دوعة الى التحصيح

يلا نيبا

،عزيزي وعزيزتي

انا عارف ان ايد كل واحد فيكم دلوقتي بتاكلكم انكم تبعتولي 

وتقولولي يا احمد انت كاتب العنوان غلط 

المفروض تبقى دعوة إلى التصحيح - يلا بينا 

احب اقولكم ان الغلطة دي انا قاصد اعملها بالشكل ده

لأن فيه قصة انا عايز احكيها، ودرس انا عايز انقله 

خلوني اخد الريسك اني ابعت الايميل بالشكل ده 

😄 وانا الحقيقة عندي فضول رهيب اشوف معدل الاوبن ريت بتاع الايميل ده هيبقى عامل ازاي

فـ من غير ما اطول عليكم اكتر من كده

يلا بينا نبتدي

قصتنا بتبتدي مع شيرلوك هولمز  

اكيد كلنا عارفين شخصية شيرلوك هولمز العظيمة اللي ابتكرها الكاتب الأكثر من رائع

السير آرثر كونان دويل

Sir Arthur Conan Doyle

القصة اللي هحكيلهاكم النهاردة حصلت لشيرلوك هولمز ودكتور واطسن في رواية مغامرة الجوهرة الزرقاء 

ودي رواية الحقيقة في غاية الروعة، انصحكم تقروها وتقروا سلسلة روايات شيرلوك هولمز كلها يعني مش دي بس

The Adventure Of The Blue Carbuncle

المهم

شيرلوك في الراوية كان محتاج يستخلص شوية معلومات كده هتفيده في حل القضية اللي هو شغال عليها 

من راجل فرارجي بيبيع فراخ وبط 

المشكلة ان الراجل ده كان رخم ومش عايز يتعاون مع شيرلوك خالص

فـ شيرلوك قرر يستفز الراجل في موضوع تاني خالص بقى 

قاله انت عارف ان انا عندي خبرة كبيرة اوي في موضوع الطيور ده 

واقدر اقولك وبمنتهى الثقة أن البطة اللي اكلتها امبارح على العشا، كانت بطة تربية مزارع 

البياع رد عليه وقاله خلي ثقتك دي لنفسك عشان البطة اللي انت اكلتها دي بطة متربية هنا في البلد عادي جوه محل 

شيرلوك قاله مستحيل انا عارف انا بقولك ايه

البياع ابتدى يتعصب ويقوله هو انت مفكر انك تعرف في البط اكتر مني؟

انا بتعامل مع البط ده ومن انا كنت لسه عيل صغير قد كده

انا بقولك البط ده تربية البلد هنا مش مزارع ما تراجعش ورايا 

شيرلوك حب يستفزه اكتر قام قايله انت عمرك ما هتقدر تقنعني على فكرة

البياع قاله تحب نتراهن طيب؟

شيرلوك قاله ده كده تبقى اسهل مرة هاخد فيها فلوس في حياتي

ومع ذلك انا هتراهن معاك عشان اعلمك ما تبقاش عنيد بعد كده مع الناس 

البياع قاله تمام اوي، استنى اجيب الكتب واوريك بالأدلة 

وعلى ما اجيب الكتب، جهز فلوس

واكل البياع الطعم

جاب البياع الكتب لشيرلوك، وفتحها قدامه 

وفضل يشرح لشيرلوك الفروقات ما  بين أنواع البط 

وشيرلوك اصلًا مش مركز معاه خالص، هو قاعد بيحاول يحفظ ويستوعب المعلومات اللي هو عايز يعرفها اصلًا من الكتب 

بس مكنش عارف عشان الراجل كان رخم معاه من الأول 

وبعد ما خلص البياع وهو يظن انه انتصر، شيرلوك كان خد المعلومات اللي هو عايزها 

وقام مدي الفلوس للراجل

واخد واطسون وخرجوا من المحل

اراهنك اني لو كنت اديت للراجل ده ١٠٠ جنيه من الاول مكنش هيقولي كل المعلومات اللي انا شوفتها دي

ودي اول حاجة شيرلوك قالها لواطسون بعد ما خرجوا من المحل 

وكمان كمل شيرلوك وقال ان الراجل اداله كل المعلومات دي مش بغرض انه يعلمه او يوعيه 

لا هو كان عايز يأدبني عشان انا استفزيته في الحتة بتاعته 

وصدق او لا تصدق ان اللي حصل ده حقيقة سلوكية عندنا كبني ادمين

وهو أن الناس بشكل عام ما بتحبش تقول حاجات كده وخلاص 

لا هي تحب تتكلم وتقول طالما كلامها ده هيبقى فيه تناقض او اختلاف مع طرف اخر او فكرة اخرى، او وجهة نظر اخرى عادي

يعني واحدة من الأمثلة الحقيقة انا بحبها اوي بخصوص الموضوع ده

كان بوست شوفته على تويتر لواحدة بتحكي انها كانت عايزة تتعلم برمجة 

فـ نزلت بوست على ريديت تسأل فيه الناس ايه احسن طريقة تقدر تتعلم من خلالها البرمجة 

وبعد ما نزلته قامت عملت حساب تاني جديد على ريديت مش بـ اسمها 

وابتدت ترد على سؤالها اللي هي سألته بإجابات غلط ومستفزة 

وده في حد ذاته استفز الناس انها تدخل تعدل عليها وتنتقض اللي هي بتقوله 

والبنت بقى ما بين اللي عملته وما بين اللي الناس ردوا بيه عليها 

خدت اللي هي عايزاه عشان تتعلم برمجة فعلًا بالطريقة الصح 

وانا عايز اقولك ان الموضوع ده اتعمل فيه قانون كمان

اسمه قانون كاننجهام 

Cunningham’s Law

اللي بيقول ان البني ادمين عندهم سرعة غريبة في تصحيح وتعديل الأفكار والأخطاء من وجهة نظرهم

عن انهم يجاوبوا على سؤال عادي بطريقة عادية

ويمكن عشان كده مؤسس ويكيبيديا ستيڤين ماكجيدي طلع قال هو كمان 

ان احسن طريقة تاخد بيها اجابة صح تفيدك على الانترنت

 😄 هو انك ما تسألش سؤال اصلًا، لا روح جاوب غلط وخلاص 

تفتكر ايه الدرس المستفاد من الحقائق والقوانين دي يا ترى؟

لا حاجات كتير الحقيقة، ابسطها مثلًا انك تجرب كده اللي عمله شيرلوك هولمز ده وتشوف ايه اللي هيحصل

او تجرب اللي البنت عملته برضه على الانترنت وتشوف ايه اللي هيحصل 

بس اعتقد اهم درس انت محتاج تتعلمه من الموضوع ده

هو ان في شغلك، معظم الناس اللي مش هتعرف تساعدك، ولا ناوية تساعدك تعمل شغلك صح

هتلاقيها في النهاية بعد ما تشتغل بتطلعلك القطط الفطسانة فيه 

زي مثلًا حد يطلسقك في بريف ملهوش اي ملامح خالص بأي شكل من الأشكال 

فـ تقرر انت تاخد خطوة ايجابية وتشتغل 

وتيجي وانت بتعرض الشغل، يقولك لا أصل ما ينفعش كنا نعملها بالشكل ده

عشان احنا المفروض لما نتكلم عن المنتج نقول ١ و ٢ و ٣

طب هو ١ و ٢ و ٣ دول محدش جاب سيرتهم ليه من الأول؟

هتلاقي صوت صرصور الحقل ساعتها 

وهتلاقي نفسك بتعيد الشغل على بريف تاني جديد خالص

لأن الأسهل هو اني انتقد شغلك

الأصعب هو اني احط مجهود في الأول يساعدك تشتغل صح

وعشان كده لازم دايمًا قبل ما تشتغل، تسأل كل الأسئلة اللي تشكك في صلاحية البريف

تسأل أسئلة تشكك في قابلية تحقيق الاوبجكتف 

اسأل دايمًا اسئلة تجبر اللي قدامك انه يتكلم، انه يطلع اللي مقالوش 

عشان لو معرفتش تطلع باللي انت عايزه من الأول

هيطلع عليك وانت بتسلم شغلك في الأخر

 😄 وبس كده

فاضل 3 ايميلات وتخلص الميكروكوبي

ممتن جدًا الحقيقة لمجهوداتكم في نشر النيوزليتر سواء عشان الهدية او من هدف المشاركة للاستفادة فقط لا غير

وعشان كده كل اللي عمل شير للنيوزليتر بتاعتي على مدار الفترة اللي فاتت، وعلى مدار الأيام القادمة 

هيبقى له نسبة خصم على الاشتراك في برنامجي كوبي دوز 

نسبة الخصم دي ممكن تبقى ١٠،٢٠،٣٠،٤٠ او ٥٠٪ من تمن البرنامج الحقيقة 

وده انا هحدده على حسب حجم المشاركات اللي كل واحد فيكم عملها بشكل فردي 

الخصم ده ممكن انت تستفاد بيه، او ممكن تديه لحد شايف انه ممكن يستفاد بيه كمان 

وبس كده، اكتفي بهذا القدر

 ❤️ ونتكلم عما قريب ان شاء الله

Join the conversation

or to participate.