لا تعطني سمكة

وتقولي اصطادها ازاي

قولي مكانها فين وانا هتصرف

ما اخبيش عليكم عزيزي وعزيزتي

ده بالظبط اللي انا كنت كاتبه كملحوظة جنب القصة اللي انا هحكيلكم عنها دلوقتي

فـ خلونا الأول نحكي القصة

وبعد كده نفهم ليه عنوان  الإيميل ده كده

يلا بينا

الحكاية بتبتدي سنة ١٩٤٥ 

وقبل إسدال الستار على الحرب العالمية التانية خلاص

كان فيه غواصة المانية محملة ببضاعة سرية في اتجاهها إلى اليابان

والحقيقة أن الغواصة دي كانت شايلة حوالي ٧٠ طن زئبق 

بالإضافة إلى مخططات كاملة بتشرح طرق بناء طائرات نفاثة

وشايله كمان صواريخ ثقيلة

بالإضافة ان كان على متنها مجموعة من الخبراء في كل ما يتعلق بالوقود وطرق توظيفه

ده غير بقى ان الغواصة دي كان فيها ذات نفسها ٢٢ صاروخ تقدر تهاجم بيهم اثناء حركتها 

لو عايز تاخد فكرة اكتر عن شكلها وحجمها، شوف الصورة اللي انا حاططهالك دي اهي

U-864 German Subamrine

بريطانيا سمعت خبر عن الغواصة دي

وطلبت من ضابط اسمه جايمي لوندرز انه ياخد غواصته ويتحرك على غواصة الألمان بهدف تدميرها واغراقها 

Jamie Launders

اتحرك جايمي بغواصته بناءً على معلومات قدمهاله الجيش ان غواصة المانيا موجودة دلوقتي في النرويج

وقد كان فعلًا 

الغواصة كانت موجودة في بحر النرويج

لما وصل جايمي هناك قدروا يشوفوا المنظار الخاص بالغواصة في بحر النرويج

ولكن هما شافوا بعديها بوقت مش قصير ان الغواصة بقت تحت المياه بشكل كلي

فـ قرروا هما كمان يفضلوا تحت المياه

وهنا كان فيه مشكلة بقى 

وهي ان نظرًا لأن الغواصتين تحت المياه

فـ محدش مرئي للتاني خالص

وبالتالي عشان جايمي يعرف هي الغواصة فين بالظبط تحت المياه عشان يبتدي تعامل عليها

مضطر انه يستخدم السونار

بس هو خاف أن لو استخدم السونار، كابتن الغواصة الألمانية يعرف وكمان يعرف مكانهم فين

وعشان كده قرر جايمي انه بدل ما يستخدم السونار، يستخدم استراتيجية تحديد الصوت جاي من انهي مكان

فـ طلب من الطاقم عنده ان مفيش اي حركة تحصل للغواصة وتفضل في حالة ثبات كده

عشان نقدر نحدد أي أصوات خارجية حوالينا

وقد كان فعلًا

فضلوا بالمنظر ده حوالي ٤٥ دقيقة

لحد ما قدروا يسمعوا صوت حركة الغواصة الألمانية جاي منين

اكتشف جايمي كمان ان الغواصة الألمانية ما بتتحركش في خط مستقيم لأ

هي قاعدة بتتحرك في شكل زيج زاج كده

ودي كانت مشكلة بالنسباله لو هو عايز يهاجمها

ولكن مع ذلك هو قرر يمشي وراها الأول

لعلى وعسى يغيروا من طريقة حركتهم

ولكن ما غيروش من طريقة حركتهم

وهنا جايمي كان خلاص عارف انه لازم يهاجم دلوقتي على الرغم من أن الغواصة ما بتتحركش في خط مستقيم  

حاول جايمي يحسب متوسط سرعة وصول الصواريخ اللي هيضربها على الغواصة الألمانية قد ايه

اكتشف ان الصاروخ الواحد هياخد تقريبًا ٥ دقايق على ما يضرب الغواصة

وده معناه ان الغواصة الألمانية هتعرف ان فيه صاروخ في الاتجاه إليها وهتحاول تتفاداه 

جايمي قرر يلعب لعبة مختلفة

في الوقت اللي انا بحكيلك فيه القصة دي، كان المعتاد في حروب الغواصات

ان الهجوم دايمًا مبني على حاجتين

المسافة المتاحة للوصول الى الهدف ومدى الحركة الأفقية الخاصة بالهدف 

جايمي بقى قرر يزود حاجة تالتة في المشكلة اللي هو فيها دلوقتي وبيحاول يحلها دي

وهي العمق الخاص بالهدف 

هو كان عايز يحسب او يتوقع مكان وجود الغواصة الألمانية في المياه

بعد ٤ دقايق من ضرب اول صاروخ عليها هيبقى فين

هتتحرك يمين ولا شمال ولا هتنزل لتحت

:وحط في حساباته الأتي

سرعة الغواصة الألمانية

قدرات الالتفاف والغوص الخاصة بالغواصة

وايه اللي ممكن يعمله قائد الغواصة كـ احتمالات بعد ما يعرف انه اتضرب عليه صاروخ

وبناءً على ذلك

قرر جايمي يضرب ٤ صواريخ، الفرق ما بين كل صاروخ وصاروخ حوالي ١٧ ثانية

صاروخ موجه توجيه مباشر على الغواصة في الاتجاه الافقي 

صاروخ موجه تحت الغواصة

صاروخين كمان موجهين على شمال ويمين الغواصة

وبعد ربع ساعة بالظبط

جايمي واللي كانوا على الغواصة سمعوا صوت انفجار ضخم في المياه

توقع جايمي كان في محله 

الغواصة الألمانية نزلت لتحت بعد ما عرفت ان فيه صاروخ متوجه عليها توجيه مباشر

بعد كده اضطرت تتحرك تاني على الشمال عشان تفادي الصاروخ التاني

بعد كده اتحركت على اليمين عشان تفادي الصاروخ التالت

بس على ما عملت كل ده، ما عرفتش تفادي الصاروخ الرابع اللي كان اصلًا رايحلها في الحتة دي

فـ الصاروخ ضرب فيها وانفجرت

وده كان يعتبر حدث فريد من نوعه الحقيقة

لإن اللي كان بيحصل قبل كده في حروب الغواصات 

ان الغواصة بتضرب وهي لسه مش تحت المياه بشكل كامل 

فـ بتغرق في المياه غرق كلي 

انما اللي حصل ده يعتبر اول اشتباك لغواصات تحت المياه بشكل كامل 

ودي كانت حاجة غير متوقعة على الإطلاق 

لإن لما الجيش كلف جيمي بالمهمة دي

كان التكليف هو انك تروح لمكان الغواصة

تدمر الغواصة وتغرقها 

بس كده

محدش قاله تدمرها ازاي وتعمل ايه لو حصل ايه

والقصة دي فيها درس عظيم الحقيقة

لو شيلنا كلمة تكليف اللي انا قولتها فوق دي جايمي 

وبدلناها بـ بريف 

هنلاقي ان البريف اللي اتقال جايمي 

بريف شرح ايه المهمة اللي مفروض هو يعملها 

البريف ده ما شرحش لجيمي المهمة بتاعتك المفروض تنفذها ازاي 

وبالمناسبة هي دي مهمة البريف 

انه يقولك انت مطلوب منك تعمل ايه، ما يقولكش انت المفروض تعمله ازاي 

وده درس محدش بياخد بيه للأسف

ناس كتير دلوقتي اللي بتبقى مسئولة عن كتابة بريف بيقول مطلوب نعمل ايه

يظنوا ان من نطاق شغلهم انهم المفروض يشرحوا كمان بالتفصيل ازاي نعمل اللي مطلوب ده

فـ بتبقى النتيجة في النهاية

 انك عندك واحد بيعرف يقول مطلوب نعمل ايه

راح خانق كمان على الناس اللي بتعرف في النهاية تقول وتشوف هننفذ المطلوب ده ازاي

ودي مصيبة سوداء 

لإن مهمة اللي بيكتب البريف انه يوصل للإجابة الصح على سؤال هو البراند او الكلاينت محتاج ينفذ ايه في الوقت الحالي

بس مهمة اللي هيشتغل على البريف ده هو انه ازاي يحول الإجابة دي لشئ ملموس على أرض الواقع يحدث تأثير في النهاية

يعني لما ييجي اكاونت مانجر او بلانر او اي شخص تاني حتى ما بيشتغلش في الكومنكيشن يكتب بريف 

فـ المتوقع أنه بناءً على مهاراته في البروجكت مانجمنت وأساسيات التسويق انه يحط بريف مركز على الشغلانة اللي مفروض فعلًا تتعمل

ويسلم البريف ده لأي شخص بيشتغل في الكومنكيشن عشان يشوف شغله بقى 

والكلام موجه برضه للشخص اللي بيشتغل في الكومنكيشن سواء بقى كنت كريتور، كوبي رايتر، موديروتور، ديزاينر، او ڤيديوجرافر، ايًا كان بقى

ما ينفعش تستلم بريف قالك مطلوب نعمل ايه

وتقعد تسأل هنعمله ازاى اصل البريف ناقص

البريف يبقى ناقص لو مقالكش ايه المطلوب عمله بشكل واضح وصريح 

غير كده ده شغلك انت بناءً علي مهاراتك في الكومنكيشن والريسيرش وفهم سلوك التارجت والماركت ومذاكرتك للمنتج وارشادات البراند اللي هتشتغل عليه

انما ده مش شغل حد تاني

وختامًا كده خليني اقول

مفييش بريف هييجي بفكرته، بس فيه بريف بيخليك تعرف تفكر

مفيش بريف مش هتستفاد منه، بس حجم الاستفادة ده واصل لحد فين؟

وطبعًا لو مفيش بريف، يبقى اكيد الوضه مش لطيف

وبس كده

اتمنى تكون استفدت من ايميل انهاردة

ولنا لقاء اخر بكرة ان شاء الله

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير