عزيزي وعزيزتي،

اهلًا وسهلًا بيكم في ايديشن جديدة من النيوزليتر مختلفة من نوعها شوية

لإن الحقيقة، مش انا اللي كاتبها المرة دي

وانما اللي كتبها هو واحد من اصدقائي الاعزاء وهو سعيد الحكيم

سعيد بيشتغل في مجال الـ Product Management بقاله ١٢ سنة تقريبًا

وكان واحد من المؤسسين لـ Bot Me Startup، واللي كانت يعتبر اول Official Partner لفيسبوك في الشرق الأوسط

والكارير بتاعه في الـ Product الحقيقة كان مليان محطات في شركات ناشئة مختلفة زي تاجر، وباي باس

وحاليًا هو Senior Product Lead في شركة سليندر

على مدار الفترة اللي فاتت كان فيه زي ما بنقول كده زن مستمر من قبلي على سعيد

في انه يطلع ويتكلم ويشارك التجارب بتاعته بشكل علني كده للجميع

لإن الحقيقة التجربة بتاعته مليئة بالـ Insights اللي ممكن تفيد اي حد مهتم بمجال الـ Product بشكل عام

سواء بقى على مستوى الـ Management او على مستوى الـ Marketing كمان

والحمد لله، الزن طلع له فايدة في النهاية

فـ مش حابب اطول عليكم اكتر من كده

واترك قلمي عند هذا السطر

واسيب القلم لسعيد

قراءة مثمرة ومفيدة ان شاء الله

متبيعش لعميلك الربابة

فاكر الراجل بتاع الربابة لما كان بيعدي تحت البيت و يفضل يعزف مقطوعات بمنتهى السهولة تأهله يكون ف الاوركسترا الماسية؟ طب فاكرلما كنت بتتحمس و بمنتهى التسرع "كعادة اي طفل مصري يعني" و تروح تناوله الجنيه اللي حيلتك علشان تشتري واحدة, و طبعاً علشان انت انصح واحد ف اخواتك بتقوله انا عايز اللي انت بتعزف بيها؟ فاكر بقى ايه اللي بيحصل بعدها؟

بالظبط كدة, ولا بتعرف تعمل اي حاجة و بتفضل تعمل اصوات مزعجة لغاية ما تيجي الحجة تكسرهالك على دماغك علشان الصداع اللي عملته و انت تفضل تشتم ف الراجل و انت فاكره انه ادالك البايظة او هو بس اللي بيعرف يعزف عليها بقوة البياعين السحرية.

تخيلت معايا الموقف دة؟ اهو دة حرفيا اللي بتعمله ف عميلك او ال users بتوعك لو مشتغلتش عال Rollout و ال GTM plans قد ما بتشتغل بالظبط على ال product نفسه, بتعمل product حلو اوي علشان تعرف تستخدمه انت و السادة الزملاء فقط, و اول ما تعمل ال release بتتكسر احلامك على صخرة الحقيقة و مبتلاقيش حد عارف يستخدم ال feature او ال product بتاعتك, طب تعالى نفصص الموضوع دة سوا و نشوف ازاي ممكن تتخطى دة و توصل لل Adoption اللي بتحلم بيه,

الموضوع بيبدأ منين؟

الموضوع بيبدأ لما بتكون خلاص إتاأكدت من ال feature بتاعتك و عملت ال PRD بتاعك و حددت ايه المشكلة او الفرصة Problem or Opportunity و ال priority بتاعتها وخلاص انت جاهز تبدأ مع ال Product Designer تشتغلوا على ال User Flow وال Design بتاع ال Feature , وانت شغال على دة لازم تبدأ بكام حاجة كدة, زي ال Benchmarking و اللي بإختصار شديد بتحاول تحدد ايه الحلول المشابهة في ال Market و ازاي اتهندلت في Products تانية, بعدها هنبدأ نقول طيب انا عندي كام User Segment/Group ال Feature دي هتخدمهم و تبدي تنسق شوية User Interviews تعرف منهم هي الناس مشكلتهم ف ايه بالظبط و ايه اقرب طريقة لطبيعتهم و مستوى تعلمهم هتخلي ال Feature دي Appealing ليه "هنتكلم في موضوع ال User Interviews دة ف مقال لوحده", خلصت و عرفت مين تحديداً اللي هيكون مستهدف؟ اختار أغبى فئة او اقل فئة في المسار التعليمي لخدمتك او منتجك "دي مش شتيمة متزعلش" "زي الناس اللي مش بتعرف تستخدم موبايلات ذكية" و اعمل ٰال Product Design على اساسها, و دة علشان تبقى حاطط كل السيناريوهات اللي ال Users هيعطلوا فيها و يحسوا ان ال investemnet اللي هيعملوه بإستخدامهم مش مكافئ لل reward اللي هياخدوها منك,

طيب يعني ايه ال Adoption / التبني؟

خلصنا المرحلة دي و قربنا على ال Release, محتاجين نسأل نفسنا سؤال مهم اوي, هو ايه تعريف ال Feature Adoption بالنسبالك لل feature دي, بمعنى هو امتى هقول ان الUser استخدم و Adopted او اتبنى و استخدم و استفاد من ال Feature؟ , هل لما بيدخل على ال screen اللي فيها ال feature؟ ولا هل لما بيستخدمها مرة ؟ ولا بقى لما بيوصل لعدد استخدام معين او تحقيق هدف معين زي انه يعمل اوردر بإستخدام المساعد الذكي مثلا؟

و خليني اديلك مثال عملي مثلا , دلوقتي انا عملت سوفتوير بيساعد الناس تعمل شات بوت يرد على عملائهم, ساعة ما نزلناه عملت غلطة كبيرة الا و هي اني اعتبرت ال Adoption في الفترة دي هو عدد الناس اللي هتسجل في النسخة التجريبية بمعنى ان ال Adoption metric بالنسبالي كان عدد الناس اللي سجلت حسابات, وبالفعل لقينا ناس كتير جداً سجلت و فرحنا و طلبنا اوردر بيتزا نحتفل كأي ستارت اب, لكن بعد كدة لقينا ناس قليلة جداً من اللي سجلوا هما اللي بالفعل عملوا شات بوت, و هنا اتلغبطنا و قولنا هل نفرح ان عندنا ناس كتير سجلت ولا نزعل علشان محدش منهم استخدم الخدمة بقى؟, و اكتشفنا بعدها طبعا ان الناس مكانتش عارفة تستخدم المنصة و اضطرينا نعدل في تجربة المستخدم و نساعد العملاء و اعتبرنا ان نجاحنا من اللحظة دي هنقيسه بعدد الشات بوت اللي شغالة بالفعل على صفحات,

السؤال دة هيقصر عليك المشوار بشكل كبير و دة لأنه هيخليك عارف ايه الخطوات او ال Funnel اللي ال User محتاج يخلصها علشان نقول انه Adopted ال Feature وساعتها هتبقى عارف ازاي هتحسب نجاحها و الاهم انك هتبقى عارف ايه ال metrics اللي هتبص عليها و ايه اللي ال Rollout و ال GTM بيركزوا عليه علشان العملاء يعرفوها.

و ازاي طيب نحدد ال Adoption metric؟

علشان نحدد ال Adoption metric هنحتاج نعمله ب اربع خطوات مهمين هشرحهملك بإختصار لغاية ما نعمل مقال مخصوص للموضوع دة:

1. حدد تعريف النجاح لل feature او المنتج بتاعك, هل هو التفاعل بمعنى ان الناس تعمل خطوات معينة او تقضي وقت معين في ال product ولا مرات الاستخدام "frequency of use" بمعنى ان الناس بترجع تستخدم المنتج كام مرة او بيكرروا استخدامه كل قد ايه ولا هو Conversion معين زي ان الناس تشترك ف الخدمة المدفوعة او تشتري حاجة معين ؟
2. ايه هي الخطوات المهمة او ال Key actions؟, هل زي المثال اللي قولته لما العميل يعمل شات بوت ولا لما يوصله بصفحة ولا لما يدعي حد من افراد التيم لل software؟
3. تقسيم ال adoption لمراحل, بمعنى انك تبدأ تشوف هو كام واحد مثلا دخل على الويب سايت, طيب كام منهم عمل حساب و كام منهم بدأ فعلا يستخدم و بعدها مين بقى اللي عمل شات بوت و هكذا
4. اختار ال metrics او ال events اللي هتخليك تشوف كل دة بقى, بمعنى انك تبقى محدد metric معين لكل مرحلة علشان منه تدخل على المرحلة اللي بعدها و تبقى متأكد انك بتحقق فعلا مش مجرد فرضيات

خلصنا ال Adoption, ندخل بقى على ال Rollout نفسه.

طب ايه هي ال Rollout و ال GTM Plans؟

"A successful product rollout requires both marketing and product management to be in lockstep, ensuring that the messaging and the product experience align perfectly."

دي مقولة لDan Olsen في كتابه The Lean Product Playbook و المقولة دي بتلخص الموضوع جدا, بإختصار لازم ال Product Manager و ال Marketing يكونوا هما الاتنين شغالين جنب بعض علشان يطلعوا ال Feature او ال Product و خلينا نقسم الموضوع لجزئين, الجزء التشغيلي لل Feature و الجزء ال الدعائي ليها,

الجزء التشغيلي "نوعاً ما" الا و هو ال Rollout:

و هنا بتشتغل على انه هو ال feature دي هتطلع ازاي و لمين و صلاحياتهم قد ايه و ايه ال policies اللي مترتبة على دة؟

و طبعا دة ممكن يكون بأكتر من شكل, زي مثلا هل دة هيكون Controlled او Focused Rollout, بمعنى انه هيكون مش لكل ال Users و هيكون ل Segment/User Group محددة ب functionality محددة مش كل حاجة في ال Feature ولا لأ هيكون مفتوح عموما لل Users,

و هنا فيه حاجتين كمان محتاجين نشتغل عليهم " هتفيدك اوي لو شغال على حاجة فيها Operations" الحاجتين دول هما ال SOPs و ال SLAs و دول علشان متتلخبطش ف هما القوانين او ال manual اللي التيم عندك و المستخدم هيشتغلوا بيهم و هيدخل ال user على ال product و هيتعاملوا معاهم على اساسهم و خليني اديلك كام مثال على الاتنين من واقع حاجات اشتغلت عليها قبل كدة

خلينا نقول اني عملت سيستم للأطباء علشان يقدروا يسجلوا عليه حالات المرضى مثلا ف علشان الطبيب يكون جاهز انه يبدأ يستخدمها ف هو محتاج يكون مدخل بيانات العملاء و محتاج يكون حاطط لوجو و عنوان و امضاء العيادة بتاعته ف المريض هيجيله هيحتاج يكون فيه تابلت جاهز عليه السيستم و يكون مشحون وهكذا "دة مثال يعني", دة كدة ال SOP او بالعربي Standard operating procedure المعايير الخاصة بالتشغيل

طيب خلينا نقول بقى ان الدكتور دة هيطلب موافقات و الموافقات دي هي اللي هتتيح الادوية للمرضى و هنا الدكاترة محتاجين رد من ادارة بس محتاجينه يكون ف ٣ ساعات بحد اقصى و يكون موضح فيه اعداد الادوية لكل مريض, هنا بقى احنا بنتكلم على SLAs, او service level agreements او مستوى الخدمة المتفق عليه,

قد تسأل نفسك سؤال و تقول وانا مالي يبن عمي بالحاجات دي؟, هقولك عندك حق انت ف الطبيعي ممكن تشوف انك مالكش دعوة و ممكن مش انت بشكل محدد اللي تكون بتعملها على فكرة, لكن واجبك ان الحاجات دي تكون ف ال checklist بتاعتك قبل ال feature ما تطلع علشان تبقى عارف و متحكم في ظروف تشغيلها و دة اللي بيضمنلك الاجابة على اهم سؤال و هو ان هل ال منتج او ال feature دي مهمين فعلا و استخدامهم سهل و ممكن ولا لأ,

و ايه التعليم نفسه بقى؟

عايز اقولك ان كل دة مالوش اي لزوم من غير ما تكون في الاول وانت بتصمم الfeature او ال product تكون عامل حسابك ف الطريقة اللي هتعلمهم بيها استخدام المنتج او ال feature , هل هتعملهم Tooltips علشان يدوسوا عليها ف يطلعمهم شرح مختصر لكل حاجة في ال feature ولا هتعملهم journey او مسار ياخدمهم ف اول دخول ليهم يقولهم كل حاجة هيعملوها ازاي, ولا هتحتاج تعمل Documentation لكل حاجة ف المنتج بحيث يكون سهل الوصول لكل حاجة؟ بس من غير الحاجات اللي فوق دي مكنتش هتوصل انك متحكم في الاسئلة دي و دة لأنها مجرد بتدله على طريقة الاستخدام و لكنها مش الاستخدام نفسه و دة يخليها مهمة جدا في حد ذاتها

هتقولي طيب انت متكلمتش عن ال GTM نفسها بقى؟

هقولك مبدئياً لاي يفكر في حاجة ناجحة في السوق لازم يبقى عنده GTM plan او خطة للوصول للأسواق، وده بيشمل:

1. فهم السوق والمنافسين: لازم تعرف مين منافسينك وايه مزاياهم وعيوبهم.
2. تحديد الجمهور المستهدف: مين بالظبط اللي هيستفيد من منتجك؟
3. وضع استراتيجية التسعير: هتبيع بكام وليه؟
4. اختيار قنوات التوزيع: هتوصل لعملائك ازاي؟
5. تخطيط الحملات الترويجية: ازاي هتعرف الناس بمنتجك؟
6. تحديد مؤشرات النجاح: ايه اللي هيخليك تقول ان خطتك نجحت؟

الخطة دي بتساعدك تفكر في كل جوانب طرح منتجك في السوق، مش بس في المنتج نفسه.

نصيحة اخيرة

افتكر دايماً ان نجاح منتجك مش بس في جودته، لكن في قدرة الناس على فهمه واستخدامه والاستفادة منه. خد وقتك في التخطيط للـ Rollout و GTM، وشوف الأمور من منظور العميل. كده هتضمن ان منتجك مش هيبقى زي الربابة اللي اشتريناها واحنا صغيرين ومعرفناش نستخدمها!