فكرتك مش بيضة

ارجوك قوم من عليها

،عزيزي وعزيزتي 

اسمحولي احكيلكم قصة تفتكروها كده كل مرة 

وانتوا واقفين قدام مكنة البنك بتسحبوا فلوس 

والشاشة مطلعة قدامكم برجاء الانتظار جاري سحب نقودك 

وفيه لحظات من القلق والتوتر قاعدة تتصاعد كده

لإن لسه المكنة ما طلعتش الصوت بتاع انها بتعد فيه الفلوس قبل ما تخرجها 

حاسس اني  بوتركم دلوقتي مع ان القصة مش موترة خلاص 

بس ممكن يكون الدرس اللي هتعرفوه في الأخر هو اللي موتر الحقيقة 

فـ انا بقول نكتفي بهذا القدر 

ويلا بينا ندخل على قصة ودرس النهاردة 

سنة ١٩٥٠ ذهب جون بارون إلى البنك

John Barron

كأي مواطن عادي في الوقت ده عايز يروح يسحب قرشين 

يصرفهم في الويك اند على كل ما لذ وطاب 

ولكن المشكلة ان جون ملحقش يدخل البنك الحقيقة

لإن البنك ساعتها كان بيقفل الساعة ٣ العصر تقريبًا 

وطبعًا احنا في سنة ١٩٥٠، فـ مفيش حاجة اسمها مكن سحب وايداع فلوس 

الموضوع ده ضايق جون جدًا جدًا

مش موضوع ان مفيش مكن سحب وايداع فلوس

لا موضوع انه ازاي يعني مش عارف يسحب فلوسه من حساب البنك بتاعه 

وانه لازم كل مرة يبقى ملتزم بمواعيد معينة عشان يحقق ده

وفضل الموضوع ده عامل ازعاج لجون 

لحد ما في يوم ما وجون بياخد دش كده

نورت في دماغه فكرة تحت اسم وجدتها شبيهة للـ لحظة اللي مر بيها ارشميدس لما فكر في قانون الطفو  

وهي احنا ليه ما نعملش ماكينات بتطلع فلوس شبه الماكينات اللي بتطلع سناك

واللي هي الڤيندينج ماشين لو ما تعرفهاش، دي صورة ليها اهي

Chocolate & Fruit Vending Machines

المهم يعني، جون ابتدى يشتغل على الفكرة دي كتير اوي 

لحد ما قدر يقنع بنك باركليز انه يطبقها عنده

جون فكرته كانت بتتمحور حول استخدام شيك ورقي مطبوع عليه بصمة كده كربونية

تدخلها جوه المكنة، فـ المكنة تقرأ البصمة دي 

تقوم مطلعالك الفلوس اللي انت عايزها 

جون كمان فكر ان يبقى فيه كود مكون من ٦ ارقام يبقى خاص بيك انت 

تستخدمه في المكنة كل مرة بتروح تسحب فيها فلوس

كنوع من انواع الامان يعني

ولكن الحقيقة الكود ده كان عامله مشكلة

لإن جون لما جرب يعمل الكود ده زي ما هو كده 

اكتشف ان مراته كل مرة بتنساه

فـ فضلوا يروحوا وييجوا في الموضوع ده 

لحد ما رسيوا في الأخر على ان الكود يبقى من ٤ ارقام بس 

كل ده عشان مراته ما تنساش الكود 

نحب نشكرها برضه الحقيقة لإننا لحد دلوقتي بنستخدم كود مكون من ٤ ارقام بس للكروت بتاعتنا

نقفز بقى في الزمن لسنة ١٩٦٧

وده كان الميعاد الرسمي لإطلاق ماكينات سحب الفلوس داخل بنك باركيليز

Barclay Cash Machine

الموضوع ده ساعتها كان حديث داير على كل لسان الحقيقة

وحقق نجاح وانتشار كبير جدًا 

لدرجة ان جون نفسه اتكرم وخد اوسمة شرف وحاجة جميلة اوي كده

وده ضايق شخص تاني جدًا جدًا 

والشخص ده هو جايمس جودفيلو 

James Goodfellow

جايمس كان مضايق جدًا من الموضوع ده

لإنه كان شايف انه هو صاحب ومخترع الفكرة الأصلية لماكينات سحب الفلوس

ده غير ان قبل ما جون يطلع بالاختراع بتاعه بسنة كده، جايمس كان مسجل براءة الاختراع الخاصة بفكرته 

وكان بيقول ان السبب اللي عشانه فكر في الفكرة دي هو أن البنوك ساعتها كانت قلقانة من اتحاد البنوك

انه يوقف عمل موظفين البنوك يوم السبت في الفترة الصباحية 

لإن ده كان الوقت الوحيد اللي يقدر فيه عملاء البنوك يدخلوا يسحبوا فلوسهم 

خد بقى الأنقح من كده

فكرة جايمس كانت بتتمحور حوالين استخدام كارت بلاستيك داخل المكنة مش شيك ورقي 

وده اللي احنا بنستخدمه دلوقتي بالمناسبة

فـ عنده حق الراجل يضايق انه مخدش اللقطة اللي اخدها جون 

بس الحقيقة هو معندوش حق في حاجة تانية كده

هي اللي وصلته للي حصله ده

جايمس كان شايف ان مكنش المفروض ان السبق في تقديم الماكينات في السوق

يبقى مبني على مين اللي هينفذ الفكرة الأول 

هو كان شايف انه المفروض يكون مبني على مين هينفذ الفكرة صح في المقام الأول والأخير 

وبالتبعية هو كان شايف ان فكرة جون فكرة مش متنفذة صح 

بالتحديد عشان موضوع الشيكات الورقية ده 

ودي النقطة اللي جايمس مكنش عنده حق فيها الحقيقة

ليه بقي؟

ببساطة شديدة، عشان الناس لا تهتم يا عزيزي ويا عزيزتي بمين نفذ فكرته صح بنسبة ٪ ١٠٠

الناس ما بتذاكرش كل واحد دخل السوق وعمل ايه خطوة بخطوة 

وده لإن الناس بشكل عام اللي موجودة في سوق ما، ايًا كان بقى ده سوق ايه مش فارقة

بتقسم مقدمي الخدمات فيه إلى شريحتين 

رقم ١

وبعديه كل الارقام مش فارقة 

طيب ليه الناس بتعمل كده؟ 

بنفس البساطة الشديدة، الإجابة تكمن في البوزيشنينج 

مين اول واحد اخد حتة في دماغ الناس دي؟

ايًا كان مين هو، خلاص ده بقى رقم ١

اي حد هييجي تاني، هيبقى رقم بعد رقم ١ ده 

وعشان كده مثلًا لما نيجي نسأل مين مؤسس حركة الفن التكعيبي 

الناس هتقولك بيكاسو، محدش هيجيب سيرة براك، مع انه كان مع بيكاسو برضه في نفس الحركة

وعشان كده برضه لما نيجي نسأل مين عمل الراديو

الناس هتقولك ماركوني هو اللي عمله، مع ان اللي اشتغل عليه هو نيكولا تسلا 

وعشان كده لو سألنا مين اللي عمل الماوس بتاعة الكومبيوتر وعمل ثورة في شكل الواجهة الخارجية لسطح المكتب الخاص بالكومبيوترات 

الناس هتقولك ستيڤ جوبز، مع ان ستيڤ جوبز نفسه قايل انه اخد كل الحاجات دي من مركز بالو للأبحاث اللي كانت عاملاه زيروكس 

وعشان كده جايمس مكنش عنده حق

لو كان عايز الناس تديله اللقطة في موضوع ماكينات سحب و ايداع الفلوس ده

كان المفروض يركز انه ازاي يكون أول شخص ياخد حتة في دماغ الناس متعلقة بالموضوع ده

قد يبدو الموضوع مؤلم وحزين

ولكن دي الطريقة اللي دماغنا بتشتغل بيها 

وعشان كده فيه حاجة اسمها بوزيشنينج 

وعشان كده برضه في حاجة اسمها استراتيجية خلق نقطة اختلاف عن اللي حواليك 

لإن من غيرها كل الحاجات هتبقى شبه بعضها، وكل الناس هتبقى زي بعضها عادي

وعشان كده انا حابب انبهك انت كمان

انك لو عندك فكرة راكنها في دماغك او قاعد عليها  زي فرخة قاعدة على بيضها لحد ما يفقس ويطلع كتاكيت

احب اقولك ان بيض الفرخة هيفقس ويجيب كتاكيت 

وانت لسه قاعد على فكرتك زي ما انت مبتعملش حاجة

فـ لما ييجي حد تاني يبقى عنده فكرة شبه فكرتك 

ويشتغل عليها ويفرجها للناس 

ما تزعلش بقى انه عملها الأول، وما تقولش انك كنت هتعملها احسن 

لإن جيس وات 

انت كان عندك فرصة تعملها الأول وضيعتها

وبالتالي انت معملتش حاجة من أساسه تقول انك كنت هتعملها احسن 

وبالتالي حطيت نفسك في موقف انك لو نفذت فكرتك 

هتبقى رقم ٢، او ٣، او ٤، الله اعلم 

وبالتبعية بقيت مطالب بـ انك تخلق لنفسك نقطة اختلاف قوية جدًا 

تخلي الناس تفكر فيك جديًا قصاد رقم ١

فـ فكر فيها كده

وشوف انت عايز تعمل ايه

وبس كده

فاضل ٥ ايميلات وتخلص الميكروكوبي

واظن ده وقت مناسب اني اقول ايه الحاجة اللي انا كنت شايلها للناس اللي بتشارك النيوزليتر مع زمايلها 

زي ما كنت قايلكم اني تقريبًا مفيش بوست بيتعملي فيه منشن بخصوص النيوزليتر انا مش بشوفه 

وانا ممتن جدًا الحقيقة لمجهوداتكم في نشر النيوزليتر سواء عشان الهدية او من هدف المشاركة للاستفادة فقط لا غير

وعشان كده كل اللي عمل شير للنيوزليتر بتاعتي على مدار الفترة اللي فاتت، وعلى مدار الأيام القادمة 

هيبقى له نسبة خصم على الاشتراك في برنامجي كوبي دوز 

نسبة الخصم دي ممكن تبقى ١٠،٢٠،٣٠،٤٠ او ٥٠٪ من تمن البرنامج الحقيقة 

وده انا هحدده على حسب حجم المشاركات اللي كل واحد فيكم عملها بشكل فردي 

الخصم ده ممكن انت تستفاد بيه، او ممكن تديه لحد شايف انه ممكن يستفاد بيه كمان 

وبس كده، اكتفي بهذا القدر

 ❤️ ونتكلم عما قريب ان شاء الله