طب ما تجرب يا اخي؟

،عزيزي وعزيزتي

اعذروني في علامة التعجب في عنوان الايميل
اندمجت شوية بس معلش

اسمحوا لي بدون مقدمات كتير المرة دي
ادخل في الموضوع على طول
لإني محتاج اتكلم شوية تحت اكتر ما هتكلم فوق الحقيقة

…المهم

سمعتوا قبل كده عن واحد اسمه بلايز باسكال؟

ده راجل فيلسوف وعالم رياضات، وكمان فيزيائي
كان عايش على كوكبنا من بتاع ٤٠٠ سنة كده ولا حاجة تقريبًا 

الراجل ده فيه رهان كامل معمول بـ اسمه
اسمه رهان باسكال

وهو عبارة عن حجة مبنية على نظرية الاحتمالات النسبية
استخدمها عشان يقنع اللي قدامه
بضرورة الإيمان بوجود الله سبحانه وتعالى

وعشان تفهم الحجة دي، محتاجين نفصصها واحدة واحدة كده

بس هحاول اشرحها بشكل سهل عشان الدنيا ما تتكلكعش وانت بتقرأ
الموضوع بسيط خالص الحقيقة 

باسكال قال لو انت ملحد، اذًا بكل وضوع انت غير مؤمن بربنا
وده ممكن يقودك الى نتيجتين 

النتيجة الأولى انك صح، ربنا مش موجود (استغفر الله العظيم)
وبعد الموت مفيش حاجة خلاص كده بح

النتيجة التانية انك غلط، ربنا فعلًا موجود
وبعد الموت وكشخص ملحد ف انت هتقضي حياتك الأبدية في الجحيم

بس باسكال كمل وقال
تعالى بقى على النقيض الأخر نفترض انك مؤمن
ده برضه ممكن يقودك الى نتيجتين

النتيجة الأولى انك غلط، ربنا مش موجود (استغفر الله العظيم)
وبعد الموت مفيش حاجة خلاص كده برضه بح

النتيجة التانية انك صح، ربنا فعلًا موجود
وبعد الموت وكشخص مؤمن ف انت هتقضي حياتك الأبدية في الجنة والنعيم

..اذًا

النتيجة النهائية بالنسبة لباسكال ان لو ربنا مش موجود (استغفر الله العظيم)
فـ ده مش هيعمل اي فرق في حياتنا كده كده
وبعد الموت خلاص مش فارقة

بس في حالة بقى ان ربنا موجود
اذًا من الذكاء انك تختار انك تؤمن بوجوده

لأن الملحد في الحالتين كده كده في النهاية خسران عادي
بس المؤمن عنده على الأقل نسبة ٥٠٪ انه يكسب

فـ بـ ايمانك في النهاية
انت بقى عندك كل حاجة ممكن تكسبها ومعندكش حاجة تخسرها

وبس كده يا سيدي
دي الحجة اللي بناها باسكال في الموضوع ده باستخدام نظرية الاحتمالات النسبية

خلينا بقى ناخد الحجة دي ونطبقها على حاجة تانية

الحجة دي بنفس نظرية الاحتمالات تنطبق على قطاع كبير جدًا من الناس حوالينا
وبشكل أخص، الناس اللي بتشتغل في الصناعة بتاعتنا الحقيقة

وبشكل أكثر دقة على الناس اللي بتقول ان عندها موهبة وصنعة حلوة وقوية
وعلى الناس برضه اللي ما بتقولش حاجة وكافية خيرها شرها وقاعدة بتشتغل

وعشان نخلي الموضوع اكثر شخصنة
تعالوا نتخيل ان عندنا شخص بيقول انه موهوب وصنايعي
وشخص تاني بيقول انه فرهود وفراك

واسمحولي انا البس روب باسكال وأسرق منه رهانه
واسميه رهان عشري
والرهان حرام انا عارف، بس ده استخدام عشان نمشي الأحداث، ف زق السطور معايا
وخلوني بقى اكلم الاتنين دول على المسرح، وانتم قاعدين بتتفرجوا

لو انت شخص مقتنع انك موهوب وصنايعي جامد

واختارت انك تعتمد على دول، قصاد اعتمادك على الفرك والفرهدة والتجربة
احب اقولك ان في نتيجتين ممكن توصل اليهم

النتيجة الأولى انت صح، انت فعلًا موهوب وجامد
بس رضاك واقتناعك بده هيخليك كسول
وكسلك هيحد من سقف النجاح اللي ممكن توصل اليه

النتيجة التانية انك غلط، انت مش موهوب ولا حاجة
ومفيش اي شغل جاد انت عملته تقدر تسند عليه هذا الإدعاء الحقيقة

والنتيجة النهائية هتبقى صعبة اوي عليك

بس لو انت شخص شايف نفسك فرهود وفراك

احب اقولك انت فيه نتيجتين ممكن توصل اليهم

النتيجة الأولى انت صح، انت فعلًا مش موهوب بالفطرة
بس شغلك وتعبك ومحاولاتك المستمرة هتقودك الي نجاح كبير جدًا
مكنش يخطر في بالك

ولا كان ممكن توصله الحقيقة من غير فركك ده

النتيجة التانية انك غلط، انت طلعت موهوب على فكرة وانت مش واخد بالك
بس عادي تعامل انك ما تعرفش انك كده، وكمل في اللي انت بتعمله
غالبًا هتوصل لضعف النجاح بالطريقة دي ان شاء الله

…اذًا

اصيع رهان ممكن نعمله في الحالة دي انك تصدق انك مش موهوب عادي
وتعامل في شغلك وكاريرك وصنعتك بإعتمادك على الفرك والفرهدة والتجارب الكتير جدًا

في الحالة دي هتكسب في نتيجة من الإتنين
بالإضافة إلى احتمال مش قليل خالص انك تكسب في النتيجتين برضه

فـ لا مانع وعلى سبيل التجربة
انك تعيد التفكير في الاحتمالات دي
وتجرب

ايه اللي هيحصل؟
انت غرمان حاجة؟
انت عندك حاجة تخسرها؟

انا اظن لأ

وبس كده

قبل ما اختم كنت حابب اقول
اني امبارح كنت مدي فرصة لـ ٥ اشخاص يدخلوا التراك بتاع

 كوبي دوز بخصم ٥٠٪ على سعره
بسعر ٧٥٠٠  بدل ١٥ ألف

والحقيقة فيه ٤ اخدوا الخصم ده
 😄 بس فيه ٤٠ واحد باعتنلي عايزين ياخدوا الخصم ده برضه

وانا الحقيقة نفسي ما ازعلش حد
بس الموضوع ابتدى يخرج عن نطاق سيطرتي الحقيقة
بس ومع ذلك ولإضافة القليل من التحدي في الموضوع ده

فـ فيه شخص واحد ممكن ياخد الخصم ده

مين  الشخص ده يا ترى؟

الشخص اللي هياخد او هتاخد فكرة ايميل النهاردة
ويعالجوها بشكل جديد ومختلف وينزلوه عندهم ويعملولي منشن
قبل الساعة ١٢ ونص صباح يوم الثلاثاء ان شاء الله

واكتر بوست هيعجبني وهيفاجئني معالجته
الهدية دي هتبقى من نصيبه أو نصيبها ان شاء الله
ده طبعًا لو هو فعلًا ناوي يشترك في التراك من بدري 

اكتفي بهذا القدر
 ❤️ والى اللقاء في ايميل جديد ان شاء الله