انت مفخد فكريًا؟

،عزيزي وعزيزتي 

مخبيش عليكم، في معظم الأحيان لما بكتب عنوان لإيميل هبعته

مش بحاول ابص عليه تاني او حتى احاول اني اكتب كذا بديل له

بس بالنسبة لعنوان النهاردة، حسيت لوهلة كده اني عايز اراجعه تاني

 😄 ولكن مش عشان اغير الكلمة اللي انا كاتبها لأ

عشان انا عارف ان فيه متابعين للنشرة البريدية خارج من مصر

فـ ممكن ما يكونوش فاهمين يعني ايه مفخد فكريًا دي

المشكلة ان العنوان التاني اللي كنت بفكر فيه هو نظرية التفخيد الفكري

 😄 فـ حسيت في الحالتين ممكن يكون الموضوع مش مفهوم

فـ لو انت من خارج ومش فاهم معنى العنوان

ولو انت من مصر ومش فاهم العنوان برضه

😄 او فاهمه ورديت في سرك وقولت لا انا مفخد في العموم مش فكريًا بس

اوعدكم لما نكمل قراءة في الإيميل، كلنا هنفهم انا قصدي ايه

فـ يلا بينا نبتدي بقصة النهاردة

الحدوتة بتبتدي من إعلان شغل 

من ١٦ سنة فاتت كده تقريبًا نزل شخص اسمه انتوني كورسيو اعلان

طالب فيه ٢٥ راجل لشغلانة سريعة هتتعمل في واشنطن

بمقابل ٢٩ دولار تقريبًا في الساعة الواحدة

الشغل كان عبارة عن لاندسكيبينج او اعمال عمل وتزيين مناظر طبيعية كده في المنطقة دي

ومكان التجمع كان قدام بنك في واشنطن اسمه بنك امريكا

الناس اللي هتيجي، مطلوب منها تلبس اوتفيت

:والأوتفيت ده كان كالأتي

بنطلون جينز

تي شيرت لونه ازرق 

كوتشي ينفع للشغل 

ڤيست لونه اصفر

نظارات سيفتي 

والماسك الخاص بطلاء الدهانات

وقد كان

حضر تقريبًا في الميعاد حوالي ٣٠ واحد تقريبًا

كلهم لابسين الأوتفيت اللي موجود في الاعلان وجاهزين عشان يستلموا الشغل

الناس فضلت واقفة وكله قاعد يبص حواليه بيحاولوا يشوفوا المدير او المسئول فين

بس محدش عارف حاجة، كله لابس زي بعضه ومحدش فاهم في ايه

المهم وهما واقفين كده، جت عربية مصفحة وقفت خارج البنك اللي هما مستنيين عنده

وخرج منها جارد وقام داخل البنك على طول

وبعدين شوية كده وقام خارج منها وهو شايل شوالين كبار من الفلوس

وقوم هوب كده

خرج واحد من الشباب اللي كلهم لابسين زي بعض دول وقام راشش سبراي في وش الجارد

واخد الشوالين وقام فص ملح وداب

كل الناس التانية اللي كانت واقفة فضلوا متنحين كده من اللي حصل

ومحدش فاهم ايه ده

ولكن من الواضح كده ان دي سرقة علني اهو

البوليس جه بقى

ابتدى ياخد أقوال الشهود على  الحادثة ويسأل عن مواصفات الحرامي ده عامل ازاي

ولكن الحقيقة كلهم كانوا بيكرروا نفس الكلام

الحرامي كان لابس جينز، تي شيرت ازرق، كوتشي شغل، ڤيست اصفر، نظارات سيفتي، وماسك طلاء الدهانات 

ودي كانت مشكلة بالنسبة للبوليس

لإن فيه اكتر من ٢٠ بني آدم واقفين جنب البنك كلهم لابسين نفس اللبس ده هو هو

البوليس حاول يراجع الكاميرات، بس مفيش فايدة

كل اللي ظهروا في الكاميرات ينطبق عليهم نفس المواصفات

عرفتوا مين الحرامي؟

براڤو عليكم

 😄 الحرامي هو انتوني كورسيو ذات نفسه

أنتوني منزلش اعلان شغل

أنتوني عمل اعلان عشان يسرق ٤٠٠ ألف دولار من البنك ومحدش ياخد باله

الراجل وبمنتهى العبقرية قرر انه عشان يسرق 

فـ هو محتاج انه بدل ما يفكر ازاي يبقى جزء من محيط عملية السرقة

فكر ازاي محيط عملية السرقة ذات نفسه يبقى جزء منه هو شخصيًا 

وعشان كده هو قعد يخطط للعملية دي لأكتر من شهر 

وجرب يلبس لبس شخص في العادي العين مش بتبقى عليه كتير

كان بيسجل عنده الايام والمواعيد اللي عربية الفلوس بتيجي فيها البنك 

وكان بيسجل ايه المواقيت اللي بتبقى شايلة فيها أكبر قدر من الفلوس 

كل اللي كان محتاجه ان يوم عملية السرقة محدش يقدر يتعرف عليه

وعشان كده هو عمل الإعلان بالطريقة اللي انت شوفتها في أول الإيميل كده

طلب ناس تلبس زيه تقف في نفس المكان اللي هيقف فيه وفي نفس التوقيت اللي هو عايزه

عشان يختلط وسطيهم ومحدش ياخد باله منه

وهنا الحقيقة في درس مهم جدًا انا عايزك تاخد بالك منه

شوفت كل الكلام الحلو اللي انا قولته على خطة انتوني ده

 😄 ارجوك ما تعملوش، وارجوك بطل تعمله

لإن تطبيقه في عالم الكومنكيشن، البراند بيلدينج، الأدفيرتايزينج، وحتى البيرسونال براندينج

يعتبر حالة من حالات التفخيد الفكري الحقيقة

يعتبر حالة من الحالات اللي بتطفي فيها زراير التشغيل بتاعة مخك كده بالكامل

ايوه ايه اللي انا معملوش او ابطل اعمله ده؟

هو انك ببساطة تختلط وسط كل اللي حواليك في الماركت

وتعمل زي ما الماركت بيعمل

عشان قال ايه، ده الصح وده اللي بيجيب مع الناس

ولكن في واقع الأمر ده اسمه استسهال 

وخصوصًا لو مش مبني على أرقام

زي مثلًا اني اشوف المنافس بيتكلم ازاي

واتكلم زيه او اعلي عليه 

او اشوف مثلًا تصميمات المنافس طالعة عاملة ازاي

واطلع حاجة شبهها في الروح بشوية تاتشات مختلفة كده وخلاص

عشان ما يتقالش ناقشين من بعض 

او اني اسمع ان لما تكتب كوبي، اكتبها دايمًا قصيرة

عشان دي دايمًا بتجيب مع الناس

او اني اسمع ٥ نصائح لكتابة عنوان جذاب قاهر للعذاب 

واجي اطبقها والاقي طوب الأرض بيطبقهم هما هما عادي

والاقي انه ما طلعش جذاب ولكن جالب للعذاب وهضطر اعدله تاني

او اني اسمع ان الاستراتيجي مهمة فـ اروح اجيب تمبليت

احط فيها كلمتين عشان الاستراتيجي مهمة 

واجي في النهاية الاقي ١٠٠ الف واحد بيشتغل بنفس الاستراتيجي وحاطط فيها نفس الكلمتين

استمرارك في المنهجية دي بتضمنلك الأتي

ان عند مرحلة ما انت هيبقى عندك ماجستير في التخفي 

ان هيبقى عندك قدرة مش طبيعية في انك تبقى شبه كل اللي حواليك بالمللي

ان للأسف فرص ان محدش ياخد باله منك هتبقى عالية جدًا

ولو محدش اخد باله مننا 

يبقى المجهود اللي بذلناه ضاع في الهواء

يبقى الفلوس اللي اتصرفت على الشغل ضاعت ومجبتش العائد المتوقع

ما تلغيش دماغك

ما تستهلش

وما تسمعش كلام حد في المطلق 

مفيش حد في الايكو سيستم ده ولا في اي ماركت 

بيسن قوانينه وقواعده 

اتفرج على كل حاجة بتحصل حواليك 

وراجع كل حاجة انت عملتها حتى الأن 

وشوف كده اللي انت عملته ده

فيه كام واحد زيك عمل شبهه بالظبط 

وارجع شوف كل حاجة بتحصل وبتتقال حواليك

وشوف كام واحد بيكرر نفس الكلام هو هو 

واسأل نفسك في النهاية

كام واحد حواليك بيحاول بأقصى جهده يبقى جزء من المحيط الحالي

وكام واحد حواليك بيخلق لنفسه المحيط بتاعه

واسأل نفسك برضه

هل انت جزء من محيط حالي

ولا بتحاول تخرج من محيط حالي وتدخل في محيط جديد انسب لك

ولا بتحاول تخلق محيط انسبلك بناءً على ستايلك وطريقة تفكيرك؟

وبس كده

اتمنى تكون استفدت من ايميل انهاردة

ولنا لقاء اخر بكرة ان شاء الله

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير