محتاج هودي اوفرسايز رجالي

،عزيزي وعزيزتي

ياااااه، وحشتني كتابة المقدمة دي بجد

عاملين ايه؟
اخبار اول يوم صيام ايه؟

كل سنة وانتم طيبين ورمضان كريم ومبارك عليكم جميعًا يارب
ويارب ما يقطعها عادة كده

إني أدخل عليكم في ايام رمضان المباركة كل سنة بالنسخة الجديدة
من اكتر الأفكار اللي عملتها ومحببة الى قلبي وهي الميكركوبي

الميكركوبي ببساطة هي عبارة عن سلسلة رمضانية كل جزء من السلسلة دي
بيحتوي على فكرة بسيطة في دماغي عايز اعبر عنها بشكل مفيد ليك

ملهاش ترتيب معين
ولا محتاجة انك تكون شوفت اللي قبليها او اللي بعديها عشان تفهمها

ولو دي اول مرة ليك تشوف الاسم ده
او اول مرة تفتح ايميل مني
اكيد مش هتكون فاهم انا بتكلم عن ايه
بس تقدر تدخل على الويبسات الخاص بالنشرة البريدة نفسه
وهتلاقي النسخ اللي فاتت

،خلينا بقى ندخل في الموضوع

بس الحقيقة وفي واقع الأمر
انا مش من الناس اللي بتدخل في الموضوع على طول في الميكركوبي
لإن الحقيقة برضه، الميكروكوبي هي واحدة من الفورماتس اللي لما بعملها

بحب اخلي المتلقي مش فاهم هو ايه علاقة عنوان الموضوع بيا
وبحب برضه اخلي المتلقي يفكر شوية كده هو انا عايز اخده واروح بيه على فين 

المهم يعني عشان ما اطولش عليك اكتر من كده
من فترة مش بعيدة اوي كنت بتفرج على مسلسل وثائقي
‘ترجمته اسمه بالعربي حاجة كده رايحة في سكة ‘اتيكيت الحشيش

وبيني وبينك، انا فكرت كتير استخدم الاسم ده بشكل ما او بأخر في عنوان الايميل مش هكدب عليك

كان ممكن يزود نسبة الناس اللي هتفتح الايميل الصراحة
بس رجعت في كلامي الحقيقة
وفي نهاية الايميل هتعرف ليه

،المهم

واحدة من النقاط اللي كان بيتكلم فيها الفيلم الوثائقي ده
هي توضيح ان الادمان له انواع مختلفة

فيه مثلًا نوع بدني، ونوع نفسي

الإدمان البدني مثلًا
هو ان جسمك مش هيبقى قادر يشتغل طبيعي غير لما ياخد المخدر اللي هو محتاجه

زي الهيريون كده مثلًا

جسمك لو اتعود عليه، هيبقى محتاجه وبشدة بعد كده
ولو ما تحصلش عليه، هينهار

فيه مثلًا ناس تانية برضه، الكحوليات بالنسبة لجسمها ادمان عادي
من غيرها مش هتقدر تشتغل

فيه بقى مخدرات تانية، هي عبارة عن إدمان نفسي في المقام الأول والأخير
جسمك مش محتاجها على الاطلاق

عادي جدًا تبطلها، ومش هيحصلك اعراض انسحاب عنيفة يعني
زي السجاير كده مثلًا

المشكلة بس ان عشان بيتكون بناءً عليها زي عادة كده
فـ بيبقى من الصعب انك تفكر تبطلها

ممكن برضه زي القهوة مثلًا
فيه ناس لازم اول ما تصحى من النوم تشرب سجارة مع كوباية قهوة

ليه؟
مفيش ادنى سبب منطقي، غير انه لازم اعمل كده

،المثير بقى للاهتمام

أن الحشيش مثلًا مش مخدر إدمانه بدني
لا, مخدر ادمانه نفسي عادي

بس يقدر عادي يتحول إلى إدمان نفسي
على حسب نوعية الشخص اللي بيتعاطاه

يعني لما كنت بتفرج، فيه بنت قالت انها لازم تشربه بعد الشغل
واحد تاني كان بيشربه اول ما يقوم من النوم
وبعد كده يشرب واحد تاني في نص اليوم

وهكذا

لما تشوف ناس زي دي، هتلاقي ان الموضوع هنا نفسي اكتر منه بدني

وعشان تفهم اكتر تعالى نشوف واحد من اللي بيشربوا دول قال ايه بالظبط

في البداية انا كنت بشرب عشان اهرب من الروتين اليومي اللي في غاية الملل’’

كان الموضوع بالنسبالي هروب من كل حاجة متوقعة مملة ممكن تحصل في يومي

بس مع مرور الوقت، ابتديت اشرب كل يوم

وواحدة واحدة شرب الحشيش بقى هو الروتين الجديد بتاعي

وساعتها ما بقاش الموضوع هروب بقى من الملل

الشرب نفسه بقى شئ في غاية الملل والتوقع

وعشان كده قررت ابطل اشرب كل يوم

وبقيت اشرب بس في نهاية الأسبوع

“عشان ارجع تاني احس المتعة في الموضوع

والحقيقة، الراجل كلامه منطقي جدًا

محدش يفهمني غلط

هذا الايميل مش بيروج لأي نوع من انواع الهباب

ولكن لو جردنا اللي اتقال على لسان الراجل من سياقه
وركزنا على الجوهر السلوكي في اللي قاله

هنلاقي ان كل شئ بيلمع وبيظهر كده وسط الزحمة
هو كل شئ مثير للاهتمام وخاطف للعين
هو كل شئ جديد ومختلف

بس اول ما يبقى موجود بكثرة وحواليك في كل حتة
هيتحول لحاجة مملة وباهتة عادي
ملهاش لمعان ولا بريق

والناس هتبتدي تقول ما كفاية بقى احنا زهقنا

عارف ايه اللي كده برضه؟

 😄 اولًا الكنافة بالبيستاشيو وشوكولاتة دبي

ثانيًا الموضة عزيزي وعزيزتي 

حد عمل حاجة مختلفة، كل الناس اخدت بالها منها
وعشان كل الناس اخدت بالها منها
كله حاول يقلدها ويعمل زيها

ومرة واحدة كده تلاقي كل الناس بقت كوبي بيست من بعضها 

كل الناس لابسة اوفر سايز
كل الناس لابسة بناطيل باجي
كله لابس كروب توب

كل الناس بتتناول أطراف حديث صيحات الموضة
ومحدش مركز في أطراف الهدوم اللي بقت مقطعة في كل حتة

فـ  لما تيجي تركز كده في الموضة
هتلاقي ان الموضة مش ابتكار

وانما هي عبارة عن محاكاة
لا يوجد قائد، وانما يوجد قطيع

كله عايز يبقى جزء من الصورة وخلاص

وعشان كده الموضة هي إدمان نفسي هي كمان
كله خايف ما يبقاش شبه اللي حواليه
كله خايف يلبس عادي وسط سنه

  Rizz عشان هيبقى متخلف طبعًا ومش هيبقى

عارف بقى ايه اللي مش كده؟

وما ينفعش يبقى كده؟

ايوه صح برافو عليك، برفوا عليكي
شغلنا ما ينفعش يبقي زي الموضة كده
مبنى على ثقافة القطيع

ما ينفعش عشان شوفت فورمات اعلان عجبك
تروح تنقشه عندك ظنًا منك انه هيشتغل

يعني على سبيل المثال واحد من الفورماتس اللي كانت ناجحة جدًا في الإعلانات
هو انك تطلع كريتيف كأنه متاخد سكرينشوت من ابلكيشن النوتس على الأيفون

:زي اللي في الصورة ده كده

الإعلان ده اتنقش ٦٠ الف مرة

ليه؟

عشان اول ما اتشاف كان جديد ومختلف
وكل الناس كانت بتقول انه حلو جدًا كأرقام ومبيعات

دلوقتي بقى عادي

لإن استخدامه فقد السياق بتاعه خلاص
واتحول لموضة وتريند

بس صدق او لا تصدق
الكومنكيشن مش موضة

ما ينفعش يبقى موضة
ولا ينفع يبقى إدمان نفسي
تبقى محتاج فيه تنفذ حاجة
عشان كل اللي حواليك بيعملوا شبهها

الكومنكيشن صناعة ما ينفعش فيها صاحب رأي ورؤية وطريقة تفكير

ينسخ وينقش أفكار الآخرين بدون معالجته الشخصية
لإن ساعتها الناس اللي بتتبع رأي ورؤية وطريقة تفكير هذا الشخص
هتعمل زيه وتحاول تقلده

والنتيجة إننا هنتحول لمجموعة من النقاشين في النهاية
والأفكار كلها هتبقى مسخ الحقيقة

الموضوع بقى عامل زي واحد بيقول انا نفسي اكون مختلف
بس زي كل الناس اللي هناك دي
ماهو انت كده مش هتبقى مختلف
بس الأكيد انك هتبقى شبه كل الناس اللي هناك دي

،واكتفي بهذا القدر

قبل ما اسيب الكيبورد وابعت الايميل 

"حابب اقولك انا ليه ما سمتش الإيميل ده "اتيكيت الحشيش
مع اني كنت عارف ان نسبة الأوبن ريت بتاعته هتبقى اعلى
خصوصًا اني بقالي كتير ما بعتش ايميلات كمان

الحقيقة ده لسببين

السبب الأول أن فيه هدية في الايميل ده
السبب التاني ان شخص واحد بس هو اللي هياخدها الحقيقة
ده لو عايز طبعًا

طيب ايه هي الهدية؟

خصم ٦٧٪ على سعر الاشتراك في التراك الخاص بيا وهو كوبي دوز
واللي هتبتدي منه نسخة جديدة من نوعها ان شاء الله بعد العيد الصغير

السعر الحالي للتراك هو ١٥ ألف جنيه مصري
ولو انت حابب تبقى في الرواند دي هتقدر تشترك فيها بسعر ٥٠٠٠ جنيه بس

مين بقى هياخد الخصم ده؟

اول شخص هيكتب بوست عن الايميل ده
ويعرف الناس ان الميكروكوبي رجعت
وليه الناس ممكن تبقى حابة تتابعها

وطبعًا يبقى عاملي منشن عشان اشوف البوست بتاعه و ابعتله اقوله مبروك

 😄 بس كده الموضوع بسيط خالص

مش هكدب عليكم الحقيقة

بس دي ممكن ما تكونش اخر هدية هتلاقوها في ايميل
بس مش هخبى عليكم برضه
الخصم ده مش هيتكرر تاني

وبس كده

خلص ايميل انهاردة
 ❤️ والى اللقاء في نسخة جديدة ان شاء الله