هي الستات مبتعرفش تسوق فعلًا؟

ما تيجي نشوف

،عزيزتي وعزيزي

انا عارف ان السؤال اللي انا طارحه في عنوان الإيميل قد يبدو مستفز شوية شويتين الحقيقة لجزء مش قليل منكم

😄 ومش هكدب عليكم، ده اول سبب عشانه انا كتبت العنوان بالطريقة دي

ولكن يشفعلي اني كتبت تحت العنوان ما تيجي نشوف، وده معناه اني بطرح سؤال برئ

تاني سبب هو اني اكيد هحكي قصة لها علاقة بالموضوع ده

 😄 ومش قصة عادية الحقيقة

فـ من غير ما اطول عليكم اكتر من كده

تعالوا بينا نشوف قصة انهاردة والدرس المستفاد منها كمان

قصتنا بتبدأ من عند بيرثا

Bertha

بيرثا كانت سيدة منزل المانية وقعت في حب جوزها كارل لإنها كانت شايفاه شخصية مبتكرة وعبقرية 

ومن الحاجات اللطيفة اللي بيرثا عملتها في اول جوازها من كارل انها ادته المهر بتاعها عشان يشتغل على الاختراع بتاعه

وهو اول عربية بـ ٣ علاجات بمحرك احتراق داخلي - موتور يعني - في العالم 

وكان اسم العربية دي الموتور واجين

Motorwagen

بيرثا كانت قلقانة على كارل الحقيقة

على الرغم من مدى إيمانها بمدى ذكاء و عبقرية جوزها كارل 

الا انها كانت شايفة انه مش شاطر خالص في انه يسوق لنفسه ولا يسوق للعربية اللي هو عملها 

مقدرش يبيعها خالص على الرغم من الناس كانت شايفاها حاجة مبتكرة كده وجديدة من نوعها في الزمن ده 

بس في نفس الوقت الناس برضه كانت شايفة العربية دي كأنها حاجة انتيكة كده او لعبة 

انما مش حاجة عملية ينفع تستخدم فعلًا

بس بيرثا كانت شايفة حاجة عكس اللي الناس شايفاه

بيرثا كانت مقتنعة ان عربية كارل تقدر تسد مكان العربية اللي بيجرها حصان عادي جدًا 

والعربية اللي بيجرها حصان دي كانت العربية الرسمية اللي كل الناس بتستخدمها في الوقت ده

كانت شايفة ان كل اللي هما محتاجينه هو إثبات عملي على صحة وعملية الاقتناع ده

بيرثا اخدت عيالها وسابت لكارل رسالة

قالتله فيها انا رايحة عند ماما انا وولادك

كارل لما شاف الرسالة ما ابداش رد فعل اوي الحقيقة

قال مفيش مشكلة اكيد اخدت اول قطر هي والعيال عشان تروح لمامتها 

اصل بيت مامتها بعيد عن بيتهم بـ بتاع ١٠٠ كيلو كده تقريبًا 

بس كارل اكتشف في نفس اليوم ده لما راح يفتح الجراج بتاعه

ان العربية مش موجودة

اتاري بيرثا قررت تاخد العربية وتسوقها لحد بيت مامتها 

وهنا بس كارل ابتدى يهلع

لإن اولًا كل البنزين اللي كان في العربية يمشيها حوالي 16 كيلو بس 

ومفيش على الطريق اي بنزينة، لإن الحقيقة مكنش فيه حاجة اسمها بنزينة في الوقت ده

ثانيًا بقى هو مكنش فيه طرق اصلًا ساعتها، احنا بنتكلم سنة ١٨٨٠ تقريبًا 

الطرق عبارة عن شوية مسارات كده مليانة طوب عادي 

فـ العربية حرفيًا هتقعد تتنطط على الطريق والموضوع هيبقى كارثي كارثي يعني 

ولكن الحقيقة على الناحية التانية كل ده مكنش في بال بيرثا 

بيرثا فكرت في حاجتين اتنين بس

انا هاخد العربية

ولما تحصل مشاكل في نص الرحلة ابقى اشوف احلها ازاي 

نبتدي بقى بـ اول مشكلة

وهي طبعًا البنزين

بيرثا كان عندها معلومة ان فيه مركب اسمه ليجروين من مشتقات البترول

وبيتم استخدامه كمذيب في الصناعات الكيماوية 

وكانت عارفة برضه ان الـ ليجروين ده بيتباع في الصيدليات عادي

فـ قررت انها تقف في اقرب صيدلية تلاقيها في اي قرية على الطريق وتشتري الـ ليجروين ده

وقد كان فعلًا، اشترت حوالي ١٠ لتر منه عشان الرحلة 

ولما تيجي تفكر في اللي بيرثا عملته ده 

 😄 هتلاقي انها وهي مش قاصدة اخترعت كونسبت محطات البنزين للعربيات

نروح لتاني مشكلة

وبيرثا سايقة العربية، فيه سلكين لمسوا في بعض وعملوا قفلة في الدائرة الكهربائية

تعمل ايه بيرثا بقي؟

راحت مطلعة رباط من شنطتها وحاولت تفصلهم عن بعض عشان ما يلمسوش تاني ويعملوا قفلة

قامت العربية دايرة تاني 

ولما تيجي تفكر في اللي هي عملته ده

 😄 هتلاقي انها وهي مش قاصدة اخترعت كونسبت عزل الأسلاك الكهربائية في العربية

مازلنا مستمرين في المشاكل

كاربراتير العربية وهي سايقة اتسد

والكاربراتير ده بتبسيط شديد هو اللي بيخلط البنزين مع الهواء عشان الموتور يفضل شغال

بيرثا حاولت تنفخ فيه كتير يمكن يسلك بس مفيش فايدة

فـ جربت تسلكه بدبوس من دبابسيها عشان تسلك السدة اللي فيه

وقد كان، الكاربراتير اتسلك وكملت بيرثا رحلتها

الفراميل تسكت؟ اكيد لأ

دواسة الفراميل كارل كان عاملها من الخشب

بس مع التخبيط والترزيع في الطريق، الدواسة ابتدت تشقق وتتأكل كده

بيرثا تسكت؟ اكيد لأ

وقفت عند اقرب قرية وكانت بتدور على اي حد عنده ورشة جلود

وطلبت منه يعمل قالب جلد للدواسة عشان تلبسها على الدواسة وتعرف تدوس عليها

بيرثا قربت خلاص على بيت مامتها

بس فيه مشكلة صغيرة كده واجهتها 

هي مش صغيرة خالص الحقيقة بس انا بتريق

وهي ان فيه تل محتاجة تطلع عليه الأول عشان توصل 

وانا عارف ان حد ممكن يفكر دلوقتي ويقول طب ما تسيبتها تحت وخلاص ويطلعوا هما ما حبكتش 

هقولك ده انت ممكن تفكر كده، بس مش بيرثا لأ 

بيرثا كانت عايزة تطلع التل بالعربية

اللي كان شاغل بالها ان العربية فيها نقلتين سرعة بس، الأول والتاني

فـ عشان تطلع على التل، هي محتاجة عزم شديد من العربية عشان تطلع

وده مكنش موجود وكارل مفكرش فيه، لإن هو كان مصمم العربية على اساس انها هتمشي في طريق مستقيم عادي 

عملت ايه بيرثا بقى؟

😄 فاكرين عيالها الاتنين اللي كانوا معاها طول الرحلة وما جبناش سيرتهم دول؟

هما كانوا ولدين الحقيقة واحد عنده ١٥ سنة والتاني ١٣ سنة

خلتهم يزقوا العربية على التل وهي قاعدة فيها فيها

بحيث ان العربية تكتسب عزم كافي من زق الأولاد، يخليها تعرف تنقل السرعة عند مرحلة ما من الصعود 

فـ العربية تعرف تطلع بسهولة 

وقد كان والعربية طلعت وبيرثا والولاد وصلوا عند مامة بيرثا بألف سلامة

بيرثا بعتت برقية لكارل بعد ما وصلت 

قالتله فيها عزيزي كارل انا وصلت عند ماما بالعربية وانا والاولاد كويسين

وقامت حكياله في البرقية كل اللي حصل بالتفصيل 

وراحت في تاني يوم على طول اخدت الولاد رجوعًا تاني لبيت كارل

كل ده عشان تثبت ان عربية جوزها تقدر تقطع ٢٠٠ كيلو رايح جاي 

زيها زي العربية اللي بيجرها حصان عادي

اللي عملته بيرثا ده انتشر كالنار في الهشيم الحقيقة

كل الناس عرفت اللي هي عملته

وكل الناس بقى عندها فضول تجرب وتشوف عربية كارل بنفسها بقى هي كمان

وده ادى الي نجاح كبير جدًا لكارل ونجاح كبير جدًا لشركته كمان

واللي انا مرضتش اتكلم عنه طول القصة دي الحقيقة 

 😄 هو ان بيرثا دي كانت مراة كارل بنز 

ولو انت ما تعرفش مين كارل بنز، فـ ده احد المؤسسين لشركة ميرسيدس بنز 

بعد اندماج شركته مع شركة اسمها دايملر للمحركات سنة ١٩٢٦ 

Karl Benz

واللي عملته بيرثا ده في درس عظيم جدًا

وهو انك محتاج تبدأ يا عزيزي ويا عزيزتي بأي فكرة انت شايف انها ممكن تحل مشكلة قدامك

مفيش مشاكل هتتحل وانت قاعد بتجري جوه دماغك وبتفكر هتتخطاهم ازاي

مفيش مشاكل هتتحل وانت قاعد بتخطط هتحلها ازاي في دماغك بشكل مثالي 

محتاج تبدأ حتى لو انت مش قادر تشوف كل الحلول قدامك

لإن صدق او لا تصدق مهما عملت، هيطلعلك مشاكل عمرك ما كنت متوقع انها تحصل اصلًا 

فـ لما تبقى قاعد بتفكر في فكرة لكلاينت، وشايف ما بينك وبين نفسك انها مش حلوة

يا سيدي ابدأ بس واشتغل عليها، ممكن منها تقدر تخرج بـ فكرة واتنين وتلاتة تانيين احسن

ولما تبقى قاعد بتقول انا نفسي اعمل بودكاست، ولا نفسي اصور فيديوز

بس انا مش عارف اسجل ازاي، واجيب مايك منين، وايه احسن كاميرا

يا سيدي سجل من مايك الموبايل، اطلع قول اي حاجة الأول 

ومع الوقت هتعرف انت محتاج تعمل ايه

ابدأ عشان انت بتضيع وقت وبتضيع فرص

ابدأ اشتغل وشمر ايديك، وابقى حل وعالج المشاكل بعدين

ابدأ عشان انت فيه مشاكل هتحلها بناءً علي معرفتك التراكمية

ابدأ عشان فيه مشاكل هتجبرك تفكر بطرق جديدة

ابدأ عشان فيه مشاكل هتجبرك تتصرف

ابدأ عشان مفيش خبرة بتيجي من غير مواجهة مشاكل

ولنا في قصة بيرثا مثال عظيم يحتذى به الحقيقة

وبس كده

اتمنى تكون استفدت من ايميل انهاردة

ولنا لقاء اخر بكرة ان شاء الله

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير