدى الإبداع المطلق الصرف الموجود فيه

في مرة كنت بقول لمجموعة من الطلاب حضرت معايا وركشوب

ان زمان لما كان الكلاينت ذات نفسه يقولي ان ده مش كريتيف بما فيه الكفاية

وانا شايف ان الحاجة دي حققت هدفها بالأرقام و الهدف اللي احنا متفقين عليه

كنت بقوله إن الهدف اتحقق

والإبداع في النهاية شئ نسبي للغاية

اللي عاجبك ممكن ما يكونش عاجبني 

واللي عاجبني ممكن ما يكونش عاجبك

بس اللي هيعجبنا احنا الاتنين في النهاية

هو ان فيه كومنيكيشن طلع تحت اسم البراند، بغرض واضح جدًا

وتمكن من تحقيق هدفه

وانا هنا مش بكلم صناع محتوى او كوبي رايترز بس بالمناسبة

انا بكلم برضه جرافيك ديزاينر مهتم جدًا بالجانب الأرتيستيك أو الفني في شغله، اكتر من التواصل البصري المبنى على غرض تسويقي

بكلم شخص عايز يعمل لنفسه بيرسونال براندينج، ف طالع يخبط في ١٠٠ ألف حاجة

بس ولا حاجة منهم ليها سبب واضح او غرض واضح

بكلم ميديا باير بيقرأ ارقام يحطها في تقرير عشان مطلوب كده وخلاص، مع انه عنده القدرة انه يطلع من الأرقام دي حاجة

ينفع يتبني عليها كومنيكيشن أو استراتيجي أو خطة قصيرة الأجل حتى، ممكن تغير من شكل الأرقام تمامًا 

وفي الختام هقول تاني

متحددش قيمتك في السوق بمدى ابداعك المطلق

حدد قيمتك في السوق بمدى ابداعك العملي القادر على تحقيق أهداف

وبس كده 

اتمنى تكون استفدت من ايميل انهاردة

ولنا لقاء اخر بعد بكرة ان شاء الله

😄 بكرة انا هاخد بريك

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير