Veni, Vidi, Vici

،عزيزي وعزيزتي

عاملين ايه؟

اسمحولي في بداية ايميل النهاردة

اوضح حاجة بسيطة 

وهو اني لا جيت مكان

ولا شوفت حاجة

ولا انتصرت على حد الحقيقة

وانما عنوان انهاردة هو اقتباس باللغة اللاتينية 

لواحد من الشخصيات المشهورة جدًا تاريخيًا 

وهو يوليوس قيصر

ولأ مش ده اللي معمول على اسمه سلطة السيزر

السلطة دي معمولة على اسم شيف ايطالي وهو سيزر كارديني 

فـ قطعة تركيز كده بالله عليكم

وطالمًا انا جبت سيرة يوليوس قيصر

فـ اكيد فيه حدوتة ما عايز اشاركها معاكم بخصوصه

فـ تعالوا بينا ندخل في قصة ايميل النهاردة

يوليوس وهو عنده ييجي ٢٣ سنة كده تقريبًا

كان لسه شاب بياخد خطواته الأولى على السلم السياسي

وواحدة من الميزات التنافسية الغير عادلة اللي كانت عنده في الوقت ده

هي انه كان واثق في نفسه بشكل كبير جدًا

بالإضافة الى انه كان شاب في غاية الذكاء والحنكة الحقيقة

المهم

في طلعة من طلعات يوليوس البحرية في بحر ايجه تحديدًا

وده خليج صغير كده ما بين أوروبا وآسيا

طلع مجموعة من قراصنة صقلية على سفينة يوليوس 

واخدوا السفينة واخدوا يوليوس نفسه رهينة

وطلبوا منه فدية حوالي ٦٢٠ كيلو من الفضة

يعني بتاع ٦٥٠ ألف دولار كده بأسعار دلوقتي

ايه الهبل ده؟

لأ ده مش انا اللي بسأل

ده يوليوس هو اللي سأل القراصنة وقالهم كده

قالهم يعني ايه ٦٢٠ كيلو من الفضة

انا ما اسمحش أن فديتي اللي تدفع من دولتي تبقى ٦٢٠ كيلو فضة

انا مش هسمح بالرخص ده ابدًا

وهنا الحقيقة القراصنة جالهم ترابنتينة في دماغهم

او بمعنى اخر حسوا انهم مش فاهمين حاجة ومتلخبطين كده من الصدمة

بس يوليوس ما سابهمش كده كتير وقالهم

انا اقل واجب يتطلب فيا كفدية هو ١٥٠٠ كيلو فضة 

يعني بتاع مليون دولار ونص كده دلوقتي

والقراصنة الحقيقة مكانوش فاهمين هو الراجل ده عبيط ولا ايه

يعني الرهينة بيحاول يخرج نفسه من موقف زي ده بإنه يتفاوض

ويخرج بأقل سعر ممكن يتوافق عليه يعني

بس في نفس الوقت قالوا لنفسهم خلاص يعني هنعمل ايه

ضعف الفدية مصلحة لينا برضه في الأخر

فـ وافقوا على الكمية وتم الاتفاق

القراصنة سابوا رجالة يوليوس قيصر يرجعوا لروما

عشان ينشروا الخبر ويحاولوا يلموا المبلغ المطلوب

وطبعًا الخبر ده عمل قلبان في روما الحقيقة

مش عشان يوليوس قيصر كانت حتة تقيلة اوي اوي في البلد ساعتها لأ الحقيقة

خليك فاكر اني قولتلك ان ده حصل وهو كان لسه بياخد خطواته الأولى على السلم السياسي

بس حجم الفدية المطلوبة خلى اسم يوليوس على كل لسان في روما

لأن مفيش حد اتخطف واتطلب فيه فدية بالحجم ده قبل كده خالص

اكيد الولد ده فيه حاجة خطيرة عنده خلته يتخطف اولًا

ويتطلب فيها فدية بالحجم ده ثانيًا

وصدق او لا تصدق

حادثة الاختطاف دي

هي اللي غيرت تاريخ يوليوس قيصر بالكامل بعد كده

بس قبل ما اكملك القصة

اسمحلي نقف دقيقتين كده نستوعب حاجة مهمة جدًا حصلت في القصة دي

شايف الراجل ده؟

لا ده مش يوليوس قيصر، اصحى معايا كده

الراجل ده اسمه ثورسيتين ڤيبلين 

جه بعد يوليوس قيصر بـ ييجي حوالي ٢٠٠٠ سنة تقريبًا 

هذا الرجل اخترع حاجة اسمها تأثير ڤيبلين 

وده مصطلح الحقيقة في غاية الأهمية لو انت شخص مهتم بكل ما له علاقة

بإستراتيجيات العلامات التجارية

ايه بقى تأثير ڤيبلين ده؟

تأثير ڤيبلين ببساطة هو لما المستهلك 

يقوم بملاحظة المنتجات ذات التسعير العالي

بإن قيمتها عالية جدًا لإنها اكيد اتكلفت كتير

عايز مثال؟

بسيطة

عندك روليكس

كارتيير

هيرميس

رولز رويس

لويس ڤيتون

هارودز

والقائمة تطول الحقيقة

بس الأكيد في الموضوع واللي محتاجين نتفق عليه

أن ولا منتج من منتجات البراندات دي بالضرورة احسن او اكثر فعالية

من منتجات شبيهة لهم وأقل منهم في التسعير

الفكرة بس ان سعر المنتجات دي وعدم توافرها بكثرة

هو اللي مخليها مرغوب فيها بشكل خيالي

واهو ده اللي عمله يوليوس قيصر

قبل اصلًا ما يبقى فيه تأثير ڤيبلين

وقبل ما يبقى فيه براندات بنقول عليها ڤيبلين براند

يوليوس قيصر عمل من نفسه ڤيبلين براند

حط قيمة على نفسه أكبر من اتقلها شخص ممكن يكون موجود في روما ساعتها

كل ده من خلال تقييم مستقل عمله على نفسه

بس عشان الخبر انتشر من خلال سياق محدد وخطير جدًا

وهو انه مخطوف واللي خاطفينه هما اللي طالبين الفدية دي

ده خلى كل الناس تلاحظه بنفس الطريقة اللي يوليوس قيصر قيم بيها نفسه

ورجالته فعلًا قدرت تجمع الفدية

ورجعوا للجزيرة اللي القراصنة حابسينه عليها

وحرروه منها

ورجعوه لروما

بس يوليوس قيصر خطته ما وقفتش على كده

ما ينفعش رجع روما بعد كل ده وما ياخدش اكشن

خصوصًا بعد كل الشهرة اللي بقى فيها دلوقتي

وعشان كده استغل القوة والسلطة والشهرة دي

في انه يجمع جيش يلاحق بيه القراصنة دول

وفعلًا راح طاردهم ومسكهم كلهم

واخد كل الفدية اللي تحصلوا عليها

بالإضافة لكل المقتنيات اللي كانت عندهم من عمليات القرصنة اللي كانوا بيعملوها 

وقام بعديها قاتلهم واحد ورا التانى

وبقى يوليوس قيصر دلوقتي

عنده ثروة

وقوة

وسلطة

وشهرة

والكولكشن ده مع مرور الوقت وصله الى انه يبقى حاكم روما

ووسع الامبراطورية بتاعتها من اسبانيا لألمانيا 

ومن بريطانيا للشرق الأوسط

كل ده عشان يوليوس كان مؤمن بفكرة ان الواقع بيبدأ من العقل

فـ لو عايز تاخد حاجة، خد حتة في عقل اللي بتكلمه

بس عشان تاخد حتة من عقل اللي بتكلمه

محتاج تخلق انطباع في دماغه

وعشان تخلق انطباع في دماغ حد

محتاج تتحكم في سياق ما يسمحلك بخلق الانطباع ده

ف اتحكم في سياق، هتتحكم في عقل

ولما تتحكم في عقل

هتتحكم في الواقع

عايز تعرف اكتر ازاي تعمل ده في شغلك؟

في حلقة كاملة في البودكاست كنت عاملها قبل كده

بشرح فيها ازاي تخلق انطباع في دماغ جمهورك المستهدف

وبس كده

خلص ايميل انهاردة

انا عارف اني بقالي كتير ما بعتش ايميلات من اخرة مرة بعت الميكروكوبي 

بس احقاقًا للحق انا ما قولتش اني هبعت كل يوم

او قولت بس مش فاكر، ان شاء الله اكون فعلًا ما قولتش

هو ده الحقيقة بسبب اني مشغول جدًا الفترة دي

ومفيش وقت كافي للتفرغ اني ابعت بشكل يومي

ده غير اني كنت بتابع مع الناس اللي كانت عايزة تلتحق بالتراك بتاعي كوبي دوز 

فـ معلش محدش يزعل

وبمناسبة التراك والخصومات اللي كنت بوزعها هنا 

فـ فيه خصم جديد على التراك لـ ٥ اشخاص جداد

سعر الخصم هيبقى ٨٥٠٠ بدل ١٥٠٠٠ الف

لو ناوي فعلًا تلتحق بالتراك

ممكن تكتب بوست تتكلم فيه عن ايميل النهاردة

ايه اللي لفت نظرك فيه

خلاك تفكر في ايه

كده يعني

وتعملي منشن طبعًا عشان اشوفه

وبس كده الف مبروك هتلاقيني بقولك انك اخدت الخصم

ده لو لحقت تعمل كده طبعًا وكنت واحد من الـ ٥ اشخاص

اكتفي بهذا القدر

 ❤️ والى اللقاء في ايميل اخر ان شاء الله