- Ashpen Newsletter
- Posts
- فرق خبرة
In partnership with
،عزيزي وعزيزتي
النهاردة احنا هنرجع بالزمن لـ ٥٠٠ سنة فاتت تقريبًا
وهنتفرج مع بعض من فوق كده على مشهد حصار الجيش الأسباني تحت قيادة هيرنان كورتيس لـ إمبراطورية الأزتيك
واللي مكانها دلوقتي شمال المكسيك تقريبًا
Siege of Tenochtitlán
ولو بتسأل نفسك ايه اللي جاب الجيش الأسباني من اوروبا لحصار الأزتيك
فـ ده الحقيقة كان بعد ما كريستوفر كولومبوس أسس مستوطنات أوروبية في جزر الكاريبي
بمعنى اخر، ده الوقت اللي أوروبا ابتدت تغزو فيه قارة أمريكا الشمالية والجنوبية
ندخل في الموضوع بقى
الحقيقة أن الجيش الإسباني مكنش قادر يقتحم عاصمة إمبراطورية الأزتيك ساعتها
وده لانهم كانوا محصنين نفسهم كويس وعندهم أسوار عالية محاوطة المدينة كلها بشكل يؤمنهم من أي اختراقات خارجية
والموضوع ده كان مستفز جدًا لواحد من جنود جيش كورتيس
وفضل يصيح ويشتكي ان ليه ما نستخدمش المنجنيق ونحط طوب في اتجاه أسوار المدينة عشان نحدث فيه ثغرات
تمكن الجيش من اختراق أسوار المدينة
واستمر في الصياح وقال انه كان موجود في معركة جاريليانو في إيطاليا اللي كانت ما بين اسبانيا وفرنسا ساعتها
وانهم استخدموا المنجنيق في كسر واختراق دفاعات الجيش الفرنسي
فـ ليه ما يعملوش كده برضه هنا؟
trebuchet
كورتيس اقتنع بكلام الجندي الحقيقة
وقاله انا معنديش مشكلة خالص في استخدام المنجنيق بالمناسبة
المشكلة بس ان مفيش حد هنا في الجيش عنده فكره ازاي المنجنيق بيتبني ويتركب
الجندي قاله مفيش مشكلة خالص، انا شوفت ازاي المنجنيق بيتبني وبيتركب قبل كده كتير
اديني بس نجارين والمواد اللي انا محتاجها، وانا هشرف على الموضوع من بدايته لنهايته
وكورتيس الحقيقة ما بخلش على الجندي بحاجة
خلى باقي الجنود يجيبوا الخشب والحديد والحبال والأحجار اللي الجندي محتاجها
وجابله نجارين واداهم أوامر ينفذوا تعليمات الجندي بالحرف الواحد
وابتدى الشغل
الجندي كان عارف كويس هو بيعمل ايه، وده كان واضح لكل الناس اللي حواليه
وابتدى يدي تعليماته للنجارين بشكل يقول انه عارف ان الموضوع مش معقد لهذه الدرجة يعني
النجارين اخدوا تقريبًا ٣ اسابيع على ما خلصوا بناء وتركيب للمنجنيق
واخدوا ٤ أيام تقريبًا في تظبيط مكان المنجنيق خارج السور وظبط الزاوية اللي هيحدف الطوب في اتجاهها
وكل ده بيحصل وجنود الأزتيك داخل الأسوار شايفين الأسبان بيعملوا ايه وشايفين المنجنيق وهو بيتحط في مكانه
الجندي قال لكورتيس احنا جاهزين خلاص نستخدم المنجنيق
كورتيس اداله التمام
والجنود ركبت الحجر وشدوا البكرة لأخرها استعدادًا لقطع الحبل
عشان الحجر يتنطر في اتجاه السور
وقد كان فعلًا
المنجنيق اشتغل، والحجر انطلق من مكانه
بس انطلق لفوق الحقيقة
الحجر بدل ما ينطلق من المنجنيق في زاوية ٤٥ درجة في اتجاه السور
انطلق من مكانه في اتجاه أفقي كأنه صاروخ كده طالع عمودي
وفضل طالع طالع لفوق لحد ما الجاذبية عملت شغلها بقى
فـ قام نازل الحجر نفس الاتجاه الافقي اللي طلعه
وراح واقع على المنجنيق مدشدشه ١٠٠ حتة وعامل اصابات في كل اللي كان واقف في محيط المكان اللي فيه المنجنيق
كارثة من جميع الاتجاهات الحقيقة
وطبعًا جنود جيش الأزتيك واقفين في الأسوار بيتفرجوا وهيموتوا من الفرحة بسبب اللي شافوه
طبعًا احنا عارفين مين السبب في الكارثة دي
الجندي الجميل اللي عمل فيها أبو العريف
وقال انا عارف المنجنيق بيتعمل ازاي، انا شوفتهم وهما بيبنوه وبيركبوه قبل كده كتير
واسمح لي عزيزي وعزيزتي قبل ما نكمل تقطيع في فروة الجندي
اني اوقفكم واقولكم ثانية واحدة ستوب كده
واسألكم سؤال مهم جدًا
هو مين قال اننا لحد دلوقتي ما بنعملش نفس اللي عمله الجندي ده من ٥٠٠ سنة فاتت؟
مين فينا ما بيتفرجش على حاجة من الخارج كده وبيظن في قرارة نفسه ان الموضوع سهل
وانه يقدر يعمله عادي؟
مين فينا ما شافش نفسه انه عشان عمل حاجة او اتنين او تلاتة فـ هو عنده الخبرة الكافية
انه يعمل اي حاجة تانية عادي؟
لا احنا كتير، احنا كتير اوي اوي الحقيقة
وعشان كده احنا محتاجين نستوعب الكام كلمة اللي جايين دول كويس اوي
فيه فرق كبير جدًا ما بين كلمة خبرة وتجربة
الخبرة هي حجم معرفة ومهارات انت اكتسبتها من خلال وجودك ومشاركتك داخل نشاط ما لفترة معينة من الزمن
التجربة هي حجم معرفة ومهارات انت اكتسبتها في مجالات محددة جدًا من خلال الممارسة
والتطبيق والمذاكرة بمستويات عميقة لفترة معينة من الزمن برضه
بإختصار شديد، التجربة اعمق واكثر تفصيلًا من الخبرة بكتير
الجندي اللي في جيش كورتيس، كان عنده خبرة اكتسبها من وجوده في حرب سابقة
شاف بيها بنفسه المنجنيق بيتركب وبيتعمل ازاي
شاف اللوح الخاصة بأبعاد المنجنيق
شاف النجار وهو بيبنيه قطعة قطعة
شاف أحجام الصخور اللي بتستخدم فيه
شاف الزوايا والأماكن اللي بيتثبت فيها المنجنيق
شاف بما فيه الكفاية اللي خلاه وسط جيش ما يعرفش حاجة عن بناء المنجنيق
يكون مؤهل انه يبقى مسئول عنه
بس نظرًا لإنه مش الشخص اللي جرب
مش الشخص اللي ذاكر
مش الشخص اللي طبق
بنى منجنيق ادى الى احداث خسائر في الطرف اللي بينتمي إليه
كل ده عشان ظن انه طالما شاف الحاجة بعنيه خلاص كده
هو مش محتاج حاجة تانية
الموضوع سهل
ولكن الموضوع مش سهل على الإطلاق
من فترة كبيرة بعتلي أحد من المتابعين
بيقولي انه قد ايه مستمتع بالمحتوى اللي انا بقدمه
وشايف اني شاطر في الكتابة، وشاطر في تقديم افكاري بسلاسة
وكان بيقولي انه ابتدى يحفظ الطريقة اللي انا بكتب بيها
وابتدى يحفظ التون اوف ڤويس بتاعتي
وانه ناوي يقلد الطريقة بتاعتي بشكل ما أو بأخر
وأنه في وقت ما هيقدر يتخطاني ويبقى احسن مني كمان
رديت عليه وشكرته على ذوقه الحقيقة
ودعيلته بالتوفيق فيما هو بيخططله
بس انا فاكر ساعتها اني قولتله
مذاكرتك وحفظك لطريقتي كمتلقي للمحتوى اللي بتاخده مني
مش هتفيدك بحاجة لو ما شمرتش ايديك وجربت تعمل اللي انا بعمله
انا على مدار ٤ سنين نشرت اكتر من ١٦٠ فكرة في شكل مقالات وبوستات
على مدار ٤ سنين عملت سيجمنت اسمه ميكروكوبي بشكل شبه يومي بنشر فكرة مني بشكل مختلف
على مدار ٤ سنين سجلت ٤٠ حلقة بودكاست
على مدار ٤ سنين كتبتب وسجلت وصورت بنفسي محتوى بنشر فيه افكاري
بس على مدار ١٤ سنة انا استهلكت وصرفت واستثمرت آلاف الساعات في المذاكرة والتطبيق
على مدار ١٤ سنة دونت وسجلت قصص ودروس وافكار كتير بتجيلي ومازلت بعمل كده
وانا هنا مش بقولك ده عشان احبطك
او اقولك ان مفيش وجه مقارنة بيني وبينك
بس انا بحاول انبهك انك مركز على الزاوية الغلط لتحقيق الهدف اللي عندك
أسلوبي وطريقة كتابتي هي وسيلة لتوصيل فكرة عندي
الفكرة دي نتاج تجربة ونتاج دروس فشل العديد منها زي ما نجح العديد منها برضه
اذًا من الأولى عندك دلوقتي انك تركز على الجانب الصح اللي يحققلك الهدف
وهو تجربتك الشخصية
لإن وبكل تأكيد تجربتك الشخصية المهنية هتبقي مختلفة تمامًا عن تجربتي الشخصية والمهنية
وخلي بالك اني قولت مختلفة، ما قولتش لا احسن ولا اوحش
لإن في التجارب مفيش اوحش ولا احسن
كل التجارب حلوة، كل التجارب مثمرة ومفيدة
انا عايزك تفكر في اللي انا قولته لحد الأن وتعكسه دلوقتي عليك مع الكلاينت
تفتكر مين عنده تجربة أعمق في الشغل؟
انت، ولا الكلاينت؟
اكيد انت، على ما اظن يعني
هو الكلاينت لما ييجي يعدل على شغلك تعديلات مش منطقية
مش بتحس ما بينك وبين نفسك بنوع من أنواع الإستياء كده؟
لما ييجي يقولك بدل الكلمة دي، او انا شايف نحط الدخلة دي احسن
أو أنه يكتب بدالك اصلًا ويقولك ظبطهالي بس
او يقولك كبرلي اللوجو، زودلي التكست في الصورة
وما خلافه من هذه العبثيات
هو الكلاينت ده بيعمل كده ليه؟
عشان نفس الظن هو هو بالظبط
انه مفكر عشان هو عارف شوية عن الحاجات دي
انه عنده الخبرة الكافية اللي تخليه يعملها
مع ان نفس الكلاينت ده لو جاب نجار، سباك، مهندس، دكتور
عشان يشبع احتياج أو يحل مشكلة عنده
مش هيعمل اللي بيعمله معاك ده
وعشان كده انت عندك دور مهم جدًا
في توصيل رسالة انك الشخص البروفيشنال المطلوب لإنجاز المهمة التسويقية اللي محتاجها الكلاينت
وعشان كده انت محتاج توصل أسباب رفضك لحاجة مثلًا هو مقترحها بشئ مبني على التجربة والخبرة مع بعض
عشان تخلق خط كده ما ينفعش يتم اجتيازه من قبله يبوظلك الشغل بتاعك
وهكذا بقى
وانا عارف ان الايميل ده طول شوية
بس خليني أسألك سؤال كمان
تفتكر عدد السنين الخبرة اللي انت حاططها دي نوعها ايه؟
هل دي سنين خبرة صافية؟
هل دي سنين تجربة صافية؟
هل هي مكس ما بين الإتنين؟
طيب لو هي مكس ما بين الاتنين، ودي حاجة مهمة بالمناسبة
يا ترى سنين التجربة موجودة في ايه، وسنين الخبرة موجودة في ايه؟
وتفكر كل واحد انت بتقوم بمتابعته على السوشيال ميديا
عامل لنفسه بيرسونال براندينج في موضوع ما
وبيقولك ان عدد سنين خبرته رقم محدد
تفتكر الرقم ده حقيقي؟
تفتكر الرقم ده تجربة صافية، ولا خبرة صافية؟
ولا مكس ما بين الاتنين؟
ولو مكس ما بين الاتنين
هل هو رقم كافي تخليك تسمع كلامه وتمشي وراه
بدون ما تبحث انت في اللي بينصحك بيه؟
هل هو رقم كافي يخليك مش محتاج تذاكر؟
هل هو رقم كافي يخليك تبقى مكتفي باللي بتاخده وخلاص؟
انا عارف اني قولت هسأل سؤال كمان، قمت سائل بتاع ١١ سؤال
بس هي دعوة للتفكير ومراجعة الأمور عزيزي وعزيزتي
😄 وبس كده
اكتفي بهذا القدر
بكره ختام الميكروكوبي
ممتن جدًا الحقيقة لمجهوداتكم في نشر النيوزليتر سواء عشان الهدية او من هدف المشاركة للاستفادة فقط لا غير
وعشان كده كل اللي عمل شير للنيوزليتر بتاعتي على مدار الفترة اللي فاتت، وعلى مدار بكره وبعده
هيبقى له نسبة خصم على الاشتراك في برنامجي كوبي دوز
نسبة الخصم دي ممكن تبقى ١٠،٢٠،٣٠،٤٠ او ٥٠٪ من تمن البرنامج الحقيقة
وده انا هحدده على حسب حجم المشاركات اللي كل واحد فيكم عملها بشكل فردي
الخصم ده ممكن انت تستفاد بيه، او ممكن تديه لحد شايف انه ممكن يستفاد بيه كمان
ودي فرصة لطيفة لو عايز تذاكر من كوميونيتي
سايبلك تحت هنا لينك تقدر من خلاله تنضم الى كوميونيتي امريكان ماركتنج اسوسييشن
الكوميونيتي بيقدم برامج كتير جدًا في منها المدفوع وفيه منها المجاني
ده غير ان فيه مصادر كتير مجانية بيقدموها انا اظن انك هتستفاد منها افادة كبيرة ان شاء الله
ادخل من اللينك اللي تحت ده واعمل الأكاونت بتاعك
❤️ وبالتوفيق ان شاء الله
Join the Essential Community For Marketers
Stay ahead of the curve and join the thousands of marketers shaping the future of marketing with the American Marketing Association. As the largest community-based marketing organization, you’ll find award-winning content, professional certifications (PCM®), industry-leading training events, and vibrant local chapters. Members get access to an abundance of resources, on-demand courses, and the most essential community in marketing.
Reply