خف مذاكرة كوبي رايتينج شوية

،عزيزي وعزيزتي

اهلًا وسهلًا بكم في نسخة جديدة من النيوزليتر راجعالكم بعد إجازة العيد اللي انا اخدتها 

كانت اجازة طويلة شوية الحقيقة، بس انا كنت محتاجها 

مش عايز اطول عليكم قوي في المقدمة، فـ خلينا ندخل في موضوع ايميل النهاردة

وهو موضوع في غاية الأهمية، نابع من سؤال بسمعه بقالي اكتر من ١٠ سنين الحقيقة

وساعات بسمعه من نفس الشخص اكثر من ٥ مرات على مدار فترات زمنية متعددة

وهو سؤال ازاي اذاكر كوبي رايتينج اكتر واكتر؟

ازاي اطور نفسي في المجال ده بشكل أعمق؟

وعلى الرغم من أن دي اسئلة حلو اوي انها تطلع من شخص حريص انه يكون احسن في مجال عمله 

إلا أن التطوير في مجال زي الكوبي رايتينج، او اي مجال في الكومنكيشن حتى والله

لا يسري في هذا الاتجاه خالص

والاتجاه اللي قصدي عليه، هو اني اذاكر مثلًا كوبي رايتينج اكتر، فـ ابقى كوبي رايتر احسن

واسمحولي اوضحلكم ليه، وازاي

وايه اللي مفروض تعملوه بدلًا من المذاكرة المستمرة وخلاص

تعالوا ناخدها من الأول خالص

لما بتيجي سيرة بيع اي منتج او خدمة، سواء  ديجيتال او حقيقي

بتيجي معاها سيرة الكوبي رايتينج صح؟

ليه يا ترى؟

لإن من خلال الكوبي رايتينج انت تقدر تخلق لغة تواصل تقنع بيها عميل مستهدف بالمنتج أو الخدمة دول

واللي من خلالها تقدر تبيعهم في النهاية، مظبوط؟ 

جميل جدًا 

اسمحلي هنا اسألك سؤال رابع

هو طالما الموضوع سلس وبسيط وماشي بترتيب منطقي كده

ليه في السوق موجود العديد من الكوبي رايترز

اللي ما بيعرفوش يبيعوا حاجة عادي

على الرغم من انك ممكن لما تشوف الشغل اللي هما عاملينه

تحس انه معمول صح بناءً على قواعد الكوبي رايتينج؟ 

سيبك من الموجودين في السوق خالص

انت نفسك ممكن تكون واقع في المشكلة دي

وسألت نفسك هي المشكلة فين طيب

المشكلة فيا ولا في العميل ولا في المنتج ولا في ايه بالظبط؟

وده سؤال خامس هنشوف إجابته حالًا مع بعض

بس محتاجين نرجع مع بعض ٦٤ سنة في الزمن الأول

والحقيقة سبب رجوعنا في الزمن لسنة ١٩٦٠ بعيدًا عن انكم بتحبوا القصص يعني

هو اني عايز اوضح كده حقيقة مهمة بخصوص الكوبي رايتينج تحديدًا 

وهي أن الأسس اللي اتبنى عليها الكوبي رايتينج ما اتغيرتش من ساعة ما بقى فيه حاجة اسمها كوبي رايتينج

كل حاجة جديدة بتتقال و بيتلزق جنبها كلمة كوبي رايتينج، ما هي إلا إعادة قولبة لأساس من الأساسات القديمة

طيب، خلينا نرجع لموضوعنا

في نهاية الستينات كان فيه توجه موحد كده من قبل العلامات التجارية ووكالات الإعلانات

إننا لازم نغير الطريقة اللي بنعمل بيها الإعلانات بتاعتنا

وده الحقيقة كان راجع إلى أن في فترة الخمسينات واوائل الستينات، الإعلانات كلها كانت شبه بعضها 

فيها نوع من أنواع المبالغة عن الكلام عن خصائص المنتجات بشكل عام

وعلى الرغم من أن الاتجاه ده كان بيجيب وكانت الناس بتشتري 

الا ان ده مكنش سببه الرئيسي قوة الإعلان نفسه، اكتر منه رغبة الناس في الفترة دي انها تقبل على الشراء

وده لأن الناس كانت لسه خارجة من آثار الحرب العالمية التانية

اضافة على ذلك الدايركشن ده مبقاش يحدث تأثير اوي لما بقى فيه تنوع كبير من المنتجات

وبقى فيه وعي أكبر عند المستهلكين 

وبالتالي المستهلك بقى محتاج يعرف ويفهم اكتر عن المنتج اللي بيتعرض عليه ده

وهنا بس حصل تبني لدايركشن مختلف تمامًا

والدايركشن ده او التوجه ده تبناه عدد من الناس اللي نقدر نقول عليهم اباء روحيين فعلًا للكوبي رايتينج

والمودرن الأدڤيرتايزينج

زي اوجيلفي، وشوارتز، وجاري هالبرت، وغيرهم كتير

:والدايركشن ده كالأتي

وهو انك لما تيجي تكتب كومنكيشن، او تستخدم الكوبي رايتينج في بيع منتج او خدمة

:مطلوب منك تنوع طاقة اهتمامك ومذاكرتك بنسب، تقسيمها كالآتي

٤٠٪ من وقتك في مذاكرة السوق ونقاط الألم والتحديات اللي فيه واللغة اللي بيتكلم بيها السوق ده

٤٠٪ من وقتك في مذاكرة الأوفر أو العرض اللي هتقدمه للسوق ده في النهاية، مكون من ايه وازاي هيبقى مقنع ومغري للسوق

٢٠٪ من وقتك في استخدام الكوبي رايتينج لتقديم كل ده في النهاية

ارجوك اقرأ التقسيمة دي تاني

قريتها خلاص؟

اخدت بالك من حاجة؟

الكوبي رايتينج عنصر مكمل للبيعة اللي انت عايز تعملها

مش العنصر الأساسي

العناصر الأساسية هي السوق والأوفر اللي عايز تدخل بيه اصلًا 

انت عارف ده معناه ايه؟

ان لو فيه واحد غيرك مش شاطر في الكوبي رايتينج اصلًا

بس قدر يفهم بالظبط السوق عايز ايه، وقدر يعمل اوفر كويس بناءً عليه

واستخدم ابسط عناصر الكوبي رايتينج في تقديم الأوفر ده في النهاية

يقدر يعمل شغل احسن منك، لو انت داخل بتحارب بس بمهاراتك الكتابية كـ كوبي رايتر

وده لسبب بسيط جدًا  

تلميذ السوق دايمًا هيكسب تلميذ المادة

تلميذ المادة، ممكن في النهاية يبقى استاذها 

لكن السوق ملوش استاذ

وعشان كده كلنا تلامذة اي سوق بندخل فيه بحجم المهارات اللي موجودة عندنا في المادة او المجال اللي بنشتغل فيه

انا مش بقولك كده عشان لا سمح انا بحاول اقلل من حجم المهارات اللي عندك في المجال اللي انت فيه

لكن انا بقولك كده عشان اعرفك انك عندك فرصة اكتر من هايلة انك تبقى تلميذ السوق واستاذ المادة كمان مش تلميذها 

الفكرة بس انك تقتنع ان الهيدلاين الصايع مش هيفيدك في حاجة وانت مش مذاكر السوق

والدخلة الكاتشي مش هتكاتش حاجة لو مركزتش على السوق عايز ايه

والخصم اللي هتعمله في الكوبي مش هيجيب حاجة لو اصلًا البيعة كلها مش مقنعة للي بتكلمه 

وعشان كده انا عايزك تاخد الإطار ده تطبقه في شغلك الفترة الجاية

والإطار ده الحقيقة مركز على اول نقطتين انت المفروض تركز عليهم كـ كوبي رايتر

وهما السوق، والأوفر بتاعك

تعالوا بينا نشوفهم كده مع بعض

السوق

عملت ريسيرش وطلعت تفاصيل الديموجرافيكس والسايكوجرافيكس الخاصة بالماركت اللي انت فيه؟

عملت سيرڤايز وبيانات استطلاع رأي وانترڤيوز مع البيرسوناز اللي بتشتري من عندك او من عند غيرك؟

تحليل المنافسين

حددت مين منافسينك المباشرين وغير المباشرين ولا لأ؟

راجعت استراتيجية التسعير عندهم ولا لسه؟

جربت تحلل آراء العملاء اللي عندهم وتشوف بيقولوا ايه وبيمدحوا في ايه وبيشتكوا من ايه؟

نقاط الألم والتحديات

حددت ايه المشاكل الرئيسية اللي بيواجهها الجمهور المستهدف بتاعك؟

حللت كلام جمهورك المستهدف وقدر تفهم هما بيدوروا على ايه او عايزين ايه من المنتج او الخدمة بتاعتك في النهاية؟

لغة التواصل

حللت اللغة اللي جمهورك المستهدف في السوق اللي انت فيه بيتكلموا بيها؟

حددت ايه اكتر مصطلحات بيقولوها وبيقولوها ازاي؟

جربت تعمل حصر بكل الكلام ده وتخطط هتستخدمه ازاي في الكومنكيشن اللي هيطلع مع الجمهور المستهدف بتاعك؟

خلصت دول؟

تعالى نشوف العنصر التاني

الأوفر

حددت المنفعة النهائية الموجودة في المنتج او الخدمة بتاعتك؟

حددت انت ليه مختلف او مميز عن البدائل الموجودة؟

حددت اصلًا انت ازاي شبه البدائل الموجودة؟

المنتج او الخدمة

حددت ايه الخصائص الخاصة بالمنتج او الخدمة؟

حددت انت ازاى هتقسم الخصائص دي على اشكال كومنكيشن مختلفة وهتلعب على كل واحدة ازاي؟

حددت ازاي هتتكلم عن الخصائص دي بلغة المتلقي يفهمها؟

المحفزات

حددت ايه ممكن بونص يتحط في الكومنكيشن يقنع المتلقي انه ياخد اكشن حالًا بدل بعدين؟

حددت ايه العناصر اللي ممكن تزود من قيمة العرض اللي انت عامله للمتلقي؟

تقليل المخاطر

حددت ايه الضمانات اللي ممكن تخلي المتلقي مطمن وهو مقبل على عملية الشراء منك؟

ولو انت بتسأل نفسك دلوقتي حالًا هو انا كمان هتشغل على الحاجات دي؟

فـ صدقني يا عزيزي لما اقولك ما ينفعش تقول كمان على الحاجات دي

عارف ليه؟

لإنك مسوق اولًا، وكوبي رايتر ثانيًا 

الا لو انت ارتضيت بإن دورك يقتصر على الكتابة وخلاص

ده موضوع تاني بقى

بس خليني اقولك حاجة

وفكر فيها كويس

لو روحت تبيع مياه في الصحراء، انت مش محتاج كوبي رايتينج عشان تبيع بيعتك 

بس لو روحت تبيع تلج في القطب الشمالي، اظن انت محتاج حاجة اكبر بكتير من الكوبي رايتينج

عشان تبيع بيعتك

فكر فيها كويس من غير ما تقعد تسرح وتتخيل حوارات مش منطقية

 😄 وبس كده

فقرة الترشيحات

انهاردة برشحلكم الحقيقة نيوزليتر لطيفة جدًا والمواضيع بتاعتها في غاية التنوع لأي كريتيڤ بشكل عام

هتلاقي هناك اخبار وتوتوريالز مختلفة، ومناسبة جدًا للقراءة مع كوباية قهوة الصبح او في الطريق للشغل 

روح على اللينك اللي تحت ده واشترك وشوف النيوزليتر بنفسك

وبس كده

اتمنى تكون استفدت من ايميل انهاردة

ولنا لقاء اخر عما قريب ان شاء الله

احب جدًا لو تشارك النشرة البريدية مع زمايلك كده

تكتب على الفيسبوك ليه يتابعوها، تعملي منشن عشان ارد عليك

 😄 كده يعني، خليك اكتيڤ معايا كده وعلى الخط

 ❤️وبشكر جدًا كل اللي بيشارك النيوزليتر بشكل مستمر مقدمًا

 ❤️ اشوفكم على خير