تبيعلي معرفتك دي كلها على كام؟

انت تسأل، انا اجاوب

،عزيزي وعزيزتي

اهلًا وسهلًا بيكم في نسخة جديدة وايميل جديد من النيوزليتر

من فترة كده كنت نزلت بوست عندي بعلن فيه عن فقرة جديدة كده عايز اعملها هنا في النيوزليتر

بعنوان أنت تسأل، انا اجاوب

وزي ما واضح كده من عنوانها ان الموضوع بسيط جدًا

انت هتسألني سؤال في دماغك، وانا هجاوبك عليه في ايميلك 

فـ اسمحولي اعرض واحد من الأسئلة اللي الايميل ده بيتكتب حاليًا عشانها 

والسؤال ده من محمد محمود 

Mohamed Mahmoud

في الحقيقة ده سؤال خطير جدًا

وفي الحقيقة برضه دي مش اول مرة حد يسألني السؤال ده

صحيح صياغة السؤال بتختلف، ولكن السبب وراء السؤال واحد هو هو

ويمكن المنطقي دلوقتي بالنسبالك عزيزي القارئ وعزيزتي القارئة اني اجاوب السؤال ده في شكل نقاط كده

وخطوات محددة جدًا تتاخد كوبي بيست عشان نمشي عليها

ولكن في واقع الأمر، انا مش هعمل كده

لإن مفيش خلطة سحرية هنمشي عليها كوبي بيست عشان نعرف نعمل ايه في المعضلة دي

بس فيه مجموعة من المعضلات الحقيقة، انا اظن اننا لو استوعبنا وجودها واستوعبنا ابعادها كويس اوي

هنعرف نجاوب السؤال ده صح من وجهة نظر كل واحد بيفكر فيه وبطريقته

فـ عشان ما اطولش عليكم اكتر من كده

يلا بينا نبتدي

معضلة خبراء في مجالنا بحق وحقيقي، ولكن

لو جربنا نطلع لفوق كده وناخد بصة على انواع الخبراء الموجودين في مجال ما، ايًا كان ايه هو بالمناسبة

هنلاقي ان فيه شريحة كده منهم، انا بسميهم خبراء ولكن الحقيقة

ودلوقتي هفهمك انا ليه بسميهم كده

الخبراء دول بيقولوا على نفسهم انهم خبراء بحق وحقيقي

وبينشروا محتوى على العديد من منصات التواصل الاجتماعي تحت تون واتجاه إننا خبراء 

والمحتوى بتاعهم ناجح بشكل كبير بلغة النجاح في منصات التواصل الاجتماعي

ولكن

لو دخلنا في تفاصيل المحتوى اللي بيتم نشره ده، هنلاقي حاجة مثيرة جدًا للاهتمام الحقيقة

ايه هي بقي؟

أن المحتوى ده بيدي المتلقي نسبة صغيرة من اللي هو محتاج يعرفه

بالشكل اللي يخليه مشدود واهتمامه مثار جدًا للي بياخده ده في الأول

ولما يبقي لسه عايز يعرف اكتر

يلاقي أن النسبة الأكبر من المحتوى ده محطوطة خلف بوابة دفع

اللي هو عايز تعرف اكتر؟

عايز تتعلم صح؟

اشترك في الكورس بتاعي

اشتري الكتاب بتاعي

اشتري المنتج اللي انا عامله ايًا كان ايه هو بقى

النوعية دي بقى اسمها خبراء ولكن

لأن في معظم الأحيان هما بيتعاملوا مع المعلومات اللي عندهم كأنها قفص فاكهة

وش القفص للعامة 

بس اللي تحت الوش اللي هيدفع فلوس

وفي معظم الأحيان برضه، معظم المحتوى الخاص بوش القفص ده

بيبقى محتوى سطحي للغاية

ولكن متعالج بطريقة كويسة عشان يجذب الانتباه

ويحقق باقي اغراضه بقى

ودي مشكلة كبيرة جدًا الحقيقة

لإنها الحقيقة ناتجة عن تعامل سطحي للغاية مع مصطلحات زي

المعلومات، المعرفة، والخبرة

وصدق او لا تصدق، يوجد فرق شبه الفرق ما بين السماء والأرض كده، ما بين المصطلحات دي برضه

في معظم الأحيان هتلاقي ناس مسمية نفسها خبراء 

ولكن هي مجموعة من الناس اللي بتتعامل على مستوى المعلومات اللي عندهم فقط لا غير

معضلة التحوير لحد ما الدنيا تظبط 

ودي مصيبة مش معضلة بس الحقيقة

لو طلعنا لفوق برضه وجربنا ناخد نظرة تانية كده على الخبراء الموجودين في مجال ما

هنلاقي ان فيه نوعية منهم برضه محققة بيرسونال براندينج بلغة منصات التواصل الاجتماعي برضه

ولكن على أرض الواقع هما معندهمش تجارب عملية قوية جدًا تؤهلهم انهم يتكلموا في المجال ده تحت مظلة الخبير الحقيقة

ودي الحقيقة نظرية خلينا نحور ونمشيها كده لحد ما نشتغل شغلانة كبيرة وان شاء الله الدنيا تظبط

وانا بقول دي مصيبة لإن لو انت معندكش تجربة عملية قوية

من انهي منطلق بتحاول تشارك معرفتك ومعلوماتك وخبرتك في المجال دي؟

من انهي منطلق بتحاول تعمل بوزيشنينج لنفسك بالشكل ده؟

وياريت الموضوع بيقف عند كده

لإن عشان القالب ده يمشي بالشكل الصح اللي متخططله

هتلاقي فيه انماط متكررة بيعملها النوعية دي من الخبراء 

زي ايه يا ترى؟

زي انه في كل كلامه يقولك وبشكل متكرر انت محتاج تثق فيا لإني جربت كتير

زي انه يتجاهل أي اسئلة جاية من ناس بتسأل عن نوعية وديناميكية الخبرة الموجودة عنده

زي انه نص وقته بيقدم محتوى بيحاول يقنع اكتر ما بيعلم أو يشارك معلومة او خبرة حقيقية

زي انه يألف تايتلز بيشتغل فيها أو يضخ عدد سنين خبرة نتجت من قفزة في نهر الزمن محدش غيره عملها

اظن النمط بقى واضح اكتر دلوقتي

معضلة الخبراء الاوريجينال

انا تعبتك معايا انا عارف، بس معلش محتاجين نطلع فوق تاني نبص بصة كمان

شايف معايا النوعية اللي هناك دي؟

دي بقى نوعية الناس اللي معندهاش خبرة، ولا معرفة، ولا معلومات كفاية حتى

بس عندهم قدرة جبارة على نسخ افكار ونصائح ناس اكتر خبرة منهم بكتير جدًا

وإعادة صياغتها بشكل جديد، وتقديمها بقى على اساس ان الأفكار دي بتاعتهم ونابعة من بنات أفكارهم

وانا هنا مش بتكلم انهم بيعالجوا الأفكار دي من وجهة نظرهم وتجربتهم الشخصية، ياريت والله كنت اتمنى

بس خليك فاكر اني  قولتلك ان مفيش اصلًا لا معرفة ولا معلومات كفاية ولا تجربة من اساسه كافية ووافية

مشكلة النوعية دي من الخبراء تكمن في ٣ حاجات الحقيقة

انهم بيقدموا معلومة ناقصة ومشوهة

لأنك مستحيل يكون معندكش خبرة وتيجي تنسخ فكرة وتعرف تحافظ على الجذر الأساسي الخاص بالفكرة دي

لإنك لو جربت تحافظ عليه، غصب عنك هيبان انك واخدها من حد تاني، وبالتالي التشوه بيجي من هنا

ان عندهم عدم وضوح في شكل الشخصية بتاعتهم كخبراء

لما بتنسخ فكرة من حد تاني خبير فعلًا، بتحاول برضه تغير من التوناليتي اللي اتقدمت بيها الفكرة من قبل الخبير ده

بتحاول برضه تغير وتبدل القصص او وجهة النظر الخاصة بالخبير اللي انت اخدت منه الفكرة دي

والنتيجة في النهاية الفكرة اللي نسختها بتبقى ماسخة ومختصرة ومفيهاش روح ولا بصمة

ان عندهم فراغات كبيرة في ملخص سنين تجاربهم

وبالتالي صورة انك خبير اوريجينال دي عند مرحلة ما من الوقت بتنكشف وتبان

الا بقى لو انت ناصح فـ تقرر تدمج ما بين النوع ده من الخبراء والنوع اللي قبليه

فـ تبقى بتنسخ شغل ناس تانية، وبتحور في عدد سنين خبرتك وتجاربك كمان

كده انت عملت مكس هايل 

دول ٣ معضلات

بـ ٣ انواع من الناس، انت محتاج تتجنب انك تكون منهم

لو انت فعلًا عايز تعمل لنفسك بيرسونال براندينج قوي

ولو انت فعلًا عايز تستفيد شخصيًا ومهنيًا وماديًا من البيرسونال براندينج ده

انا مش هاجي اقولك ايه اللي ينفع تقدمه مجانًا وايه اللي ينفع تقدمه بفلوس

بس انت محتاج تقيم وتحدد هو اللي هيتقدم مجانًا واللي هيتقدم بفلوس، تم تقييمه بناءً على ايه؟

انت عايز تبيع ايه في الاخر؟

واللي هتبيعه دي حاجة انت مخبيها عشان تكسب منها؟

ولا حاجة هتعرضها عادي بس الناس هتبقى عايزة تدفعلك فلوس عشان تطبقها معاك وتحت اشرافك؟

واللي هتبيعه ده، عايز تبيعه من انهي زاوية؟

هل من زاوية الخبير الحقيقي؟ هل من زاوية الشخص اللي جرب؟

هل من زاوية الشخص اللي طبق كتير وتطبيقه نجح فـ عايز ينقل التطبيق ده للناس؟

اسئلة كتير محتاج تفكر فيها الحقيقة

والأهم من كده، هو وانت بتفكر في الإجابات

جرب تشوف كده هل الإجابات دي بتتماشى مع اي نوع من النوعيات اللي انا ذكرتها ولا لأ

عشان لو لقيتها بتتطابق بشكل ما أو بآخر

يمكن انت محتاج تفكر وتجاوب تاني

يمكن انت محتاج تعيد صياغة واجابة السؤال بشكل واقعي اكتر

وهكذا

❤️ وبالتوفيق ان شاء الله 

عجبتكم فقرة انت تسأل، انا اجاوب؟

هتلاقوا تحت فيه لينك سيرڤاي انا عامله

تقدروا من خلاله تسيبوا اسئلتكم برضه 

عشان الفترة الجاية اجاوب عليها في ايميلات معمولة مخصوص عشانها ان شاء الله

 ❤️ اشوفكم عما قريب

Join the conversation

or to participate.