كوبي رايتر تحت المحاكمة

In partnership with

عزيزي وعزيزتي،

قد يبدو من عنوان الإيميل اني هحكي قصة بتتكلم عن كوبي رايتر اتحاكم فعلًا 

وكان مطلوب منه يدافع عن نفسه بدون وجود محامي

وعلى الرغم من أن فيه قصة حقيقية بتتكلم عن الموضوع ده فعلًا

الا اني مش هحكي القصة دي خالص في ايميل الليلة دي

القصة اللي هحكيها انهاردة هتبقي عنك انت او عنكي انتي

ومطلوب مننا قليل من التخيل مع شوية جدية كده في التخيل ده

للوصول الى الدرس المستفاد من قصة انهاردة

الموضوع حصل فجأة وانت مش عامل حسابك

اتاخدت من بيتك وانت قاعد لا بيك ولا عليك

غمولك عينيك وركبوك في عربية

وبعد نص ساعة كده العربية وقفت

الباب اتفتح

اتسحبت من العربية

طلعوك على سلالم كتير اوي

اخدت بالك انك بتدخل يمين في شمال في يمين

ومرة واحدة باب اتفتح

من صوته تهيألك انه طويل وعريض كده

دخلوك جوه حسيت انك ماشي في بهو كبير السقف بتاعه عالي

طلعوك على عتبة كده خشب صغيرة

حطوا ايديك الاتنين على ترابيزة خشب غالبًا دي اللي قدامك

ومرة واحدة شالوا حتة القماش اللي كانت على عينيك

والمنظر اللي قدامك مهيب ومرعب فعلًا الحقيقة

لدرجة انك بتتمنى انهم ما شالوش القماشة من على عينيك

انت في قاعة محكمة

واقف على منصة خشب 

وقدامك على منصة أعلى قاعد ٣ قضاء 

بس مش شبه اى قضاة ممكن تكون شوفتهم قبل كده في حياتك

واحد فيهم بيتكلم وبيتفرج بس ما بيسمعش

الثاني بيسمع وبيتفرج بس ما بيتكلمش

والتالت ما بيتفرجش بس بيسمع وبيتكلم 

الوضع غريب ومخيف جدًا في نفس الوقت

انت مش عارف تعمل ايه

بتبص وراك لقيت ان مفيش حد في القاعة غيركم انتم ال ٤

مفيش حضور كرام

مفيش حضرات السيدات والسادة المحترمين

مفيش حد يمثلك ولا يفهمك في ايه

ومرة واحدة وانت بتهلع وسط افكارك

سمعت صوت حد بيتكلم من قدامك على المنصة

السيد المحترم الكوبي رايتر

اهلًا وسهلًا بيك في جلسة محاكمتك 

…محاكمة ايه؟، انا عملت اي

شششش! محدش سمحلك بالكلام لسه

انت هنا بتتحاكم

والمحاكمة دي هتبقى من خلال مجموعة من الأسئلة هنطرحها عليك

!ولما يتسمحلك بالكلام ابقى اتكلم

مماااا..ماشي حححححح..حاضر اللي تشوفه

اتنين من القضاة اللي بيتفرجوا بس لبعض

وهزوا راسهم لبعض كده

وواحد فيهم مسك المطرقة الخشب بتاعته

وضربها على الطاولة اللي قدامه

!!محكمة

…السؤال الأول

استخدمت قبل كده في الكوبيز بتاعتك أي نوع من انواع الفومو الكذاب؟

كتبت وقولت في الكوبي ان الكمية المحدودة وهي مش محدودة
وفي منها اللي يكفي شهور قدام؟

حطيت عداد زمني كاذب على الموقع اللي انت مسئول عنه

في سبيل ان اللي داخل يشتري يظن فعلًا ان فيه حاجة هتفوته؟

انا خلصت اسئلة، اتفضل جاوب

ااا… اه عملت ده قبل كده

بس انا عملت ده بحسن نية

كنت مفكر ان المفروض يتعمل كده عادي

سمعت صوت زمزأة كده من القاضي اللي بيسمع وبيتفرج بي ما بيتكلمش

ولقيته بيكتب كده حاجات انت مش شايفها قدامه 

….انا بس كنت حابب اوضح اني كنت بعمل كده عشان لقيت معظ

شششش! احنا ما سمحناش بتوضيح ومش محتاجين نسمح بيه

خصوصًا اننا عارفين اخر الكلام ده ايه

…السؤال التاني

القاضي اللي بيسمع وبيتفرج كتبلنا ملحوظة اضافية على شغلك

انك بتشتغل بنماذج عمل وقوالب جاهزة واخدها من على النت

بتاخدها وبتكتب من خلالها

الكلام ده صحيح؟

…ايه ده، بس نماذج العمل مالها؟ دي حاجة بتسهل الشغ

شششش!! دي مش اجابة على السؤال يا متهم

هنعيد السؤال تاني وعايزين اجابة واضحة ومباشرة

استخدمت نماذج عمل جاهزة زي ما هي قبل كده؟

كنت عارف انك لما بتستخدم نماذج جاهزة

انك بكده بتبوظ اي فرصة لملاحظة اي حاجة ممكن تتعمل

تحسن من اداء البيزنس اللي انت بتشتغل عليه؟

كنت عارف انك لما بتستخدم نماذج جاهزة

بتلغي الجانب الأدمي في التواصل مع جمهورك المستهدف؟

كنت عارف انك بوظت فرص كتير للبيع والنمو في اي بيزنس انت اشتغلت عليه

لما قررت تلغي دماغك وتعتمد على نماذج عمل وتمبليتس جاهزة؟

ما تجاوبش على كل الأسئلة دي

هو سؤال واحد عايزينك تجاوب عليه!

!استخدمت نماذج عمل وتمبليتس بالشكل ده ولا لأ؟

اه انا عملت كده، بس صدقوني معظم الناس في مجالي بتعمل كده برضه

برضه!!، معظم الناس بتعمل كده في مجالك؟

هو ده عذرك بعد كل ده

تمام جدًا

مازال القاضي التاني مستمر في كتابة ملاحظات قدامه انت مش شايفها

…السؤال التالت

من الواضح برضه في الكوبيز بتاعتك وملاحظات القاضي التاني

وكمان القاضي التالت

ان فيه معظم الكوبيز اللي بتعملها سواء مكتوبة او في شكل فيديوهات

انك بتبالغ في تعظيم قيمة المنتج بتاعك ووعد الجمهور بحاجات كتير

مش موجودة في المنتج بتاعك في النهاية

وواضح كمان انك بتتجاهل كل حاجة ليها علاقة باحتياجات السوق

واحتياجات الجمهور المستهدف بتفاصيلها 

وبتعتمد انك تركز بس تبيع المنتج ازاي حتى لو المنتج ده مش امثل حاجة لجمهورك

احنا مش هنسألك هنا، احنا مش محتاجين نسألك

احنا شايفين كل ده في شغلك بالفعل 

اجابتك مش هتفيدنا بحاجة خلاص

…بس انا كنت عايز اوضح نقط

مفيش توضيح! غير مسموحلك بالإجابة

احنا انتهينا من طرح الأسئلة

ودلوقتي هنتداول مع بعض شكل الحكم

تاني…غير مسموحلك بالكلام خلاص

وبعد وقت كبير جدًا

!انتباه يا متهم

الحكم صدر

والحكم بيقول انك مذنب

من هنا ورايح كلامك مع الناس حتى على ارض الواقع

هيبقى من خلال التمبليتس اللي كنت بتستخدمها في شغلك

عشان تشوف لما تتكلم مع الناس في الحقيقة من خلال تمبليت

شكلك هيبقى سخيف ازاي

من هنا ورايح مش مسموحلك تكتب كوبيز تاني من دماغك

محكوم عليك بسنتين اشغال شاقة بتنسخ فيها امثلة من كوبيز عالية الجودة

عالية القيمة، مكتوبة بشكل جيد جدًا عشان توصل رسالة محددة قابلة للقياس

ونظرًا لمستواك مش مطلوب منك تفكر، مطلوب منك تنسخ

هتنسخ مرة واتنين وتلاتة واربعة

ساعتها هيتطلب منك تفكر ايه المشترك في الكوبيز دي

يمكن تتعلم حاجة جديدة

وبعديها هتتحط في امتحان جديد

انك تكتب كوبي بشكل جديد

اننا نشوف النسخ الأبدي اللي كنت فيه ده استفدته منه

ولا لسه دماغك هي هي ما اتغيرتش برضه

كل ده كان ممكن تجنبه

لو من الأول فهمت واحترمت دينمايكية عمل مجالك

كل ده كان ممكن تجنبه

لو اخدت مذاكرة السوق على محمل الجد

لو اخدت مذاكرة جمهورك المستهدف على محمل الجد

لو حاولت توفق ما بين كل ده وعكسته على منتجك بشكل حقيق

بس هنقول ايه

لعل الحكم ده يرجعك تاني على الطريق السليم

الجلسة انتهت

والمتهم تحت المراقبة الى ان تنتهي مدة الحكم

وخلصت القصة

الحقيقة كان فيه اسئلة كتير ممكن اسألها من خلال القصة دي

بس انا كنت قاصد احط كذا سؤال بعينهم

لإني على ما اظن ان كل واحد فيكم فكر في حاجات غلط هو بيعملها

ممكن فعلًا لو فكر انه هيتحاسب بسببها يبطل يعملها

وعشان كده انا هسيبلكم هنا سؤال، احب جدًا تجاوبوا عليه

او تردوا على الايميل ده وتجاوبوني عليه

والسؤال هو

واخيرًا للي مهتم

لو بتشتغل على بيزنس او براند في مجال الإي كوميرس والستور بتاعه موجود على شوبيفاي

ممكن تحضر بشكل مجاني ويبينار عظيم جدًا هيبقى كمان ٣ ايام

مقدم من قبل Chargeflow

الويبينار هيناقش اخر استراتيجيات النمو اللي تقدر البراندز
تطبقها والكلام هيبقى بالتحديد على شوبيفاي

انا شخصيًا شايف ان حتى لو البراند بتاعك مش على شوبيفاي 

حضورك الويبينار ده ممكن يديلك مجموعة من الانسايتس والتجارب الجديدة

اللي تقدر تطبق منها اللي ينفع على البراند بتاعك حاليًا 

هسيبلك لينك التسجيل في الويبينار تحت

والى اللقاء في ايميل جديد ان شاء الله

Get Shopify growth strategies from the top DTC experts

Introducing "Level Up Your DTC Brand," a digital event hosted by Chargeflow, where you'll receive the latest tactics, strategies and data on how to scale your brand on Shopify in 2024.

RSVP now to hear from the CEOs of growing DTC brands like Haven Athletic and Allermi, as well as eCom SaaS leaders from Sendlane, Triple Whale, Aftersell, and more. Get practical strategies, actionable tips, tools to grow your brand, and have a chance to win platform credits from solution providers, gift cards, and a Meta Quest 3 Reality VR Headset.

Register now (limited seats available)