لو مش عايز حد يشوفك

،عزيزي وعزيزتي

مش عارف الحقيقة ابرر ليكم اللي انا كاتبه ده ازاى في الأول كده

 😄 لا بجد، انا فعلًا مش عارف 

وعشان كده احنا محتاجين نقرأ الإيميل كده

واوعدكم ان تقريبًا في نص الإيميل كده هتفهموا انا قصدي ايه

فـ يلا بينا نبدأ في قصة انهاردة

من ٢٩ سنة كده في بنسلفانيا

دخل راجل كبير في الأربعينات من عمره البنك عادي

وزنه ١٠٠ كيلو تقرييًا 

وطوله تقريبًا ١٦٠ سم

لو غمضت عينك ثانيتين تحاول تتخيل شكله

هتلاقي ان راجل بالمواصفات دي شكله عادي مفيهوش حاجة

المشكلة بقى ان الراجل ده كان داخل البنك بمسدس

ومش بس كده كمان لأ

ده كان داخل البنك وهو مش لابس ماسك

الراجل داخل يسرق البنك ومش هامه اي حاجة

ولأزيدك من الشعر بيت

الراجل ده بص للكاميرات اللي جوه البنك وشاورلها وضحك كده

عارف ايه الأنيل من كل ده؟

انه بعد ما سرق الفلوس من البنك ده

راح على بنك تاني في نفس اليوم وعمل نفس الموضوع بالظبط هو هو

طبعًا الدنيا قامت ما قعدتش

في نفس اليوم ده بليل، صور الراجل من كاميرات البنوك كانت بتتعرض في النشرة الاخبارية للناس 

والبوليس قام بشغله، وقدر يعرف مين الراجل ده وساكن فين كمان

وده اسم وشكل الراجل برضه عشان تاخد فكرة

الظباط راحوا لبيت ارثر وقبضوا عليه

المشكلة بقى ان ارثر لما اتقبض عليه فضل يصوت ويزعق ويقول

ان مستحيل تكون الكاميرات صورتني انا، انتم اكيد متلخبطين

وانا عارف انك دلوقتي مستغرب وبتقول اكيد فيه بلوت تويست في الموضوع

بس خليني اقولك ان الظباط برضه كانوا مستغربين زيك كده من اللي ارثر بيقوله ده

وعشان كده قرروا يفرجوه على تفريغ كاميرات البنوك

آرثر انهار بقى 

آرثر لما شاف نفسه في الكاميرات مقدرش يستوعب الحقيقة اللي هو شايفها

وفضل يعيط ويقول

مستحيل ده يحصل، انا استخدمت العصير

انا استخدمت العصير ازاي ده حصل

طبعًا الظباط مكانوش فاهمين هو بيقول ايه

عصير ايه اللي استخدموا و ايه علاقة ده باللي هو عمله

 😄 هو في ايه ماله الراجل ده

آرثر لما هدي شوية اعترف بكل حاجة هو عملها 

قال فعلًا ان هو اللي سرق البنكين، وان هو اللي طالع في الكاميرات عادي

وقال كمان انه كان مقتنع ان وشه مش هيطلع في الكاميرات

عشان هو عصر على وشه كله عصير ليمون

وده عشان هو كان عارف ان الليمون هو المكون الأساسي في الحبر السحري

ودي حاجة من البديهيات في أساليب التواصل السري والرسائل المشفرة كده

تكتب رسالة بقلم شارب عصير ليمون، وتسيبها تنشف شوية

بعد كده تجيب مكواة سخنة وتكوي الورقة، هتقدر تقرا اللي مكتوب

آرثر بقى كان مقتنع انه لو دهن وشه بعصير ليمون

محدش هيعرف يشوفه 

انا عارف ان اللي انا بقوله ده عبث ودرب من دروب الخيال انه يكون حقيقة

 😄 بس والله ده حصل بجد

اللي آرثر عمله ده كان له تأثير كبير جدًا الحقيقة 

 😄 ولكن مش في قسم الجرائم

إنما في قسم علم الاجتماعيات

لإن اللي عمله ده كان لافت نظر واحد من أكثر علماء النفس تأثيرًا لحد وقتنا هذا

وخلاه يدرس العلاقة الموجودة ما بين مقدار الجهل اللي ممكن يكون موجود عند بني آدم

ومقدار الثقة اللي ممكن تبقى موجودة عنده برضه

والراجل ده هو البروفيسور ديڤيد دانينج

صاحب نظرية تأثير دانينج كروجر

ما هو تأثير دانينج كروجر؟

زي ما انت شايف من الجراف اللي في الصورة ده كده 

ان تأثير دانينج كروجر بيقول

ان فيه انحياز عقلي عند البني ادم

بسببه يقدر شخص غير مؤهل - ايًا كان غير مؤهل في ايه

انه يبالغ في تقدير نفسه وتقدير حجم المعلومات اللي بيمتلكها 

وعلى النقيض الأخر ممكن تلاقي شخص مؤهل جدًا 

بيحاول دايمًا يحجم نفسه عن المبالغة في تقدير ما يمتلكه او ما حققه او ما يعرفه بشكل عام

ودي مش حاجة هو طلعها بناءً على اللي عمله ارثر بس 

لا دي حاجة لاحظها في معظم الناس اللي اتعمل عليهم الدراسة

كل ما كان الشخص متعجرف ومغرور ومبالغ اكتر، كل ما كان بيأڤور ويبالغ في حجم معرفته وقدراته

وكل ما كان الشخص ذكي او عنده ذكاء اجتماعي عالي، كل ما كان بيقلل من حجم قدراته

كإن ببساطة كده اللي مش فاهم حاجة مفكر انه عارف كل حاجة

واللي فاهم كتير عارف ان لسه فيه اكتر ممكن يعرفه

ودي الحقيقة حاجة منطقية جدًا 

اصل لو جينا فكرنا فيها كده

لو تخيلنا ان فيه حد غبي ومفكر انه عارف كل حاجة

عند انهي لحظة الشخص ده ممكن يدرك انه غبي بجد؟

اصل لو وصل للحظة دي، فـ ده معناه انه وصل لقدر من الذكاء 

 😄 خلاه يكتشف انه غبي

وده يرجعنا لحاجة انا قولتها قبل كده هنا في النيوزليتر 

وهي انت ما تعرفش اللي ما تعرفوش بالفعل 

ناس كتير ما تعرفش انها ما تعرفش 

فـ بتفترض انها عارفة 

وتبتدي بقى تتعامل بمنتهى الثقة اللي في الدنيا مع اللي حواليها

عارفين ايه مشكلة الحتة دي بالذات بقى؟

ان في معظم الأحيان الثقة تغلب الجهل بالنسبة للمتلقي 

الثقة درع حماية مغري بيستخدمه اللي ما يعرفش طول الوقت

وناس كتير تانية ما تعرفش برضه وبتصدق بسبب الثقة دي

ودي ممكن تكون نصيحة ليك الحقيقة

ان لما تكون في نقاش مع زمايلك في الشغل 

او في ميتينج مع مديرك وزمايلك

او في ميتينج مع الكلاينت بتاعك

وتلاقي فيه واحد صوته هو أعلى صوت في الأوضة

ورأيه هو اقوى رأي في اللي قاعدين

مش شرط بالضرورة انه يكون صح

ومش شرط خالص انه يكون فاهم هو بيقول ايه ولا بيعمل ايه

ممكن يبقى فيه نسبة كبيرة ان الشخص ده عارف أقل قدر من المعلومات عن الحاجة اللي بتتناقشوا فيها

ممكن يبقى فيه نسبة كبيرة ان الشخص ده بيتعامل من منظور التايتل أو السلطة اللي عنده وخلاص

بعيدًا عن فنيات وتقنيات شغل 

حاول ما تلخبطش ما بين حقيقة ان فيه معلومات ناقصة

وحقيقة ان فيه كلام بيتقال بوضوح

لإن ما بينهم ممكن يكون فيه جهل وسطحية بيحركوا كل حاجة

ودي حاجة بالمناسبة محتاج تطبقها على نفسك برضه

لإن لا انت ولا انا ولا اي حد استثناء من القاعدة دي عادي

ودي كانت قصة اخرى عن حرامي فيها درس مختلف

وده بناءً على طلب المشتركين اللي عجبهم اوي الموضوع ده

اعتقد انا هكتفي بهذا القدر من قصص الحرامية في النيوزليتر

 😄 ما شاء الله اخدنا دروس متنوعة منها

اتمنى تكون استفدت من ايميل انهاردة

ولنا لقاء اخر بكرة ان شاء الله

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير