زمان انت كنت طفل غلس

،عزيزي وعزيزتي

اسمحولي اضيف مزيد من السياق في بداية الإيميل بخصوص العنوان اللي انا كاتبه ده

فاكر انت اي قعدة كنت فيها قاعد مع طفل قعدة طويلة شوية؟

الطفل ده ممكن يكون ابن صاحبك، صاحبتك، اخوك، او اختك ايًا كان يعني صلة القرابة

في حدث كده لازم يحصل في أي قعدة من القعدات دي الحقيقة

وهو ان الطفل او الطفلة دي يقرروا يفتحوا حنفية اسئلة كلها بتبتدي بـ ليه؟

كل ما يتطلبه الموضوع هو انك تجاوب على سؤال واحد بس من اللي سألهم بـ ليه دي

عشان تلاقي بعديها شلال اسئلة كلها بتبتدي بـ ليه برضه 

انت في الأول كنت بتحاول تعمل فيها الكبير العقلاني اللي جت لحظته خلاص في انه ينقل خبراته بشكل بسيط لهذا الطفل الصغير الجميل 

بس مع تكرار الأسئلة وزيادة حجم العبثية فيها، تلاقي نفسك خلقك ابتدى يضيق كده 

وتلاقي نفسك في النهاية بتقوله هو كده وخلاص ما تسألش اكتر من كده

أو يسألك ليه، تقوله عشان انا قولت كده اسمع كلامي

وعلى الرغم من ان بنسبة كبيرة النقاش بينتهي بعديها 

الا ان الطفل نفسه تحسه كده لسه ما اقتنعش 

لسه عايز يسأل اكتر

عارف انت اللقطة دي؟

عايز اقولك اننا كلنا كنا كده واحنا صغيرين برضه بالمناسبة 

احنا كنا الأطفال اللي بهذا الحجم من الغلاسة في الأسئلة اللي بتبتدي بـ ليه 

بس الواحد مش عارف ايه اللي حصله لما كبر الحقيقة 

لإن صدق او لا تصدق، الطريقة اللي بيسأل بيها طفل اسئلته 

هي واحدة من أعظم الطرق اللي الواحد يقدر ياخد من خلالها اجابة بسيطة جدًا جدًا 

ولكن في غاية التأثير والفعالية 

عايز تعرف ازاي؟

تعالى نشوف مع بعض 

داخل غرفة اجتماعات بمقر امازون   

جيف بيزوس كان في اجتماع مع مديرين القطاعات في شركة امازون 

بيستمع الى مدير الأمان بالمخازن اثناء شرحه لحادثة كده حصلت عنده

ان موظف حصله كسر في صباعه اثناء تأديته لعمله عادي 

بيزوس وقفه عن الكلام وقاله ثانية واحدة كده معلش 

وقام قايم جايب سبورة وابتدى يكتب عليها شوية اسئلة ويوجه كلامه لمدير الأمان ده 

اول سؤال كتبه: ليه العامل صباعه اتكسر؟ 

الراجل قاله عشان ايده اتحشرت داخل سير نقل البضاعة 

بيزوس كتب تاني سؤال: ليه ايده اتحشرت في سير نقل البضاعة؟

الراجل قاله عشان كان بيحاول يجيب شنطته 

بيزوس سأل: وهو ليه كان بيجيب شنطته من على السير اصلًا؟

الراجل رد وقاله اصل هو كان حاطط شنطته على السير لما كان مقفول وواقف مش شغال

بس للأسف السير اشتغل فـ هو حاول يجيبها بس ملحقش فـ حصل اللي حصل 

بيزوس سأل: وهو ليه يحط شنطته على السير من أساسه؟

الراجل قاله عشان مكنش فيه ترابيزة يحط شنطته عليها، فـ السير وهو معظم العمال بيحطوا شنطتهم عليه كترابيزة مؤقتة كده

بيزوس خلص اسئلة خلاص

لإنه من خلال ٥ اسئلة بتبتدي بـ ليه، قدر يعرف جذر المشكلة اللي حصلت دي ايه 

إن مفيش ترابيزات جنب سيور النقل العمال يحطوا حاجتهم عليها 

فـ كانت اول حاجة اتعملت بعد الاجتماع ده هو ان يتحط ترابيزات بجانب كل سيور النقل داخل مخارن امازون 

والحقيقة بيزوس ما اخترعش العجلة وهو بيطرح اسئلته بالشكل ده

لإن الطريقة دي هو اخدها من واحد تاني اسمه ساكيشي تويودا، مؤسس شركة تويوتا للسيارات 

وساكيشي كان بيعتمد الطريقة في ايجاد جذور اي مشكلة ممكن تواجههم على مستوى التصنيع، التركيب، وحتى النقل كمان 

طريقة بسيطة جدًا جدًا ولكن فعالة للغاية

ليه بقى؟

لإن من خلالها ان مش بتقدر تكتشف حل فوري لمشكلة حالية

انا زي ما قولتلك انت من خلال بتقدر تكتشف جذر المشكلة ذات نفسها ايه

وده معناه انها بتديك قوة في اتخاذ اجراءات تانية تجنبك الوقوع في مشاكل مشابهة قدام

وعشان تستوعب مدى فعالية الطريقة دي

لإني عارف انك من جواك دلوقتي مازلت شايفها طريقة عبيطة 

ودي حاجة انا لسه هرد عليها في نهاية الإيميل لوحدها 

بس انا عايز دلوقتي اقولك حقيقة مهمة جدًا بخصوص ديناميكية المشاكل بشكل عام 

وهي ان المشاكل عبارة عن أعراض متفاوت شدتها

اعراض متفاوت شدتها لإيه يا ترى؟

لمشاكل أعمق موجودة داخل قلب المنظومة، البيزنس، المنتج، او البني ادمين حتى اللي انت بتتعامل معاهم

فـ فكرة انك تجرب تطبق فريم ورك مكون من ٥ اسئلة على الأقل كلهم بيبتدوا بـ ليه، وليهم علاقة بالمشكلة الحالية

بيجبرك وبيجبر كل اللي حواليك على خلق نقطة نظام وانضباط 

نظام في طريقة التفكير المتسلسل 

وانضباط في عدم القفز إلى أي استنتاجات نهائية لها علاقة بحل المشكلة

وتعالى ناخد مثال تاني على قصة تانية

واحد من المعالم المشهورة في أمريكا هو مبنى نصب لينكولن التذكاري 

وده شكله الخارجي اهو

كان فيه مشكلة بيعاني منها المبنى ده هو ان ابتدى يحصل فيه تآكل خارجي كده

ودي مشكلة عادي ممكن ان يتم معالجتها بتدخل هندسي لإصلاحها مش حوار يعني 

ولكن الحقيقة أنهم عشان يعالجوا المشكلة دي من جذورها

قرروا يطبقوا نفس الفريم ورك اللي انا بحكيلك عنه 

اول سؤال هو ليه بيحصل تأكل في المبنى؟ هل ده بسبب مشكلة في تصميمه؟

الحقيقة لأ، التأكل سببه عمليات الغسل والتنظيف المستمرة للمبنى من الخارج

وليه بنغسل المبنى من الخارج كتير يا ترى؟

عشان فيه حمام كتير جدًا بييجي يقف على المبنى بشكل مستمر، وبيتبرزوا ويتبولوا عليه 

طيب ليه الحمام بييجي يقف على المبنى بشكل مستمر؟، احنا مانعين ان يبقى فيه اكل او اي حاجة تترمي حول المبنى

ماهو ده مش بسبب الأكل، ده بسبب الحشرات، فيه حشرات كتير موجودة على سطح المبنى الخارجي وده بيجيب الحمام عليه

وليه فيه حشرات علي المبنى؟

بسبب الإضاءة المستمرة للمبنى خارجيًا وداخليًا، والإضاءة بتجذب الحشرات، والحشرات بتجذب الحمام

يبقى نقلل من الإضاءة الخارجية ونغير في المواعيد بتاعتها

وده الحل اللي تم اعتماده فعلًا

واللي لما اتطبق حصل بعديها انخفاض في معدل قاذورات الحمام بنسبة ٨٥٪ تقريبًا 

لإن بقى فيه حشرات اقل، الحمام بقى اقل 

وبالتبعية معدل تنظيف المبنى بقى اقل 

وبالتالي معدل التآكل في المبنى قل

مشكلتنا اننا بنموت في العصر الفكري الحقيقة 

وانا هنا مش قصدي على عصر بمعنى زمن

😄 انا قصدي عصر اللي هو كإنك تمسك حاجة مبلولة وتقعد تعصر فيها كده

لإننا بنشوف البساطة في التفكير بشكل عام حاجة ساذجة اوي وعبيطة كده

وبنشوف التعقيد حاجة في منتهى العبقرية والذكاء

وعشان كده في معظم الأحيان بنقفز الى الاستنتاجات المباشرة

بدون ما يبقى وراها تفكير منطقي مرتب كده

وكأننا بنحب نوصل للغلط بسرعة

 😄 على اننا نوصل للصح بس بالراحة

عشان الإيجو بتاعنا بيقدس جدًا السرعة في الظهور بشكل ذكي ولماح كده

اللي في النهاية هيلبسنا في حيطة الحقيقة

المفروض تحترم البروسيس دونًا عن النتيجة 

لإن النتيجة نتاج البروسيس مش العكس 

وبس كده

اتمنى تكون استفدت من ايميل انهاردة

ولنا لقاء اخر بكرة ان شاء الله

بس على ما نقابل ممكن تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

لإن الحقيقة الناس اللي هتعمل كده من دلوقتي لنهاية شهر رمضان ان شاء الله

ليهم مفاجأة حلوة عندي ليها علاقة بحاجة انا بقدمها 

وبشكر جدًا كل اللي شارك النيوزليتر الاسبوع اللي فات

 ❤️ انا شوفتكم واحد واحد وهنتواصل مع بعض قريب ان شاء الله

اكتفي  بهذا القدر عشان مش حابب احرق من كده

 ❤️ اشوفكم على خير