فكرتك محتاجة تتحول طوارئ

!!وبسرعة

،عزيزي وعزيزتي 

فيه مشهد كده متكرر طريقة عرضه في المسلسلات أو الأفلام الدرامية

بيبقى في معظم الأحيان يا داخل مستشفى او في ارض حرب

على حسب يعني 

اللي هو تلاقي واحد متشال على سرير متحرك وناس بتتحرك بيه بسرعة 

وتيجي ممرضة او دكتور يبصوا عليه بصة كده 

وبعد كده يقولوا ودوه الطوارئ بسرعة

New Amsterdam Hospital GIF by NBC

Gif by nbc on Giphy

مشكلتي مع المشهد ده الحقيقة ان كان فيه كلمة بتتقال مكنتش بفهم هما ليه بيقولوها كده 

:يعني المفروض في المشهد ده بالإنجليزي يقولوا الكلمة دي

Emergency Definition

بس هما كانوا بيقول كلمة تانية الحقيقة 

:واللي هي دي

Triage

انا في الاول كنت بقول لنفسي ما يمكن دي كلمة مرادفة للكلمة اللي انا عارفها عادي

بس دي شائعة أكثر في لغة الدكاترة في المستشفيات 

ولإن فضولي كان قاتلني، قولت اما ادور كده عن معنى الكلمة دي

مش هخسر حاجة يعني 

والحقيقة انا طلعت غلطان 

الكلمة ما طلعتش مرادف لكلمة طوارئ بالانجليزي

أصل الكلمة نفسه طلع تعبير كان بيتقال في الحرب

واللي ابتكره في الحرب تحديدًا هما الدكاترة والممرضين الفرنساويين 

زمان في الحروب كان اللي بيحصل ان فيه عدد كبير جدًا من الجرحى 

اكبر بكتير من عدد الطاقم الطبي الموجود في أرض المعركة لخدمة ومعالجة المصابين دول

وعشان كده كانوا دايمًا قبل ما يحددوا هيعملوا ايه مع الجرحى دول علاجيًا 

كانوا بيقوموا بالأتى

بيقسموهم الأول لـ ٣ أنواع

نوع من الجرحى للأسف هيتوفى مهما عملت تدخلات طبية

نوع من الجرحى كده كده هيعيش مهما عملت من تدخلات طبية برضه

نوع من الجرحى هيعيش لو تدخلت طبيًا صح وبسرعة 

وبناءً على التقسيمة دي

تفتكر انهي نوع المفروض ياخد اكبر قدر من الاهتمام والسرعة في التدخل والرعاية؟

مظبوط كده، هو النوع التالت

وده كان جاي من حقيقة انهم عمرهم ما هيقدروا يعالجوا كل الأنواع بنفس المقدار

يبقى من الأجدر اننا نركز جهدنا على الحاجة اللي هتعمل فرق

فـ طلع ان كلمة ترايج اللي انا قولتها فوق دي بتعني الفرنسية عمل فرز وتصنيف

مش بتعني دخلوا الناس على الطوارئ على طول كده وخلاص

وانا بشوف ان الكونسبت ده المفروض يبقى مبدأ في شغلك الحقيقة

والكونسبت ده لو انت سرحت مني هو انك من الأجدر في كل مرة هتشتغل 

انك تركز جهدك على الحاجة أو الشخص او الفكرة اللي هتعمل فرق في النهاية

وانا الحقيقة مش بقولك ده من منطلق اني شخص بلغ من درجات الحكم اعلى الدرجات

لا خالص على الإطلاق

انا بقولك ده من منطلق تجربتي الشخصية والمهنية

زمان لما كنت لسه بشتغل كـ كوبي رايتر وحتى فيما بعد كـ كريتيف دايكتور

كان دايمًا عندي قناعة ان مستحيل كل كلاينت هروح اقعد معاه اعرض عليه فكرة

أو أعرض عليه فكرة كامبين او ما خلافه يعني 

ان كل كلاينت من دول هيوافقوا عادي كده

بالعكس، ده ممكن يكون نسبة كبيرة منهم مش عايزين يسمعوا اللي انا بقوله

عشان بمنتهى البساطة مش ده الحل اللي هما عايزينه عادي

فـ كنت بقعد اقول لنفسي بدل ما اقعد اهد في حيلي في مناوشات ومفاوضات ونقاشات مش هتودي لنتيجة في النهاية

انا مش هروح الإجتماعات دي بمنتهى البساطة، حد غيري يروح

سواء بقى اكاونت بلانر، حد تاني من المديرين في الشركة، او حد سينيور من التيم بتاعي

وانا بقى اركز على اجتماعات تانية وكلاينتس تانية

انا عارف ان لو تم بذل نفس المجهود ده فيها هيحصل فرق ونتيجة ايجابية في الأخر

نفس الكلام برضه بالظبط بيتم تطبيقه كمدرس ومدرب

زي ما جزء كبير منكم عارف، فـ انا عندي برنامج اسمه كوبي دوز متخصص في تعليم الكونڤرجن كوبي رايتينج

البرنامج ده مدته ٨ اسابيع تقريبًا وفيه حوالي ١٣ محاضرة، بواجبات مطلوب تسليمها بمواعيد لمراجعتها وتصحيحها 

متوسط عدد الطلاب في كل الجولتين اللي عملتهم حتى الأن من كوبي دوز هو ٥٠ طالب تقريبًا 

وانا اللي براجع شغلهم وواجباتهم بنفسي 

واحدة من اول الاستراتيجيات اللي بطبقها في البرنامج ده أول ما بيبدأ هو اني اقسم الطلاب اللي دخلت لـ نوعين

نوع انا مهما قولت ومهما عملت، هو مش ملتزم في الحضور، مش ملتزم في تسليم الواجبات، مش ملتزم في سماع الكلام

نوع انا اي حاجة بقولها بيتم سماع الكلام فيها، ومحاولة تطبيقها بأحسن شكل يقدروا عليه في الوقت المحدد

تفتكروا مين اكتر نوع انا بركز مجهودي عليه اكتر؟

اكيد النوع التاني

لإن النوع التاني لو خد الرعاية المطلوبة، هنوصل بيه للنتيجة المرغوب تحقيقها 

وقد يبدو غريب اني بقول ده علنًا، الا انك لما تعرف ان دي اول حاجة كل الطلاب بيعرفوها عني من اول محاضرة في البرنامج

😄 هتلاقي الموضوع مش غريب خالص 

انا عايزك تطبق نفس الكونسبت ده في شغلك

انا معرفش انت بتشتغل فين، وماسك براندات عاملة ازاي

بس اللي انا عارفه، ان قبل ما تطلع فكرة، وقبل ما تشتغل على كومنكيشن استراتيجي

محتاج الأول تتخيل فكرتك او الإستراتيجي بتاعتك دي هتروح الطوارئ 

هناك فيه ناس هيبقى مهمتها انها تعمل فرز لحاجتك دي

وتشوف هي رايحة لمين

والفرز ده هيتقسم لـ ٣ أنواع في الغالب

نوع مش هياخد اكشن، مهما قولت ومهما عملت ودول مش مستخدمين أساسيين للبراند بتاعك

نوع هياخد اكشن، مهما قولت ومهما عملت ودول غالبًا مستخدمين أساسيين للبراند بتاعك

نوع هياخد اكشن، بس لو طلعته الكومنكيشن الصح اللي يقنعه 

وانا هنا هسألك لتالت مرة

تفتكر المنطق بيقول تصرف مجهودك ومصادرك على انهي نوع من دول اكتر؟

المنطق بيقول على النوع التالت

لأن النوع التالت هو اللي هيكبر قاعدة مستخدمينك في النهاية

وعلى الرغم من ان دي حاجة واضحة وضوح الشمس

إلا أنها للأسف مش بتطبق 

لأن ناس كتير بتتعامل مع الكومنكيشن اللي طالع ده كإنه سحر

هيخلي اكبر قاعدة ناس تاخد اكشن وتيجي عندنا 

وهيخلي اكبر قاعدة ناس بتستخدم حاجة تانية تسيبها خلاص وتيجي عندنا 

وهتخلي كل الناس اللي سابتنا تندم وترجع تستخدمنا تاني 

وان شاء الله التفاعل هيزيد جدًا 

والأوارنيس هيبقى في أعلى قممه 

والريتش هيكسر كل التوقعات 

فـ برجاء خفض التوقعات 

ووضع المجهود في المكان اللي هيحدث فرق أو تغيير

ما تضيعش مجهودك في مكان لا يحدث لا فرق ولا تغيير

اشتغلوا على الفرازة عزيزي وعزيزتي

وبس كده

اتمنى تكون استفدت من ايميل انهاردة

ولنا لقاء اخر بكرة ان شاء الله

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير