كيف تصبح جنتل مان بالعافية

Sponsored by

،عزيزي وعزيزتي

😄 انا بكتب الإيميل ده وفيه ابتسامة عريضة كده على وشي

وده راجع لسببين الحقيقة

السبب الأول وهو بسبب اني بحب القصة اللي هحكيها دي اوي وبشوفها مضحكة الى حد ما 

والسبب التاني هو اني حاسس ان نسبة البنات اللي فتحت الإيميل ده

 😄 هتبقى غالبًا اكبر من نسبة الولاد اللي هتفتحه 

وده بسبب العنوان اللي انا كتبته

فـ من غير ما اطول عليكم اكتر من كده

يلا بينا نبتدي

قصتنا بتبتدي من عند الراجل ده

ثيوفيليس فان كانيل مواطن امريكي اتولد سنة ١٨٤١ 

وكان من عائلة ارستقراطية غنية جدًا 

في فترة شباب ثيوفيليس كان من المعتاد في البيوت الأمريكية ساعتها 

ان سيدات المنزل بيعملوا زي صالونات تجمع كده في بيوتهم 

يتكلموا في كل الحاجات اللي غالبًا الستات لما بتقعد قعدة بيتكلموا فيها 

يمكن الحاجة الإضافية اللي كانت موجودة في القعدات دي

هو ان كان كل ست بتحاول تتباهى وتتفاخر بالطرق اللي بتربي بيها ولادها

وده لإن في القعدات دي الأولاد بيبقوا موجودين برضه

فـ بتبقى القعدة كلها يا ما شاء الله يا منى ويا زينات هانم لا التربية والذوق باينين خالص في اولادك اللهم بارك

ام ثيوفيليس كانت زيها زي اي ام برضه

كان بييجي الدور عليها في انها تعمل قعدة عنها في البيت وكده

وتضايف الناس وتتكلم وتحكي بقى هي كمان، اشمعنى هي يعني

وبما انها ام لشاب قد الدنيا في طريقه انه يبقى راجل كبير مسئول وسيد الرجالة

فـ واحدة من الحاجات المتوقعة من أم لراجل هي انها تربيه على الشهامة والجنتلة كده

ودي حاجة ثيوفيليس مكنش بيطيقها الحقيقة

كونسبت الشهامة والجنتلة ده كان كونسبت مستفز جدًا بالنسباله وشايف انه ملوش لازمة

ومكنش مقتنع بيه خالص الحقيقة

وقبل ما ناخد موقف من ثيوفيليس دلوقتي حالًا

محتاجين نفهم اكتر هو ايه اللي كان بيحصل

خلى ثيوفيليس مش طايق حاجة زي كده

زي ما كنت بحكيلكم كده ان في القعدات دي الأولاد بيبقوا قاعدين برضه

فـ كان كل مرة القعدة دي معمولة في بيتهم

كان مطلوب منه انه يفضل فاتح الباب عشان الستات والبنات يعدوا منه

وكل ما واحدة تقوم مثلًا عايزة تروح حتة

المفروض يقوم هو كمان الأول يروح للحتة دي ويفتح الباب للست او البنت عشان يعدوا

ودي حاجة كانت مجنناه 

انا ليه افضل فاتح الباب لواحدة عندها القدرة الكاملة انها تفتح الباب لوحدها يعني

وعشان كده ثيوفيليس ابتدى يتمرد على الموضوع ده

وما بقاش يعمله في القعدات اللي بتبقى معمولة في بيتهم

وده الحقيقة كان بيسبب احراج كبير لمامته

لدرجة ان في مرة من المرات قامت زعقتله وضربته بالقلم

قدام الستات والبنات اللي كانوا موجودين

تفتكروا ثيوفيليس اتعظ؟

 😄 على الإطلاق

ده الموضوع ده خلاه مصمم اكتر انه لازم يشوف حل في الحوار ده

خصوصًا بقى ان بعد مرور كام سنة

ثيوفيليس اتجوز واحدة بتقدس جدًا موضوع الجنتلة ده

ومقتنعة اقتناع تام ان لازم جوزها يفتحلها كل باب اوضة جوه بيتهم قبل ما تدخلها

وفي صباح يومًا ما، داخل اوضة نومهم، ثيوفيلس انفجر

فتح ثيوفيليس باب اوضة نومهم بمنتهى القوة كده وخرج منه بيزعق لمراته وهي قاعدة على سريرها

وبيقولها 

!!العبث بتاع فتح ابواب اوض الشقة ده كل يوم انا مش مكمل فيه

!!انا مش هفضل بجري طول اليوم جوه شقتي عشان انقل حضرتك من اوضة لأوضة 

!!انتي ست ناضجة وكبيرة وتقدري تتنقلي ما بين الأوض براحتك ولوحدك

وساب ثيوفيليس الشقة ورزع بابها هو كمان

تفتكروا مراته عجبها اللي هو عمله ده؟

 😄 على الإطلاق 

ده انا عايز اقولكم ان من كتر ان اللي عمله ده ما عجبهاش 

لما رجع ثيوفيليس البيت، لاقاها لسه قاعدة في السرير في نفس الحتة اللي كانت فيها لما خرج الصبح وكان بيزعق 

كأنها بتوصله رسالة حلو اللي انت عملته الصبح ده، بس ما تحلوش اكتر من كده

عشان انا لسه مستنياك تفتحلي ابواب اوض الشقة برضه 

وخليني هنا اقولك ان ثيوفيليس كان خلاص رسمي اتجنن من الموضوع

وعقد النية انه لازم يحل مشكلة ان الراجل يفتح الباب للستات دي

ثيوفيليس قعد ٣ سنين بيشتغل على الحل

الحل ده كلفه تقريبًا حوالي ١٠٠٠٠ دولار ساعتها

والحل ده ببساطة هو اللي احنا هنشوف في الصورة ده اهو

😄 ايوه مظبوط، ثيوفيليس هو الشخص اللي عمل  الباب الدوار

وكان شايف ان ده الحل الأكثر عبقرية لمشكلته

وكان شايف كمان ان الحل ده يبان فيه الراجل جنتل اكتر بكتير كمان

لإن دلوقتي هو يقدر يدخل جوه الباب الأول ويزقه 

والست تدخل وراه بتمشي بس ما بتعملش حاجة

وعشان يحط الباب ده تحت التجربة العملية 

راح عمله منه ١٤ قطعة 

وركبهم في بيته وفي بيت مامته

وكان مبسوط اوي اوي من النتيجة الحقيقة

وعشان كده قرر انه يسوق للباب ده بقى ويبيعه للجمهور

بس طبعًا ما ينفعش يسوقله بالأسباب اللي هو عمل الباب عشانها 

ثيوفيليس كان محتاج أسباب ومميزات عملية ومنطقية يقدر من خلالها يبيع الباب ده

وعشان كده كان شارح في كاتالوجات الباب ده الآتي

انه بيمنع يبقى فيه طريق مباشر ما بين القسم الداخلي والخارج للمبنى بشكل يقلل من فقدان درجة الحرارة

وانه ما بيعملش اي دوشة ولا اي تزييق ولا اي اصوات خالص

وانه فعال جدًا في منع دخول التراب والمطر والتلج الى داخل المبنى 

وانه مقاوم جيد جدًا للرياح وصعب انه يتكسر

وانه بيعزل الأصوات الخارجية

وانه بيدي اكسيس ان الناس تدخل وتخرج من المبنى في نفس الوقت

و كل ده بقى كان تحت سلوجان إعلاني بعنوان

 الباب اللي على طول مقفول

الباب ده انتشر انتشار رهيب مع الوقت

يعني تقريبًا دلوقتي معظم الفنادق الكبيرة فيها الباب ده

معظم مباني الشركات الكبيرة فيها الباب ده برضه

وده الحقيقة مش عشان المميزت اللي ثيوفيليس قال عليها بخصوص الباب

ده عشان الباب فعلًا عمليًا مفيد جدًا على اكتر من ناحية

سواء من كل ما يتعلق بالحرارة والجو والعوامل الخارجية بشكل عام

وكمان كل ما يتعلق بحركة الناس الداخلة والخارجة من الأماكن دي

بس عارفين ايه المضحك اكثر في القصة دي؟

ان على الرغم من ان ثيوفيليس اخترع الباب الدوار ده

عشان مكنش مقتنع بإن الجنتلة هو اني افتح الباب للست

الا ان لحد اللحظة اللي بنتكلم فيها دي دلوقتي 

لو فيه راجل وست داخلين من الباب ده

 😄 الراجل ذوقيًا هيخلي الست تعدي الأول

ثيوفيليس عمل ثورة في اختراع أبواب المباني 

الا انه مقدرش يحدث ثورة في تغيير سلوك بشري ومتعارف عليه اجتماعيًا 

لأن من المستحيل على صاحب منتج او مسوق او ايًا كان مين

انه يغير من احتياج موجود عند بني ادم

احنا ممكن نلعب على احتياج عند بني ادم ونخلق رغبة ليها علاقة بمنتج احنا بنقدمه

عشان يحصل عليه طلب في النهاية

وده الفرق ما بين الحاجة، الرغبة، والطلب 

انما انك تغير احتياج عند بني ادم دي صعبة اوي الحقيقة

الراجل في النهاية كده كده عنده احتياج انه يحس برجولته وانه يظهر رجولته بشكل ما او بآخر

وواحدة من الأوجه اللي بيقدر فيها يفرغ الإحتياج ده، هو التعامل بجنتلة وشهامة مع الجنس الآخر

لو قدرت تقدم حاجة تزيد من رغبة الراجل في اظهار اناقته، جنتلته، شهامته، افتح القوس وما تقفلوش

انت كده ماشي في الاتجاه الصح

انما لو قررت انك الأول تغير الاحتياج عند الراجل، عشان ناوي تخلقله احتياج مختلف بقى

وبعدين تخلقله رغبة في منتج ليها علاقة بالاحتياج الجديد ده

 😄 فـ كان غيرك اشطر، وعندك ثيوفيليس اهو مثال

وبالمناسبة الكلام ينطبق على الجنسين عادي

وبس كده

اتمنى تكون استفدت من ايميل انهاردة

ولنا لقاء اخر بكرة ان شاء الله

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير

وصحيح كنت هنسى

حابب اشارك معاكم لينك لدورة تدريبية مقدمة من امريكان ماركتنج اسوسييشن

خاصة بطرق بناء سوشيال ميديا استراتيجي تحقق تفاعل فعال مع التارجت اودينس

وازاي تبني من خلالها خطة المحتوي بتاعتك

تقدر تدخل على اللينك اللي تحت ده وتسجل مكانك في الدورة ان شاء الله

هي هتبتدي لسه الشهر القادم ان شاء الله

 ❤️ يلا بالتوفيق

Level Up Your Social Media Strategy This April

Master the art of crafting a social strategy. This small group and conversational training from the American Marketing Association equips you with the knowledge to create highly effective content plans and audience engagement strategies. Define your purpose and measure your impact.

Boost Your Engagement; Register Now!