من بره هالله هالله

ايه ده انت بتتكلم عن مين؟

في الحقيقة مش حابب أفصح عن كينونة الشخص اللي بتكلم عنه دلوقتي عزيزي وعزيزتي 

نظرًا لوجود قصة تستدعي الكلام عنها وده اولًا 

ثانيًا بقي ما انا لو قولت مين دلوقتى هبقى حرقت الفكرة بتاعة الايميل كله والدرس بتاع النهاردة كمان 

😄 فـ يلا بينا ندخل في الموضوع على طول 

في شهر ديسمبر، سنة ١٩٤١، الساعة ٧ صباحًا

فاجأت القوات الجوية والبحرية اليابانية، القاعدة الامريكية البحرية المتمركزة في ميناء هاربر في هاواي 

بهجوم استراتيجي بشع في عنفه وشدته بشكل لا كان على البال ولا على الخاطر الحقيقة

والهجوم ده ادى الى مقتل اكثر من ٢٤٠٠ جندي امريكي

وتدمير ييجي ١٨٨ طائرة حربية، وتدمير وإغراق وإلحاق أضرار بأكثر من ١٥ سفينة ومركبة بحرية 

والمعركة دي الحقيقة كانت السبب الرئيسي في إعلان الولايات المتحدة الأمريكية انضمامها للحرب العالمية التانية مع قوى الحلفاء

ولحد هنا قد تظن ان تاريخيًا الموضوع منطقي

اليابان دخلت غفلت أمريكا ونفذت خطتها الاستراتيجية اللي هي كانت عايزاها

قامت أمريكا أعلنت دخولها الحرب بشكل رسمي

وقامت رازعة اليابان علقة في غاية البشاعة في النهاية عشان تؤدبها وتخرجها من الحرب دي خالص

وتخسر اليابان وتخرج من الحرب وتنهزم قوى المحور كلها 

وتنتهي الحرب العالمية الثانية 

بس الحقيقة اليابان خسرت الحرب في نفس اللحظة اللي قررت فيها تهاجم ميناء هاربر 

ايه ده ازاي وليه؟

اليابان عزيزي وعزيزتي لما خططت للهجوم على ميناء هاربر 

كانت عندها هدف استراتيجي في عمل حركة شلل تام للقوات الأمريكية في المحيط الهادئ 

وده لانها كان عندها طموح في توسيع حجم الامبراطورية بتاعتهم في جنوب شرق آسيا وسواحل المحيط الهادئ

فـ على الرغم من اليابان قدرت فعلًا تهاجم ميناء هاربر وتحدث خسائر جسيمة هناك

الا انها مقدرتش تعمل شلل تام للقوات الأمريكية 

ابسط حاجة خالص ان مش كل الطائرات الخاصة بالقاعدة دي كانت موجودة ساعة الهجوم 

وعلى الرغم من أن القوات اليابانية قدرت تحدث تدمير في مدرجات الطيران في القاعدة

الا ان فيه طائرات قدرت تطلع وتشتبك مع القوات الجوية اليابانية

فـ اه اليابان قدرت تنتصر نوعًا ما في المعركة دي

بس هي ما حققتش كل الأهداف الاستراتيجية اللي عشانها قامت المعركة دي اصلًا

واللي حصل ان قلبت الرأي العام في أمريكا كله عليها، وأمريكا دخلت الحرب رسميًا بقى

وانا مش عارف انت وانتي اخدتوا بالكم ولا لسه 

بس انا الى حد الان ذكرت كلمة استراتيجي ٤ مرات من ساعة ما بدأت كتابة بخصوص الموضوع ده 

وده له سبب مهم جدًا جدًا الحقيقة لإضافة المزيد من السياق الى القصة بتاعتنا 

وهو ان غلطة اليابان لما جت تهاجم ميناء هاربر هو انها فكرت انها عاملة استراتيجي 

ولكن في واقع الأمر هي كانت بتنفذ تاكتيك او تكتيك 

وعدم إدراكها للنقطة دي هو اللي وصلها الى الفشل في تحقيق المطلوب 

لإن فيه فرق كبير جدًا جدًا جدًا ما بين الاستراتيجي والتاكتيك

الإستراتيجي ببساطة هي إجابة سؤال احنا عايزين نعمل ايه

بس التاكتيك هو إجابة سؤال احنا هنعمل ده ازاي

الإستراتيجي هي نقطة الوصول 

التاكتيك هو شرح احنا هنوصل للنقطة دي ازاي 

تسمية اليابان الهجوم على ميناء هاربر كخطة استراتيجية

خلاها تشوف الهجوم في شكل نتيجة نهائية 

بس في واقع الأمر، الهجوم ده كانت نقطة بداية عادي

اليابان ما فكرتش ايه اللي هيحصل بعد كده

وبالتالي كل اللي كانت اليابان بتعمله هو تنفيذ مجموعة من التاكتيكس متنكرة في شكل استراتيجي وخلاص

أمريكا مثلًا لما دخلت الحرب مع اليابان، كان عندها استراتيجية

وهي انها تسيطر على اليابان جزيرة جزيرة 

كل جزيرة من جزرها يتعملها خطة هجوم 

تخلص ندخل على اللي بعدها 

نوصل في النهاية أننا عملنا شلل لليابان وحاوطناها من كل حتة 

لحد ما تعلن استسلامها 

وده ليودينا لنقطة محورية كمان بخصوص الاستراتيجي والتاكتيكس

أن التاكتيكس كلها بتنتهي لما الهدف من الإستراتيجي يتحقق خلاص 

وان الاستراتيجي ما بتنتهيش طالما الهدف بتاعها لسه ما اتحققش

وده كلام حلو وجميل واحنا دلوقتي بنهز دماغنا وبنقول صح الكلام ده فعلًا

وهنا ييجي سؤالي الحقيقة

😄 طالما صح الكلام، ما بنعملوش ليه؟

ليه كل حاجة تعتبر في النهاية تاكتيك في التنفيذ، بنسميها تفكير استراتيجي

أو الأسوأ، بنروح نسمي التاكتيك استراتيجي 

مع أنه لا استراتيجي ولا يحزنون 

هل ده عشان كلمة استراتيجي مغرية اكتر؟

هل عشان ليها وزن أثقل مثلًا؟

ماهو هنعمل ايه بالإغراء والتقل في الوزن في كلمات رنانة

بيؤدي لتسمية كل اكشن يعتبر تاكتيك في النهاية إلى تفكير استراتيجي؟

عارفين النتيجة هتبقى ايه؟

 😄 هتبقى عقم فكري الحقيقة

انا بكلمكم بالأمانة، واتمنى محدش يضايق من اللي انا بقوله

لأن اللي بيحصل على أرض الواقع

ان بقت معظم المسوقين بقوا يسموا نفسهم استراتيجيست

كونتنت استراتيجيست

براند استراتيجيست

بروداكت استراتيجيست

كريتيڤ استراتيجيست

وده بالظبط عامل زي مثلًا كونتنت كريتور او كوبي رايتر

يروح يحط قبل التايتل بتاعه كلمة كريتيڤ

بننفخ في التايتل لإبداء المزيد من التقل والأهمية في العنوان

وبننسى المضمون

وبنلاقي نفسنا من غير ما نحس بنلغي الحاجة اللي عشانها بنشتغل الشغل ده

وهي التفكير الناضج، التفكير المنتج، التفكير اللي يؤدي الى نتائج 

لإن صدق او لا تصدق عزيزي وعزيزتي 

مش كل شغل هتشتغله هيبقى مطلوب منك فيه حل إبداعي 

ممكن يبقى مطلوب منك حل يضبط الوضع الحالي بشكل احسن وملموس 

وممكن يطلع الحل ده في النهاية هو تصليح وتظبيط مجموعة من الأخطاء اللي كان بيتم ارتكابها قبل ما انت تشتغل 

ومش كل شغل هتشتغله هيبقى مطلوب منك فيه حل استراتيجي 

ممكن يبقى مطلوب منك مجموعة من التاكتيكس اللي تؤدي المهمة وتحقق الهدف المطلوب 

زي برضه مش كل شغل هتشتغله هيبقى مطلوب منك فيه حلول تكتيكية

ممكن يبقى مطلوب منك حل استراتيجي، لإن مفيش استراتيجي واضحة

اصل لو كله بتاع استراتيجي، مين هيشتغل ويشمر ايده معلش؟ 

😄 وده بافتراض أن كل واحد مسمي نفسه استراتيجيست عارف يعمل استراتيجي اصلًا يعني 

بس مطلوب ناس تعرف فعلًا الفرق ما بين الاستراتيجي والتاكتيكس 

مطلوب ناس تعرف تحط امتى تفكير استراتيجي، وامتى تحط تفكير تنفيذي 

وانا هنا عايز اسألك سؤال تالت الحقيقة

تفتكر التفكير الاستراتيجي بيخلص امتى في شغلك؟

فكر كده شوية قبل ما تكمل قراءة

فكرت خلاص؟

😄 طيب فكر شوية كده كمان

التفكير الاستراتيجي بيخلص بعد ما تعرض رؤيتك على الكلاينت ويوافق عليها

خلاص كده، مفيش حاجة تانية مطلوب منك تعملها

اي شغل بعد ما الكلاينت يوافق على الاستراتيجي ويمضي وتشتغل

هو عبارة عن تاكتيكس بتتنفذ لتحقيق الاستراتيجي 

وده معناه ان الأد كوبيز اللي انت بتعملها 

السوشيال ميديا كاليندر اللي بتشتغل عليها 

تغيير طريقة عرض الرسالة الخاصة بالمنتج او الخدمة مثلًا 

اي اي حاجة هتعملها داخل هذا السياق هي تفكير تنفيذي مش استراتيجي 

اقولك على حاجة كمان؟

انت اي تغيير حتى هتعمله بعد شهر او شهرين في الحاجات اللي انا قولتها دي

مش معناه بالضرورة خالص انك مطالب بتغيير الاستراتيجي 

ولكن مطالب بتغيير التاكتيكس، سعيًا في تحقيق أهداف الاستراتيجي بشكل احسن 

ماهو احنا مش هنقعد كل شهر نغير في الإستراتيجي 

ماهو ده معناه انها مكنتش استراتيجي اصلًا في المقام الأول 

فـ برجاء التأني في كل خطوة انت بتفكر فيها 

وعود نفسك انك لما تيجي تفكر في حاجة

تراجع نفسك بجد كده وتسأل هو اللي انا بفكر فيه ده نوعه ايه

بلاش تبقى من بره هالله هالله

ومن جوه يعلم الله 

واحدة واحدة عزيزي وعزيزتي 

إتقان التخطيط الاستراتيجي او التخطيط التنفيذي  بياخدوا سنين من الخبرة والممارسة

فـ عيد ترتيب أولوياتك، لإن من المستحيل انك تتقن الاتنين في نفس ذات اللحظة في نفس التوقيت 

وعيد ترتيب أولوياتك وانت مقتنع ان مفيش تفكير احسن من التاني

كل تفكير له الغرض منه وله المكان والأوان بتاعه

😄 وبس كده

فاضل 4 ايميلات وتخلص الميكروكوبي

ممتن جدًا الحقيقة لمجهوداتكم في نشر النيوزليتر سواء عشان الهدية او من هدف المشاركة للاستفادة فقط لا غير

وعشان كده كل اللي عمل شير للنيوزليتر بتاعتي على مدار الفترة اللي فاتت، وعلى مدار الأيام القادمة 

هيبقى له نسبة خصم على الاشتراك في برنامجي كوبي دوز 

نسبة الخصم دي ممكن تبقى ١٠،٢٠،٣٠،٤٠ او ٥٠٪ من تمن البرنامج الحقيقة 

وده انا هحدده على حسب حجم المشاركات اللي كل واحد فيكم عملها بشكل فردي 

الخصم ده ممكن انت تستفاد بيه، او ممكن تديه لحد شايف انه ممكن يستفاد بيه كمان 

وبس كده، اكتفي بهذا القدر

 ❤️ ونتكلم عما قريب ان شاء الله