العشاء اوبن بوفيه

،عزيزي وعزيزتي

من الواضح أن ايميل امبارح عمل قلق جامد
مع اني لحد دلوقتي ما نزلتش اي حاجة على الصفحة بخصوص اني رجعت
أو أن الميكروكوبي حتى رجعت 

وبيني وبينكم، انا مبسوط الحقيقة
مع ان بلغة ولوغاريتمات السوشيال ميديا
المفروض عليا كـ كريتور اني اعلن وانزل بوستات كل يوم

عشان كل الناس تاخد بالها والدنيا ترجع تتحرك
واللي لسه معرفش يعرف، وكده يعني

بس زي ما انتم عارفين، لو فيه حاجة كلنا مجتمعين عليها
فـ هي اني دايمًا بحب ابقي عكس عكاس كده
خصوصًا بقى في موضوع الايميلات ده

مش حابب اطول عليكم اكتر من كده
عشان انت وانتي اكيد عايزين تعرفوا هو ايميل انهاردة انا عايز اقول فيه ايه

فـ خليني احكيلكم حدوتة صغيرة كده الأول 

قصتنا بتبتدي داخل حرب ملحمية
حصلت على الأراضي اليابانية تحديدًا في مدينة سيكي جهارا
 من ٤٣٠ سنة فاتو كده تقريبًا

والحرب دي كانت ما بين جيشين على نفس الأرض
الجيش الشرقي بقيادة القائد لياسو
والجيش الغربي بقيادة القائد ميتوسناري

كل جيش فيهم تقريبًا عدده بتاع ٨٠ الف جندي كده ولا حاجة

وما اخبيش عليك وعليكي عزيزي وعزيزتي
لإن ده تاريخ في النهاية فـ مش هينفع اخبي عليكم حاجة 

كان فيه جيش تالت بقيادة القائد هيدياكي في الحرب دي
قاعد متمركز على جبل مطل على مدينة سيكي جهارا بيتفرج على الجيشين تحت

والحقيقة هيدياكي كان قاعد فوق لسبب

وهو انه كان متفق مع لياسو قائد الجيش الشرقي
انه هينزل في توقيت متفق عليه يحارب معاه ضد ميتوسناري
عشان يكسبوا الحرب

بس اللي لياسو ما يعرفوش
ان هيدياكي كان متفق في السر مع ميتوسناري
انه هيحارب معاه ضد لياسو

طبعًا انت اتلخبطت من الأسامي
هديك فرصة ترجع تقرأ تاني عشان تفهم مين مع مين

خلاص؟
حلو يلا بينا نكمل

الحرب ابتدت

والقتل والطحن وصل لأقصى مرحلة من العنف
تتخطى خيال اي محارب كان واقف في ساحة المعركة ساعتها

بس هيدياكي فضل واقف فوق بيتفرج ما بيعملش حاجة

لياسو ابتدى يحس ان الحرب بتروح منه
فـ ابتدى يبعت في رسل لهيدياكي عشان يبتدي يحرك الجنود من فوق
وينضم الى ساحة المعركة بجانبه عشان يقلبوا الدفة في صالحهم

بس هيدياكي فضل زي ما هو بدون حركة
وبالتالي جنوده فضلوا واقفين هما كمان في انتظار اوامره

لياسوا بعت رسل تاني فوق عشان يحركوا هيدياكي
بس برضه مفيش فايدة
هيدياكي ما بيتحركش
مش عارف يعمل ايه
مش قادر ياخد قرار

وهنا بس قرر لياسوا ياخد خطوة في منتهى الجنون

امر كل جنود المدفعية
بـ انهم يعيدوا توجيه المدافع كلها
في اتجاه هيدياكي وجيشه فوق الجبل
واداهم الإشارة بالضرب

ومرة واحدة كده لقى هيدياكي نفسه بيتضرب عليه نار ومدفعية
من اكتر من ١٠،٠٠٠ جندي في جيش لياسو

ومرة واحدة كده لقى هيدياكي جيشه عمال يقع جنبه
تحت الجحيم اللي اتفتح عليه مرة واحدة كده
بدون اي مقدمات

وساعتها بس هيدياكي فاق وأمر جيشه بالنزول والانضمام لجيش لياسو
وفعلًا التحم الجيشين ضد جيش ميتوسناري
وقدروا يكسبوا الحرب
ووقعوا اكتر من ٦٠ الف جندي من جيش ميتوسناري

وكسب لياسو الحرب
وبقى هو خلاص الحاكم الرسمي لكل جزر اليابان

كل ده عشان لياسو عمل اللي محدش فكر فيه

انه ضرب نار على حليفه في وسط المعركة
عشان يفوقه من الشلل في التفكير اللي حصله
ويزقه ياخد القرار

بس زي ما انتم عارفين
انا مش هسيب القصة لحد هنا الحقيقة
لإن القصة دي فيها درس في منتهى الروعة 

فـ تعالوا كده نفصص اللي حصل ده واحدة واحدة

لياسوا لما شاف هيدياكي مشلول مش عارف ياخد قرار
هو فكر ان هيدياكي دلوقتي بيفكر في اختيارات متعددة

هيدياكي كان عنده العديد من الاختيارات الحقيقة

زي انه يفضل واقف زي ماهو لحد ما الحرب تخلص
او انه يرجع في اتفاقه وينضم لميتو سناري
او انه ينفذ اتفاقه وينضم لـ لياسو
او انه يفضل واقف يشوف الحرب ماشية في انهي ناحية ويقرر

لياسوا بقى تحت شايف ايه يا ترى؟

شايف ان لو هيدياكي ما نزلش حالًا وقف معاه، فـ هو هيخسر الحرب
وبناءً على ذلك فـ هو كده كده خسران
وبما انه ما بقاش عنده حاجة يخسرها
قرر انه يضرب جيش هيدياكي نفسه

وكإنه بيقول لهيدياكي حتى لو انا خسرت
فـ انا هدمرك معايا يا هيدياكي قبل ما اخسر الحرب كده كده

وبكده لياسوا دمر كل الإختيارات اللي بقت موجودة في دماغ هيدياكي
وزرعله اختيارين اتنين بس ياخد قرار ما بينهم

يا انضم لجيش لياسو
يا افضل زي ما انا واخسر الجيش بتاعي كله واحتمال اموت كمان

وطبعًا الاختيار التاني ده مش اختيار اصلًا

وعشان كده هيدياكي تم إجباره بالطريقة على اول اختيار من قبل لياسو

واهو ده بقى اسمه فن هندسة الاختيار

وعشان تفهم انا لسه عايز اقول ايه
اسمحلي احكيلك قصة تانية
بس دي قصة حصلت معايا بشكل شخصي في شغلي

واحد من العملاء الكبار جدًا في جنوب افريقيا
ولعوامل كتير احنا السبب فيها
ابتدى يتعامل معانا بشكل احنا مطالبين فيه بتنفيذ طلبات خارج سياق الاتفاق المبرم ما بيننا

والموضوع وصل لمرحلة نقدر نقول عليها بقت شبه خارج نطاق السيطرة
ولحسن او لسوء حظي، انا اللي كنت مطالب بالتدخل فيها ووقف الموضوع ده عند حده

بعد مراجعتي لواحدة من الحالات اللي حصل فيها الموضوع ده

اكتشفت ان العميل نفسه بيقارن الحاجات اللي تم تسليمها من قبل الفريق
على الرغم من انه سلمها وهي حاجات غير متفق عليها

بنفس الحاجات اللي العميل ذات نفسه طلب من الفريق الخاص بيه في شركته بتسليمها برضه
وابتدى الموضوع يدخل في مقارنة ان الفريق بتاعي عمل الحاجة احسن من الفريق بتاعكم

ودي طبعًا دوامة سهل جدًا ان الواحد ينجذب اليها
ويقع فيها وما يخرجش

فـ انا بالنسبالي كان قدامي حل من اتنين
يا نستخدم الحاجة اللي فريق العميل نفذها كمصدر الفريق الخاص بالشركة عندي
يبني عليه الحاجة ويعدل بناءً عليها
يا احط دايركشن جديد تمامًا يبقى احسن من اللي قدمه فريقي وفريق الشركة

تفتكر انا اختارت انهي حل؟

في الحقيقة الإجابة خاطئة عزيزي وعزيزتي
انا اخترت حل تالت خالص

وهو اني روحت دورت على شكل الطلب اللي طلبه العميل في المقام الأول
من بدري خالص كان عامل ازاي
وقيمت اللي تم تسليمه بناءً عليه

واكتشفت مجموعة من الأخطاء اللي ممكن تتصلح وما تاخدش وقت عادي
وطلبت من الفريق يشتغل عليها ويسلمها
وطلبت ان الحاجة تتبعت للعميل بعد التعديل ويتحط معاها البريف اللي هو كان طالبه من الأول

عارف النتيجة كانت ايه؟

لأ.. العميل ما اخدش الحاجة بتاعتنا الحقيقة

العميل شكرنا وقالنا انه هيستخدم الحاجة اللي الفريق بتاعه عملها

وده اللي كان مطلوب تحقيقه الحقيقة

بالنسبالي انا
لو كان العميل اختار الحاجة اللي فريق الشركة عملها
ف احنا كده تمام الحقيقة

دي حاجة اصلًا مكنش متفق عليها، وسلمناها بناءً على اللي مطلوب

بس لو العميل اختار في النهاية الحاجة اللي فريقه عملها
فـ ده بالنسبالي ممتاز جدًا

لإن اولًا ده مش هيتكرر تاني
وثانيًا لو اتكرر، الفريق كله بقى عنده سابق تجربة ازاي يتعامل مع الموضوع ده بحرص شديد
عشان ما يتمش استثمار وقت ومجهود ومصارد في حاجة غير متفق عليها
من وجهة نظر بيزنس بيشتغل مع بيزنس

وهو ده الدرس في ايميل انهاردة

ان من الذكاء الشديد في مواقف كتير في الشغل
انك تطرح سؤال
اجابته الممكنة الوحيدة، هي نتيجة انت عايزها

وهو ده فن هندسة الاختيار
انك ما تقدمش ٦٠ الف حل لمشكلة
انك ما تخليش اللي قدامك يحس ان دماغك اوبن بوفيه
يدخل وقت ما هو عايز يطلب اللي نفسه فيه

حاول دايمًا تزنق الحل في شكل اختيارين
اختيار منهم هو المفضل ليك جدًا

لمع الاختيار ده بذكاء
اظهر تكلفة عدم اختياره هتبقى عاملة ازاي

واتفرج وشوف رد الفعل هيبقي عامل ازاي
زي ما شوفت كده لياسو عمل ايه في هيدياكي

ولو عايز تعرف اكتر عن حرب سيكي جهارا
:انصحك تشوف الفيلم ده

وبس كده

خلص ايميل انهاردة

بس طبعًا انا عارف نظرًا ان ايميل امبارح عمل قلق
فـ كله عايز يعرف ايميل انهاردة هيبقى فيه حاجة
لها علاقة بخصم على التراك الخاص بيا كوبي دوز ولا لأ

في الحقيقة وفي واقع الأمر
فيه اه خصم انهاردة كمان

بس مش زي امبارح

لو انت بتقرأ السطر ده دلوقتي
فـ عندك فرصة انت و٥ زمايلك تشتركوا في كوبي دوز ان شاء الله

بخصم ٪ ٥٠

يعني الاشتراك هيبقى بـ ٧٥٠٠ بدل ١٥ الف
والخصم ده هيخلص سواء حد اخده او ما اخدوش

 😄 كمان ٣ ساعات بالظبط

يعني الساعة ١٢ ونص صباحًا الموافق يوم ٣ مارس ان شاء الله

فـ لو ناوي تشترك، اكتب بوست، اعملي منشن
عشان الحق اشوفه وابعتلك تاخد الخصم بتاعك

 ❤️ والى اللقاء في ايميل جديد ان شاء الله